الجانب الإيجابي
الرسالة السابقة
العنوان : الجانب الإيجابي
القسم: #الاجتماعي
الرقم: 49
السؤال:
السلام عليكم
أنا عندي مشكله عايز أعرضها عليكم تفاصيلها كبيره جدا وصعب شرحها في رساله
لكن اختصارها ان احساس ان الدنيا كلها جايه عليك , مش مجرد احساس لا دي وقائع يوميه بتحصل
المعامله السيئه من أقرب الناس من الدم
عمري 31 سنه ومن يوم ما كملت عمر 14 سنه محدش له أي فضل عليا لا في مأكل ولا ملبس
بالاضافه لكدا ان الكل بيحاول يطلع نفسه البطل على حساب اسمي وسمعتي حتى لو اضطروا يالفو قصص من وحي خيالهم
نفسيا بقيت حالتي سيئه جدا لكن شعوري بأن ربنا هو اللي بيدبر اموري هو اللي مديني طاقه أعيش بيها وتقاوم أي شيئ
ملاحظه هامه جدا أنا محبوب جدا من زملاء العمل ولكل الناس اللي يعرفوني والاصدقاء المقربين من حياتي مستغربين جدا من معاملة أهلي ليا
لدرجه ان مرات أبويا قالتلي مش عارفه ليه اخواتك بيعاملوك كأنك من أم ثانيه ناهيك عن معاملة الأب اللي تعتبر من اسوأ ما يكون
على سبيل المثال في 2015 فكرت اجيب قرض من البنك وادفعه مقدم عربيه اشغلها جنب وظيفتي
المقدم دا مكفاش ف كنت محتاج لمبلغ صغير عرضت على والدي يساعدني رفض
وفضل يقول للناس بالنص كدا الخايب عايزني اجيبله عربيه ب 200 الف جنيه اجيبله منين دا
مع اني كنت طالب منه 20 الف بس والله
موقف تاني
بيدعو أنهم جابولي فيزا للسعوديه ثمنها 100 الف جنيه وأنا رفضتها , دا طبعا لأني خايب
الثالث عرضو عليا يشترولي توك توك وأنا رفضت بحجة أن برستيجي ما يسمحش
ف يوم كنا في فرح ابن عمي وساعة وصول العريس كان فيه مشكله ف بتناقش فيها مع عمي وأبويا واقف طبعا مش بيكلمني
ف أبو العريس جاي يقول فيه ايه راح أبويا قايله سيبك منه
كفايا كدا ولا محتاج تاني
طيب تاني
عرضت على اختي مره أنها تضمني في قرض من البنك كل ما ترفض بحجه ازللها
حبت توقعني بصياعه شرطت عليا أنها موافقه بس خلال شهر اكون خاطب
طبعا انا عايز القرض لشغل
غير أنها عارفه ان أنا رافض مبدأ الارتباط لأني مش على أرض ثابته وعارفه اني بتضايق من اللي بيكلمني ف الحوار دا قعدت تتكلم فيه وأنا اقولها لو ميكتيش تقوم امشي وهحلف منا داخلك بيت تاني
وكأنها ما صدقت ان الكلمه طلعت من لساني قالتلي ما تمشي أنت بتهددني
ومن ساعتها مدخلتش بيتها ولا هي حاولت تصالحني
في كثير مواقف عايزه أيام تتحكي فيه
صدقني مهما تخيلت الوضع أصعب بكتير
مع ان اختي الأكبر مني مباشرة أنا مساعدها ف تكلفة جوازتها أبويا مدفعش جنيه ولما شاف فرشها وهو رايح بيتها كان بيزعق ويقول انتي جايبه دا كله منين يا بت الكلب ومودياه فين
للعلم أنا اخواتي مدرسة لغه انجليزيه ومدرسه لغه عربيه وموظفه في الاداره التعليميه والرابعه خريجة تمريض والخامسه خلصت ومشتغلتش بشهادتها شغاله في حضان خيري للأطفال المبتسرين
واخويا أصغرهم رايح أولى كليه ابويا له سنين مصرفش عليه جنيه هو بيشتغل وبيصرف على نفسه دول من امي
طبعا غير أربع بنات من مرات أبويا يعني فضلة خيره مخلف 9 بنات وولدين
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام و رحمة الله
شوف يا سيدي .
