العنوان : الثروة المفقودة

القسم: #النفسي

الرقم: 12

السؤال:

 

طيب انا عندي مشكلة ومحتاج حل ليها

مبعرفش انظم وقتي واستفيد منه اقصى استفادة

ومبعرفش امشي ع جدول زمني مهما كان نظامه ايه

ودا طبعا بيخليني مبوفيش بوعودي في اوقات كتير وبتأخر ع اي معاد بروحه

في حل للكارثة دي

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

طبعا فيه حل . .

 

شوف يا سيدي . .

 

صحيفة لوموند الفرنسية , عملت من سنين مقالة ,بيقولو فيها , يا تري لو هتاخد يوميا 1440 يورو , ولازم تصرفهم وممنوع تحوش منهم اي حاجة  , هتعمل بيهم ايه . .

 

كاتب المقال قال , ان مش هتعرف تشتري بيهم حاجة غالية (عقار , عربية) , ولا هتضيعها في حاجات هايفة (اكل و شرب) .  .

 

فالفكرة المثالية هي الاقساط . .

 

يعني تشتري حاجة غالية جدا , مثلا فيللا بمليون يورو  , وتتفق مع صاحب الملك انك هتديله يوميا 500 يورو , هتلاقي ان خلال تقريبا 6 سنين القسط هيخلص . .

 

وبعدها كاتب المقال قال حاجة جميلة . .

 

انت معاك يوميا 1440 دقيقة , وكل دقيقة هي اغلي من اليورو , شوف انت بتضيعها يوميا في ايه . .

 

شوف بتنام قد ايه  , قاعد علي النت كام دقيقة , علي القهاوي , حاجات هايفة , وهكذا  . .

 

بينما انت لو عملت نفس نظام القسط , هتنجز اهداف هايلة من غير ما تاخد بالك . .

 

بعدها قريت مقال لكاتب مصري بيعمل تعليق و اضافة علي الكلام ده , وبيقول ايه . .

 

 

انك لو اخترت مشروع كبير في حياتك , مثلا هتاخد ماجستير في الكلية عندك واللي هيفرق معاك اكيد في كتير من فرص العمل . .

 

لو قلنا الماجيستير ده .  محتاج الفين ساعة مذاكرة , يعني انت محتاج 120 الف دقيقة عشان تخلصه . .

 

فلو انت عملت نظام القسط , انك تفرغ مثلا 900 دقيقة اسبوعيا , بمعدل 3 ساعات يوميا , لمدة 5 ايام في الاسبوع و عندك يومين اجازة . .

 

اذن عشان تدفع المبلغ الكامل (120 الف) بقسط مقداره (900) اسبوعيا , فانت محتاج 133 اسبوع  . .

 

يعني تقريبا سنتين ونص . .

 

والغريب ان لو انت دلوقتي (2018) فكرت ان هبدأ اذاكر الماستر ده  , وهيحتاج مني سنتين ونص , يعني هخلص اول 2021 , احتمال تشعر باحباط شديد , و "يااااااه , هقعد لغاية 2021 عشان ده , ده عمر بحاله "

 

الغريب بقي انك لو رفضت الفكرة و رميتها ورا ضهرك , هتلاقي نفسك انشغلت بامور اكثر تفاهة , و أقل قيمة , و فجأة هتبص في الحيطة , هتلاقي الوالدة  بتشيل نتيجة 2020 , وبتعلق نتيجة 2021 , وبتقولك كل سنة و انت طيب , البس تقيل عشان برد يناير مش بيرحم . .

 

هتفاجئ حرفيا ان السنين جريت منك , وان "ياااااااه" كانت اكبر من حجمها , وان 2021 جريت و نطت علي حجرك باسرع مما تتخيل  . .

