العنوان : الموقف الغريب

القسم: #الاجتماعي

الرقم: 44

السؤال:

 

 السلام عليكم...  عندي حيرة ومحتاجة ارائكم جدااا

 

اولا اخويا كان متقدم لبنت خالتي لخطبتها وابوها كان عنده علم بالموضوع من قبل مع ذلك تجاهل الموضوع وكأنه لم يعرف شئ وماردش بشكل نهائي وساب الموضوع مفتوح

 

وبعدها بيومين جوز خالتي (ابو البنت) طلب من امي فلوس سلف يعني و امي اعطته الفلوس

 

ولما جاء الميعاد اللي هو محدده للفلوس مارضيش يرجع الفلوس لأمي وحصل مشاكل وربط موضوع الخطوبة بموضوع الفلوس وقال الموضوع  متفركش مع العلم خالتي مالهاش اى رأي

 

وبعد ما النفوس هديت بعدها بحوالي سنه خالتي حاولت ترجع الموضوع تاني بمعني ان البنت متمسكه باخويا وبتحبه وخالتي قالت ان جوزها حابب اخويا ويتمناه يرجع مرة تانية

 

المشكلة بقي اخويا لو حب يرجع الموضوع تاني يرجع الثقة ازاى لان دلوقتي طبعا الثقة في زوج خالتي معدومة

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله  .

 

الحقيقة ليه حق انه يقلق ,  ده موقف غريب من جوز خالتك , انه يستلف فلوس و ميرجعهاش , والاغرب انه يربط ده بخطبة اخوكي لبنته .

 

يعني هو عايز الخطوبة تبقي تخليص حق مثلا ؟ ؟  عايز ييجي يحسب المهر يقوم يخصم ده من ده ؟

 

والمعروف ان الجواز من بنت , مش بيكون مستقل عن التعامل مع اهلها , ان الواحد مكانش متأكد من قيم و طباع و اخلاق الاب و الام , ممكن يحصل عدد من المشاكل , سواء من تدخل مباشر من ابوها  ,او تدخل غير مباشر .

 

فخلينا نقول عدد من الخطوات , ياريت اخوكي يمشي فيها بالترتيب . .

 

• في البداية لابد اخوكي يتأكد انه بالفعل متمسك و عايز البنت , وانه متأكد من توافق طباعها معاه , وان المساحات المشتركة بينهم كافية

 

 

 

• من ضمن الطباع اللي لازم هيشوفها في البنت  , لازم يتأكد من 3 حاجات بالتحديد لأن وجودهم حاليا هيكون ليه تأثير سلبي كبير  .

 

 

 

• لازم يعرف منها هي رأيها ايه في اللي حصل , لو كانت متضايقة و رافضة تصرف ابوها ,بس مش في ايديها حاجة تعملها , يبقي كويس , حتي لو كانت معندهاش الشجاعة انها تواجهه , مفيش مشكلة  .

 

 

 

• بالنسبة للتعامل مع الأب , اي اتفاق يكون مكتوب , بكل التفاصيل من غير ما يهملو شئ , او يسيبو حاجة للذاكرة ,وياريت يكون فيه ناس من الطرفين ساعة اي اتفاق .

 

 

 

• خليه يحاول يعرف هل جوز خالتك دخل جيبه اي قرش حرام من مصدر تاني ولا لا , سواء انه خدع حد او اكل حقه او "صهين" عليه , لان اللي يعمل ده مرة ممكن يكون عملها قبل كدة .

 

 

• لازم يكون واضح قبل الخطوبة – لخالتك و جوز خالتك – ان اي حاجة في بيتي انا و مراتي احنا الي هنديرها و هنتولاها , وان اي تدخل منكم مرفوض (بس يقولها بشكل شيك مش كلام مهين) , عشان بس يكونو عارفين من الاول ان اي ممارسات غير مناسبة هتكون مرفوضة في بيته

 

 

• مش عارف هل مناسب انه يربط ارجاع الفلوس باتمام الجواز ولا لا , او هل يخصم ده من ده هل ده مناسب ولا لا , لو حس انه هيكون مناسب ماشي , غير كدة بلاش

 

 

 

ده التصور اللي شايفه ممكن يكون مناسب لحاجة زي كدة , خليه يبدأ فيه , ولو الدنيا اتكعبلت سواء من العروسة , او ابوها او امها , يبقي يعرف ان الجواز ده مفيهوش الخير ليه