العنوان : الفجوة الواسعة

القسم: #العاطفي

الرقم: 15

السؤال:

 

 

عايزه رأيكم وردكم ضروري

 

انا بحب واحد أكبر مني بس هو مجوز وبيحبني ووعدني بالجواز وانا مستنياه بس هو مجوز وعنده اطفال وانا لسه بنت وانا في العشرينات وهو اكبر من باكتر من عشرين سنة .

 

من صغر سني واتعلقت بيه اوي جت فتره بعدت عنه وقعدت سنه مردش عليه بس هو مسبنيش وفضل ورايا وقلي انا بحبك وهجوزك

 

قبل ماابعد عنه كان بيقولي مش هقدر افتح بيت تاني وبعدين غير رأيه وقلي مافيش حاجه هتبعدني عنك غير الموت وانا كمان بحبه اوي بس المشكله ف اولاده انا خايفه يتخلى عني ومش عارفه أبعد لاني حبيته اوووي

 

بقالنا كذا سنة مع بعض بس موعدنيش بالجواز غير من قريب لما رجعتله استني ولا اعمل أي انا حرفيا مش عارفة أعيش من غيره وواثقه انه بيحبني مع العلم اكبر اولاده عنده 9 سنين

 

هو معايا في الشغل مع العلم هو ظروفه صعبه شويه بس كنت هقف معاه لاني انا ظروفي كمان تعبانه 

 

و  انا مش فارق معايا السن خالص

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

بالفعل شئ محير . .

 

من وقت ما قرأنا رسالتك و احنا محتارين في القرار اللي ننصحك بيه .

 

عندك اختيارين , الاتنين اصعب من بعض , ومش سهل علينا ولا علي اي حد موضوعي إنه يتخذ قرار فيه .

 

من السهل إننا نتخذ قرار سريع احادي الجانب , سهل علي اي حد انه يطلق حكم سريع لأي مشكلة هو شايفها و يريح بيه نفسه  ,من غير ما يعمل إلمام بالجوانب المختلفة ليها  .

 

بينما دراسة كل جوانب اي قضية , وعمل تغطية كاملة ليها من الحاجات الصعبة , اللي مش بيقدر عليها الا القليل .

 

فإحنا هنا مش هنكون قادرين اننا نديلك رأي نهائي , وحكم فاصل , لكن هنعمل معاكي تحليل كامل , كمميزات و عيوب للقرار الخطير ده , بحيث قدرتك علي اتخاذ القرار تكون اكتر دقة , و أوسع أفق . .

 

لأن اتخاذ القرار في الأمور المصيرية اللي زي ديه , ان متمش بعد عمل دراسة كاملة لكل النقاط اللي فيها , ولكل المميزات و العيوب , فالخوف ان القرار يكون في غير محله , ويتسبب في مشكلة كبيرة في المستقبل .

 

فاللي هنعمله دلوقتي , إننا نعرض قدامك مميزات و عيوب فكرة الزواج منه , وبعدها انتي هيكون عندك القدرة بشكل أفضل علي اتخاذ القرار بطريقة سليمة .

 

و أرجوكي وقتها إنك تغلبي صوت عقلك علي صوت قلبك , لأن في كتير من الأحيان بيكون صوت القلب يغلب عليه (انتي نفسك في ايه) , مش (مصلحتك في ايه) , والفرق بينهم كبير . .

 

نفس الصراع اللي بيدور في ذهن طالب عنده امتحان تاني يوم , وفي نفس الوقت فيه مباراة مهمة هو منتظرها , قلبه عايز شئ , وعقله بيقول شئ تاني , الاول شئ بيمتعه , والتاني شئ في مصلحته , ولو سمع صوت قلبه هيروح في داهية . .

