العنوان : الأحلام الوردية

 

القسم: #العاطفي

 الرقم: 18

السؤال:

 

انا عندي  19 سنة

 

من فترة كنت في مجموعة عمل اونلاين , فاتعرف بشاب فعلا محترم و متدين في نفس سني , ولقيت ان فيه بينا نقط مشتركة كتير و تفاهم في حاجات مختلفة

 

ومع اني اصلا مش متعودة اتكلم مع شباب ولا اختلط بيهم لقيت اني باتكلم معاه اكتر و شايفة ان فيه تقارب تدريجي

 

 

بعدها اقترح عليا اننا نشجع بعض في كل حاجة سواء قراية كتب او الانتظام في الصلاة او الصحيان للفجر وفعلا استمرينا علي ده فترة طويلة

 

كنا بنحاول على قد ما نقدر اننا نبعد عن الكلام الحرام   معاملتي معاه في الاول كنت بصده وكان بيكتئب

 

كل ده مكانش شاف صورتي  قالي انا هحافظ عليك ومش بيفرق معايا الشكل أن حبيتك عشان انت محترمة وكويسة ومحاولش ولا طلب صورة ليا

 

انا شوفته طبعا قالي انه بيتعامل معايا علي اني زوجة صالحة بيتعامل معايا كشخص مش كبنت وعمره ما اذني حتى ف خياله

 

امبارح كنا بنتكلم عادي فجأة قالي خايف كل لما تيجي فكرة اننا ممكن منتجمعاش اخاف

 

اضايقت من كلامه وظهر دا على كلام وكأني بقول بطريقة غير مباشرة طيب انت حر ولقيته فجأة بينهي كل حاجة

 

قالي انا مش عايز اظلمك معايا واخليكي تستني سنين وانتي خلال كام سنة هتتخرجي و يجيلك العرسان اما انا لسة قدامي سنين طويلة

 

انا اتمسكت بيه وكان أول مرة في حياتي اتمسك بولد اتمسكت بيه مش عشان حبيته انا قلبي مدقلهوش يمكن تستغرب من كلامي بس عقلي اللي دق له

 

عقلي اللي رافض يسيبه لقيت فيه كل اللي بتمناه وانا متأكدة انه بيحبني لأنه بيبصلي زي ما انا ببصله بيبصلي كزوجة صالحة وانا كذلك

 

كنت في كل صلاة فجر بيدعى ربنا يجمعنا وهو كذلك

 

قولتله سيب الامل اللي فاضلي منك و اصبر ممكن نكون لبعض قدام

 

قالي مش عايز اكسرك  انا عامل عليك اقسم بالله عشانك

 

قولتله خلاص مالهوش لأزمة اني ادعي في صلاتي بعد كدا

 

وحاليا مش عارفة اكل مش عارفة اذاكر كل اللي بعمله بصلي واضيع باقي اليوم وخلاص

 

نفسي القي اي امل يربطني بيه مش عاوزة نتكلم ولا نتقابل بس امل يأكدلي انه جاي

 

ودلوقتي بادعي ف صلاتي أن ربنا يجمعنا بس مش عارفة اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 طيب تعالي نحكي تسلسل القصة  , زي ما احنا شايفينها . .

 

انتي طالبة جامعية في سن المراهقة , و من الواضح انك متحفظة , ومش من النوع اللي بيختلط بالشباب , او بيصاحب , و عندك موانع دينية و خلقية كبيرة بالنسبة للنقطة ديه .

 

وعن طريق التواصل الأونلاين بدأ يكون فيه تواصل علي استحياء بينك و بين الشاب ده . .

 

و كانت المساحة المشتركة اللي بينكم , واللي انتو الاتنين بالفعل – مش تمثيل – مهتمين بيها , هي المساحة الدينية , و اللي بدأتو تساعدو بعض فيها , سواء قراءة قرآن او صلاة الفجر او الوِرد يومي او غيره .

 

ومن الواضح ان هو بالفعل محترم , يعني هو مشافكيش ولا طلب صورتك , ولا تخطي الحدود زي ما كتير من الشباب بيعمل (لاحظي اني باشرح اللي حصل مش بقيمه , يعني مش بقول ده صح ولا لا من الاساس )

 

وكان طبيعي ان القلوب تتحرك , وان كلا منكم يجد في التاني انسان مناسب يكون شريك لحياته , وان تتكون عاطفة مش قليلة بينكم , وان التفكير يوصل لنقطة الشكل الرسمي للارتباط . .

