العنوان : إصلاح الماضي

القسم: #النفسي

الرقم: 22

السؤال:

 

البنت االي يتم ضربها من الصغر

 

واستخدام الاهل العنف  , الحرق والسلك  والضرب الماذي

 

ده مع الكبر , ممكن ياثر تاثير سلبي . لما تتجوز على اولادها ؟

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

من ناحية ممكن فممكن  , لكن لو هي استسلمت لمشاعرها  , ولو معالجتش نفسها . .

 

يعني ايه ؟ ؟

 

هو ممكن الشخص يعالج نفسه ؟ ؟ ويعني ايه استسلام للمشاعر ؟ ؟

 

أيوة . .

 

تعالي نمسك نقطة نقطة  . .

 

 

لما يتم عمل أذي جسدي و نفسي رهيب علي الطفل بالشكل اللي انتي قلتيه , فده فيصنع داخلها تأثيرات كبيرة , و بيغير من  قواعد تعامله مع الناس و الحياة . .

 

وعشان نفهم ايه التأثيرات ديه , لازم نتعرف علي مصطلح ممكن نسميه "مقاييس الصفات المتناقضة" . .

 

 

اي انسان طبيعي بيكون جواه كمية متوازنة من المشاعر المتناقضة زي (الخوف - الشجاعة)  , (الاقدام - التردد) , (القسوة - الحنان) , (التضحية – الانانية ) , (التعقل - التهور)

 

فممكن نلاقي الحاج محمود عنده (40 % خوف – 60 % شجاعة) , (35% تردد – 65% اقدام) , (45 % قسوة – 55% حنان ) , (70 % تضحية – 30 % انانية) , ( 65 % تعقل – 35 % تهور)

 

بينما الواد سيكا بياع الجرايد في اول الشارع معاييره  مختلفة شوية (70 % خوف – 30 % شجاعة) , (20% تردد – 80% اقدام) , (72 % قسوة – 22% حنان ) , (30 % تضحية – 70 % انانية) , ( 25 % تعقل – 75 % تهور)

 

و مع اختلاف الارقام , اللي بيحدد شكل شخصية كل منهم , الا ان كلاهما لازالا في حدود المعقول . .

 

وبالتالي الصفات المتنقاضة زي كدة , اغلب الناس بيكون عندهم كمية متوازنة منها , يعني شوية خوف علي شوية شجاعة  وهكذا . .

 

مشكل الطفل اللي بيتعرض لأذي مستمر في صغره , ان المعايير عنده بتتغير بشكل "قطبي" , او بشكل "متطرف" يعني العدادات عنده بتجيب اخرها في كتير من المقاييس . .

 

فبدل ما الشخص العادي عنده مثلا (60 % شجاعة – 40 % خوف ) , يكون الطفل اللي اتأذي في طفولته عنده (5% شجاعة  - 95 % خوف) , او ممكن العكس ( 90 % شجاعة – 10 % خوف) , وهكذا

 

و برضه في باقي المعايير  , تلاقي القسوة زيادة جدا عن الحنان , الانانية عن التضحية , التهور علي التعقل , وهكذا  . .

 

وغالبا بتتجه المعايير للجانب السلبي و السئ دايما , وده اللي بيصنع منه شخصية مضطربة , تتعامل مع الحياة بشكل غير طبيعي . .

 

فببساطة ابوه و امه بغبائهم الشديد عملو "لغبطة" في العدادات اللي عند الطفل , فان كان ايده  هتخف من ضرب السلك ,  و صباعه هيلتئم بعد الحرق , والجرح اللي في رجله  هيتعافي بعد شك الدبابيس , فالجرح النفسي مش هيزول ابدا (الا بصعوبة) . .

 

و أحد تفسيرات الجرح النفسي  هو ما يسمي "تغيير المقاييس" اللي شرحناها دلوقتي . .

 

و ده اللي بيخلي الطفلة اللي اتعرضت للعذاب المستمر ده , لما تكبر , هتواجه الحياة و هي "عداداتها" بايظة تماما   . .

 

فيا اما تكون شديدة الجبن مع اي حاجة او موقف بسيط . .

 

يا اما شديدة القسوة  . .

 

يا شديدة الانانية . .

 

يا شديدة التهور و الجنون . .

 

فلأن المقاييس اتخلت عندها , فنقدر نتوقع منها الكثير . .

 

-------------------------------------------------------------------------

 

ولأنك في الصغر تعرضتي للقسوة الزائد , فالخوف ان بعض المعايير عندك بقت مش طبيعية , و ان تعاملك مع الحياة  , و الاهم مع اطفالك ممكن يكون بشكل مش مناسب  . .

