العنوان : فسخت 3 مرات

القسم: #الاجتماعي

الرقم: 55

السؤال:

 

 عندي 26 سنة  و خطوبتي اتفسخت 3 مرات في الاربع سنين اللي فاتو  مش هاقعد احكي تفاصيل بس في كل مرة فيهم بيكون حظي وحش و بقابل انسان مش محترم

 

انا اتعقدت و ناوية متجوزش ابدا بس ماما بتزن عليا و بتجيبلي عرسان اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

  

من غير ما نعرف تفاصيل و اسباب فسخ الخطوبات التلاتة , مش هنقدر نحدد انتي ضحية ولا فيه جزء من الخطأ واقع عليكي . .

 

أغلبنا – للأسف – متعود علي تغليط الست في حالة الطلاق او الفسخ  , وده غلط , والبعض بيغلط الراجل فورا , وبرضه غلط , لأن لازم نعرف ايه اللي حصل , وازاي وصلو لحالة إنهيار العلاقة , وفي أغلب الحالات بيكون كلا من الرجل و الست يتحملو جزء من المسؤولية . .

 

إن كنا مش هنعرف نعمل تقييم دقيق للي حصل في الـ 3 مرات اللي فاتو , فاحنا علي الأقل ممكن نسرد مجموعة من النصايح , واللي ممكن بعضها يفيدك و في تحسين حالتك المزاجية , او في التعامل مع أي زواج مستقبلي . .

 

 

 

• عوامل الاختيار من البداية لابد تكون اصلا سليمة , الفكرة مش حد محترم و ابن حلال بيخبط علي البيت من بابه و خلاص , لابد يتوجد مجموعة من المعايير الدينية و الخلقية , بل والطباع المتناسبة عشان ينجح الزواج

 

 

 

• الرجالة مش ملايكة ولا شياطين , لا ترفعي سقف طموحاتك للدرجة المثالية , بشكل يجعلك تنهاري مع مجابهة الواقع , ولا تخفسي بيهم الارض و تتعاملي معاهم إنهم ذئاب آدمية  , بشكل يجعلك غير قادرة علي تمييز الحقيقة , الرجالة فيه منهم الكويس و الزبالة , وانتي لازم تقدري تميزي دول عن دول عشان تعرفي تتعاملي معاهم , وتعرفي تشوفي مين الكويس اللي يستاهل , ومين اللي تبعدي عنه .

 

 

•  الزواج و الخطوبة مش جنة , لا انتي هتكون اميرة ستوكهولم , و لاهو هيخدمك بعينيه , الزواج مبني علي التضحيات المستمرة , لكن من الطرفين مع بعض , هي هتضحي براحتها وهو هيضحي بوقته , هي هتضحي برشاقتها , وهو هيضحي بخروجه مع اصحابه , وهكذا سلسلة من التضحيات المستمرة من الطرفين , تؤدي إلي باقة متكاملة من المتعة الجسدية و الروحية و العاطفية الكبيرة , ممزوجة براحة بال و هدوء و طمأنينة .

 

 

• زوجك مختلف عنك , فسيولوجيا و سيكولوجيا و عاطفيا و نفسيا و كل حاجة , فلو انتي عاملتيه بنفس المعطيات اللي بتعاملي بيها صديقاتك , او هو عاملك بوجهة نظر التعامل مع الرجالة , هيحصل صدام سريع و عنيف .

 

• تدخل الأهل في الزواج هو رصاصة الإنتحار للخطوبة او الزواج , خاصة إنه بيكون تدخل غير موفق غالبا , ولا يهدف إلا للسيطرة و التحكم  و الانتقام و النكاية في الطرف الآخر , و إن كل شخص يفوز بأكبر جزء من الكعكة , بغض النظر عن بقاء او هدم الزواج .

