العنوان : أبواب الشيطان

القسم: #العاطفي

الرقم: 17

السؤال:

 

السلام عليكم

 

لو سمحتم انا في صديقة ليا هي منتقبة وملتزمة جدااا بتحب الهزار والضحك جدااا (مع البنات فقط)

 

والدها واخواتها الولاد مش حنينين معانا مبيتعملوش معانا علي انها بنت ومحتاجة كلامة يزود ثقتها بنفسها ويحسسها بأنوثتها بيتعملوا معانا كأنها راجل يمكن في مصالح البيت اللي هما مفروض يقوموا بيها بيخلوها واخواتها البنات يعملوها

 

بتقولي ممكن لو مشكلة في البيت روحي اعملي كذا لسه بتقولي انه كان عندهم مشكلة سباكة في البيت طنشها لحد مخلوها هي اللي تكلم السباك وتجيبه البيت واخوها قاعد فشقه قصادهم مجاش حته ولا وقف مع السباك وهو بيشتغل كانت سيباه لوحده شغال في المطبخ وهي والدتها واختها في الصالة فتحين باب الشقه اللي في وش شقة اخوهم وحاسبته وكل حاجة كانها راجل

 

 ايجار الشقة هي اللي بتدفعه من شغلها وحتي طلبات البيت هي اللي بتحبها.

 

 كارهة الرجالة جداا لدرجة انها بتتعامل بشكل وحش مع الرجالة ممكن يكرهوها من ردها عليهم مبتلبس مثلا بيجامة قدام باباها واخوتها الولاد ع طول اسدال صلاة حتي وهي ف البيت ..

 

المهم انها ف الشغل كان المدير بتاعها وهو متزوج ومخلف مكنش ف بالها خالص بس كان بيلقح كلام ونظرات ليها انها جميلة (مع انها منتقبة بس كان مرة شاف ايديها من غير جوانتي ) وكده لفت نظرها ليها حسسها بانها بنت ف الاول كانت كارهة جدااا

 

 بعدها بفترة لقيتها بتقولي كلام حلو عنه انه جميل وروحه حلوه وظريف بس بقولها تتجوويه وكده عشان اعرف تفهمها قالت لي لا بكل ثقة كانها مش لسه بتمدح فيه  , وبعدها بيومين بتقولي انه عمال يقول كلام انه ولاده عنده اغلي حاجة في الدنيا وهما احسن حاجة في حياته (كله كلام تلميح مش بيتكلم معها بشكل مباشر ) ..

 

بعدها بحوالي ٣او٤ شهور بعتتله طلب صداقه وطلبت منه حاجة بخصوص شغلها بس هي مكنتش بتتحجج هو فعلا كانت حاجة ضرورية ليها وهو الواحد اللي ممكن يساعدها فيها وهو قبل بس رد عليها بطريق مش كويس ع اساس انه فاهم انها بتتلقح عليه لكن لا هي صحبتي وانا عارفها ولو كان في حاجة زي كده كونت همنعها بالعكس كان لاهمية الموضوع ده انا شجعتها انها تبعتله

 

بس المهم ادها وعد انه يساعدها ومنفذش هي معملتش بلوك ولا حاجة رغم اني قولتلها لكن هي دايما تقولي والله وجوده زي عدمه خليه يفهم اللي يفهمه بس كل شوية لونزلت حاجة يعني هي من باب الترفيه ممكن تزل حاجة بتهزر او كده احنا غاهمنا عشان عرفتها بياخد الكلام عليه و بيرد بحاجات انه بيحب مراته واولاده كانها لتخطفه منهم. ..

 

المشكله انه لو عملت بلوك في حاجات بتنزل مهمة ع صفحته بخصوص الشغل وده هيعملها مشكلة ده غير انه هيفهمها غلط وانها فعلا زي ما هو فاهم وساعات انا بحس انه هو بيعمل كده قاصده يخليها تحبه بس ويعذبها قصاده ..