 

بعض الاشخاص ربنا بينقذهم من المصير النفسي المأسوي ده , وبالرغم من العذاب النفسي اللي اتعرض ليه في الطفولة  , الا انه بيقدر يتجاوز ده بشكل ما , و بيكون شخصية سوية تماما , ويمكن افضل كمان من الاطفال العادييين   . .

 

يعني هي مش قاعدة  ثابتة , لا فيه استثنائات و كتيرة . .

 

فاول خطوة عندك انك تعملي "كشف" نفسي علي نفسك . .

 

محتاجة تشوفي احد الاختبارات النفسية اللي بتلقي الضوء علي كتير من معايير مفاتيح الشخصية  , وبتكشفلك نفسك بشكل أوضح مما تتخيلي . .

 

 و ده بيكون عبارة عن عدد من الاسئلة و المواقف و الاحداث اللي بتقريها , وانتي بتختاري اجابات معينة , و بتقولي رأيك فيها . .

 

واحيانا تتسألي علي مين الشخصية المشهورة اللي شايفاه قدوة  و انسان ناجح مثلا . .

 

ممكن تتسألي انك ترتبي الصفات ديه عندك من الاكثر تواجد للاقل تواجد . .

 

ممكن يجيلك رسم "رورشاك" المشهور , اللي كل ما تبصيله تشوفي حاجات اعمق , ويقولك انتي شايفه منه ايه . .

 

ممكن يطلب منك ترسمي رسم معين لما يتقالك كلمات محددة ,  او تسمعي موسيقي معينة . .

 

ولازم تكون الاجابات ديه نابعة منك و بشكل موضوعي , مش بتصطنعي ولا بتزوقي اجاباتك بشكل معين عشان انتي عارفة ان فلان هيشوفها , لازم تكون اجابات موضوعية تماما , ومن غير اي اصطناع او تزويق . .

 

و علي اساس اجاباتك اللي هتتقال , واختياراتك , الطبيب هيقولك معاييرك عاملة ازاي , وهل انتي قريبة من الانسان السوي , ولا فيه بعض المشاكل . .

 

و طبعا لابد الاختبار ده يتم علي يد متخصص (اخصائي نفسي او طبيب نفسي) اياكي تعمليه اونلاين او علي ايد حد بيتسلي او شخص هاوي , الحاجات ديه مفيهاش "فتي" , ولا "ابداء رأي" . .لان القرار اللي هيطلع منها مصيري . .

 

وعشان اللي حصلك في طفولتك مش قليل  , فاصلاحه ممكن ميكونش سهل , واول خطوة للاصلاح هو القياس الدقيق للي حصل بالفعل في طفولتك . .

 

فلما تروحي للطبيب و تحكيله بالتفصيل اللي حصل في طفولتك بكل اللي تفتكريه , و حتي لو حصل نوع من "التحرش" او الايذاء "الجنسي" لابد ان يتم حكيه بكل اللي تفتكريه , لان كل معلومة الطبيب هيسمعها , هتلقي ضوء علي مساحة جديدة  في شخصيتك . .

 

و بناء علي نتيجة اختبارك  ,الطبيب هيقولك  ايه اللي ممكن يتعمل . .

 

 

 

فكون انك اصلا تبحثي ان كان فيه مشكلة ولا لا , وان عندك الوعي الكافي لربطها بأحداث الماضي المؤلم , فديه دلالة طيبة , ان الآثار اللي تركه فيكي العذاب في طفولتك ممكن ميكونش عميق . .

 

كمان انتي بالتوازي محتاجة تعملي "مراقبة"  و "رصد" لسلوكياتك المستمرة ,خاصة في الحالات الغير عادية (غضب , توتر , قلق , صريخ , خوف . . ) يا تري في الحالات ديه بيكون رد فعلك قريب من الرد الفعلي العادي  , ولا فيه سلوك غير طبيعي , او زيادة شوية . .

 

لو انتي مش فاكرة انك عملتي اي سلوك غير طبيعي في السنين الاخيرة , فديه كمان علامة طيبة انك "اتعالجتي" بشكل كبير من الاثار المدمرة اللي كانت في طفولتك . .

 

لكن يظل ذهابك للطبيب من الخطوات بالغة الأهمية , وياريت يكون بالفعل عنده خبرة في ما يسمي "اضطراب سلوك الاطفال"  عشان يوصل معاكي فورا للنقطة اللي انتي عايزاها. .

 

من ناحية متقلقيش من اللي حصلك في طفولتك , لانه مش هيأثر علي حياتك مالم انتي تهملي في التعامل معاه . .

 

و من ناحية متكسليش ولا تسوفي في الذهاب لطبيب متخصص , لان اللي حصلك مش قليل , وممكن يأثر عليكي سلبا . .