العنوان : بناء الشخصية
القسم: #النفسي
الرقم: 03
السؤال:
ازاي ابني لنفسي شخصية انا طالبة في الكلية عندي 20سنة وبنات خالتي في ابتدائي ممكن يغلطوا واو يهزرو بمد ايد ومش عارفة ابني شخصيتي معاهم ارجو الحل
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي . .
بالفعل اللي ذكرتيه بيتم تكراره بشكل مؤسف في بعض الأحيان , وهو التعامل الغير منضبط من الأطفال تجاه الشباب , اللي غالبا في سن من 15 لـ 25
غالبا اللي اصغر من 15 يعتبر قريب منهم , وبالتالي الهزار التقيل يظل في إطار لعب الأطفال المتبادل . .
و اللي اكبر من 25 غالبا بيكون ليه هيبة ,ونادرا ما تلاقي طفل بيتخطاها الا لو الطفل غير طبيعي , او عنده سلوك عدواني زي بعض مرضي الأوتيزم (التوحد) , ربنا يحفظ ابنائها و يشفي المريض منهم . .
فغالبا اللي في السن من 15 لـ 25 بيقعو في المشكلة ديه , خاصة مع التغيير الكبير اللي في سلوك الاطفال واللي بيتدهور جيل بعد جيل لأسباب عديدة . .
والموضوع بيتدرج من الهزار الخفيف (الطفل ياخد عليكي , يندهلك باسمك , يتبسط معاكي) , وهو سلوك مش وحش بس نذير للخطر المستقبلي . .
لغاية لما يوصل للحدود الغير مقبولة منه , زي الضرب و الشتيمة و الاستهزاء و العداء الحقيقي . .
و احنا هنا مش هنتكلم عن مشكلة فردية مع طفل واحد هو اصلا ذو سلوك عدواني , لان ديه حلها تقويم سلوك الطفل بطرق مختلفة , احنا هنتكلم عن مشكلتك وهي ان بعض او اغلب الاطفال بيتعاملو معاكي بشكل غير مناسب وانتي اكبر منهم بكتير ..
---------------------------------------------------------------------------
عشان نعرف ازاي نعالج المشكلة , لازم نسرد عدد من اسبابها في البداية :
ده غالبا بيكون السبب الرئيسي للمشكلة ديه , انك بتتعاملي معاهم باسلوب لا يتناسب مع واحدة هي اساسا اكبر منهم بـ 12 سنة مثلا , لكن بتهزري معاهم زي ما اصحابهم الاطفال بيهزر معاهم . .
يعني مثلا لو قدامك 4 اطفال , واحد فيهم رغما عنه "أنفه" نزل منه مخاط , وهو مخدش باله . .
التصرف اللي هيعمله اي طفل يشوفه , انه يضحك عليه و يتريق , وغالبا هيطلق عليه كلمة "أبو *****" وهي كلمة مناسبة للمخاط مثلا , كنوع من السخرية . .
بينما التصرف المناسب من شخص بالغ , انه هيقوله تعالي يا حبيبي , ويا اما تنضفيه انتي , او تخليه ينضف نفسه ,او تقولي لامه تنضفه , ببساطة . .
ولكن . .
لو انتي نزلتي بالمستوي لنفس مستوي الاطفال , وضحتكي معاهم , وكررتي نفس اللفظ اللي اطلقوه عليهم , انتي كدة بتنحدري لمستواهم , وبتعملي سلوك قد يكون مقبول من طفل لطفل , وقد يكون مقبول من بالغ لبالغ , لكن بالتأكيد مش مناسبة من بالغ لطفل . .
و ديه مصيبتها انها بتجعلك "ند" ليهم , وراسك براسهم , وهو ما سيجعلهم يتعاملو معاكي زي ما بيتعاملو مع بعضهم . .
وبالتالي لو انتي اتكعبلتي مثلا , او دستي برجلك علي شئ مش نضيف , هيطلقو عليكي الضحكات المستمرة , ولقب مشابه , و يهزرو معاكي زي ما هزرتي معاهم . .
البالغ يتبسط ايوة مع الطفل , لكن ميكسرش الحاجز اللي بينه و بينه , والا هيجعلهم يتخطو الحواجز, وينزلوكي لمستواهم فورا . .
---------------------------------------------------------------------------
و ده مش بتكون غلطتك ,لكن غلطة بالغ تاني, وعمل اي نوع من الإهانة ليكي . .
فلما ماما مثلا شافت ان الصحون متغسلتش , و تلومك او تزعق فيكي ,او تقولك كلمة مش مناسبة قدام الأطفال , ديه مشكلة كبيرة , وهتعمل تأثير مش هين , وبتكسر لدي الطفل اي مهابة ليكي عنده . .