 

هي متستهلش كده كفاية عليها اللي هي فيه مع العلم انها مبتكلموش خااااالص هو صديق ع الفيس وهي صادقة معايا جدااا كل حاجة بتحكيهالي بادق التفصيل  ....

 

انا مش عارفه اساعدها اوي بحس اني كلامي بيوجعها لما بقولها هو فاهم غلط طلعيه بره حياتك بتقولي هو برة اصلا صدقيني انا لو بحبه كان زماني كلمته انا اللي بحلم بيه في حنيته ع مراته بس لكن بوستاتي عن الحب الزوج دي الحاجة اللي بتخليني احسن بنفسي بس واني بنت ورقيقة و اني بحس ..

 

بجد انا بتقطع من جوايا عليها لكن نفسي اريحه مش عارفه ..ممكن تساعدوني بس رجاء بلاش نشر و الرد يكون خاص و شكرا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله . .

 

نبدأ كالعادة بالتشخيص المختصر للرسالة  : صديقتك مظلومة , نتيجة ظروف اجتماعية مؤلمة , وأفراد اسرة يتسمو بالحماقة , لكن هي تخطت عدد من الحدود , واللي مكانش المفروض تتخطاها , وكالعادة , الظروف اللي عاشت فيها , لا تبرر الخطأ . .

 

بس من حسن الحظ ان المشكلة مش عميقة  , وان حلها سهل و مش هياخد وقت كتير . .

 

 

في البداية هي ضحية أب جاهل  , وأخوة أكثر جهل , الجهل مش بالدراسة و التعليم , لكن بمدي استيعاب العقل لحقائق مهمة غايبة عنه . .

 

للأسف لازال عصرنا يمتلئ بالنوعية ديه , اللي لسة بيعملو تفضيل للذكر عن الانثي , وبينظر للبنت علي انها مشكلة و ورطة لابد يتخلص منها , وانا اكاد أري وجهه من اكتر من عشرين سنة , لما الممرضة بشرته ان المولود القادم هي بنت , فأكاد أري وجهه وهو مسودا و هو كظيم , ربنا يهدي الناس . .

 

وهو كتر خيره عمل توريث للجهل ده لأبنائه الذكور , انت انتو الجنس المفضل , والبنات ديه وصمة عار لابد من كسر كل ضلوعها , وكذلك كسر عينها , ولا بأس بكسر كرامتها و إنسانيتها . .

 

و بالتالي عيب انها تلبس بيجاما في البيت , هي اتجننت ولا ايه  . .

 

عيب تحط برفان في البيت , ليه انتي اتهبلتي ؟ ؟

 

انتي عايزة ابوكي يحضنك لما تنجحي في الامتحان ؟ ؟ عقلك طار خلاص ؟ ؟

 

عايزة اخوكي يكون ليكي سند و ضهر و يسمع منك مشاكلك , ليه انتي فاكرة نفسك في فيلم عربي ؟ ؟

 

لما تغلطي علاجك الضرب , من ابوكي بقي من اخوكي الكبير من الصغير , اياكي تعترضي . .

 

الضرب بالحزام ماشي , علي الوش ميضرش , بالعصاية مفيش مشكلة , بس اياكي تصرخي , انتي تتضربي وانتي ساكتة . .

 

انتي مذكرتيش هنا انها تم ضربها منهم , بس انا بكمل الصورة بالمسار المنطقي الخاص بها , واتمني ميكونش حصل أذي اكتر من كدة

 

--------------------------------------------------------------------------------- 

 

وأنا كنت أتمني إنهم يستمرو في جهلهم للنهاية , وإنهم ياخدو "الباكج" كاملة , يعني يكسر عين البنت ماشي ,و يخليها راجل  , بس في نفس الوقت ان الاب و ولاده "الذكور" انهم يقومو بمهام الرجالة , يعني يصرفو علي البيت و يشوفو المهام الضرورية ليه . .

