العنوان : التعامل الصعب

القسم: #الاجتماعي

الرقم: 62

السؤال:

 

 مشكلتي مع ابني انو مش بيسمع الكلام ومش بيحب يذاكر ودائم بيعاند مع اخواته هو صعب التعامل معه عاوز اللي في دماغه وفي المذاكرة دائما بيطلع عيني

 

هو عند و ٦ سنين

  

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

  

اهلا بيكي يا فندم

 

في البداية مهم تقري المشكلتين دول , لانهم مرتطبين كتير بسؤالك

 

ديه بعنوان  : ابني لا يحترمني

 

وديه بعنوان : طفلي العنيد

 

 

و كلامنا هيدور علي نقطتين اساسيتين :

 

• المذاكرة

• التعامل مع الطفل العنيد

 

-----------------------------------------------------------------------------------

 

بالنسبة للمذاكرة  , انا شايف انه 6 سنين , يعني في اولي ابتدائي  و ده معناه انه فعلا لسة صغير .

 

كتير من الدول الدراسة بتبدأ عندهم من 7 سنين , و كمان بتكون دراسة مسلية و ممتعة , من غير الكلاكيع اللي بيوجدوها في المناهج المصرية .

 

و حتي لما بيكون فيه مادة علمية صعبة , فبيتم نقلها للطفل بشكل جذاب , من غير تعقيد او صعوبة .

 

و بيعملو تغيير كامل في مفهوم الواجب الدراسي , عشان يكون شئ مسلي لطفل بالعمر ده

 

ولو حضرتك قريتي معانا رسالة أنا أكره المدرسة , هتلاقي ان بالفعل معايير الطفل مختلفة عن اللي احنا بنظنه

  

 

فالطفل في السن ده , مش هيستحمل انه يقعد ساعات يذاكر , او يحل واجبات , وان كانت المدرسة معندهاش الوعي الكافي اللي يسمحلهم بتنشئة المهارات الابداعية لدي الطفل , فانتي كأم لازم تكوني عارفها او تعملي تنمية ليها

 

اكيد مش باقصد من كلامي انه يهمل المدرسة او المذاكرة , لكن تكون باوقات بسيطة , وتكون ممزوجة باسلوب جذاب يشجع الطفل طفل , وانه يقلل جدا من الواجب العملي .

 

حرص الابوين علي تفوق ابنهم و اجتهاده  , بيخليهم من اول سنة ليه في المدرسة  , يتعاملو معاه بنوع من الكهربا  و العصبية عشان يكون الأول , عشان يخلص كل دروسه , عشان يكون متفوق جدا , مع انهم مش عارفين ان ده بالفعل اصعب بكتير من مهارات و قدرات طالب بالسن ده .

 

لو حريصة علي مستقبله و تفوقه , اهتمي اكتر بتنمية مواهبه , بتنمية خياله , بتنمية ابداعه , بتمنية مهاراته الاجتماعية , انه يتعلم مبادئ تحمل المسؤولية , انه يتعلم رياضة و يفرغ فيها طاقته , انه يتربي علي الاخلاق السليمة اللي هتصنع منه رجل قد المسؤولية لما يكبر .

 

اكيد مش هنسيب المذاكرة , بس متاخدش اكتر من وقتها , وميكونش فيه ضغط علي اعصاب طفل في سن زي ده عشان يقعد كذا ساعة قدام الكتاب , ده بالفعل اسلوب عقيم بيقتل خيال الطفل و ابداعه .

 

اهتمي بمذاكرته ماشي , لكن بالتوازي مع تنمية خياله , مع قراءة قصص , مع انه يرسم , مع انه يلعب مع اطفال  ,مع انه يروح جنينة و يجري فيها , مع انه يرتب سريره لما يقوم من النوم , لازم الخطوط كلها تكون بالتوازي , وميكونش فيه ضغط عصبي عشان موضوع المذاكرة لذاتها .

 

عارف ان كلامي ممكن ميعملش ارضاء للأب او الأم اللي شايفين المذاكرة شئ رقم 1 في الكون , بس انا باتكلم عن واقع بشوفه  ,وعن تجارب حياتيه , وعن خبرات مع مصريين و عرب و آسيويين و اوروبيين و امريكان , فيما يخص الحالة التعليمية , وازاي ان الضغط الرهيب علي الطفل عشان يذاكر , بيعمل عنده نوع من الكراهية التامة للمذاكرة , غير انه بيقتل خياله اللي هو اصل الابداع , واللي فعلا هيحتاجه عشان يتفوق في مجاله ايا كان هو ايه

 

 

 

الطبطبة  المستمرة مش هتنفع , والتحدي الدائم مش هينفع  , لازم يكون فيه توازن بين الشد و الجذب , الحزم و اللين في التعامل مع الطفل .