انت بالفعل عايش في مناخ عدائي غريب , صنعه والدك اللي عنده منطق غريب في الحياة , وتشبع بيه اخواتك , واللي بيعاملوك بنفس الطريقة اللي هو عاملهم بيها .
هو عاملك و عامل اخواتك بطريقة مادية صعبة جدا , وبالتالي للاسف هما بيعاملوك بنفس الاسلوب البشع ده .
و يمكن من اسباب ده هو العدد الكبير اللي انجبه والدك , يعني 9 اشقاء عدد مش قليل , ولابد هيأثر سلبا في طريقة تعامل الاب معاهم .
وللأسف اغلب اللي اعرفهم وعندهم عدد كبير من الأولاد , بيقعو في واحدة من مشكلتين , واحيانا في المشكلتين مع بعض .
المشكلة الاولي انه يعاملهم بشكل مادي صعب جدا , باعتبار ان اولاده نقمة عليه , وانهم هيخلصو علي اي دخل ليه , فبيكون للاسف بخيل عليهم , وبيكرههم في عيشتهم , ويخليهم يدعو علي اليوم اللي اتولدو فيه
المشكلة التانية انه يتعامل معاهم باهمال كبير , يعني اصلا يقضي اغلب اليوم برة البيت , بعيد عن السيرك المنصوب في البيت ليل و نهار , ويسيب عذاب التعامل معاهم للام لوحدها , واللي رغما عنها مش هتعرف تركز مع الجميع
و بالتالي بتلاقي ان الابناء كل واحد في وادي , وكل فرد فيهم في ملكوته الخاص بيه , وكل واحد فيهم بيتمني اليوم اللي يسيب البيت سواء جواز او سفر او غربة .
وان كان الشرع حضنا علي زيادة النسل , فحذاري ان الشخص يطبقه من غير ما يطبق معاه القواعد السليمة في التعامل معاهم , يعني انت ان جبت 6 ابناء مثلا , لابد تكون متأكد انك مش هتبخل عليهم , ومش هتتعامل معاهم بالقطارة .
كمان لازم تكون مستعد و جاهز لتقضية الجزء الاكبر من وقتك في متابعتهم و التركيز معاهم و الاهتمام بكل واحد علي حدة , عشان تطلعهم بالشكل المناسب .
لكن انك تجيب عيال من غير حساب , ومتهمتش بيهم ,و تسيبهم للدنيا بالشكل ده , ويكبرو وهما معقدين نفسيا بسبب اهمال الاب , ديه اسمها سفاهة , ومش من الشرع ولا حاجة , وهتتحاسب علي كل واحد فيهم اتأذي بسببك .
لازم كل واحد يكون بالفعل محدد هو عنده طاقة نفسية ووقتية لتربية كام طفل , و بناء عليه يحدد يقدر يجيب كام , لكن اسلوب "ان الطفل بييجي برزقه , وان هات عيال اكتر عشان انفع الامة بيهم " هو قول حق يراد به باطل , وينم علي عدم فهم لأساس الدين اللي بنتعامل معاه .
كان لازم اقول المقدمة دي , عشان اخليك في الصورة الكاملة للي حصل .
فرأيي ان ابوك وقع في فخ الفهم الناقص للأمور , وانه انجب عدد من الأطفال و هو مش مقدر متطلباتهم و الواجب اللي عليه , بالإضافة للطبع الصعب اللي فيه اساسا .
و حاسس ان اخواتك – مع الاقرار انهم غلطانين – الا انهم ضحية الي حد ما , نتيجة الاسلوب الغير سوي اللي شافوه من ابوك , واللي اتربو بيه .