 

والمؤسف ,  انك لا عملت الماستر ولا امتحنت ايلتس , ولا ذاكرت فرنساوي , ولا خلصت كورس البرمجة , ولا تابعت سلسلة افلام وثائقية , ولا هاجرت استراليا , ولا حوشت فلوس عشان تتجوز بيهم , ولا شطبت الشقة ,ولا حفظت 5 اجزاء من القرآن , ولا اخدت ميدالية حتي لو حديد في الكونغ فو ,  ولا عملت اي حاجة . .   

 

و بالتالي الثروة اللي بتضيع يوميا من اغلب سكان الكوكب , افضل استغلال ليها هي نظام التقسيط , واللي بتخليك تدفع يوميا مقدار بسيط , ميأثرش علي خروجاتك و سهرك و قاريبك و الفيسبوك و صلاتك , وشغلك . .

 

وفي نفس الوقت تفاجئ لما تتعلق نتيجة 2021 , ان في ايدك شهادة قوية , هتغير حياتك بشكل كبير . .

 

---------------------------------------------------------------------------

 

كل الكلام اللي فات ده  كان عن فن تنظيم الوقت علي المدي الطويل  . . .

 

يعني ازاي تحط لنفسك هدف علي مدار سنة , او اتنين او اكتر  . .

 

و ممكن ميكونش حاجة واحدة  , يعني تعمل مجموعة متكاملة من الاهداف  , ان مثلا علي سنة 2023 , يعني خمس سنين من دلوقتي  , تكون   :

 

• خسيت و عملت شوية عضلات

• بقي معاك تحويشة 100 الف

• عرفت تهاجر كندا

• معاك ايلتس بدرجة لا تقل عن 7.5

• خلصت الماستر

• متجوز ومعاك طفل

• عملت عمرة , وحفظت 5 اجزاء من القرآن

• قريت 100 كتاب

 

ويفضل انها تكون خطة بسيطة , ومفيهاش كلاكيع كتير , عشان تتجنب اليأس او الاحباط , او الفشل في تحقيقها , خليها بسيطة و سهلة الي حد كبير . .

 

ولو فاكر صفات الهدف المناسب ,اللي بتتجمع في كلمة SMART  , يعني يكون (محدد ,قابل للقياس  , ممكن يتحقق , متعلق بيك , له اطار زمني)

 

طب و بعدين ؟ ؟

 

تحاول تعمل جدول بمجموعة من الوسائل التنفيذية , واللي هتقدر تحقق بيها الاهداف ديه بالفعل . .

 

فلو كان عندك هدف واضح "الحصول علي ماستر في القانون الدولي"

 

فيكون ليه مجموعة من الخطوات التنفيذية , زي  :

​

• البحث في افضل الجامعات لعمله

• البحث في الفروع الداخلية في التخصص ده

• ايجاد نقطة بحث محددة

• البحث عن مشرف مناسب لنقطة البحث المطلوبة

• التسجيل للاختبارات التمهيدية

• المذاكرة الجادة للنجاح بتفوق في الاختبارات

• التواصل الدائم مع المشرف , للبدء في الرسالة

• تحديد و كتابة الرسالة

• المناقشة

 

فلما يتم تفصيل كل هدف لخطوات فعلية تنفيذية , هتكون الخطوات ديه "ملموسة" , وتعرف تنفذها , بدل ما تكون كلمة واسعة جدا اسمها "عمل ماستر"

 

وبعدها تحط ده كله في جدول زمني واضح و مرن . .

 

و تبدأ تنفذها و تتابع نفسك . .

 

الكلام عن تنظيم و ادارة الوقت ,و رغما عننا اخدنا لمساحة التخطيط و الاهداف و الوسائل , واللي هي الطريقة الأكيدة للاستغلال الأمثل للوقت . .

