العنوان : التعامل الوحشي

القسم: #الاجتماعي

الرقم: 47

السؤال:

  

سلام عليكم يا جماعة

 

مشكلتي اني اتجوزت وانا لسة في ثانوي و مع انه كان بيجبني جدا قبل الخطوبة  بس بعد الجواز اتغير جدا و بقي يضربني بغباوة و بمنتهي القسوة مع ان ابوه و امه كانو بيدافعو عني احيانا

 

الضرب مكانش مرة واحدة , ده يمكن يوميا

 

اضطريت اتطلق منه بعد ما بقي معايا ولد و رجعت بيت ابويا قعدت هناك

 

دلوقتي بيبعت ناس عشان يرجعني تاني و بيعتذر و انه عايز يصلح اللي بينا و كده

 

والمشكلة اني لسة بحبه مش عارفة اعمل ايه

 

من ساعت ما اتطلقت واهلي شادين عليا  واخويا الكبير قال اقتراح انه لو هيرجعني ييجي يسكن جنبينا عشان ميمدش ايده عليا تاني

 

اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

  

طليقك مجرم , واياكي ترجعيله ابدا , الا لو اتغير 100 % , وانا اشك انه يتغير .

 

لان اللي بيضرب مراته و هي حامل بالخرطوم هو انسان مش طبيعي , وعنده اضطراب عقلي لا شك  .

 

والمشكلة ان سنك الصغير (عشان اتجوزتي في ثانوي)  بيخليني اشك انك تقدري تعرفي هو اتغير ولا لا , لان اسهل حاجة عليه انه يمثل انه اتغير , وانه بقي كويس و ابن حلال , وفي الواقع هو لسة نفس التعامل الوحشي .

 

 

واخشي ان المشكلة بدأت من الزواج من سن صغير , يعني ان كنتي حاليا مطلقة و معاكي طفلة , يعني انتي اتجوزتي و انت في ثانوي , وده بالفعل سن صعب جدا للزواج .

 

ان كان ايام الصحابة كان فيه زواج في سن زي كدة او اصغر , فلأن اصلا طبيعة المجتمع و البنات مختلفة , عقليا قبل ما تكون جسديا . وبالتالي البنت اللي عندها 14 سنة , هي بالفعل مؤهلة انها تكون ربة بيت و ام .

 

حاليا المجتمع مختلف , الشباب و البنات متغيرين , فكونك تتجوزي في سن زي كدة , شئ مؤلم جدا , و هي بداية المشكلة .

 

مش عارف هل الزواج كان قرارك انتي ولا قرار اهلك , وهل كان اهلك  موافقين علي الزواج ولا لا , بس في النهاية ديه كانت للاسف بداية المشكلة , وديه حاجة مش هنعرف نحلها دلوقتي 

 

 

 

و ان كنا بنعمل ادانة للزوج , فلازم كمان نعمل ادانة للزوجة و اهلها علي السماح ليهم بكدة  .

 

اكتر من عالم افتي بأن حلال يتم الطلاق , طالما الزوج بيضرب زوجته من غير سبب , وبشكل مستمر  .

 

فأصلا من اول يوم كان مد ايه عليكي , انتي المفروض كنتي تردي الضرب بضرب , عشان يفهم ان اللي يغلط لازم يتعاقب .

 

ولو كان استمر في الضرب , كنتي فورا ترجعي بيت ابوكي و تطلبي الطلاق , فورا من غير نقاش قبل ما يستمر في اجرامه , ويوصل لمرحلة الضرب بالخرطوم .

 

و حاجة زي كدة تعمليها غصب عن الكل  , يعني غصب عنه او عن اهله او عن اهلك لو كانو معترضين .

 

للاسف فيه في مصر اسر متعنتة , وبالنسبة لهم البنت اللي تتطلق زيها زي "العاهرة" , وبالتالي اهلها يرفضو الطلاق تماما .

