العنوان : أنا أكره المدرسة

القسم: #الاجتماعي

الرقم: 22

السؤال:

 

لو سمحت عندي ابن أختي في الصف الثاني  الابتدائي وهو مش بيحب المدرسه وكمان مش حابب يقرا كل اللي عليه  يطلع طاقته في كمبيوتر العاب كدا بس

 

مامته اللي اختي عصبيه جدا مش بتتكلم غير بالشتيمه  للولد  وابوها افظع  من امه مفيش غير اهانه وضرب للولد لدرجه اني حاسه اني الولد كارهم من اللي بيعملوا ابوه

 

كل لما مايكتبش  الواجب يضربه ضرب غباء وبعدين انا لم بفتح بيقولك ده ابني وانا حر

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

في اغلب دول العالم المتحضر , ممنوع تدريس اي شئ جاد للأطفال قبل عمر 9 سنين . .

 

و في كتير من دول اوروبا , مفيش حاجة اساسا اسمها حضانة ولا كي جي , وبتكون مجرد مكان يتسلي فيه الطفل و يلعب . .

 

و بعض الدول لغت من الاصل اي حاجة اسمها واجب . .

 

و احنا لسة بنجري ورا اصنام صنعها غبائنا المستمر , وبنحاسب ولادنا عليها  . .

 

 

المشكلة زي ما انا شايفها من 3 اجزاء مهمة . .

 

• مأساة الواجب و التعليم

• العاب الكومبيوتر

• عصبية الاباء

 

------------------------------------------------------------------------

 

الشق الأول في العذاب اللي بيتلقاه طفل في 2 ابتدائي , في نظام تعليمي متخلف , حتي في المدارس الخاصة و اللغات  . .

 

النظام اللي بيجعل الواجب هو هدف في حد ذاته  , مش وسيلة للتعليم و الاستفادة . .

 

نظام يجمع بين بيروقراطية غبية , و اساليب عفي عليها الزمان , و سادية عند بعض المدرسين , ولسان حالهم بيقول  : انا وجدنا آبائنا كذلك يفعلون

 

والمدهش ان الاب او الام نفسه  ,لو شاف ابنهم جاي من غير واجب يقلق , ومش بعيد يروح المدرسة يلوم في المُدرسة , انتي ازاي جالك قلب تخلي الواد يروح من غير واجب يمقق فيه عينه , ويتعقد شوية من المذاكرة , ميصحش كدة  . .

 

الواجب هو من الاصنام البائدة اللي معششة في مدارسنا الازلية في بلادنا المتخلفة (خلينا نقول النامية عشان محدش يتقمص) واللي المدرسين شايفينها  شئ لابد منه , ومن غيره لن تستقيم العملية التعليمية من الاساس  . .

 

ولو ان مدرس حاول يطور من نفسه  ,وعمل واجب غير تقليدي , يعتمد علي الابتكار و الابداع و الفكر الجديد , لهوجم من المدرسين و ادارة المدرسة و الاباء علي حد سواء . .

 

اذكر ان صديق ليا مقيم في كندا , فلما اتصلت بيه قالي معلش انا مشغول شوية دلوقتي , عشان بساعد بنتي انها تبيع مناديل في الشارع . .

 

مفهمتش منه حاجة , ولما كلمته بعدها  قالي ان بنته (9 سنين) كان الواجب بتاعها اليوم كالتالي  : انها تستلم عدد 10 عبوات مناديل من مؤسسة خيرية معينة , ومهمتها انها تقف في الشارع , وتوقف المارة عشان تقنعهم انهم يشترو باكو المنديل بمبلغ 10 دولار كندي , وهو بالطبع اعلي بكتير من تمنها . .

 

و الهدف  ان المبلغ ده بالكامل بيروح للمؤسسة الخيرية  , فلو ان تمن الباكو نص دولار و هيتباع ب 10 , فالفرق بينهم هو عائد للمؤسسة عشان تصرف علي اعمالها الخيرية . .

 

بس يا ستي , اهو ده مثال للواجب اللي علي طفلة في كندا  . .

 

نشاط اجتماعي مميز , يجعل الطفل يشعر بالمسؤولية و العمل الخيري , و مواجهة الناس , والايجابية و التطوع , وممكن نتكلم 3 ساعات بنمدح في فكرة صغيرة عبقرية زي كدة . .

 

وحتي لما يتواجد واجب تقليدي من مواد عادية , فده لان اساسا الطالب اتشرح له بشكل مكثف و دقيق في المدرسة, والطالب عنده امكانية دخول علي موقع المدرسة اي وقت عشان يعمل تحميل للمحاضرة و يتابع مع اصدقائه و هكذا . .

 

فالجريمة التعليمية في مصر و باقي البلاد العربية لسة مستمرة  ,الا باستثناءات قليلة جدا للاسف . .

 

 

 

و ان كان الاباء بيعملو جريمة في حق ابنهم بانهم يضغطو علي اعصابه في نقطة الواجب , فهما بيعملو جريمة تانية انهم يسبوه ضحية لالعاب الكومبيوتر , و اخواتها في الموبايل و التاب . .

 

نسبة قليلة جدا من الالعاب ديه اللي بتكون مفيدة و تثير الانتباه و تنمي الذكاء ,و السواد الاعظم منها بيعمل تدمير كامل لكل قدرات الطالب الذهنية و العقلية و الفكرية . .