 

---------------------------------------------------------------------------

نيجي بقي لمجموعة خطيرة  , من النصايح الغالية , واللي حاول تلتزم بيها , لأن التخطيط سهل ,و التنفيذ متعب , وإن كان فيه الف واحد بيعملو خطط هايلة , فاقل من خمسين واحد منهم اللي بيقدر ينفذ الخطة بشكل مقبول

 

 

• خلي الخطة سهلة و ميسرة , متخليش الحماس ياخدك فتكتب حاجات محتاجة سبع رجالة عشان ينفذوها , ولا حتي انك تكتب حاجة علي اساس انك هتكون متفرغ ليها , انت بتجري في ماراثون طويل لسنوات عديدة , فمحتاج تجري علي مهلك , بنفس طويل , وخلي الحاجات تستوي علي نار هادية , ومتعملش حسابك في اكتر من ساعتين تلاتة يوميا

 

 

• أول ما تقع في مطب (خلل في الجدول , زهقت في اسبوع مش عايز تنفذ , جالك سفر طارئ , عيان و في السرير , فرح الواد سيكا و لازم توجب معاه و تسافرله بورسعيد) فاياك انك تفركش الخطة و تقول هي كدة كدة خربانة , لو انت بالفعل عامل الخطة مرنة و فضفاضة , هتلاقي ان اي تقصير هيحصل , مش هيأثر كتير في الخطة  . .

 

• أكبر عدو ليك هو النت , ووسائل التواصل (فيس , واتس , يوتيوب) , ومش هقولك الغيهم , لان لازالو ليهم عدد من الفوايد , زائد ان ده هيضغط علي اعصابك فمش هتستحمل تبعد عنهم , هقولك نظم وقتك معاهم بحيث ميكونش ليهم وقت اكتر من المطلوب

 

 

• استخدم نظام التدبيس , يعني "دبّس"  و "ورّط"  نفسك  في حاجات , عشان تزقك انك تكملها , يعني انزل الجيم اشترك فيه وادفع اشتراك 6 شهور مقدم , عشان الفلوس تلسوعك لما تكسل , شوف كورس الايلتس في البريتيش كاونسل , روح الكلية قدم ورقك للماستر , اتصل بالواد عبده وقوله هقابلك كل يوم بعد العشا اراجع معاك ربع من سورة آل عمران , خلي اختك تصحيك كل يوم الساعة 5 حتي لو بضرب الجزم . .

 

 

• فن "حشر" الحاجات في وقت مناسب , ابدء يومك بالحاجات الصعبة , والمملة (مذاكرة الماستر) , بعدها حاجة لطيفة تعملك فاصل "تشوف فيلم رعب" , تدخل علي حاجة مهمة "الايلتس" , تفصل بحاجة لطيفة "قصة ميكي و بطوط" , بعدها حاجة مهمة "مراجعة آل عمران" وبالليل تروح الجيم . .

 

 

• اصنع سجن مؤقت . .

 

• اقطع علاقاتك , او علي الاقل خففها مع "لصوص الوقت" وهما مجموعة من الاصدقاء, اللي عندهم كمية مدهشة من الهيافة و التفاهة و الفراغ , و عندهم صبر وطولة بال علي تضييع اربع ساعات في لعب الطاولة علي القهوة , اللي زي دول شوفهم مرة في الشهر . .

 

•  امشي بالتوازي في اغلب خطوك حياتك , يعني متخصصش 3 شهور بس للايلتس و انت سايب الباقي ,و بعدها 5 اسابيع للجيم من غير حاجة تاني . . لان ده هيعمل خلل في باقي شئون حياتك , خلي كل حاجة بالتوازي

 

• فن انك تستغل الوقت باختيار عمل يعملك حاجتين مع بعض , يعني تجري في الجنينة (رياضة) وانت بتسمع اذاعة البي بي سي (ايلتس) , او تروح لعمتك في اسيوط (صلة رحم) وانت معاك اللاب في القطر (ماستر) . او تختار سلسلة افلام وثائقية مفيدة (ترفيه و ثقافة)

 

واخيرا . .

 

مهما قلنا من نصايح , كلها هتكون "بلا فائدة" لو اختفي عندك الدافع  , ارسم هدفك واضح , وحط صورة للدافع بتاعك في اكبر حيطة في البيت (صورة بالفوتوشوب وانت ماسك شهادة الماستر ) , عشان تبصلها كل يوم و تشحن شوية . .