تذبذب المشاعر
الرسالة السابقة
العنوان : تذبذب المشاعر
القسم: #العاطفي
الرقم: 19
السؤال:
انا كان زميلي بيحبني واحنا صغيرين واتبهدل علشان يثبتلي حبه ده ويخليني احبه كمان انا معنديش اصحاب زمايلي كلهم زمايل دراسه لكن مفيش حد قريب مني
عارف يفهمني لا من زمايلي ولا من اهلي حتي بس كلمته وكان هي صاحبي الوحيد اللي بحكيله عن كل حاجه فاهمني بيديني الهتمام والاحترام والثقه ف نفسي و الامان والحنيه وكل حاجه محتجاها
هو شخص طيب جداً وجدع جداً وبيصلي ويخاف ربنا بس ف تانيه ثانوي اتقدملي واحد قريبي وانا وافقت مع اني كنت بحبه ومرتاحه مع زميلي جداً وكنت عارفه ان خطيبي ده مش هكون مرتاحه معاه زي زيملي او مش هيقدملي اللي كان بيقدمهولي زميلي المهم وافقت عشان مكنش مرتاحه ف بيت اهلي وكنت تعبانه نفسياً وده الوسيله الوحيده اني اطلع من البيت
وفعلاً اتخطبت سنه وانا اللي سببت خطيبي عشان مشكلة مبينا وبعدين تعبت اكتر لان كنت بعتقد ان بحب خطيبي
المهم كلمت زميلي وقعدت احكيله زي الاول لانه الوحيد اللي هيفهمني وبرتاح ف الكلام معاه وفضلنا نتكلم واتفقنا اننا نكمل مع بعض تاني وهو وقف جنبي لاني كنت ف الثانويه وخلصنا امتحانات وعقدنا منتكلمش لحد مالنتيجه ظهرت
كلمته اطمن عمل ايه بس كان تعبان جداً لانه ملحقش كليه من كليات القمه فضلت اهديه واقوله انه خير وربنا شايلك الاحسن وبعد كدا متكلمناش تاني وعرفت من زمايلنا انه دخل كليه خاصه وخلصنا اولي كليه واحنا مش بنتكلم غير مكالمه كل شهر مثلاً نطمن علي بعض
بس ف بدايه سنه تانيه رجعنا اتكلمنا تاني بس ف النص اتعرض لضغط جامد وكان بعيد عن ربنا وتعب نفسياً بسبب احساس بالذنب ودخل ف اكتئاب شديد تحول ف بدايات الفصام ووقف جنبه ودورت علي دكاتره نفسيه وتابعت مع دكتوره ل حالته من غير مايعرف عشان مايديقش او اجرح شعوره وكنت بعمل اي حاجه تسعده وحاولت اقربه علي قد ماقدر تاني من ربنا
وبعد كدا اتفاجئت ان حالته ساءت وبدأ عايز ياخد حقه من كل شخص اذاه وقالي اني ابعد عنه حتي لو لفترة لكن انا كنت شايفه ان لازم اقف جنبه وساعده فرفضت اني ابعد فقالي انه هياخد حقه مني الاول انه ماحبنيش ورجع عشان يردلي القلم قلمين وكدا ف قولتله خلاص انت كدا اخدت حقك فسيبني بقا ونبعد قالي لا انا كل ده كان ف نيتي بس معملتوش لانك عوضتيني لكن انا قولتلك كدا بس عشان تحسي بالوجع اللي اتوجعته ونفسيتي ترتاح وتعالي نكمل لان اللي اتبني علي اساس بايظ بيتهد وهو اتهد علينا اهو تعالي نبني تاني اساس سليم وانه لسه والله بيحبني وعايزني وانه واخدها واحده بواحده وكدا اتعادلنا ونكمل بقا وان ده مش اسلوبه اصلا مش هيكون كدا
بس انا من صدمتي مكنتش عارفه افكر تعبت اوي واني ارجعله كرامتي منعاني اصلا فقولتله لا مش هكمل لانه مقدرش اللي عاملته عشانه انا جيت علي نفسي كتير واستحملت عشان تعبه وهو مقدرش فبعدت
بس انا دلوقت تعبانه اكتر لانه بعيد فكره اصلا انه ف حياتي مطمني ومديني الامان واني لو حصلي حاجه هيلحقني ومش عارفه انساه اصلا كتير بيجيلي تفكير اني اكلمه تاني لاني تعبانه بجد بس مش عارفه هو هيكون رد فعله ايه،الصح اني ابعد ولا لا وابص لكل حاجه حلوه عملها واقدر انه لسه تعبان ؟
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
باختصار . .