 

و الاسوء انها بتدمر حاجة غالية جدا عند اي طفل ,و هي الخيال . .

 

لو ان الاباء يعرفو الاثر المخيف اللي  بتصنعه الالعاب علي اللاب او الموبايل او التاب , ماكنوش سابوه لحظة واحدة اضافية  . .

 

خلينا بس نسرد عدد من المآسي اللي بتصنعها العاب الكومبيوتر :

 

• متلازمة ادمان الالعاب

• الانفصال عن الواقع

• صناعة الطفل المنطوي

• صناعة الانانية في الطفل

• قد تصنع مهارات الاحتيال و الكذب

• الانشغال عن اشياء اهم

• الضرر الصحي علي الجسد من الجلوس الطويل بلا حركة

• التاثير علي النظر

• التاثير علي الجهاز العصبي و صناعة التوتر والقلق

• تعليم الطفل لذة العنف و التدمير وارتكاب الجرائم

• تدريبه علي السلوك العدواني

• تعليم الطفل ضياع الوقت

• التأثير السلبي الخطير علي الذاكرة

• قتل الخيال لدي الطفل

 

والقائمة لن تنتهي . .

 

يعني ببساطة اختك و زوجها بيعذبو ابنهم في المدرسة , ولما بيجعلوه يستمتع في وقت فراغه , فهو بيستمتع بشئ  بيدمره بشكل مستمر . .

 

 

 

واللي بتترجم في ضرب و اهانة و شتيمة لا تنتهي  . .

 

و احنا اتكلمنا بالتفصيل عن في اكتر من  سؤال عن العصبية و ضرب الاطفال المستمر , والاذي الرهيب اللي بيحصلهم بسببه  ,فارجوكي شوفي اللينكات ديه و تابعيها عشان تعرفي مقدار الجريمة اللي بترتكب في الطفل . .

 

 

 

انا هذكر هنا الحل المثالي , اللي انا كنت هطبقه لو كان ده ابني , وانتي عليكي انك تعملي المستطاع انك توصلي الرسالة ديه لاختك , اما انها تشوف البوست بالكامل , او تقنعيها واحدة واحدة باي اسلوب شايفاه مناسب . .

 

انقاذ الوضع الحالي هيتمثل في عدد من الخطوات و هي :

 

• التوقف تماما عن ضرب الطفل و اهانته , الضرب ليه قواعد و شروط و كمية قليلة جدا , تجعله نادر الاستخدام اصلا,  و الأب او الأم اللي بيستمرو في ضرب ابنهم بشكل دائم هما ببساطة بيصنعو منه وحش مخيف , هيفترسهم عن قريب

 

• لابد من تخفيف الضغط علي اعصاب الاولاد في موضوع الواجب , يعني ان كانت ادارة المدرسة معندوهمش الوعي الكافي لتنمية ذكاء الطفل , فلازم الابوين يكونو فاهمين و مقدرين ده

 

• لازم الابوين يساعدو الطفل في انهم يجعلو الواجب الممل هو شئ ابداعي  , يعمله و يمخمخ فيه بذكاء و فكر متجدد , مش مجرد بينقل و خلاص

 

• فورا لازم الطفل يمتنع عن العاب الكومبيوتر ,و ان الاب و الام يختار عدد محدود جدا من الالعاب اللي بتعمل تنمية للذكاء و الانتباه و الخيال , وحتي الالعاب ديه تكون بوقت محدد ميزيدش عنه

 

• لابد يكون فيه تعويض من الابوين للطفل , بدلا من غياب الالعاب , ان يكون فيه العاب يدوية الطفل يمارسها , يمسك القطر و يفكه و يركبه تاني , يكون اشكال معينة , يرسم   ,مكعبات , وياريت يكون بمشاركة الاب او الام

 

• لابد علي الابوين انهم يعالجو الاثر السلبي  الخطير اللي هما صنعوه داخله تجاههم من ضربهم المستمر الفترة اللي فاتت و عن طريق انهم يقربو منه اكتر , ويروحو رحلات عائلية لامكان مختلفة من غير اي ضغط عليه

 

• لابد ان الابوين يتعملو مهارة تربية الابناء و تقويمهم  , من غير استخدام الضرب تماما , مع الاستثناءات القليلة , ويكون عندهم الوعي لكيفية مزج الحزم بالقوة بالحب بالحنان بالعقاب في اوقات متناسبة مع بعض

 

 

لو بالفعل الاب و الام طبقو الكلام ده , هيلاقو ابنهم بدأ يتعافي تدريجيا من الاذي المستمر من عصبيتهم و ضربهم , وكمان من العاب الكومبيوتر . .

 

لازم الابوين يدركو مدي المشكلة اللي هما تسببو فيها , و عليهم انهم يحاولو اصلاحها . .

 

وانتي كخالته , متحاوليش تصطدمي معاهم بشكل مباشر في انقاذ الولد , لكن يكون الموضوع بالراحة و الاقناع البطئ . .

 

و عليكي انك تختاري الوقت و المكان و الظروف المناسبة لفتح الموضوع  , يعني لازم تكوني مع اختك لوحدها من غير وجود زوجها او ابنهم , وتتكلمي بالراحة و تعرفيها المشاكل و حلها

 

لو هي تفهمت , هي تكلم جوزها و تتفق معاه علي اسلوب مختلف في التعامل مع الطفل

 

بالتوفيق يا رب