 

 

• الزواج مش تنافس , ومش حرب , ومش هدفه إن كل واحد يكسب اكتر , ربنا سبحانه وتعالي وصفه في سورة الروم  : (أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ) الرحمة بتذكر لما بيكون حد قادر يقسو علي الطرف التاني أو يظلمه بس يتغاضي عن ده , ده هو مفتاح الزواج الناجح

 

• وجود مشكلة أو خلاف أو خناقة بين المخطوبين أو المتزوجين مش نهاية العالم , و مش معناه إن العلاقة لازم تفشل , كتير من المشاكل بتتم لأن الطرفين مش فاهمين بعض لسة , و عشان هما حديثي عهد بالتعامل المباشر من الجنس الآخر, فلازم يحصل طولة بال , ومحاولات للتقويم المستمر , و منفكرش في إنهاء العلاقة الا لما يكون فيه يأس تام من الإصلاح , وإصرار كامل علي الغلط .

 

• لازم نكون عارفين الفرق في التعامل بين مرحلة الخطوبة و مرحلة الزواج , وتداخل خصوصيات أي مرحلة غير مكانها بتسبب مشاكل , الخطوبة معناه تحريم الإنفراد بها , أو إنه يشوفها من غير حجاب  ,أو يمسك ايديها , أو يخرج معاها إلا لو معاها أبوها أو أخوها (مش اختها الصغيرة) , وميكونش فيه سهوكة و تسبيل بالعينين , الخطوبة هي وعد بالزواج , وأي تعدي للخط ده معناه إن العلاقة أخذت جانب محرم  .

 

ديه كانت نصايح عامة للمخطوبين او للمتجوزين , نيجي بقي نتكلم عنك بالتحديد

 

---------------------------------------------------------------------------

 

عشان برضه مش قادر أحدد هل فيه خطأ من جانبك ولا لا من غير معلومات كاملة , فهقولك خطوات عامة ممكن تعمليها , وقد تساهم في إصلاح المشكلة . .

 

• متحطيش في بالك صورة او انطباع معين عن الرجالة , عشان كدة هتحاسبي علي أساسه أي زوج مستقبلي بشكل غير دقيق , وده ممكن يطفشه دون ذنب منه  .

 

• شوفي عندك – بنظرة موضوعية و من غير زعل – نسبة الأخطاء اللي انتي وقعتي فيها في التلات مرات اللي فاتو , وارد ميكونش فيه أي أخطاء , وارد يكون فيه أخطاء قليلة لا تذكر , وارد يكون فيه كتير , شوفي لو فيه حاجة مشتركة حصلت في التلات مواقف , او انطباع معين التلاتة قالولك عليه حتي لو انتي شايفة إنه مش سليم , حطيه في بالك عشان ممكن يكون سليم  . .

 

• مبدأ رفض الزواج مبدأ غلط , لا هينفع تترهبني , ولا هينفع تقرري تقاطعي الرجالة , ولا هينفع تخرجي برة إطار دينك و أخلاقك , لو إن نصيبك مجاش خالص و فضلتي مش متزوجة مش وحش , بس التجنب المتعمد للزواج , ده مش صح . وبالتالي لازم تفتحي عقلك و قلبك لفكرة الخطوبة و الزواج , طالما المعايير هتتظبط المرادي , اسمعي كلام ماما و شوفي لو فيه فرصة جديدة . .

 

• هتسمعي من اللي حواليكي عقول مريضة هتعيب فيكي لمجرد إنك فسختي قبل كدة , اللي زي دول مبتصيش في وشهم أساسا , وكمان هتسمعي من بعض صديقاتك اللي يقولولك (انتي مش غلطانة  خالص يا حبيبتي , هما اللي صنف معووج ) برضه دول متسمعيلهومش , لأنهم مش شايفين الصورة كلها , وكمان هتسمعي اللي يبستف فيكي ويلومك علي كل مشاكل الفسخ اللي فاتت , كمان دول متعبريهومش , من ناحية إنتي مش مجرمة , و من ناحية ممكن يكون بالفعل انتي عليكي جزء من المسؤولية .

 

• متوقفيش حياتك بانتظار الزوج , لو في الكلية خلصيها , لو بتشتغلي ركزي في شغلك , لو قاعدة في البيت اتعلمي كورسات أو اخرجي مع صديقاتك , اتطوعي في اعمال خيرية و غيرها , بحيث حياتك متكونش بتدور في فلك واحد .

 

أتمني أكون قدرت أعالج جزء من الموضوع , الكرة في ملعبك , ومحدش هيقدر يساعدك أكتر من نفسك

​