 

لأ حضرتك , هما بس اخدو الجانب اللي عايزينه من "الرجولة" , وعرفو يكسرو عينها , و حرموها من اي كلمة حنينة او تعامل انثوي , وفي نفس الوقت خلعو ايديهم من اي مصاريف في البيت او اي مسؤوليات "ذكورية" , فهي البنت اللي المفروض تشتغل و تجري في الشوارع عشان تصرف علي البيت , وهي اللي هتدفع الايجار والفواتير ,وهي اللي تتصل بالسباك و الكهربائي , وتقعد معاهم علي ما يخلصو الشغل في البيت , بينما البيه بيتفرج علي ماتش الكورة ولا قاعد علي القهوة . .

 

عرفتي ليه وصفتهم انهم جهلة , والله حتي كفار قريش عندهم مروءة أكتر منهم . .

 

والأسوء ان الجهلة اللي من النوعية ديه , انهم بيعملو إسقاط لتصرفاتهم و تبرير لها , من الدين الحنيف , باعتبار ان البنت لازم تكون محتشمة و ذات حياء و عفة . .

 

طب دول لو عرفو ان الرسول صلي الله عليه و سلم كان "بيتسابق" مع السيدة عائشة , ايوة بيعمل سباق ويشوفو مين فيهم الأسرع , انتي متخيلة الصورة ؟ ؟

 

طب لما أم المؤمنين – يقال انها السيدة عائشة رضي الله عنها – كسرت طبق الطعام اللي قامت بإهدائه زوجة اخري من زوجات الرسول صلي الله عليه و سلم , غيرة منها , وابتسم الرسول صلي الله عليه و سلم وقال "غارت أمكم" , لو ده حصل من زميلتك مع ابوها كان عمل إيه ؟ ؟ 

 

 

----------------------------------------------------------------------------------

 

والمؤلم ان الأم – رغما عنها – اضطرت انها تعوم علي عومهم , وانها تجبر بنتها انها تمشي علي نفس المسار , وانها بقت تتكلم بلسان جوزها و ولادها , اما قناعة باللي بيقولوه , او خوفا عليها من البطش بها منهم . .

 

للأسف ده السيناريو المؤلم اللي مرت , اللي جفف من عقلها و تفكيرها ومشاعرها اي مقدار من الحنان , اللي المفروض كانت تتشبع منه بالطريقة الصحيحة من اسرتها . .

 

ايوة امها بتعطيها الحنان , لكن غير كافي , حنان الام غير حنان الاب غير حنان الأخ , كل واحد فيهم ليه نوع و نكهة و تأثير مختلف , و اختفاء ايا منهم ليه تاثير مش قليل . .

 

للأسف الظروف اللي هي نشأت فيها , أخشي انها ممكن تكون صنعت داخلها شئ من التشويه النفسي , نوع من الضرر الجسيم الللي اتمني انه ميستمرش معاها سنين طويلة . .

 

هي من جوة مش حاسة ان من حقها كلمة حلوة من اقرب الناس ليها , هيكون عندها قناعة ان اللي اتعمل معاها هو الصح و الباقي غلط , واخشي انها لما تتجوز , هتمر بمرحلة انتقالية مش سهلة , لانها مش قادر تتأقلم مع مشاعر و عواطف و كيان العقل و الروح الأنثوية . .

 

زوجها ان مكانش عنده طاقة استيعابية كاملة لها , وقدرة علي امتصاص اي صدمات نفسية متوقعة لها , فهو ممكن يشعر بالدهشة و الضيق , يحس انها مش طبيعية , مش أنثي . .

 

و الأسوء انها ممكن تعمل توريث للي هي عاشت فيه لأولادها , حتي بشكل لا شعوري , ممكن تلاقي نفسها بتعمل تفضيل لابنائها , ونوع من كسر جناح لبناتها , عشان يستمر نفس المسلسل المؤلم . .

