انه هو بيحب لما يتكلم معايا  ,يقول كلام غزل و مدح , واحيانا بيزودها . والمشكلة ان ده بيحرجني جدا

ومرة اتكلمت معاه و قلتله ان انت كدة بتحبني لجسمي مش لروحي , فاتضايق كتير , ومن ساعتها مبقاش يقول حاجة زي كدة 

انا خايفة انه يروح يتكلم مع واحدة تانية طالما انا رفضت الكلام في الموضوع ده 

ايه الحل خاصة اننا مخطوبين من فترة طويلة و لسة قدامنا شوية علي الجواز

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة  :

شوفي يا ستي . . 

شرعا  , مفيش اي شئ يحل في فترة الخطوبة , وهو محرم قبلها . . 

 

يعني ايه ؟ ؟ 

يعني لو "عادل" , "سعاد" مخطوبين , فمفيش اي شئ يقدرو يعملوه بعد الخطوبة , لو كان هو اصلا محرم علي اتنين غرب عن بعض  . . 

 

يعني لو كان ولد مينفعش يمسك ايد بنت متقربلوش , فمينفعش عادل يمسك ايد سعاد . . 

لو كان مينفعش يقعد معاها لوحدة في مكان , فبرضه مينفعش عادل يقعد مع سعاد . . 

لو كان مينفعش يشوفها محجبة بس حاطة مكياج يبقي نفس الحوار لعادل و سعاد . . 

و نفس الكلام يتقاس علي : البرفان , البلوزة , يروحو السينما , يروحو النادي , وهكذا . . 

 

ربنا شرع هذا الأمر , لأن الخطوبة هي وعد بالزواج مش اكتر , فلما انا اروح اخطب سعاد , وانا عارف انها اتخطبت قبل كدة , هكون متأكد ان كل اللي دار بينهم , هو نفسه اللي بيدور بين ولد و بنت ميعرفوش بعض في الشارع , فاكون مطمن . . 

والله بقي  , هو بيحبك و بيموت فيكي , ومش قادرين تستغنو عن بعض , ساعتها يتم كتب الكتاب , وتقعدي معاه بشعرك و ببرفان و تروحي السينما معاه , ويوصلك للنادي وكل حاجة . . 

لكن قبل كتب الكتاب , اي شئ من الاشياء اللي بتحصل كتير للاسف بين المخطوبين , بتكون حرام فورا  . . 

 

طب ماذا عن الكلام  ؟ ؟ 

اكيد الكلام في ذاته مش محرم , بل وانه يزورها في البيت اكتر من مرة , وانه يقابلها في الشارع (ويكون معاها اخوها الكبيراو ابوها مش اختها الصغيرة ) , كل الامور ديه حلال بل و مطلوبة , عشان يتعرفو علي بعض بشكل كامل . . 

و لأن الواتس و الفيس قربو الدنيا  ,فرغما عنا الشات والمكالمات بيكون من اهم عوامل التواصل بين الخطيبين . . 

 

و هنا لازم الفرامل تشتغل . 

لأن نسبة كبيرة من الكلام اللي بيتم بين المخطوبين (وللأسف بين الصحاب كمان) هو مأساة كبيرة , و بيجر عدد من الذنوب لا يعلمه الا الله . . 

ربنا سبحانه و تعالي أمر امهات المؤمنين في الآية 32  سورة الأحزاب (فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ)

عارفة يعني ايه "تخضعن" ؟ ؟ 

 

يعني تقولي كلام محتشم ومفيهوش اي تجاوز , بس بطريقة "ناعمة" شوية . . 

يعني الاية بتحذر من ان يتقال كلام عادي جدا , بس بطريقة فيه جاذبية لقلوب الرجال . . 

يعني لو سعاد قالت "ازيك يا عادل عامل ايه , يارب الوالدك تكون بخير النهاردة" , لو قاتلها بس بشوية "حنية و دلع" يبقي حرام . . 

أومال  لما يتكملو كلام حب عفيف يبقي عامل ازاي ؟ ؟

 

طب لما يتكلمو في غزل صريح , نقول ايه علي ده ؟ ؟ 

شرع ربنا فيه خطوط واضحة , واحنا اللي بنحب نعمل نفسها مش عارفينها , بينما الكلام باين جدا للي عايز ياخد باله . . 

لو انتو مش قادرين , يبقي مفيش حل الا كتب الكتاب , وتأجيل الدخلة للمعاد المناسب , مش عايزين تكتبو الكتاب يبقي التعامل فيه تحفظ و احترام تام , سواء من ناحية نوع الكلام او الاسلوب 

 

---------------------------------------------------------------------------

 

وبالتالي اللي هو كان بيعمله قبل كدة غلط تماما , وانتي كنتي صح لما قلتيه يتوقف . . 

مش بس انه يقول كلام "صريح" شوية , ده حتي لو قلتو كلام عادي "اداء مصر في كاس العالم" بس باسلوب فيه نعومة و انوثة . يبقي حرام . . 

لو بالفعل عايزين رضا ربنا سبحانه و تعالي يلازمكم في كل خطوة من خطوات ارتباطكم , يبقي لازم تحرصو علي طاعته بشكل مستمر , واولها التعامل بينكم حاليا   . . 

 

فطلبك انه يتوقف من الكلام ده كان صح , وهو كتر خيره انهم تفهم ده و اتوقف فعلا . . 

دلوقتي انك تشاوري عقلي انه يرحع لنفسك الكلام , طبعا فكرة غير صحيحة ابدا . . 

فيه قاعدة شرعية بتقول : ما عند الله لا يُأتي الا بطاعته ,  يعني بالفعل لو عايزة ربنا يرزقكم البركة في حياتكم مع بعض , فمتسلكيش اي طريق فيه بالفعل حرمانية , لانك مش هتوصلي ابدا . . 

 

الصح كالتالي : 

متطلبيش منه انه يقول الكلام ده تاني  , وهو ميرجعش ليه لاي سبب , ولو نسي و قال حاجة مش مناسبة تفكريه فورا , ولو استمر تقفلي الكلام لغاية لما يرجع لعقله . . 

 

وفي نفس الوقت لابد من التحكم في الكلام بينكم في حاجتين : المحتوي يكون مناسب , والاسلوب يكون مفيهوش ضحك و هزار و "انوثة" , الحاجات ديه وفريها لما تتجوزو بالفعل . . 

لو مش مستريحة للكلام , او شايفه انه "حنبلي" شوية . سيبك من كلامنا خالص , وابحثي عن "الضوابط الشرعية للكلام بين الولد و البنت"  وهتشوفي قصدي ايه . . 

 

ولو انتي خايفة من انه يكلم واحدة تانية او يجبها طالما انتي قفلتي الباب , فهنا لازم تتأكدي اساسا من مقدار الوازع الديني اللي في عقله قد ايه  ؟ ؟ 

يعني هو لو من نوع الشباب , اللي ان متكلمش كلام حب مع خطيبته , هيروح يدور علي صديقة تانية , تبقي مشكلة كبيرة عنده ,  وعلاجها مش انك تتكلمي معاه بكلام حب ابدا , لكن انه يغير من نفسه . . 

طلبك صح , متتنازليش عنه , وثقي ان ربنا هيحفظه بعيد عن شياطين الانس و الجن لغاية لما تتجوزو قريب

​