يعني بفرض ان كل الكلام اللي ماما قالتهولك هو كلام في حدود المعقول (ايه الكسل ده , هتفضلي طول عمرك مقصرة , سيبك من الفيس الزفت ده) , فده مينفعش يتقال ابدا قدام اي طفل , لكن بينك و بينها , او حتي في وجود قريب او صديقة , يعني هي لو لامتك قدام خالك او خالتك فهي مش كارثة , لكن قدام طفل فهي بتصنع مشكلة كبيرة لاحقة . .
و هنا لازم تتكلمي مع اي شخص مش بياخد باله ويلومك قدام الاطفال , وتخليه يعرف مدي الأثر اللي بيتم زرعه جواهم بسببه ,او ببساطة خليه يقرا البوست ده و هيقتنع . .
---------------------------------------------------------------------------
- المزاح التقيل من بالغ ليكي قدامهم :
وديه بيكون ليها نفس التأثير السابق , يعني لما توصل خالتك و ترميلك كلمة بهزار (كفاية اكل يا زفته , هتتخني و تبقي برميل) فحتي ده لو نوع انتي تقبليه من الهزار منها , وحتي لو كان مقبول قدام بالغين (اختك , امك , جدك ) و هما بيضحكو , فالقاء حاجة زي كدة قدام اي طفل , هتخليه يضحك هو كمان . .
ويا سلام بقي لما يشترك في الحديث و يقول تعليق ولا حاجة , وكدة مع السلامة اي هيبة ليكي قدامه , و توقعي انه يقولك بكرة نفس التعليق , او يضيف عليه اي الفاظ أكثر تطور . .
فلازم اي حد يتعامل معاكي , يبقي عارف ان الهزار يكون باسلوب معين قدام الاطفال , لابأس بالهزار قدامهم لكن من اخف الانواع , اللي يخلو من اي سخرية او كلام جارح . .
---------------------------------------------------------------------------
يعني أحيانا تصرفات الشخص نفسه , حتي بعيدا عن الطفل , بتدفع الطفل دفعا للسخرية منه ,او ذمه بشكل مباشر او غير مباشر . .
يعني لو ان شخص ببساطة رمي زبالة في الشارع او البيت (حتي لو قشرة لب) , او انه استخدم لفظ غير مناسب في الكلام , او انه غير مهتم بنظافته الشخصية او رائحته , فطبيعي ان الطفل هيحتقر البالغ فورا ,لانه متعود ان اللي يعمل كدة انسان مش محترم , و مع سقوط البالغ من نظر الطفل , الشخص يتوقع اي شئ منه
فلازم تحافظي علي الحد الأدني من السلوك المقبول طالما هما موجودين قدامك , لانهم هيقيموكي من خلال اعمالك
---------------------------------------------------------------------------
طيب لسة مقلناش ايه الحل ؟ ؟
بناء علي النقاط السابقة , هنسرد عدد من الخطوات اللي ان شاء الله يكون فيها الحل . .
-
أولا , يتم الغاء او ايقاف ايا من العناصر الاربعة السابق ذكرها , بقاء ايا منها هيعني استمرار الاطفال في التعامل الغير سليم معاكي , ده أمر منتهي .
-
لازم تتعلمي فن التعامل اللطيف معاهم , من غير ما تتبسطي و تكسري الحواجز , يعني تكوني ودودة و محبوبة منهم من غير ما ياخدو عليكي , تبقي محبوبة منهم , من غير ما "يصاحبوكي" , تبقي استاذة ليهم مش زميلة , فيه فرق . .
-
اول ما طفل يقل ادبه عليكي , اوعي تضحكي و تهزري , لابد يتم ايقافه فورا , اما بالزجر , او تزعقي فيه بحدود , او تبلغي امه فورا , بس مترديش الكلمة بكلمة , عشان متنزليش لمستواه . .
-
هاتي الحاجة اللي الاطفال بيحبوها , سواء بنبوني , بسكويت , هتحكيلهم حكاية او كدة , بس تشترطي عليهم الادب و الاخلاق قبل التوزيع , هتلاقيهم اتلمو . .
-
المشاركة في اللعب معاهم تكون بحدود و حذر , ياريت يكون فيه اكتر من بالغ معاكي عشان ميركزوش معاكي , ولو هتكون لوحدك متتعصبيش في اللعب ولا تزعقي في حد فيهم , فلو حد مثلا دخل فيكي جون , تضحكي باستسلام مش تتضايقي و تتنرفذي , او تقوليه بغضب انت غشاش , وقتها هيرد عليكي الكلمة بكلمة و يتخذك ند ليه . .
لو واظبتي علي الحاجات ديه ,مع ايقاف النقاط السابقة , هتلاقي النتيجة اتغيرت اكيد