 

وكان طبيعي كمان ان احلامكم الوردية تصطدم بصخرة الواقع , ان هو شاب في بداية حياته , وقدامه سنين طويلة علي ما يقدر يعرف راسه من رجليه في الحياة الواقعية , وان اي افكار للارتباط هي خيال حالم  ,اكتر منها واقع ممكن يتنفذ .

 

ولأنه من جواه محترم , مرضيش انه يمرمطك معاه سنين طويلة , وفي الاخر محدش عارف الدنيا فيها ايه , فاضطر يدوس علي رغبته الشخصية بالبقاء معاكي , وعلي الشيطان اللي اكيد وسوسله انه يفضل مرتبط بيكي اونلاين و خلاص , وقرر قطع كل سبل التواصل بينكم .  

 

ولما انتي فوجئتي بحاجة زي كدة , و تمسكتي بيه , هو تردد شوية , لكن تاني يوم اصر علي رأيه , و قطع كل حبال التواصل معاكي , عشان ميعذبكيش معاه

 

وسابك فجأة وحيدة في صحراء الألم , حاسة بالتوهان و ضياع الحلم الجميل اللي انتي كنتي حاساه .

 

وحاليا انتي تشعري بالمزيج من الوجع النفسي , والحيرة من حقيقة مشاعره , والصدمة من اختفاء الحلم فجأة .

 

 

--------------------------------------------------------------------------

 

لازم في البداية نحط النقط فوق الحروف بالنسبة لشئ محدد . .

 

ان اللي دار بينكم من البداية شئ محرم شرعا , وذو اثر سلبي خطير اجتماعيا . .

 

قلنا اكتر من مرة لما بح صوتنا , ان اي تواصل بين ولد و بنت  ,بين شاب و فتاة  ,بين رجل و ست , لازم يكون بس في حدود الضروري و اللي لا يمكن الاستغناء عنه , يعني حاجة مهمة في الدراسة , حاجة لا بد منها في الشغل . وهكذا .

 

لكن بالتأكيد اللي كان بينكم مش من الحاجات اللي نقدر نقول انها من الضروريات اللي لابد من التواصل عشانها مع شباب .

 

ولو كان تم التواصل بس في "شات مشترك" بين عدد من الأعضاء , فكنا ممكن نتفهم ده , باعتبار ان الشات ده "علي الملأ" , فالكلام نفسه هيكون له حدود لا بد منها .

 

لكن مع بداية التواصل الخاص بينكم , هيبدأ الشيطان يشمر ايديه عشان يشتغل , وبالفعل اشتغل بينكم .

 

و كل اللي كنتو بتعملوه من "مساعدة علي الصلاة , القرآن , الفجر ,  العبادة . .  " كل ده مدخل واضح جدا للشيطان بينكم .

 

لان ببساطة المدخل ده هو اللي انتو بتظنو انه في اطار التعبد و التقرب لربنا , بتظنو انتو الاتنين ان لما هو بيصحيكي للفجر , ولا لما انتي تقوليله قرأت اليوم سورة العنكبوت ولا لا , انتو بتظنو انكو بتعملو شئ صح . .

 

بالطبع انتو بتضحكو علي نفسكو , ماشيين في بداية طريق غلط  ,وانتو فاكرين انه صح . .

 

يعني هل ممكن مثلا نتخيل ان صحابي يتواصل مع صحابية عشان تحفظ القرآن , او عشان يعلمها الفقه , هل ده كلام  ؟ ؟

 

حتي لو كان الكلام في منتهي الجدية , حتي لو كان مشفاش صورتك ولا سمع صوتك , حتي لو كنتي عمرك ما اتكلمتي معاه في كلمة خارجة , حتي لو كنتو متفقين علي الجواز , كل ده غلط , و لا يمت للدين بصلة . .

 

لو كان هو جاد في التمسك بالدين كان تواصل مع شاب زيه , يصحيه الفجر  , ويفكره بالقرآن , ولو انتي عايزة اللي يساعدك في الصلاة كنتي تشوفي صديقة ليكي , او حد من اقاربك المحارم  اللي يساعدك  . .

 

لكن اي تواصل بين ذكر و انثي بنية التعبد هو خداع لانفسكم , وهو بداية طريق شائك و مؤلم .

