العنوان : الصبر أم الطلاق

القسم: #الاجتماعي

الرقم: 14

 

السؤال:

 

عايزه حل لمشكلتي

 

انا متزوجه من 18سنه عندي 5اولاد

 

تزوجت وزوجي كان مطلق وعنده بنت بعد الجواز رجع مراته

 

من اول الجواز مشاكل وضرب واهانه وخيانه وكرش لبيت اهلي

 

في يوم اكتشفت خيانته صممت علي الطلاق وفعلا حصل واتنازلت عن كل حاجه

 

وقعد  6  شهور في بيت والدي في خلال الفتره ديه اخد شقتي وعطاها للاولي

 

ولما رجعت اخدت شقه قانون جديد بدون عفش

 

وحصل انجاب للمره التانيه وهو هو مبيتغريش انا عصبيه بس كنت بحاول اعمل كل شي وقفت معاه من الصفر حتي ان اصبح عندنا محلات كنت بستلف من اهلي علشانه بعت دهبي ومع ذلك ولا كانك بتعملي حاجه

 

كان نفسه يجمعنا انا وهي في بيت واحد كنت دايما برفض وبقول كل واحده فينا حره في بيتها

 

كنت اضرب لو رفض اروح او اطلق

 

بابا جه في مره وقالي مش حترجعي مش هو ده قولتله هو بيحبني غضب عني ومرداش يجي وفعلا كلامه طلع صح ومحضرش كتب كتابي وبعت عمي سنين

 

عايشه تعب ومشاكل وخيانه ونرجع لبعض لغايه من تلت سنين اتجوز التالته ومن ساعتها واحنا في النازل

 

هي غيري وعرفت تضحك عليه انا وهو في بعد تام طلبت الطلاق اكتر من مره مش راضي

 

لغايه من فتره وهو اتقطع شهرين عن البيت طلبت الطلاق لاني مش موجوده في حياته ولا بيسال ولا بيعرف عني اي حاجه  , اعمل ايه

 

ده اختصار لحياه مليئه فعلا بالتعب والحزن والوحده في نقط كتير مستخبيه بين السطور في وجع في الم ونفسي استريح

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

قرأت الرسالة أكتر من مرة عشان اعرف استوعبها  , وافهم حقيقة مشاعرك من الكلمات القليلة الموجودة , وحاولت عمل استنطاق للسطور والحروف لرسم صورة دقيقة لاحساسك ناحيته . .

 

فأحيانا اشعر ان عندك حب عميق تجاهه , واللي خلاكي تتحملي 18 سنة معاناة , و مشاكل مش قليلة . .

 

وأحيانا اشعر بالكراهية الشديدة , واللي جائت نتيجة الخيانة المتكررة , والإهانة التي لا تتوقف .  .

 

وأحيانا اشتم رائحة الغيرة , من زواجه من التانية , وبعدها اخر العنقود التالتة . .

 

وقرأت الرسالة مرة إضافية , لمحاولة ربط الأحداث مع بعض , والوصول لقرار يتناسب مع عمق المشكلة . .

 

ووجدت كل الاسهم تشير لسؤال محدد , مش عارفين اجابته . .

 

ايه اللي جعلك تصبري سنين طويلة, علي شخص بالمواصفات الغير معقولة ديه . .

 

يعني احنا متفقين من رسائل اخري ان التعدد في حد ذاته مش مشكلة , طالما فيه عدل  , فمش ديه النقطة . .

 

وبالتالي ارجاع زوجته الأولي , او الزواج بالتالتة , مش هي سبب الأزمة . .

 

ولكنك ذكرتي في سطر واحد خمس جرايم (مشاكل وضرب واهانه وخيانه وكرش لبيت اهلي) كل واحدة فيهم هي مشكلة كاملة . .

 

وان كنا آخر ناس بتفكر في الطلاق كحل للمشكلة , لكن واضح ان هو في الاصل مسابش اي فرصة اننا نشفق عليه  ,او اننا نتردد في المطالبة بالطلاق من ساعتها  . .

 

احنا مش بنتكلم في "شوية غضب" , او "اعصابه فلتت" , لكن بنتكلم في هتك مستمر لكل قواعد وأسس الزواج , كفاية بس الخيانة الزوجية , او طردك لبيت اهلك . .

 

ومع اكتشافك لخيانته انتي طلبتي الطلاق , ده قرار سليم تماما . .

 

ازاي بقي رجعتيله ؟ ؟

 

يعني هو – ربنا يحفظنا – صار زانٍ , فبأي منطق تجعليه زوجا ليكي مرة تانية  ,او يقربلك وهو بهذه النجاسة ؟ ؟

 

هل هو تاب الي الله توبة نصوحا  , عشان كدة رجعتي في عصمته ؟ ؟

 

والغريب انك لما رجعتي له , كان هو بنفس اسلوبه المدهش في التعامل مع الحياة , ومع زوجاته , بنفس عصبيته و ضربه , واستغلاله لفلوسك . .

 

و في النهاية وجدتي انك أضعتي عمرك , وفلوسك , كرامتك مع إنسان لا يؤتمن . .

 

ولما والدك شاف بعين الحكمة ان ده لا يصلح كزوج , ولا حتي بني آدم , انتي مسمعتيش كلامه , واصريتي علي موقفك برضه . .

 

انا بالفعل مندهش , ايه الشئ اللي جعلك تتمسكي بيه بالقوة الهائلة ديه , ده لو كان "رشدي اباظة" نفسه مكانش فيه واحدة هتستحمله بالشكل ده  . .

 

وحاليا هو كافئك بالاهمال التام و المقاطعة الكاملة بعد ما اتجوز التالتة . .

 

و دلوقتي بتسئلي علي الحل , واللي هو كان في ايدك من سنين طويلة  , من يوم ما تجرء علي هتك  قدسية الزواج , وتنجيسه  بقذارة الخيانة . .

 

---------------------------------------------------------------------------

 

والحقيقة لما قعدت افكر , علي الشئ اللي كان بيمنعك من الطلاق , جه في بالي أكتر من دافع محتمل . .

 

 

• إما انك مش عايزة الأطفال يعيشو يتامي . .

 

• الخوف من الوحدة . .

 

 

• الأمل انه يتغير ويتحسن . .

 

 

• مش معاكي فلوس تعيشي بيه  . .

 

 

فلو هتاخدي رأينا , مفيش الا طلب الطلاق , احنا مش بنتكلم انه اتعصب ولا عمل مشكلة وهو غضبان , احنا شايفين انه ماشي في خط اجرامي مستمر , ومش عايز يوقفه لسنين طويلة , وكل شهر إضافي هتقعديه معاه , معناها تدمير جهاز العصبي , و تحطيم بقايا السلام النفسي عند الاولاد . .

 

جميع الفتاوي اللي قرأتها , أقرت بمشروعية الطلاق في حالة الأذي المستمر , او الأهمال الشديد , او الخيانة , او الضرب المبرح . .

 

فمابالك لما يتجمعو كلهم مع بعض في زوج واحد  ؟ ؟

 

بالتأكيد انا لا اتمني خراب اي بيت او هدم زواج , لكن المأساة ان هو اللي مُصر يهد البيت من سنين طويلة  ,وانا اتمني انك تهربي انتي و الاولاد سريعا قبل ما ينهدم فوق رؤوس الجميع . .

 

المثل يقول "من أمن العقوبة , أساء الأدب" , وهو لأنه من أول مرة رفع ايده عليكي , ملقاش اي رد فعل مناسب , فهو استمر في اجرامه حتي الآن