نسيان المحنة
الرسالة السابقة
العنوان : نسيان المحنة
القسم: #الاجتماعي
الرقم: 29
السؤال:
انا كنت متزوجة رجل عندة اولاد وانا وقفت معة وكبرتلو اولاده
ولما كبروا طلقني غيابي وعندي منة اولاد
ونفسي أنسى المحنة ال مرت بيها
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
لان المشكلة اللي بعتيها من غير تفاصيل كافية , فهنحاول تكون اجابتنا عامة بقدر الامكان
يعني احنا معرفناش سبب الطلاق ؟ هل فيه مشاكل متبادلة ؟ هل فيه امكانية لحل المشاكل ؟ ؟ هل فيه اي كلام عن الرجوع لبعضكم ؟ هل بيبعت النفقة بالفعل ولا مهمل فيها ؟ ؟ هل هو اتجوز تاني ؟ ؟ هل ليه علاقات ؟ ؟
غياب المعلومات ديه كلها , هيجعل اي خطوات للحل مش كاملة , فهنحاول نقول خطوات عامة للحل . .
---------------------------------------------------------------------------
قلنا قبل كدة ان الطلاق وان كان حلال , فالظلم حرام , وهو بيكون نفسي و معنوي اكتر ما يكون مادي وفلوس . .
فببساطة في بداية الزواج , بيكون الزوج و الزوجة في سن الشباب , وكل واحد عنده مجموعة من الرغبات و الاحتياجات . .
ورغباتهم و احتياجاهم بتتشابه في الانواع (رغبة جسدية , رغبة عاطفية , اهتمام , رعاية , خوف علي بعضهم , وجود الغيرة المعقولة . . )
و لكن بتختلف في الكميات . .
فان كانت رغبات الرجل "الجسدية" اعلي شوية من رغباته "العاطفية" , فالعكس تماما عند الزوجة . .
واللي رغباتها "العاطفية" اللي بتنعكس في الاهتمام والحب و اعطاء مشاعر حقيقية , اولي بكتير عندها من الرغبة "الجسدية" . .
ولما بيكون الزوجين في مقتبل الشباب , غالبا كل واحد فيهم بيجد في التاني اللي محتاجه , هي شايفه من اهتمام و حب , وهو شايف منها "اشباع كامل" . .
و لما السن بيزيد , أحيانا تتشعب الطرق وتختلف . .
الزوج والزوجة السوية , اللي عارفين يعملو توازن بين المطلوب و المتاح , واللي بيتحكمو في اهوائهم بشكل سليم , بيظلو يحبو بعض بشكل مستمر , لان لسة كل واحد شايف في التاني اللي هو عايزه . .
فبالنسبة للزوج , صحيح الزوجة كبرت , لكن هي لسة بتعمل "اشباع " للزوج بشكل كبير , خاصة ان هو لما بيكبر شوية , احتياجاته العاطفية بتزيد عن احتياجه الجسدي , وبالتالي انه يمارس "الحب" مع زوجته الاقل جمال , والاقل شباب , لكن بتحبه بشدة , اولي من انه يمارسه مع واحدة اجمل و اصغر , لكنها "مش طايقاه". .
كمان بالنسبة له ,انه بس يقعد يشرب معاها شاي العصاري وهي جنبه , او انها تعمله لمون سخن لما يجيله برد , اولي بمراحل من انه "يقطع السمكة و ديلها" زي ما هو كان ممكن يعمل , وهو عنده عشرين سنة . .
فبالنسبة للزوج "السوي" احتياجه لزوجته اللي قده في العمر , كبير جدا . .
وبالنسبة للزوجة لما هي بتكبر , احتياجها العاطفي بيزداد جدا , و ممكن يتحول شوية من الاحتياج "الرومانسي" للاحتياج المتعلق بالـ "اهتمام" . .
يعني مش لما تكبر مش هتهتم كتير بالدباديب و الورود و اغاني حماقي , لكن هتحتاج جدا انه يكون مهتم بيها و فاكرها و يتكلم معاها و هي في باله . .
فرغبتها انه يكون قريب منها , و متواجد , وبيحبها , رغبة عاتية , وقوية جدا , ويمكن تزيد عن لما هي كانت شابة . .
لان بشكل ما , في سن الشباب , الواحدة بتكون بقدرة تحمل اكبر , و امكانية صبر اكتر , نفسية تقدر تتحمل الضغوطات المستمرة , ولكن مع كبر سنها تحملها بيقل , وصبرها بيختفي , وقدرتها علي التحمل بتزول . .
ففي الفترة ديه , اي انفصال او طلاق او هجران او معاملة قاسية منه , بتقتلها حرفيا . .
----------------------------------------------------------------------------
الوصف ده كله كان عن الازواج الاسوياء , فماذا عن الحمقي ؟ ؟
الزوج الاحمق ببساطة , هو اللي بيسعي ورا "هواه" و مزاجه , ونداء هرموناته بشكل حيواني فج . .
فلما اتجوز في شبابه , من زوجة شابه جميلة , هو كان بيجد فيها المتعة اللي عايزها , و احيانا بيدور علي طرق تانية بالتوازي معاها . .
ولما هي كبرت ؟ ؟ خلاص بقت لا تصلح , خلاص المفروض تتكهن , و تترمي و نجيب واحدة غيرها . .
ده ببساطة اسلوبه الاحمق في التعامل مع الحياة . .