 

مرحلة الـ 6 سنين هي مرحلة متعبة شوية  ,لان الطفل بيبدأ تدريجيا يشوف ان الدلع اللي كان بيشوفه وهو طفل , وان الرغبات اللي كانت بتتحقق دايما , بيبدأ يشوف انها بدأت تختفي تدريجيا  , سواء مع وصول أخ جديد له , او مع دخوله المدرسة .

 

في رواية "السراب" لنجيب محفوظ ,  شفنا ان الطفل "كامل" كان متربي علي دلع بدرجة غير محدودة من أمه , حتي انه لما راح المدرسة , مستحملش يقعد فيها اكتر من اسبوع , واصر انه ميكملش فيها , وفعلا امه سمعت كلامه من حبها الغير معقول ليه , وخلته ميكملش في المدرسة .

 

فالسن ده , هو سن اصطدام الطفل مع رغبات لن تحقق , و قرارات هو شايفها قاسية و متعبة عليه , وهيبدأ بطبيعة الحال يتمرد علي الوضع ده , ويحاول استغلال حبكم ليه عشان ينفذ اللي هو عايزه .

 

فسماع كلامه شئ غير سليم , ولكن في نفس الوقت , كسر ارادته و اجباره علي كل شئ كمان شئ غير سليم.

 

لازم يكون فيه نوع من المزج بين اللي انتو عايزينه واللي هو عايزه , عشان من ناحية مينشأش بطريقة فيها "دلع" فيفسد لما يكبر , ولا بطريقة فيها جفاء و قسوة من التعامل الغير سليم معاه .

 

وبالتالي انتي لازم تحرصي علي كذا نقطة بالتوازي :

 

• لما يرفض شئ انتي عارفه انه مهم و مفيهوش تراجع , لازم يشوف منكم اصرار علي الامر , وان ده هيتعمل يعني هيتعمل , سواء عيطت او رضيت , عشان يعرف ان مفيش نقاش في الامر

 

• لما يرفض شئ انتي شايفه انه قابل للنقاش , وانه مش ضروري جدا , فاعملي موازنة في عقلك بين هل توافقي علي كلامه ولا تصري علي كلامك , بحيث يكون فيه توازن بين عدد المرات اللي تسمعي فيها كلامه , وعدد المرات اللي تنفذي كلامك

 

• لما ييجي يرفض شئ وانتي عارفة انه من باب الدلع (مش عايز اكل بطاطس طعمها مقرف) , وانتي عارفة انه بياكلها عادي اصلا قبل كدة , وانه بيتدلع  , ساعتها لا تجبريه ياكلها , ولا تسمعي كلامه , قوليله : خلاص براحتك , لو مكلتهاش مفيش اكل غيرها , وسيبيه تماما من غير ما تزعقي فيه , ولا تسمعي كلامه و تجيبيله اكل تاني , ساعتها لما يجوع مش هيكرر الكلام ده

 

• امزجي الاوامر بتاعتك بنوع  من الاقناع العقلي :  انا عارفة ان المذاكرة متعبة شوية ,بس انت عايز لما تكبر تبقي دكتور , ولا تشتغل حاجة مهينة عشان مش متعلم ؟  مش هتبقي دكتور ابدا الا لو ذاكرت و تعبت

 

• اعملي معاه اتفاق : (طيب نتفق اننا هنذاكر دلوقتي لمدة ساعة , وبعدها تقوم تلعب , اتفقنا ؟ ؟ ) , ولو هو نفذ الجزء الخاص بيه بالاتفاق اياكي انك تتراجعي عن وعدك , لازم تنفذي اللي وعدتي بيه والا هيفقد ثقته فيكي

 

• لو هو منفذش الجزء الخاص بيه بالاتفاق يبقي لازم ميلعبش , لانه لو هو منفذش الاتفاق ووجد انه كدة كدة هيلعب ساعتها مش هيذاكر تاني

 

• تجنبي ضربه او حتي الزعيق فيه الا للضرورة , استخدمي كبديل لعقابه حرمانه من شئ بيحبه , او انك تخاصميه و متتكلميش معاه لمدة يوم مثلا

 

• تجنبي اي عصبية قدامه , العصبية معدية , ووقتها هو كمان هيكون عصبي , والمشكلة هتتفاقم

 

• ابحثي عن المساحات المشتركة مع طفلك , يعني شوفي لعبة بحيث يحبها , وتكون في نفس الوقت بتوسع الخيال او بتنمي الذكاء , فديه حاجة هتفيده , وهتعجبه في نفس الوقت