 

الرسول صلي الله عليه و سلم اعطانا مقياس دقيق , عشان نعرف هل اللي بنعمله ذنب ولا لا , قال "الإثم ما حاك في صدرك و خشيت ان يطلع عليه الناس" . .

 

يعني بمجرد ما تحسي ان الشئ ده في شبهة شرعية , وبمجرد ما يكون عندك خوف ولو قليل من ان اللي بينكم يتعرف و حد تاني يشوف الكلام بينكم , فده معناه ان اللي بيحصل ذنب . .

 

هل مثلا اللي حصل في الشات بينكم , هل كان ممكن يتم علي الشات المشترك بتاع الجروب , اشك . .

 

اكيد احنا لازم نحمد ربنا ان طول الفترة اللي فاتت محصلش اشياء جوهرية , بس الاشياء اللي بتحرم مش بتحرم عشان اثرها , لكن بتحرم عشان ذاتها  , هل الفرق واضح ؟ ؟

 

يعني مفيش حاجة اسمها انا هشرب الخمرة بس مش هأذي حد , انا هسرق من شخص عني مبلغ بسيط وهو مش هيتأذي , الحرام يظل حرام في كل الظروف , حتي لو الشخص ظن انه مش هيأذي حد بيه  .

 

فالمختصر للنقطة ديه : اي تواصل بين شاب و بنت, لاي سبب , هو محرم تماما الا للاستثناءات الحقيقية , اللي من غيرها الحياة هتقف

 

-------------------------------------------------------------------------

 

طيب تعالي نحلل اللي حصل , من وجهة نظره هو أولا . .

 

هو شاب يجمع بين الخلق والجدية , واللي حاول يجعل تواصله معاكي في اطار محدد و بسيط . .

 

احنا بالفعل اتفقنا ان اللي حصل شئ محرم , بس الحمد لله ان الاخلاق اللي جواه , جعلت التواصل بينكم متوقف عند خط معين ولا يتجاوزه . .

 

و بعد ما عدي اسابيع من التواصل , وبدأ الحلم الجميل يتكون في ذهنه و عقله , انه بالفعل يتمني الارتباط بانسانة بنفس مستوي تفكيرك و تدينك و اخلاقك , بدأ يستيقظ للواقع . .

 

ان هو سنه صغير , وقدامه اقل حاجة 7 سنين علي ما يكون جاهز ماديا وواقعيا انه يقدر يخبط علي باب بيتكم , او انه يقول لابوه انا عايز اكمل نص ديني .

 

ولانه عارف ان البنت بتتجوز قبل الولد , وان انتي بالفعل خلال سنتين تلاتة هتلاقي اللي واقفين علي باب بيتكم , فهو عمل مقارنة سريعة في عقله بين حاجتين .

 

بين رغبته الشخصية : وهي انك يتمسك بيكي بغض النظر عن واقعية الكلام ده , ويربطك بيه اكتر , عشان تكوني ليه في المستقبل .

 

و بين ضميره اللي فوقه من الأحلام الوردية اللي هو فيها  , وان انت كدة بتأذيها  , لانها اكيد هي بتحبك زي ما انت بتحبها , ولو انت كشاب ممكن تنسي بسهولة , فهي كبنت مش هتنسي , خاصة ان باين عليها انها محترمة جدا و مش بتكلم ولاد ابدا , وبالتالي مش من النوع اللي بيتسلي و بيهزر و بيصاحب .

 

ضميره قاله ان انت بتجري ورا سراب لسة هيتحقق في 2025 , يعني المعاد التقريبي اللي يكون خلص فيه كليه و جيش و بقي جاهز , فحرام عليك تعذب بنات الناس معاك , ولو ان اختك مكانها اكيد مكنتش هترضي حد يربطها كدة .

 

وان لو انت قطعت حبال التواصل بينكم دلوقتي , هو ايوة مؤلم ليك و ليها ,بس اكيد هيكون ارحم كتير من لو تم تعميق العلاقة اكتر في قلبك و قلبها , ساعتها هتكون انت كسرتها بالفعل , وحطمتها تماما .

 

فهو وضع عقله في كفة و قلبه في كفة , و رجح كفة عقله علي قلبه , فاتخذ القرار بقطع كل حبال التواصل , مهما كان ده مؤلم .