 

ولو كان اهلك كدة , كان لازم تنفذي كلامك و تكسري كلامهم بالكامل , ده مش بر والدين , ده اسمه استهتار بالآدمية .

 

لو كنتي من اول ما ضربك هربتي منه , ربما كان تم انقاذ الوضع بشكل ما , وربما مكانش هيكون فيه حمل  , او طفلة تتعذب في الوضع المأسوي ده

 

 

 

وزي ما قلتلك , مش انتي اللي تقولي هو اتغير ولا لا , انتي سنك صغير , ومش قادرة تقيمي الوضع بشكل سليم .

 

و انك بتقولي انك لسة بتحبيه , الحقيقة انا اشك انك بتحبيه حقيقي , غالبا انتي  بتظني انك بتحبيه .

 

لان انتي لما اتجوزتي كـ "طفلة" , ولو كنتي اصلا من اسرة محافظة مفيهاش اختلاط بالشباب كتير , فهو بالنسبة لك , اول شخص خدش سطح الحياء الأنثوي ليكي , وهو اول من اقترب منك بالشكل مباشر , فده بيصنع  عند اي انثي – خاصة في سنة المراهقة – تأثير لا يمكن محوه أبدا .

 

فانتي ببساطة بتظني انك بتحبيه , لكن في الواقع هو مش حب , هو شعور مختلط عندك .

 

و ممكن يكون سبب تاني في انك بتحسي انك بتحبيه , ان اهلك متشددين معاكي , وبالتالي في عوامل طرد من بيت أهلك , وده اللي جعلك تظني انك بتحبيه  , او ان اقامتك معاه هتكون سهلة

 

وكون انه بيحاول يتواصل معاكي تاني حاليا , فممكن يكون عشان عايز ياخد ابنه منك , او عايز البنت اللي كانت بتخدمه ترجع تاني , او الأسوء عايز يستمر في مرضه النفسي ويكمل عملية الضرب الإيذاء .

 

وبالتالي حذار انك تتواصلي معاه لا واتس لا فيس , ده انسان لسة المرض مستوطن عقله , ولسة عايز يحط ايده عليكي عشان يكمل إيذاء .

 

لو هتاخدي رأيي , فلازم تبلغي البوليس فورا عنه , واللي حتي لو معملوش حاجة ليه , يبقي يعرف ان انتي مش هتسكتي , وان المرة الجاية ممكن هو يتأذي .

 

 

 

و هي تعتبر اختبار حقيقي لمصداقيته , وهل هو اتغير ولا لا .

 

لو بالفعل وافق , يبقي تقيمو في شقة قريبة جدا من شقة ابوكي , ومع اول مرة يرفع فيها ايده عليكي تاني , ابوكي ييجي يتصرف معاه فورا .

 

ولو موافقش لاي سبب كان  ,يبقي هو متغيرش , وعايز العبدة اللي عنده اللي كان بيضربها ليل و نهار .

 

ولو وافق واخدتو شقة جنب ابوكي , متنقلوش ابدا بعد فترة لاي مدينة تانية , لان ممكن يكون بيعمل ده مؤقتا عشان بعدها يأذيكي لما تروحو مكان تاني .

 

ولو هو رفض تماما , يبقي اعرفي ان ملكيش نصيب فيه , وان فكرة الزواج منه من البداية كانت غلط , فمتكمليش فيه , صحيح الوضع حاليا مؤلم , بس كان ممكن يكون اسوء , فاياكي تستمري فيه .

 

وبالتوازي متسيبيش نفسك للفراغ , و متقعديش لوحدك كتير  , عشان الشيطان ميدخلش ليكي , ويعكر عليكي حياتك , حاولي تستثمري وقتك في شئ مفيد , عشان الوقت لما يعدي آلامك متزيدش

 

وتمسكي بحبل الله دايما , متفرطيش في الصلاة او القرآن او الذكر , لان هي الحاجات ديه اللي هتخفف عليكي دايما

 

ربنا يوفقك