العنوان : صناعة النجاح

القسم: #النفسي

الرقم: 112

السؤال:

 

انا عندي 24 سنه ومعايا ليسانس اداب انجلش وكان طموحي اخد دكتوراه واعمل لنفسي كارير كويس مش شرط ف التدريس بس احس بقيمه فعليه بقدمها وبفيد بيها غيري

 

 لكن انا بقالي 4 سنين متجوزه يعني خلصت دراستي بعد الجواز وطبعا مع الجواز والخلفه الضغوط والمسؤليه بتزيد عندي بنتين واحده 4 سنين والتانيه سنه ونص

 

 ساعات كتير بتخنق وبحس اني مليش قيمه معقول اكون ضيعت عمري ف التعليم عشان اتجوز واخلف وبس وساعات بحس بمسؤليه كبيره مع عيالي عشان سنهم صغير وانا اهلي مسافرين اصلا مش معايا واهل جوزي جنب بيتي ودايما معايا بس لما يكون عندي مشوار واسيب بس العيال بحس بالذات من حمايا ان احمدي ربنا ان معاكي حماه بتشيل عيالك وهي فعلا بتشيلهم وتحبهم يمكن اكتر من عيال بنتها بس انا مش بحب اتقل ع حد عشان كده بعمل الحاجه بنفسي

 

لو عاوزه اخرج باخدهم معايا ولما جوزي يقولي كملي دراستك وكده اقوله والعيال يقوله وديهم عندنا ولما اشرحله اللي جوايا يقولي انتي حساسه زياده ع اللزوم وعشان انا متعوده اعتمد ع نفسي م صغري واتضايق لو حد عايرني بحاجه عملهالي مش عاوزه ده يحصل مع عيالي

 

انا كل يومي للبيت والأولاد يعني بودّي الكبيره الحضانه الصبح وبرجع تكون الصغيرة نايمه مع باباها بحب اقضي الوقت ده مع نفسي اقرأ كتاب بحبه واكتب خواطر او حاجات بفكر اعمل منها كتاب فيما بعد وع الضهر اجيب البنت م الحضانه وبعدها احضر الغدا نتغدي وجوزي يروح شغله بعد العصر اعمل شغل البيت اللي ورأيا وبعدها اقضي وقت مع عيالي م لعب او أنشطه مع التليفزيون وبعدها ع الساعه ٩ او ١٠ نقفل كل حاجه عشان ننام وجوزي بيرجع متاخر بحكم شغله ف الموبايلات بقوم احضرله الاكل وينام الصبح وأعيد نفس الْيَوْمَ ماعدا الجمعه والسبت بقضيه عند اهله

 

دلوقتي انا حاسه اني مش عايشه او ف نص الطريق مش عارفه اكمل حياتي ازاي واعمل ايه مع عيالي وهل لو كملت هقدر اوازن بين حياتي وبيتي واولادي وانا دايما اقول اعمل اللي عليا وبس وبطور من نفسي ومن شخصيتي وبتعلم ع النت ف وقت فراغي وبقول اللي عاوزه ربنا هيكون

 

 

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

 

أهلا بيكي يا فندم . .

 

في البداية محتاجينك تقرأي الرسالة الأولي في القسم النفسي اللي بعنوان : تقدير الذات

 

https://www.facebook.com/shof.ya.sidi/posts/269102600608820

 

في الرسالة اتكلمنا عن مفهوم مهم  , ازاي ان تقدير الشخص لنفسه مش بيعتمد علي عوامل التفوق الظاهرية , اللي الناس كلها بتحكم عليها , لكن مفهوم أهم وهو : انتي قد ايه عملتي نجاح في نفسك

 

و تحقيق النجاح في نفسك معناه اوسع من العوامل الظاهرية اللي الناس بتحكم عليها , هي معتمدة علي انتي فخورة بنفسك قد ايه , قدرتي تصنعي أولاد عاملين ايه , بيتم و اسرتك فخورين بيكي قد ايه . .

 

لما تفكري بوجهة النظر ديه , هتلاقي ان الدنيا اوسع من مجرد "شهادة" ماجيستير او دكتوراه , او شغل في مكان مرموق , او منصب يحلم بيه ناس كتير , دايما اتعودي تبصي لقدام كمان 30 سنة من دلوقتي , مش بس في اللحظة الآنية . .

