العنوان : ما بعد الصدمة

القسم: #النفسي

الرقم: 34

السؤال:

 

انا عندي 19 سنه

 

مشكلتي اني مشاعري جافه يعني مبعرفش احن ع حد كتير ساعات بكون بحب الناس وساعات ببقا مش عاوزه اشوف حد خالص ولا عارفه ابقا كويسه مع حد

 

يعني مبيهمنيش حد لاني  خسرت كتير اوي ف حياتي , لدرجه اني بطلت احس

 

حتي آنا مبعرفش اعيط , بكون عاوزه بس مبعرفش

 

اتعودت  ع كدا طول عمري بعيط لوحدي بحزن لوحدي محدش بيحس بيا  ,حتي حنيتي مع الناس بقدر اقسي ع اي شخص

 

 

والمشكله التانيه مشاعري للجنس الاخر يعني ممكن واحد يتقدملي وابقا فرحانه جدا وموافقه وفجاءه احس اني رافضه نهائي الشخص ده

 

مفيش اسباب لرفض العرسان بحس فجاءه بخنقه كدا واني عاوزه اكون لوحدي  , انا دايما ببقا عاوزه اكون لوحدي

 

المشكله ف اني بحب اكون حره وشايفه الارتباط انه عدم حريه بالرغم من اني مش بخرج ولا ليا صحاب

 

خليني احكيلك عني اكتر

 

اسرتي بتتكون من بابا وماما واخواتي

 

كنت دايما بحس اني لوحدي واني هما بيحبو اخواتي اكتر مني  , بغض النظر عن الاشياء اللي كانت بتخليني احس كدا

 

كنت بحب تعليمي جداا وكان مهون عليا حاجات كتير

 

لكن بعد ماكبرت شويه كنت ف حدود 14 سنه ابن عمي اعترفلي بحبه انا رفضت طبعا لاني كنت طفله بس هو حاول معايا كتير لحد ما فغلا حبيته بقي بالنسبالي هو الدنيا

 

فضلت معاه لحد ما بقيت ف 3 اعدادي كنت معاه ع المُره قبل الحلوه شلت همو وقرفه وانا مبسوطه اهملت دراستي بسببه.

 

قبل امتحاناتي سبني وقالي انه بيحب بنت عمي واني انا كنت مجرد وسيله نسيان

 

اتوجعت اوي جزء كبير جوايا انكسر

 

وطبعا كان عندي امتحانات ومع وجعي جبت درجه مدخلنيش ثانويه عامه عقلي وقف عن التفكير حسيت اني بخسر عمزي كله ف للوقت ده

 

كنت عاوزه اهرب من الواقع ف اي حاجه علشان انساه

 

ف اتخطبت عشت اسوء علاقه ف الغالم بين مشاكل مع خطيبي ومع اهله وكميه قرف لا تطاق وهو كمان سبني جالي انهيار وكنت هتشل لولا ستر ربنا خد مهدات ومنوم علشان اعرف اعدي الانهيار ده يدون خساير بس للاسف فضلت صاحيه وكل الاحداث بتمر قصادي

 

المشكله اني انا بقيت حسه اني مش عايشه

 

مش عارفه افرح , مش عارفه احس بوجود حد , محتاجه احب ومش عارفه

 

بقيت خايفه من الارتباط , لا مش خوف , آنا مش عاوزه ارتبط

 

بقيت شايفه العالم كله واحد

 

متقوليش صوابعك مش زي بعضها , لاني هما مش صوابعي . ده عالم والعالم مخيف

 

آنا عاوزه اروح عند ربنا اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

كل اللي بتقوليه قريب شوية لكن مش متطابق مع واحد من الاضطرابات النفسية المعروفة  , واللي اسمه "اضطراب ما بعد الصدمة"  , وبالانجليزي (Post Traumatic Stress Disorder) او الاختصار (PTSD)

 

وده باختصار اللي بيصيب شخص , بسبب حاجة من اتنين , اما انه مر بتجربة مؤلمة جدا , او انه شاهدها حتي لو محصلتلوش .

 

انه يمر بتجربة مؤلمة  :  يعني مثلا واحد اتخطف او اعتقل بشكل قاسي , واحدة تعرضت لاعتداء علي شرفها , طفل اتعرض لأذي رهيب .

 

وانه يشوفها يكون يكون شاهد علي حاجة كارثة , مثلا حريق وشاف ناس بتموت فيه , شاف حادثة عربية متتنسيش  , وهكذا  .

 

و الشخص اللي بيمر بالتجربة او بيشوفها , بتبدأ معاه اعراض الـ "اضطراب ما بعد الصدمة " , بعد ما تنتهي التجربة , واحيانا بعدها بفترة .