 

 

-------------------------------------------------------------------------------

 

فيه تفسير تاني , وهو وارد برضه . .

 

ان الصورة مش بالمثالية ديه , وان فيه شئ غير سليم في القصة . .

 

و الشئ الغير سليم , ان هو زهق منك , كان فيه انبهار في بداية الكلام معاكي , علي شات الجروب , و كان فيه رغبة ملحة عنده في التواصل معاكي , خاصة انك مش بنت "سهلة" او "متاحة" , زي كتير من البنات , لكن انتي بنت "متحفظة" , ومش بتسمحي لحد انك يدخل حياتك او يكلمك علي الخاص . .

 

و اي شاب بيكون عنده رغبة عارمة في التواصل مع البنت الصعبة , ده شئ في سيكولوجية الشباب و مش هتعرفي تفسريها , وكل ما كانت البنت صعب الوصول ليها اكتر , كل ما كانت رغبة الشاب اقوي .

 

لما الظروف جعلتكم تتواصلو علي الخاص , وهو كان عنده انبهار كامل بشخصيتك و اخلاقك و تربيتك , بدأ الانبهار ده "يهدي" شوية بشوية مع طول التواصل , ومع الاعتياد علي الكلام معاكي .

 

وبعد فترة حس ان ممكن متكونيش انتي شريكة الحياة اللي هو بيحلم بيها , لسبب ما مش هنقدر نحدده , وبالتالي بدأ يعرف ان هتنشأ علاقة من الاعجاب و الحب في قلبك تجاهه , بينما هو بالفعل مش مستعد للزواج منك لسبب ما  .

 

فهو ضميره منعه انه يتسلي معاكي , وهو عارف انه مش هيتجوزك , لا دلوقتي ولا قدام , وبالتالي عمل السبب  ده , علي اعتبار انها "حجة" مناسبة , عشان ميجرحكيش . .

 

و كأن التفسير الاول انه بالفعل بيحبك بس داس علي قلبه عشان ميعذبكيش , والتفسير التاني انه كان معجب بيكي بس حاليا مش حاسس بالاعجاب , فقرر انه ينهي العلاقة بهدوء , بدل ما يسيب جرح لا يندمل في قلبك .

 

و ايا كان انهي تفسير هو الصح , فلابد نقوله كتر خيرك , انه مسمحش لنفسه انه يتسلي بيكي , او انه يكمل في تواصل معاكي وهو عارف انه مش هيتجوزك , وقتها هتكون جريمته مضاعفة .

 

يعني ان كان في البداية انتو الاتنين عملتو ذنب التواصل الغير ضروري , فهو سريعا اتخذ قرار صحيح نشكره عليه  ,انه انهي العلاقة سريعا , قبل ما يكون فيه تطوير في المشاعر .

 

---------------------------------------------------------------------------

 

كل ده كان من وجهة نظره هو , ماذا عن وجهة نظرك انتي ؟

 

زي ما وصفت من شوية , انتي بنت متحفظة , مش بتاعت كلام مع شباب , ومش بتاعت نصاحب و نحب و نهزر , لان الوازع الديني و الخلقي عندك مش قليل .

 

ولما تواصلتي معاه , كان عندك نوع من "التقييم الغير دقيق" في نقطة انكو تساعدو بعض علي الطاعة و العبادة , وكنتي بتظني ان ده اسلوب سليم للتقرب من ربنا .

 

و اعجابك بيه بدأ يزيد , لان قليل ما تلاقي شاب خلوق , فيه تدين و جدية , والاهم انه مش باين عليه انه بيتسلي او بيصاحب , ده حتي مطلبش يشوف صورتك , واللي هي اول حاجة بتيجي في ذهن اي شاب .

 

ورغما عنك اعجابك بيه زاد ,و وصل لمرحلة الحب , خاصة لما كان الكلام رايح في اتجاه الارتباط الرسمي والزواج , مش المصاحبة ولا التسلية .

 

ولأن البنت بطبيعتها بتكون حالمة , وخيالية شوية , فانتي موضعتيش في حسبانك العواقب الحياتية الحقيقية , واللي اهمها السبع سنين اللي قدامه علي ما يقدر يكون نفسه و يكون قادر انه يرتبط رسميا .

 

لان كتير من البنات بتنتصر للحب في عقلها عن الواقع  ,فانتي كنتي بتظني ان العقبات ديه يسهل التغلب عليها , وان "حبنا هينتصر" , وكل المشاعر اللي من هذا القبيل .