هو شخص غير مناسب ليكي و انتي غير مناسبة ليه , هو لازال عنده مشكلة نفسية مستمرة , وانتي مش هتعرفي تعالجيها , ومش هتعرفي تتعايشي معاه كزوج – بفرض انه اتجوزك – فارحمي نفسك و اقطعي حبال التواصل معاه , رحمة بنفسك و شفقة عليه هو . .
و هنا التفاصيل . .
------------------------------------------------------------------------------------------
وعشان نشوف هو ليه مش مناسب ليكي , تعالي نمسك نقطة محددة هو عملاها , واللي كشفت كتير عن تفاصيل شخصيته . .
وهي لما اعترفلك انه رجع تاني عشان ينتقم منك , وياخد بحقه منك , نتيجة انك سبتيه من سنين . .
الموقف ده علي بساطته يوضحلك عدد من النقاط بالغة الأهمية المتداخلة في تركيب شخصيته . .
- ان هو عنده كمية مدهشة من تفاهة التفكير , واللا نضج , واللي المفترض تتواجد لدي اي شخص مقبل علي حياة زوجية , إن شخص يخطط و ينفذ خطة انتقامية من واحدة , عشان اختارت شخص غيره كشريك لحياتها , ده تفكير طفولي , مش هاقول حتي تفكير مراهقين , لأن المراهقين أعقل من انهم يعملو كدة .
هل شخص بالتفكير ده و بالطريقة ديه من التعامل مؤهل إنه يبني بيت و حياة زوجية ؟ ؟ هل هتشعري بالأمان و انتي مع شخص بمستوي التفكير ده ؟
- إن عنده لذة لا توصف في شهوة الإنتقام , وهو الأمر اللي ممكن يتطور لاضطراب نفسي اسمه "السادية" . .
الإنسان اللي يفكر ازاي ييجي و ينتقم من واحدة عشان حاجة هي اصلا مش غلط ولا حرام (انها اختارت شخص غيره) , هو عنده مشكلة نفسية حقيقية , و عنده طاقة نفسية و استعداد إنه يعذب واحدة عشان هي آذته بشكل ما . .
ده بالفعل عنده مشكلة , ثقي انه لا يصلح كزوج
- عنده تذبذب في المشاعر , في البداية كان بيحبك , بعدها بقي عايز ينتقم منك , وفي النهاية خلاص بقي بيحبك بعد ما نفذ انتقامه و فضفضلك باللي كان في قلبه . .
ده بالفعل شخص غير مستقر عاطفيا , وتوقعي منه اي حاجة ممكن تحصل بعد الجواز لو تم . .
فيه احتمالية كبيرة لتكرار الامر ده لاحقا بشكل مختلف , سواء اثناء الخطوبة او بعد الزواج , وهو الأمر اللي يخليكي تقلقي , المعروف ان البنت بتكون "مجنونة" , والولد "عاقل" , وجنون البنت بيكون بس في حاجات معقولة و قرارات هوجاء , لكن لما يكون الشاب نفسه مضطرب نفسيا , وبيفكر بالشكل ده , فثقي ان حياتك معاه هتكون جحيم
---------------------------------------------------------------------------
طب والحل , أعمل ايه ؟ ؟
امشي علي الخطوات ديه , مهما كانت صعبة عليكي و مش علي مزاجك , بس صدقيني احنا ادري منك بالصح في المواقف اللي زي ديه . .
-
ابعدي عنه , بمنتهي البساطة , ابعتيله رسالة ان خلاص مفيش نصيب , و كل واحد من طريق , وان احنا مش لبعض . .