 

و كمان بالتوازي مع ده , احنا نشجعك جدا انك تستمري في سلك الدراسات العليا و البحث عن عمل مناسب , من غير ما يكون فيه تعارض مع اسرتك و اولادك . .

 

وممكن نلخص نصايحنا ليكي في نقاط محددة . . 

 

• أولا إن خطوة جوازك وانتي صغيرة هي خطوة هايلة , ولو الزمان رجع بيكي لقبل الجواز كنا هنقولك ايوة وافقي علي الجواز في سن صغير , لان فوايده هي بالفعل كتيرة , كفاية انك بتقدري تتأقلمي مع جوزك وتفهمو بعض بسهولة عن اي زوجين سنهم اكبر , كفاية ان الفرق بينك و بين اولادك يكون سن معقول , بحيث تكونو : اصحاب فعليا لما يكبرو , وهتعرفي اهمية حاجة زي كدة لما تكبري فعلا, وهتحمدي ربنا علي نعمة الزواج في سن صغير

•  

• اعملي تغيير في قناعاتك بالنسبة لعوامل النجاح , واعرفي ان النجاح و التفوق مش بس معتمد علي الشهادة او الشغل او المرتب , لكن معتمد علي الجانب الإنساني أكتر , واكيد انتي مش هتكوني فرحانة بشهادة رفيعة و منصب مرموق , مضاف اليه حياة باردة مع زوجك , او علاقة متوترة مع اطفالك

•  

• مين قال ان صعب انك تكملي دراسة , سواء دبلومة او ماستر او دراسة حرة علي الانترنت , من كلامك ان فيه نقاط قوة في حياتك , منها جوزك المتفاهم واللي بيشجعك علي الدراسة , ومنها ان     خلال فترة قليلة , بنتك التانية هتخدل حضانة , فهيكون عندك بالفعل وقت اكبر

•  

• كمان متنسيش انك مش مضطرة تشتغلي عشان تفتحي البيت , ديه نقطة تساعدك ان اي وقت فراغ عندك ممكن يكون بس مخصص للدراسة او المشروع اللي هتفكري فيه

•  

• امشي علي  القاعدة اللي بتقول : ما لا يدرك كله , لا يترك جله , فلو مكانش في امكانك انك تحققي حلمك بشكل معين , فممكن تحققيه بطريقة مختلفة او في جدول زمني اطول شوية

•  

• يعني لو الشخص المتفرغ بيخلص رسالة الماجيستير في سنتين , فايه المشكلة لما تخلصيها في اربع سنين ؟ انتي لازلتي في سن صغير و العمر طويل قدامك , لو كانت البنت الغير متزوجة ممكن تشتغل 8 ساعات في اليوم , فايه المشكلة انك تشتغلي بس شغل خفيف بما يتناسب مع بيتك و اولادك

•  

• بالنسبة لحماتك و حماكي , فممكن عشان تتجنبي اي حساسية او تعليق مش مناسب , انك تتفقي مع جوزك انك هتحتاجي مثلا 10 ساعات مذاكرة في الاسبوع , فوقتها هو اللي يقول لوالده وولدته انهم ياخدو بالهم من الاطفال , فلما تيجي منه هو تعاملهم هيفرق عن لما انتي اللي تقوليلهم , ومن حسن الحظ ان هو بيشجعك بالفعل علي المذاكرة و التفوق

•  

• موضوع الشغل متفكريش فيه حاليا , اظن الاولي انك تركزي اكتر في الرسالة او الدبلومة او كورس اللغة او الكومبيوتر , لان الدراسة بشكل عام ممكن تمشي بالتوازي مع البيت و الاولاد , لكن الشغل بيكون متعب اكتر

•  

• لما اولادك يكبرو شوية , فممكن تشوفي لو فيه شغل بوقت مريح من غير ما يكون فيه تعارض مع واجباتك الاسرية

•  

• ودايما حطي في بالك , ان تفوقك و نجاحك معناه نجاحك في المهام الأساسية اللي عليكي , وهي صناعة بيت زوجي جميل , وإنشاء أبناء لما يكبرو تفتخري بيهم , وبالتوازي مع كدة , انك تتفوقي في المجال العلمي و العملي بقدر الإمكان