 

فهو لما ألقي عليكي قنبلة "الانفصال" انتي مكنتيش مصدقة ان الحلم هيطير بالسهولة ديه , وكنت تتمني ان هو يكون اكتر صبر , او اقل واقعية .

 

ولأن كبرياء الانثي و حيائها يمنعها انها تقول كلام صريح , فانتي ضغطتي عليه بشكل غير مباشر , عشان يكمل علي العهد اللي بينكم , و كان في عقلك انك مستعدة تنتظريه ولو العمر كله , بس هو كان حاسم .

 

 

--------------------------------------------------------------------------------

 

فانتي حاليا حاسة بمزيج من 3 مشاعر مختلفة  : الصدمة , الحزن , الغضب .

 

الصدمة اللي جالتك من تبخر الحلم فجأة , ومن انهيار الأحلام الوردية اللي كانت في عقلك , ومن القرار اللي حصل بين يوم و ليلة .

 

و الحزن اللي اصابك كان بسبب اختفاء الشاب اللي يصعب الحصول علي مثله , ومن ضياع السعادة اللي كنتي معشمة  نفسك بيها طوال حياتك .

 

والغضب بسبب كرامتك المهدورة , ان هو اللي رفضك مش انتي اللي رفضتيه  ,بل وان انتي لما الحيتي عليه , وكسرتي كبريائك عشانه , هو مغيرش رأيه , واصر علي موقفه .

 

ده اللي جعلك دلوقتي تشعري انك مش طايقاه , ومش مستحملة حتي تسمعي اسمه او تشوفي صورته .

 

بس الغضب اللي حصلك ده , لا يتعارض مع انك لسة للأسف بتحبيه  .

 

او عشان نكون أكثر دقة , انتي حبيتي المشاعر اللي حسيتيها معاه  ,مش حبيتيه هو .

 

وكنا قلنا كتير ان الحب بييجي بالعشرة و الاحتكاك و المعاملة , اكيد مش من الشات او مقاطع الواتس .

 

والتلات مشاعر ديه مجتمعة , دمرتك نفسيا , وجعلتك مش طايقة الحياة ولا المذاكرة ولا الكلية ولا الفيس ولا اي حاجة في الكوكب .

 

وخليني اقول ان الاثر ده متوقع , لان ديه اول تجربة حقيقية في صدمة المشاعر , غير ان حلمك كان كبير , فالاثر مش هيكون قليل .

 

بس خليني اطمنك ان الاثر ده مش هيستمر كتير , حتي لو انتي ظنيتي انه هيستمر للابد .

 

و كمان من الطبيعي انك تشعري بالغيرة عليه , و ان تلتهمك نيرانها المستعرة لو ان اي بنت  تواصلت معاه سواء وجها لوجه , او علي الشات , او حتي بلايك علي الفيسبوك .

 

لان اكبر سبب للغيرة  ,ان الواحدة تتخيل الشخص اللي بتحبه (حبيب , زوج , خطيب , صديق) , تتخيله وهو بيكرر اللي كان بيعمله معاها , مع واحدة تانية .

 

فلو انتي بس فكرتي انه ممكن يتواصل مع واحدة تانية  , ويصحيها للفجر , فمع بساطة الامر الا انه كفيل انه يحرقك تماما بنيران الغيرة .

 

خاصة ان الانفصال بينكم مكانش مثلا من خيانته , او من قسوته  ,او من سوء خلقه , بل كان بسبب عوائق معينة  ,انتي شايفه انها ممكن تتحل , وهو شايف انها مستحيلة .

 

فالانفصال اللي حصل من ناحيته هو , هيجعلك تعيشي في لهيب الغيرة فترة , لغاية لما اعصابك تهدي شوية , وتبدأي تتخلصي من آثاره في قلبك تدريجيا .

 

--------------------------------------------------------------------

 

وبالتالي احنا ممكن نقولك عدد من النصايح المهمة , واللي حاولي تطبقيها علي قد ما تقدري  .

