العنوان : ضبط المعايير

 القسم: #الاجتماعي

الرقم: 80

السؤال:

 

عمري ٢٣ سنة حسا ان لو دخل حد في حياتي وشجعني حاكون نفسيا افضل من كدا بكتير .. والصدمة ان في اكتر من حد حاليا متقدملي بس في اللي بيقول لما اخوه يرجع من السفر عشان يكون معاه ودا مهما قال انه بيحبني مش مصدقاه ومش واثقة فيه ..

 

 وفي اللي جه البيت فعلا وطلبني ودا كان معايا ف الكلية بس انا نفسيا قفلت منه بسبب كذا موقف حصل منه بيقول انه من غير قصده وبيترجاني اسامحه بس انا مش عارفة اثق فيه بردو لأن غلطاته اتكررت هي هي ..

 

وفي اللي بيقول انه بيحبني وانا مصدقاه بس هو ظروفه مش مساعداه انه يتجوز قبل سنتين واتقدملي واترفض لأنه معهوش شقة ملكه بس عاوز يخطبني لحد ما يجيب الشقة ..

 

انا قلت كل دا لأني مش البنت المنبوذة اللي محدش عاوز يرتبط بيها لاء الحمد لله انا في الظاهر  ممكن اكون مناسبة لناس كتير ..بس زى ما قلتلكم قبل كدا ان حظي مش مساعدني استقر ..

  

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 اهلا بيكي

 

سؤالك لحسن الحظ مش معقد زي كتير من الاسئلة اللي بتوصل لنا , فهنحاول نلخص الرد عليه في عدد من النصايح , واللي ان شاء الله يكون ليها تاثير ايجابي في مساعدتك في اتخاذ القرار . .

 

 

• بشكل عام  , حاولي تعملي ضبط للمعايير اللي تعملي علي اساسها تقييم للشخص اللي متقدملك , انا مش عارف ايه هي المعايير اللي في ذهنك بالفعل , و ممكن تكون كلها سليمة و دقيقة  ,فاحنا هنعمل سرد سريع ليها , وانتي حطيها في بالك عشان تكون هي دي الاساس اللي تختاري علي اساسها الشخص

 

• تمسكه بالاخلاق قد ايه , يعني صادق , امين , وفي , قد كلمته

• بيخاف ربنا ولا لا  ,لانه لو بيخاف ربنا (بشكل حقيقي مش بس مظهر ) , مش هيأذيكي ابدا

• مدي المساحات المشتركة بينكم , وقد ايه انتو متفقين علي حاجات قبل ما تتجوزو

•  عنده اهتمام قد ايه بالمشاعر والجانب العاطفي منك , عشان تلاقي فيه اشباع كامل لعاطفتك كانثي , ومتحسيش انه هو بارد او غير مهتم

• هل هو انسان جاد , ونشيط و طموح ولا لا , و بيسعي لتطوير نفسه و اسرته معاه ولا كسول

• صبور ولا لا , الصبر صفة مهمة جدا لاحتواء اي مشكلة تحصل , وانه ميكونش اهوج في قراراته

• ماديا يقدر يفتح بيت بالحد المعقول ولا لا , مش شرط يكون غني بس مش يوصل بيكم لخط الفقر

• قابليته للتغيير , ومدي مرونة تفكيره , واستعداده انه يغير حاجات في نفسه لما يعرف انها مش كويسة او انها مش عاجباكي (طالما حاجات معقولة)

• انتي متقبلة شكله , هيئته , شياكته , مدي الكرم اللي عنده , اسرته

• رد فعله ايه لما بيغضب , يا تري بيزعق , يقول كلام مش مناسب , يضرب , بيهدي , يسيب البيت و يمشي . .

 

 

 

 

 

و بالفعل مهم انك تدرسيه , ومفيش مشاكل انك تقابليه مرة و اتنين و تلاتة قبل ما تتخذي قرار الخطوبة , ده قرار مصيري نتيجته هتكون لسنين طويلة  ,فمفيش مشكلة تدرسي القرار اسابيع

 

​

• النصيحة التانية متعلقة بانك متجعليش حياتك مبنية علي قرار الارتباط , وبالتالي متضغطيش علي اعصابك عشان توافقي علي اي واحد و السلام  ,اي اختيار غلط هيكون تمنه كبير , خلي قرار الارتباط "يستوي علي نار هادية" , ومتوافقيش علي حد مالم يكون بالفعل محقق عدد مقبول من الشروط اللي قلناها , و يكون عنده استعداد انه يطور نفسه في الباقي , اياكي توافقي علي حد بمجرد اعجاب قلبي من غير ما يكون عنده الحد الادني من مقومات الزواج

 

 

• استكمالا للنقطة اللي فاتت , مارسي حياتك بشكل عادي , سواء دراسة او شغل او كورسات او عمل تطوعي او دراسات عليا , متخليش الزواج هي المحطة اللي بيتبني عليها حاجات تانية , ده اسلوب غير دقيق في التخطيط

 

 

• الشاب اللي قالك انا منتظر اخويا , بالفعل مفيش حاجة تتعمل الا لما هو يتخذ قرار , وارد يكون بس بيقول كدة كنوع من التسويف , وارد يكون منتظره بالفعل , وارد اي حاجة , فانتي متتواصليش معاه و متقلليش من نفسك قدامه , وفي نفس الوقت متربطيش نفسك بيه وهو مقالش اي كلمة جادة , لو جالك حد محترم و مناسب , توكلي علي الله و وافقي , لو هو بعد فترة قالك ان اخوه وصل و عايزين ييجو البيت , يبقي اهلا و سهلا

 

 

• الشاب التاني اللي عمل الموقف السخيف ده , فعلا مش شايفين اي تفسير منطقي للي عمله , الا انها حركة عيال صغيرين , او ان فيه نوع من كراهية الخير للناس , فبالفعل اقطعي معاه التواصل , والحمد لله انه عمل الموقف ده قبل اي ارتباط , عشان يبان مدي تفكيره و اسلوب تعامله

 

 

• بالنسبة لموضوع الشقة التمليك , لا شك هي اكتر أمان و استقرار عن الايجار , بس نصيحة واحد احتك بعدد كبير من مشاكل المجتمع , والمشاكل الأسرية , اختاري شخص محترم جاد بيحبك , هتلاقي البيت معاه جنة , و مش هيغلب انه هيتصرف لو الايجار خلص و عايزين شقة تانية , فنقطة الشقة التمليك ايوة مهمة , بس فيه اهم منها فعلا , ونفس الموضوع في تكاليف الزواج , الشبكة , النيش , الفرح يتكلف كام , وهكذا

 

 

ربنا يوفقك و يشرح صدرك دايما يا رب