متقوليش في الرسالة ان السبب ان انت عندك كذا كذا , اكيد لا , لكن اتصرفي في ايجاد اسباب متجرحش كبرياءه و عزة نفسه وكرامته , و تكون مقبولة و يصدقها . .
-
ثقي إنك هتنسيه . .
سيبك من التفكير المراهقي انك هتفتكريه العمر كله , وانك مش هتحبي غيره , ده كلام مش بيحصل , وانتي اساسا سنك صغير بالفعل , ولسة مش قادرة تميزي الحب بمعناه الحقيقي عن الإعجاب السريع اللي بيبتخر بعد شهور . .
اقفلي الصفحة ديه من حياتك , وارحمي نفسك من العذاب , هو بالفعل مش مناسب ليكي .
-
متفكريش في مساعدته . .
لأن ممكن ييجي في بالك انك تخليكي جنبه عشان تساعديه في محنته , المشكلة ان بقاءك معاه مش هيساعده في اي شئ , لأن هو محتاج طبيب نفسي متخصص , مش حبيبة تعذب نفسها , وهو نفسه هيتعذب بتذبذب المشاعر معاها . .
و متفتكريش إنك لما سبتيه انتي خذلتيه , بالعكس انتي هتطلعي من حياته عشان هو يعرف يتعالج و يشوف الصح ايه , ولو متعالجش فهي مشكلته وانتي مش هتعرفي تعمليه معاه حاجة . .
لو انتي كنتي شاب مش بنت , او لو هي كانت بنت مش شاب , كنت هقولك ايوة ممكن ساعتها يكون فيه مساعدة منك , لانكم من نفس النوع فالعلاقة بينكم هي صداقة متينة واخوة , مش عاطفة بين ذكر و انثي . .
سيبيه و علاجه هو مسؤولية طبيب متخصص , او حد من اصدقاءه اللي ياخد بايده خطوة خطوة لغاية لما يتخلص من الاضطراب اللي عنده , فمتخليش عندك اي احساس بالذنب او التقصير انك سبتيه , بالعكس وجودك جنبه ممكن يكون بيعمق الأزمة من الاساس .
-
متنسيش ان هو في صراع مع ابوه عشانك , ابوه عايز يجوزه واحدة تانية وانتي لسة موجودة بشكل ما في حياته , فلو انتي ظللتي موجودة في حياته فهو ممكن يدخل في صراع حقيقي مع ابوه عشانك و ده هيجعل الأزمة أعمق و أشد . .
بينما لو انتي اختفيتي , وهو عرف ان خلاص مفيش أمل في الارتباط بيكي , هو هيفكر بشكل مستقل عن ضغوط قلبه , و يتفاهم مع ابوه علي مين هي الزوجة اللي هيرتبط بيها
-
متكرريش غلطة التواصل مع شاب جديد .
بداية الغلطة كلها انك تواصلتي مع شاب لمدة سنين طويلة , وانتي عارفة انه غير قادر علي الارتباط بيكي و لسة قدامه سنين . .
التواصل ده بيصنع في قلبك و قلبه علاقة غير سليمة , ومشاعر غير ناضجة , غير قابلة للترجمة بشكل عملي كخطوبة و زواج . .
فأتمني ان ده ميتكررش مع حد تاني , وان اي علاقة مع اي شاب , تكون محدودة جدا لغاية لما ييجي يرتبط بشكل حقيقي .
-
افتحي قلبك لفكرة الارتباط . .
انتي مش هتعيشي راهبة , وهو هيبدأ يشوف حياته ,فلازم تتقبلي فكرة الزواج من شخص تاني , شخص يكون ناضج و فاهم يعني ايه مسؤولية و زواج , ايوة انتي قلبك دلوقتي بيقول انك مستحيل تحبي شخص تاني ابدا , لكن ده كلام غير سليم , ولما تتجوزي شخص تاني , هتجدي ان ذكري الشاب الأول اختفت تدريجيا لغاية لما تروح للأبد