-
اولا انك تتعامل بنوع من حسن الظن .
انا عارف انه هيكون صعب شوية , بس اظن هي خطوة ضرورية .
انك لما تضع في بالك ان ابوك ضحية اسلوب غير قويم هو اتربي بيه من صغره , وان اخواتك هما كان متأثرين بالطريقة اللي نشأو بيها , هتلاقي ان فيه تبرير ما للي حصل منهم
خاصة ان علي كلامك , المشاكل اللي عملوها بتدور في فلك "الكلام و الشعور" , وموصلتش لمرحلة الايذاء الحقيقي ,او العداء المستحكم .
ولو انت تابعت معانا , هتلاقي ان فيه انواع مدهشة من الحروب الاسرية , اللي بتدور بين اباء و امهات ضد ابنائهم , وبيجعلوهم يصلحو لمرحلة الجنون .
فمشكلتك علي بشاعتها , اقل شأنا من مشاكل تانية تتجاوز المعقول .
ده بس حطه في بالك , واعرف ان اللي بيعملوه هو اسلوب تعامل , اكتر ما هو ايذاء متعمد .
-
متطلبش منهم حاجة تاني
يعني ردود افعالهم السلبية معاك لما طلبت منهم حاجات معقولة , كانت سخيفة جدا ,فببساطة ريح نفسك و حاول متطلبش شئ تاني ,و كمل طريقك في الاعتماد علي نفسك .
و اللي فهمته من كلامك انك بالفعل شغال و دخلك مناسب , وديه نعمة من ربنا انك مش مضطر تاخد منهم فلوس او مصروف , يعني وضعك افضل من وضع طالب جامعي مثلا غصب عنه لازم هما يصرفو عليه
-
متقطعش حبال الود
سيدنا معاوية بن ابو سفيان قال كلمة جميلة .
قال : لو أنّ بيني وبين الناس شعرة ما انقطعت، كانوا إذا مدّوها أرخيتها، وإذا أرخوها مددتها
و ده سبب تسمية "شعرة معاوية" لاي حبال للود , اللي بتنشأ بين الخصوم .
نفس الموضوع, حتي لو في قلبك كتير من الغضب تجاهم , حاول تظل علي علاقة كويسة معاهم , افتكر ان "الواصل" (يعني اللي بيصل رحمه) , هو اللي بيصل من قطعه , يعني بيود و بيزور اللي مش معبره من قرايبه , زي ما وصف لنا الرسول صلي الله عليه و سلم .
تواصل معاهم و خليك انت كريم الاخلاق , وخلي ده كله لوجه الله , لعلها تكون سبب لدخولك الجنة
-
متحطش الموضوع علي اعصابك .
ارجع واقولك تاني ان وضعك احسن من وضع عدد كبير من ضحايا مشكلات مشابهة وصلت الصفحة , وربنا انعم عليك ان اهلك – حتي علي تعاملهم السلبي – محدش فيهم بيسعي يدمرك او يكسرك , لكن هو نوع من الاهمال .
كمان ان عندك دخل مستقر ده يجعلك مش محتاجلهم اصلا , وديه نعمة تانية من ربنا .
فلازم متخليش الموضوع علي اعصابك ,ومتفكرش فيه اساسا , و انسي كل الخذلان اللي شفته منهم , واتعود انك دايما تبص للجانب الايجابي من اي مشكلة , حتي لو كان صغير ومش باين
--------------------------------------------------------------------------------------
مش عارف انا افدتك ولا لا , بس انا شايف انك لو طبقت الخطوات الاربعة اللي قلناهم , علي الاقل هتحس من جواك براحة نفسية , وهتحس ان المشكلة اصغر من اللي انت كنت بتحسبها , وحتي لو مكانش عشانهم ,يبقي عشان صحتك النفسية و جهازك العصبي
بالتوفيق يا بطل