 

غير كدة , انها حاليا عندها جوع عاطفي جبار , و هي حاليا من أسهل ما يكون انها يتم "الضحك عليها" بكلمتين حلوين من اي حد . .

 

الحمد لله انها عندها الوعي الكافي , والوازع الديني اللي يمنعها , بس الضغط النفسي الرهيب اللي جواها , ممكن يخليها تنفجر اي وقت  , او تتخذ قرارات غير سليمة , ومدمرة في حياتها . .

 

---------------------------------------------------------------------------

 

كل ده كان عرض للنقطة اللي هي ضحية فيها  . .

 

نيجي للنقطة اللي هي غلطت فيها . .

 

هي التعامل غير السليم مع  مديرها  . .

 

وأول غلطة عملتها , انها أصلا سابته يقولها كلام جميل و هي مكانش عندها رد فعل مناسب لكلام زي كدة . .

 

يعني هو إنسان سافل , بيتحرش لفظيا بيها , وهو عارف انها منتقبة يعني عاملة عن عمد حاجز بينها و بين اي تجاوز او هزار مع اي حد , لما ييجي يقولها كلام متعلق بجمالها او برقتها , فهو بيخطو خطوات واسعة و قوية لخدش حيائها , ولتجاوز المسافة اللي هي وضعتها عن عمد ضد التواصل غير السليم . .

 

فلما هي تسمع منه كلمة زي كدة و تسكت , عقله المريض هيترجم سكوتها انها مستمتعة , وانها عايزة المزيد , وانها موافقة لخطوات اكثر عمق و خطورة . .

 

سكوتها و عدم القيام برد فعل عنيف , هيشجعه انه يقدم علي خطوات اكبر و اعمق من كدة , سكوتها ده كارثة . .

 

ده في امريكا و اوروبا – يعني مع اختفاء اي دور للدين او القيم – اي حد يتجرأ ويتحرش بزميلته في الشغل , ممكن يتعرض للفصل الفوري , واحيانا محاكمة جنائية , عشان هما مدركين ان لكل واحدة مساحة خصوصية , ومش من حق اي حد انه يقتحمها الا برضاها . .

 

فسكوتها ده جريمة هي عملتها ومش هي واخدة بالها , و كان واجب انها تهزقه بكلمتين , عشان يتلم , حتي لو أدي الأمر انها تسيب الشغل و ترمي الورق في وشه  . . 

 

لو هي خايفة علي الشغل اكتر من كرامتها فهي عندها مشكلة , ايوة هي ضحية اهلها الجهلة , بس ده مش مبرر ابدا , لازم تكون عارفة الصح من الغلط , وهي مش صغيرة . .

 

 

تاني غلطة انها فتحت قنوات للتواصل معاه . .

 

وكل الخطوات اللي انتي قلتيها , بتخليني مندهش هي ايه اللي بتعمله ده ؟  ؟

 

هو عشان عايزة تستفسر منه عن حاجة  , تقوم تبعتله طلب صداقة  ؟ ؟ هو معندهاش واتس ؟ مفيش فايبر ؟ مينفعش تكلمه علي ماسنجر من غير ما تضيفه ؟

 

وبعد ما كلمته , ليه محتفظة بيه كصديق اساسا . هي ممكن بسهولة تعلم الغاء للصداقة من غير ما يكون فيه بلوك , يعني تقدر تكلمه علي الماسنجر , بس هو مش صديق عندها , وديه حاجة معروفة طبعا في الفيس . .

 

و لما هي بتعمل بوستات علي الفيس , هي لو عايزة  , ممكن تعمل الاعدادات بحيث محدش يشوف البوست الا الاصدقاء بس , ولو هي لغت صداقتها معاه زي ما قلنا , يبقي اتقفل باب الشيطان للابد . .