 

يعني ممكن شخص يتعرض للاعتقال مثلا , ويتم الاعتداء عليه بطريقة وحشية , وبعد يخرج و يستقر و يهدي , و يمر كذا اسبوع , ممكن تبدأ اعراض الاضطراب ديه في الظهور .

 

 و ممكن تبدأ الأعراض بعد انتهاء المشكلة نفسها باسابيع , واحيانا بعد شهور طويلة , حسب نفسيه الشخص و قدرته علي التحمل .

 

ولأن انتي اتعرضتي لتجربتين مؤلمتين متتاليتين , فممكن يكون ده اللي صنع عندك المشاعر الرهيبة ديه , وقد يكون ده السبب في اصابتك بالاضطراب , او علي الاقل بمقدماته .

 

خدي بالك انتي ممكن يكون عندك شئ تاني , او معندكيش في الاساس اي اضطراب , لان مفيش اي طبيب او اخصائي نفسي يقدر يشخص حد من رسالة تتبعتله , لابد يقابله وجها لوجه و يسمع عنه تفاصيل اكتر , ويطبق معاه احد الاختبارات الخاصة بالاضطرابات المتوقعة .

 

و بالتالي انا هنا باتكلم عن احتمالية فقط , واللي هيحسمها هو ذهابك لطبيب نفسي .

 

 

 

• صعوبة النوم

• صعوبة التركيز

• الاحساس بموجة غضب احيانا

• الاحساس بالخوف الشديد احيانا

• عودة ذكريات الحدث المؤلم لكن مع عدم تذكر كافة تفاصيل الحدث

• احلام مزعجة مستمرة

• تبلد المشاعر

• قلة اهتمام بالمشاركة في انشطة المجتمع و الناس

• الاحساس بالعزلة

• الشعور باليأس

• الشعور بالاكتئاب

• الشعور بالتوتر

• بعض التصرفات العدوانية

• التفكير في (او محاولة) الانتحار

• صعوبة الاندماج في المجتمع

• تعمد تجنب اي شئ يذكرك بالحدث المؤلم

• الصداع

• التعامل بحذر مع الناس

• اضطرابات الشهية للاكل (الاكل الزائد او فقدان الشهية)

 

وبالتالي انتي قيسي نفسك علي النقط اللي فاتت  ,لو لقيتي عدد ملحوظ منها عندك , يبقي وارد يكون عندك بالفعل الـ (PTSD)  او انك في الطريق اليه .

 

لو لقيتي الاعراض ديه كلها بعيدة عنك , يبقي لازم الطبيب يحدد معاكي ايه نوع المشكلة بشكل مختلف , وبتطبيق اختبار نفسي مختلف .

 

واكتر نقاط استوقفوني في وصفك لنفسك , انك قلتي 3 حاجات خطيرة  :

 

• المشاعر الجافة

• عدم الرغبة في اي ارتباط

• التفكير في الانتحار

 

واللي هم مع بعض , ولما كمان نحط في بالنا ان حصلك صدمتين متتاليتين (ابن عمك + خطيبك) , ففورا لازم نفكر في الـ (PTSD) , ونخليه في بالنا لانه اكبر احتمال موجود

 

----------------------------------------------------------------------

 

طب و العلاج ؟

 

احنا كالمعتاد بنوصي بالذهاب لطبيب نفسي فورا , لان هو القادر علي كشف خبايا الموضوع , معرفة السبب الحقيقي للمشكلة , وكيفية الوصول للعلاج .

 

اكيد مش كل الاطباء كويسين , لكن فيه اطباء ممتازين , وبالفعل قادر علي تتبع المشكلة و انه يعاجلها بالكامل .

 

و ردا علي السؤال المتكرر لينا : قولنا يا ادمن علي طبيب كويس . .

 

احنا مش هنذكر ابدا اسم اي طبيب او عيادة , انتي اللي عليكي انك تبحثي بنفسك , وتشوفي فين تقدري توصلي لطبيب متخصص , ومفيش اسهل من استخدام جوجل للبحث عن اطباء جنبك  .

 

لكن احنا مش هنكون اداة دعائية لاي طبيب , زائد اننا منقدرش نتحمل مسئولية اننا نقول علي طبيب و يطلع فاقد الضمير , او عديم الكفاءة .

 

فلما بنقول "لازم تروحي لطبيب نفسي" فاحنا قصدنا ان عليكي انك تدوري , واكيد هتلاقي , وان ذهبتي لطبيب و طلع مش فاهم  فلازم تشوفي غيره , يعني العيب في شخص الطبيب مش في الفكرة اصلا .