 

• أولا انتي في سن حرجة و متعبة و مرهقة , ليكي و للي حواليكي , فلازم تتعاملي معاها بنوع من الهدوء والعقلانية , عشان تتجنبي الوقوع في اي مشكلة بأثر عميق , ولازم تراعي انك رغما عنك بتمري بتغيرات عنيفة في عقلك و ذهنك و كيانك و مشاعرك وحالتك المزاجية

 

• قراره صح , التواصل لازم يتقطع , لان مفيش امل علي المدي القريب ان يحصل ارتباط رسمي , لا هو غني عشان يقدر يفتح بيت دلوقتي , ولا انتي او اهلك هيوافقو انك تتجوزي في اوضة في بيت ابوه , ولا ينفع انه يسيب الكلية عشان يشتغل بشهادة ثانوي , ولا ينفع انك تنتظر 7 سنين علي أمل واه ٍ و ضعيف .

 

• اتفقنا ان اللي حصل غلط , وان مفيش اي مبرر للتواصل بين اي بنت وولد , فارجوكي متكرريش اللي حصل لاي سبب , لاي سبب كان , لو فيه شاب شايفاه محترم و عايز يتقدم حقيقي , يبقي تقابليه مع حد من اسرتك , حتي لو تتقابلو برة في الاول , مرة و مرتين وبعدها ييجي البيت , اي طريق غير كدة هو بعيد عن منهج ربنا اللي رسمه لينا , وامرنا بيه . 

 

• نفس الكلام يتقال علي الشات والواتس و غيره من مصايب التليفون , اللي دمرت بيوت ياما , بوظت عقول بنات لا تحصي

 

• اطمني ان الاحساس بالضياع التوهان و الحزن الغضب والكرامة المهدورة , اطمني انه مش هيستمر , اسابيع قليلة و هيبدأ يختفي تدريجيا  , انا عارف انك شايفاه شئ غير محتمل , وانه هيكون للابد , بس احنا عارفين مشاعر المراهقات اكتر منك , واحنا نقدر نشخصك اكتر ما انتي تشخصي نفسك , اطمني انه هيختفي تدريجيا , وبعد كام شهر انتي هتقولي لنفسك , انا ازاي كنت ساذجة كدة لما كنت باحسب ان المشاعر المؤلمة ديه هتستمر  ؟

 

• عارف ان الفترة دية مؤلمة , بس ركزي في  مذاكرتك , الامتحانات شغالة , وحرام تضيعي سنة من حياتك بسبب شئ زي كدة , ادفني مشاعرك في المذاكرة , وثقي ان الموضوع هيتحل تدريجيا .

 

• من الحاجات اللي ممكن تخفف عنك شوية , انك ترسمي له صورة اكتر واقعية , عن الصورة الحالمة اللي ممكن تكون في بالك , وتعرفي ان فكرة الزواج منه ممكن متكونش بالروعة اللي انتي كنتي شايفاها , وان هو اكيد فيه عدد من العيوب اللي انتي مشفتيهاش لسة , وممكن كانت بالفعل تكون السبب في تعاستك للابد , لما تحطي ده في بالك هتعرفي ان ربنا كان رحيم بيكي لما جعل العلاقة تنتهي  .

 

• اعملي بلوك لصفحته , مش بس عشان التواصل , لكن كمان عشان متشغليش بالك بمين قاله ايه , ومين علق بكلام ايه عنده , حتي مشاعر الغيرة اللي انتي حاساها دلوقتي هتختفي تدريجيا , بس في حالة ان انتي عملتي ابعاد لكل شئ متعلق بيه عن ذهنك و بالك , اعملي بلوك حالا  متنتظريش

 

• وارد قدام انه يتجنن و يتواصل معاكي , ساعتها اياكي اياكي اياكي انك تفتحي باب التواصل تاني , ولا حتي عشان العتاب, ولا عشان اي شئ , اعملي بلوك فورا , ومتفتحيش الجرح اللي ما صدقنا انه يلتئم , ولو انتي عملتيله بلوك وهو دخلك من اكونت تاني , انتي امسحي حسابك علي الفيس و اعملي حساب جديد , ولو معاه رقمك علي الواتس اشتري خط جديد , اقطعي تماما كل خطوط التواصل معاه عشان انتي مش ناقصة جرح جديد

 

• عايزة حد يساعدك علي الطاعة , شوفي صديقة ملتزمة تتواصل معاكي بشكل مستمر , وياريت تكون قريبة من عقلك و تفكيرك عشان ميكونش فيه بينكم فجوة في التفكير , لكن انسي تماما فكرة شاب مرة تانية