 

لكن انها تبعتله اضافة , وتكلمه علي الماسنجر , وتكتب بوستات وهي عارفة انه شايفها , فهي مستمرة في فتح جميع ابواب الشياطين بينهم , ولازم دماغه هتفسر كل كلمة هي بتقولها علي انها موجهة ليه . .

 

انا عارف ان هو مجرم , بس هو ميئوس منه و مفيش طريق نعرفه الصح و الغلط , ماذا عنها هي , واللي المفروض انها تتشح بثوب الحياء و العفة ,  وانها هي الي تبادر باغلاق كل ابواب الشياطين , مش انها تستمر في ارسال رسائل مباشرة و غير مباشرة ليه . .

 

هي أخطأت و لازالت مستمرة في الغلط , واصلاح المشكلة هييجي من عندها هي , مش من اي مكان تاني . .

 

النوع ده من الرجال – او نقول اشباه الرجال – يحتفظ بكمية من العقد النفسية المتقدمة , وغالبا عنده مشكلة في الثقة بالنفس , فلازم يؤمن ان البنات بتحبه و ان هو مش عايزهم , وهو اللي رافضهم , وان هما اللي بيجرو وراه , فهو هيفسر اي حاجة هي بتعملها علي الاساس ده , وان كان هو مجرم , فهي غلطانة في الاستمرار في المسلسل السخيف ده . .

 

-----------------------------------------------------------------------

 

فالحل في خطوات واضحة , أتمني انها تتطبق سريعا . .

 

• من غير تأخير , يتم اغلاق كافة وسائل التواصل معاه , يعني الغاء صداقته علي الفيس , والاحسن انها تكلمه علي الواتس و تعمله بلوك من الفيس اساسا , وهو يفهم اللي يفهمه ,  ولو فهم غلط يخبط راسه في الحيط , هي مجرد زميله في الشغل مش صديقته ولا مراته عشان يفهم صح و يفهم غلط . .

​

• لازم تعمل تغيير في اعدادات نشر اي بوست ليها , بحيث ميشوفهاش الا الاصدقاء بس , وتكون عارفة مين الاصدقاء اللي عندها , عشان هو ميشوفش اي شئ من حسابها علي الفيس .

​

• مع اي كلمة منه غير مناسبة , مع اي تحرش , مع اي حرف فيه تجاوز , لازم تتعامل معاه بحدة و صرامة , لازم يفهم ان فيه حدود فاصلة بينه و بينها , ولو هو عايز واحدة "سهلة" يروح يدور في مكان تاني , هي مش من النوع ده  .

​

• لو لاحظت انه استمر في  مضايقتها , يبقي تسيب الشغل فورا , وتثق ان ربنا هيكرمها بشغل تاني احسن , حذاري انها تضحي بكرامتها او حيائها عشان شغلها ابدا .

​

• بالنسبة لاسرتها (ابوها و اخواتها) الحل انها ترمي طوبتهم , متطلبش منهم حاجة , ولا تنتظر منهم شئ , لان واضح انهم حالة ميئوس منها , بس في نفس الوقت متتعاملش معاهم بحدة او بقسوة , بالعكس تتواصل معاهم دايما بحب و ود ,  بس متعشمش نفسها باي شئ منهم .

 

• خليها تمارس نشاط معين يزرع جواها الحنان اللي هي محتاجاه , خليها تفكر تربي قطة , تربية القطط بتصنع كمية مدهشة من الحنان عند اصحابها .

​

• لو تعذر تربية القطط , خليها تواظب انها تروح ملجئ ايتام , ولو مرة كل اسبوعين , وتتواصل مع ايتام هناك بشكل شخصي , ده هيعمل عندها تعويض بشكل كبير عن المشاعر اللي هي محتاجاها .

 

 

بس ارجوكي اضغطي عليها , انها متسكتش ابدا مع اي تجاوز من الانسان ده مرة تانية  .

 

بالتوفيق يارب