 

-----------------------------------------------------------------------------------

 

فالذهاب للطبيب هي الخطوة الأولي , وبالتوازي ممكن احنا هنا نلقي الضوء علي بعض مفاتيح المشكلة عندك , واللي انتي من عندك ممكن تبدئي تحلي المشكلة بالتوازي  . .

 

 

 

 

• اول مشكلة هي المبالغة في الشعور .

 

فلما تقيسي  المقدار الحقيقي للازمة في كلامك , هتلاقي انه مش بالدرجة المهولة , لكن انتي تأثرك منه , وشعورك تجاهه اللي كان مختلف شوية  .

 

وارد يكون ده بسبب انك حساسة او عاطفية اكتر , وارد يكون لاسباب اسرية , وارد يكون ان احساسك بالامل  كان اعلي شوية , ايا كان , فالحل دلوقتي انك تعالجي النقطة ديه عندك .

 

لان بشكل ما انتي لسة في حياتك معرضة لعدد كبير من التجارب اللي ممكن تكون ايجابية او سلبية  , وبالتالي لازم تكوني مستعدة لتخطي اي عقبة مشابهة او اكبر منها , والا هتقضي حياتك كلها سلسلة من المتاعب النفسية .

 

الحياة بطبيعتها قاسية , ومليئة بالآلام المستمرة , والذكي هو اللي يعرف ازاي يتخطاها بنجاح مش يبكي امامها  .

 

فاول و اهم خطوة هي انك تغيري من طريقة تقييمك للمشكلة , زائد طريق تعاملك معاها ازاي , يعني تكوني اكتر هدوء , واكتر ثبات , واقل عصبية و تأثر , عشان تعرفي تتعاملي معاها.

 

 

وهنا في مشكلة مهمة عن الحساسية المفرطة ,  لازم تقريها .

​
 

------------------------------------------------------------------------------------

 

 

• ثانيا جفاف المشاعر

 

جفاف المشاعر بالطبع هو نتيجة للمشاكل السابقة  مش  سبب في ذاته , لكن هتفاجئي انك لما تحلي المشكلة ديه , هتلاقي ان نسبة من مشاكلك هتتحل فورا .

 

و علاج جفاف المشاعر , ببساطة هو "التدريب المتزايد للمشاعر الايجابية" . .

 

يعني ايه ؟

 

يعني لما الشخص تكون رجله مكسوره و تتجبس فترة طويلة , لما يفك الجبس و رجله تكون التئمت , مش بيعرف يمشي عليها فورا , لكن بيبدأ يتدرب و يحمل عليها شوية بشوية , و بشكل تدريجي , من بس التحريك , لأنه يقف عليها بشكل خفيف , لانه يمشي بالعكاز  , بعدها يمشي ببطئ , ثم المشي العادي , ثم الجري .

 

نفس الموضوع عندك , لو ان المشاعر الايجابية اللي احنا عايزين ننميها عندك (الحب , التعاطف , الشفقة , المواساة , الفرح , الحزن) , مع استثناء المشاعر السلبية (الكراهية , الحقد , الحسد , الانتقام) . .

 

المشاعر الايجابية ديه لو احنا عايزين نرجعها تاني , فلازم تتدربي عليها واحدة واحدة .

 

ازاي ؟

 

انك مثلا تروحي ملجأ ايتام  , هتلاقي نفسك لا شعوريا بتتعاطفي معاهم , انك تربي قطة , ده هينمي مشاعر الاهتمام و الرعاية و الحب , انك تزوري قرايبك (مشاعر المواساة او الحب) , تقرأي القرآن (مشاعر الحب لله و الخوف من غضبه) . .

 

و لو لقيتي ان لسة مشاعرك متبلدة مفيش مشاكل , انتي زي اللي رجله كانت متجبسة و مش عارف يمشي خالص , كرري و استمري في الانشطة , وهتلاقي ان مشاعرك بتفك شوية بشوية , زي اللحمة المجمدة اللي بتطلع من الفريزر , بتحتاج فترة علي ما تفك و ترجع طبيعية  .

 

هنا فيه مشكلة مهمة عن الاكتئاب ياريت تقريها :

 

​

-------------------------------------------------------------------------------

 

• الاختلاط بالمجتمع  . . .

 

انتي ذكرتي انك بتحبي تكوني لوحدك , وديه مأساة و مصيبة , لان العُزلة هي البداية الحقيقية لاغلب الاضطرابات السلوكية للشخص .

