العنوان : الثبات الإنفعالي

القسم: #النفسي

الرقم: 100

السؤال:

 

من فضلك عايزه يكون عندى ثبات انفعالى اقدر اوصل لده ازاى

 

جوزى دايما يهددنى  قائل ..انا بحب الستات وهتجوز تانى وتالت وهو مبيعنى دهبى ومبيهتمش بيا ولا باولاده ولا بشغله فاشل انا بقيت عصبيه جدا بسبب كل الضغوط دى وبوصل لدرجة انى انهار قدامه وبرد على غلطه بغلط 

 

ومشانى وجى يقعد معايا ومع اخواتى وباضطر انفعل عاوزه ابينله انى قويه  وعاوزه مهمى يستفزنى اكون هاديه وكمان لما بتعصب جسمى يرتجف جدا وكل اعضائى بتعب  صحتى تدهورت جدا..علشان كده حددت هدفى اتطلق وانفد باللى باقى من صحتى

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

أهلا بيكي . .

 

بداية نتمني ان قرار الطلاق يكون فعلا هو البديل الأخير عندكم , وان تكوني قطعتي خطوات بالفعل في محاولة اصلاح الأزمة بينك و بين زوجك , هو ايوة الطلاق حلال لكنه حل مؤلم , ولو فيه بدائل لإصلاح المشكلة يبقي افضل . .

 

ديه كانت جملة اعترا ضية قبل ما اسردلك عدد من الخطوات اللي لو عملتيها هتساعدك في تقوية ثباتك الإنفعالي , واللي ان شاء الله هتفيدك كتير . .

 

 

• بداية لازم تتخلصي من حاجتين اساسيتين لو كانو عندك , فهما هيعملو اعاقة كاملة لاي محاولات لحل مشكلة الثبات , ومهما تحاولي فيه فمش هتعرفي تتمسكي بيه , وهما : الاكتئاب و العصبية

•  لأن الإكتئاب بيجعلك تشعري بالحزن اضعاف المقدار الطبيعي , فمن الطبيعي انه يجعلك منهارة لدي اي تعامل مع طليقك او غيره

•  و العصبية هتعجلك مستعدة للانهيار اي وقت , العصبية بتشحن اعصاب الشخص بالمشاعر السلبية , وبالتالي يكون جاهز للانفجار فورا مع اي مشكلة

•  فخطوة علاج الاكتئاب , وعلاج العصبية هي بالفعل اول خطوة في التمسك بالثبات الانفعالي , و الظهور بمظهر الثقة و الهدوء قدام اي حد , ولو شفتي رسالة رقم 14 و 69 فهما بيتكملو عن الاكتئاب , بينما رسالة رقم 17 فهي بتتكلم عن العصبية , شوفيهم في رابط الرسائل النفسية المجمعة تحت

•  كمان انتي محتاجة تزرعي جواكي كمية كبيرة من الثقة بالنفس , تثقي بامكانياتك و قدراتك , وتكوني عارفة و متأكدة انك تقدري تتجاوزي اي منحة , وان الأمر مش صعب ولا حاجة  , لما تحطي ده في بالك و تؤمني بقدراتك هتلاقي الأمر بقي اسهل بالفعل

• كمان من الحاجات اللي تحطيها في بالك ان تعرفي ان طليقك اصلا هو حاسس بالفشل المريع في مجالات كتير , وده اللي مخليه يتعامل معاكي بحدة و زعيق و اهانة , كنوع من "إسقاط" تهمة الفشل عن نفسه , وإحساسك ان انتي اللي فاشلة , انتي بس حطي ده في بالك و هتعرفي وقتها ان انتي لو كنتي فاشلة حقيقي مكانش اهتم بتوجيه اللوم ليكي , لكن استمرار القاء الشتايم و الاتهامات

•  فلما تحطي النقطة اللي فاتت في بالك , هتعرفي ان كلامه ليكي مش عن عيوب او نقص فيكي , لكن عن مشاكل هو بيواجهها , فاسهل حاجة انه يفرغ طاقته السلبية في الشخص اللي يقدر يتحكم فيه , وهو مراته و اولاده

•  ابدئي اتدربي علي اسلوب الهدوء و البرود في الكلام و الردود بشكل عام , خلي عندك كدة بطئ في اسلوب الكلام , وفن انك تفكري في الحاجة قبل ما تردي , وانك تتكلمي بالراحة حتي لو انتي من جواكي بتغلي , التمسك بالاسلوب الهادي ده , هيخلي اللي قدامك مش عارف يستفزك , وهيصنع جواكي راحة شديدة في التعامل , غير انه هيحسسك انك انتصرتي عليه بالفعل عشان معرفش يعصبك

•  امسكي ورقة و قلم , و اعملي نوع من التحضير لكل الإجابات الممكنة للنقاط اللي عارفة انكو هتكلمو فيها , واعملي تحضير للردود المناسبة للاسئلة المتوقعة , عشان لو اتفتح نقاش معين , تكوني جاهزة بكل رد , ومتسمحيش ليه انه ياكلك بالكلام

•  لما تتكلمي معاه , خلي عينيكي مركزة في عينه بنظرة ثابتة حادة , لا تهربي بعينيكي ولا تبصي في الأرض , ركزي عينيكي في عينيه في الكلام , هتلاقي ان هو من جواه اتهز و بقي مضطرب

•  ممكن في وسط الكلام لما يقول كلام انتي عارفة انه كلام خايب , انك مترديش عليه لكن تضحكي , بس كدة , الضحك لوحده احيانا بيكون رد بليغ جدا و بيحرج الشخص اللي قدامك

•  اتدربي علي مجموعة من الجمل اللي تتقال في مواقف عامة للردود واللي بتحمل طابع ساخر زي : (يا سلام) , (ايه العبقرية ديه) , (وعرفت ده كله لوحدك ؟ ) , (احييك علي ذكاءك الشديد) , (سقفو له يا جماعة) و هكذا , الردود ديه تحرق دم اللي قدامك و تخليه هو يتعصب , خاصة لو قلتيها و سبتيه و مشيتي

•  اول ما تخلصي نقاش معاه , متسيبيش نفسك فريسة للافكار السودا , لكن اعملي حاجة انتي بتحبيها , سواء تطبخي او تشتري اكل جاهز , او تنزلي تشتري حاجة , او تتفرجي علي التليفيزيون , ومتسمحيش لعقلك انه يقعد يفكر تاني و تالت في النقاش اللي حصل 

•  استمرارك في قراءة القرآن و المواظبة علي الخشوع في الصلاة بيصنع جواكي حالة نفسية جميلة , وكمية كبيرة من الهدوء و السلام النفسي

•  اياكي تستخدمي اي وسيلة من الوسائل اللي فاتت مع حد كنوع من انك تحرقي دمه و خلاص , يعني متكونش نوع من بداية الهجوم , لكن بس استخدميها للتعامل مع الانواع الزبالة من الناس اللي ملهومش حل الا انك تردي علي الاساءة بإساءة