ان الزوجة هي عبارة عن "موبايل" يشتريه و يستخدمه , واول ما يبدأ "يهنج" يرميه و يجيب واحد جديد . .
فهي بالنسبة له عبارة بس عن "جسد" , اول ما انتي فترة صلاحيته , يستبدله فورا . .
و النوعية ديه من الناس موجودة ومنتشرة , والواحد لا يملك الا انه يشوفهم و يتعجب من سلوكهم المدهش و الشاذ . .
و غالبا النوعية ديه بيكون ليها مقدمات من بداية الزواج , لان اللي بيتخذ قرار بالتخلص من زوجته لما فترة صلاحيتها تنتهي , لا شك كان بالفعل بيبحث عن وسائل اخري للتشبع بيها حتي في فترة زواجه , لان "البحر بيحب الزيادة" زي ما خيالة المريض بيقنعه . .
وعليه فانا بهنيكي علي الطلاق اساسا , لان النوعية ديه من البشر لا يصلحو للتعامل الآدمي باي شكل , سواء زوج او اب , او حتي "ضل حيطة" . .
واخدين بالكم ان المشكلة مش في الطلاق , لكن في الظلم اللي تتبع الطلاق . .
و غالبا النوعيات ديه من البشر ومع ارتكابها للفواحش , ربنا بيرسل لهم العقاب في الدنيا قبل العقاب الأخروي . .
في الآية 268 في سورة البقرة (الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ ۖ وَاللَّهُ يَعِدُكُم مَّغْفِرَةً مِّنْهُ وَفَضْلًا ۗ وَاللَّهُ وَاسِعٌ عَلِيمٌ)
المولي تبارك و تعالي ربط بين الفقر والفحشاء , و ما بين المغفرة , والفضل . .
يعني ببساطة يا ابن آدم , هتكمل في سكة الفاحشة , هتجد الفقر طوال حياتك , غير العذاب يوم القيامة ربنا يحفظنا . .
ويا ابن آدم , هتكمل في طريق المغفرة و التوبة الي الله ,ربنا هيزيدك من فضله و خيره في الدنيا قبل الآخرة . .
و لو هتلاحظي الآية اللي بعدها فورا هتلاقي : (يُؤْتِي الْحِكْمَةَ مَن يَشَاءُ ۚ وَمَن يُؤْتَ الْحِكْمَةَ فَقَدْ أُوتِيَ خَيْرًا كَثِيرًا ۗ وَمَا يَذَّكَّرُ إِلَّا أُولُو الْأَلْبَابِ)
يعني ديه حكمة في التفكير , ربنا بيرزقها البعض , ولكن محدش هيفهمها الا اللي عندهم ألباب , يعني عقول
الكلام ده كله بقوله عشان تخففي عن نفسك شوية من تصرف احمق من زوج معندوش اي مقدار من التفهم او الانسانية , لما اخدك لحم و رماكي عضم
---------------------------------------------------------------------------
طب تنسيه ازاي ؟ ؟
حاولي تنفذي الخطوات ديه , هتفيدك ان شاء الله . .
- بطلي تفكير فيه . .
عارف الموضوع مش سهل , بس بقدر الامكان توقفي عن التفكير في الموضوع , لأنك كل ما بتعيدي التفكير , كل ما يزداد ألمك و خلاص . .
قاومي اي ذكري ليه علي قد ما تقدري , عشان تخففي عن نفسك شوية
- اعملي تحليل موضوعي . .
احيانا العقل الباطن – استمتاعا بالاغراق في الحزن – انه بس يتذكر الجانب اللي بيؤلمك في الموضوع , وهو حاجتين : الفراق , والاهانة انه تركك . .
بينما لما تقرأي التفاصيل و التحليل اللي قلناه من شوية ,هتلاقي ان اصلا انتي الكسبانة بالتخلص منه , وان تركك حاليا احسن ما كان يكمل معاكي وهو بالمستوي اللي انتي وصفتيه
- انشغلي . .
طول ما انتي فاضية , هتتألمي و تتوجعي . .
حاولي تنشغلي بقدر الامكان , و تملي يومك عشان متلاقيش مكان في وقتك انك تفكري فيه او تتألمي . .
والاعمال الخيرية كتير , لو بس فرغتي عدد من الساعات يوميا لملجئ ايتام او جمعية خيرية او لمحو الأمية , هتفيدي الناس وتاخدي ثواب , ومش هتلاقي عندك طاقة ذهنية تفتكري الاوجاع
- اضحكي . .
علي قد ما الحزن و الكئابة مالية البيت , علي قد ما هيأثر ده علي جهازك العصبي . .
فببساطة املي يومك بافلام و مسرحيات كوميدية ,شوفي مين من زميلاتك او قرايبك اللي انتي عارفة ان الضحكة مش بتفارق بقهم , وخليكي معاهم بشكل دوري . .
وحتي في البداية لو ملكيش نفس , واحدة واحدة هتنسي احزانك . .
- التمسك بالدين . .
كمية كبيرة من الايات و الاحدايث بتقوم بفك الكرب وازالة الحزن . .
واظبي عليها , وواظبي علي قراءة القرآن , و قيام الليل , حتي لو ركعتين خفيفتين في اليوم . .
بس في الدعاء متجيبيش سيرته تاني , فكري في شئونك الاخري , ومتقعديش تفتكريه و تدعي عليه , انسيه ببساطة
واخيرا اقري رسالة نسيان الماضي اللي حلناها من فترة بتتناول نفس الموضوع