 

لازك تجبري نفسك علي الاختلاط بالناس , وابدئي بالناس اللي بتعزيهم جدا , او صديقاتك القريبين , و هتلاقي انك بتندمجي واحدة واحدة .

 

متنسيش ان العُزلة هي اللي هتجعلك تفكري تاني وتالت و عاشر في الازمة القديمة , وبالتالي مش هتخرجي من الفخ بتاعها ابدا

 

هنا فيه مشكلة مهمة عن العزلة .

 

-------------------------------------------------------------------------------

 

• فكرة الارتباط . .

 

ايوة انتي رافضاها دلوقتي ,  بس مين قالك ان ده صح  ؟

 

هتعيشي راهبة طول عمرك ؟ هتجيبي كهف و تعيشي فوق جبل ؟ ؟

 

الزواج و هو ان مكانش نقطة "حياة او موت" للشخص , فهو الشئ اللي بيخفف علي الانسان متاعب الحياة , وبيجعل جنبه شريك لحياته يساعده وهو صغير , ويسنده وهو كبير .

 

و معقولة عشان شفتي نموذجين , يبقي خلاص الناس كلها كدة  ؟

 

طبعا صوابعك مش زي بعضها , وطبعا فيه ناس محترمة و متربيين .

 

ثم مين قالك  انك اساسا عملتي اي نوع من الاختيار السليم مع ده او ده , خلينا نكون موضوعيين و نقول ان انتي عليكي جزء كبير من المسؤولية من الازمة ديه كلها .

 

يعني لما واحدة عمرها 14 سنة تسمع لشخص يقولها بحبك , وهو بالتاكيد مش هيكون اكبر منها و بالتالي في سن المراهقة , فالمشكلة فيكي انك سمعتي اصلا لانسان معدوم العقل او الضمير  .

 

ولما انتي صبرتي معاه سنين , معقولة مكانش باين فيه خالص انه مش جاد , ولا انه بيتسلي ؟

 

ولما هو باعك , انتي اللي هربتي علي اول واحد خبط علي الباب وخطبك , مين قالك توافقي علي شخص قبل ما تتعرفي عليه و علي عيلته  .

 

ثم هو يعني ايه اصلا خطوبة ؟ يعني فترة الاتنين بيتعرفو علي بعض من غير ما يكون فيه عقد رسمي  ,او حب حقيقي , فانتي من اول شهر لما شفتي ان معاملته زبالة و اهله متعبين  ,ليه مفسختيش فورا من غير ما تتأذي او قلبك يرتبط بيه . .

 

فانتي هتلاقي ان المشكلتين , وان كان الاتنين فيها تعاملهم زفت , فانتي اللي مكنتيش شايفه ده كويس , وكان ممكن تتجنبي المشكلتين بشوية حكمة و بصيرة .

 

مش بقول الكلام ده عشان اعاتب علي شئ من سنين , لكن عشان اوضحلك ان اي ارتباط  مستقبلي , هينجح فورا لو انتي ركزتي شوية , وعرفتي تعملي تقييم كامل و سليم للشخص , قبل ما ترتبطي بيه .

 

و بفرض حد جه اتقدملك و انتي لسة مش قادرة تحكمي عليه بالكامل , فمش ازمة ان يتم عمل خطوبة عشان تدرسيه , هي اصلا الخطوبة معمولة عشان ايه غير كدة ؟ ؟

 

فلو انتي في فترة التعارف او  الخطوبة لقيتي التعامل صعب , فالباب يفوت جمل , وياخد حاجته و مع السلامه يا ابن الناس , مش عايزينك , وديه مش ازمة في حد ذاتها .

 

قفل باب الارتباط , معناها فتح كل ابواب الشياطين عليكي , ومعاناه العزلة و الانطواء لسنين طويلة, وديه هيدمرك نفسيا .

 

تخيلي وانتي عمرك 40 سنة , قاعدة لوحدك وشك في وشك الحيط , وكل معارفك و قرايبك وصديقاتك متجوزين و معاهم اولاد  ,وانتي مش وراكي الا الاكل و الفيسبوك , هل ديه حياة اصلا ؟ ؟

 

لو ان الواحدة متجوزتش عشان مجاش الشخص المناسب , يبقي خلاص ده نصيبها , لكن انها تقفل الباب علي اعتبار ان كل الرجالة "زبالة" , فديه مشكلة عند الواحدة لازم تتحل 

 

                   --------------------------------------------------------------------------------

 

ديه كانت مجموع من النصايح , اللي اتمني يكون ليها تاثير ايجابي عندك في اتخاذ قرار يساعدك , حاولي تطبقيها بقدر الامكان , هتلاقي النتيجة متغيرة ان شاء الله