 

 

 

و هنا ممكن يسأل واحد من القراء , ايه ده  ؟ هو فيه مميزات للزواج منه اصلا ؟

 

طبعا فيه . . لو انت شايف إن عيوبه اكتر من مميزاته  فده مش معناه ان المميزات مختفية , لازم تتعود انك تنظر بشكل شامل و موضوعي لأي موقف او قرار بيتم اتخاذه , وربنا سبحانه وتعالي علمنا ده في القرآن الكريم . .

 

لما ربنا ذكر في سورة البقرة (كُتِبَ عَلَيْكُمُ الْقِتَالُ وَهُوَ كُرْهٌ لَّكُمْ ۖ وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ) فهو سبحانه بيؤكد علي ضرورة الجهاد في سبيل الله , مع إنه شئ مكروه للنفس البشرية , ربنا اللي بيوصف انه مكروه مش احنا  . .

 

 

كمان في نفس سورة البقرة لما ربنا وصف الخمر (قُلْ فِيهِمَا إِثْمٌ كَبِيرٌ وَمَنَافِعُ لِلنَّاسِ وَإِثْمُهُمَا أَكْبَرُ مِن نَّفْعِهِمَا ) فهو ذكر إن للخمر و هي أم الكبائر , ذكر إن لها منافع , حتي لو كانت قليلة . .

 

فلازم تتعلم بشكل عام انك تفكر بشكل شامل وواسع , ومش معني ان الخمر ليها فوائد انها مش حرام , ومش معني ان الجهاد في سبيل الله انه مكروه اننا مش هنعمله لما ييجي معاده . .

 

في نفس الإطار ,  لما نقول ان قرار الزواج ليه مميزات و عيوب , ديه حقيقة , وارد حد يكون شايف ان عيوبه اكتر من مميزاته , لكن ده ميمنعش وجود ده و ده . .

 

تعالي نسرد مميزات الزواج منه  :

 

 

• أولا إنك هتنفذي الحل المناسب لأي حب متبادل من طرفين , وهو الزواج  واللي بالفعل يمثل الحل الآمن و السليم لأي اتنين بيحبو بعض بشكل حقيقي . .

 

• الزواج هيصنع عفة ليه هو , طالما هو بالفعل بيحبك من سنين , ففرصة استمرار زواجكم هتكون أكبر و أقوي , والتعدد بشكل عام بيكون ليه فوايد , بس بشرط انه يتم تطبيقه بشكل سليم و عادل.

 

• الزواج و انشاء البيت هيخلصك من وحدتك اللي انتي فيها , ظروف اسرتك الصعبة جعلت حياتك شبه وحيدة , ده اللي يجعل خطوة الزواج ليكي هتكون مناسبة في الفترة الحالية . .

 

-------------------------------------------------------------------------------------

 

طب ماذا عن العيوب ؟ ؟

 

ايه ده , هو فيه عيوب ؟ ؟

 

طبعا , احنا لسة من شوية قايلين ان لازم ننظر للموضوع نظرة شاملة لكل الجوانب , و كون اننا سردنا المميزات فوق , مش معني كدة ان الموضوع وردي و مفيهوش مشاكل , بل خلينا نقول إن آرائنا تميل لكفة الرفض اكتر من كفة الموافقة , نتيجة السلبيات اللي هتظهر حالا . .

​

 

• إياكي تستهتري بفرق السن , إنتي بتتكلمي بفرق سن فوق الـ 20 سنة , و ديه ضربة مؤلمة و موجعة لأي حب أو تواصل أو تفاهم بينكم . .

 

 

• لغة التواصل بينكم هتكون مختلفة , الاهتمامات رغما عنك و رغما عنه هتكون متخلفة , الرغبات مختلفة , لو كان فيه شوية مساحات مشتركة ففيه كتير من  النقاط المختلفة , واللي هتزيد فيها المشاكل و الخلافات , الكلام ده إن محصلش دلوقتي هيحصل بعد سنة أو سنتين , الزواج مش مرحلة مؤقتة و بننتهي منها , ديه شراكة في العمر .

 

 

• ماذا عن القدرة المادية ؟ ؟  اكيد مش هنعمل تقييم للزوج علي فلوسه بس احنا بنتكلم في وضع خاص دلوقتي . ان كان اغلب البيوت في مصر مفتوحة بالعافية , فماذا عن فتح بيتين وهو حالته المادية متوسطة ؟

 

 

• يا تري بعد كام سنة لو مراته نشفت دماغها و قالت يا انا يا هي  , يا عيالك يا مراتك الجديدة , هو ساعتها ممكن يعمل ايه ؟ وان كان اكبر اولاده لسة اطفال صغيرين , فده معناها انها  لو طلبت الطلاق فهتسكن في الشقة اللي هي فيها , وهتاخد نفقة شهرية , وهتاخد اطفاله منه , طب لو هو مقدرش يقاوم ده كله , واضطر انه يضحي بيكي و بعتلك ورقتك , هترجعي ازاي بيت اهلك وانتي معاكي ورقتك ؟ طب ماذا لو كنتي حامل او معاكي طفل ؟ ؟

• هو ان كان دلوقتي بيحبك بجنون , فالحب بيتغير احيانا بعد الجواز , في حالات نادرة بيزيد , بس في اغلب الاحيان بيقل سواء من المشاكل او من التعود , ليه تدخلي نفسك في اختبار زي كدة , ونسبة النجاح فيه قليلة ؟ ؟ ؟

 

 

• فيه نقطة متعلقة بالجدية , انه ظل سنين طويلة متواصل معاكي و فيه مشاعر متبادلة وبعدها قالك علي فكرة الزواج  , ديه نقطة سلبية و خطيرة , الراجل اللي يسمح لنفسه انه يتواصل و يتبادل مشاعر مع واحدة سنين طويلة , تخليكي تقلقي انه يكرر ده بعد الزواج مع واحدة تانية  . .

 

• اني اخشي ان حبك ليه مش حب حقيقي , لكن تأثر من حاجتين انتي مش واخدة بالك منهم , اولا غياب الاب عن البيت و افتقادك الكامل لحنان الاب , ثانيا طول معاشرتك و احتكاكك بيه , فده اللي جعلك تظني انك بتحبيه بجنون , و الخوف انك تفوقي من المشاعر ديه بعد كام شهر او كام سنة من الجواز , لما تشوفي المعاناة الحقيقية المصحوبة لفرق السن الكبير , او الصراع بين ضرتين .

 

-------------------------------------------------------------------------------------

 

طب وبعدين ؟ ايه الحل ؟ ؟

 

احنا منعرفش الحل , انتي اللي تعرفيه و تحدديه بنفسك  , احنا رمينا الكورة في ملعبك , وانتي اللي تتخذي القرار . .

 

بس ارجوكي , اسمعي لعقلك مش لقلبك , شوفي المنطق بيقول ايه و اعمليه . .

 

و في حالة اتخذتي قرار الزواج , فلازم تتأكدي انه هيطبقه بالشكل السليم , يعني لازم يكون زواج علني , اياكي لاي سبب تتنازلي عن الشرط ده , ولازم مراته تعرف من اول يوم , ويكون كل شئ واضح .

 

وفي حالة اتخذتي قرار بالرفض , فنصيحة إنك لازم تسيبي الشغل , مش هينفع للاسف انك تكملي في المكان بعد ما تم الرفض , طالما فيه مشاعر بينكم , وجودك معاه في نفس المكان هيخلي القلوب تشتغل تاني , وهتخلي نفسك معرضة للتفكير تاني و تالت و رابع , وعذاب نفسي لا ينتهي , سيبي الشغل وشوفي شغل تاني و هتلاقي إن شاء الله . .

 

انا عارف الأمر محير , بس امسكي ورقة و قلم و ادرسي الموضوع بشكل كامل , وصلي ركعتين استخارة , وادعي ربنا بشكل مستمر انه يهديكي للقرار السليم

​