العنوان : الاختيار المحير

القسم: #النفسي

الرقم: 58

السؤال:

 

 دخلت السنادي هندسة , وهتخصص من السنة الجاية  ومحتار ادخل انهي قسم فيهم

 

كل قسم افكر فيه شوية احيانا يعجبي و احيانا اقول لا مش عايزه

 

ومش عايز اختار حاجة اندم عليها

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

اهلا بيك يا باشمهندس

 

ممكن ماقدرش افيدك بالتفاصيل في كل قسم فيهم , وايه الفرق بين مدني و عمارة و كهربا و الحاجات ديه , بس هاعرفك علي طريقة جميلة تنفع لعمل اختيار بين اكتر من حاجة محيراك , والطريقة نفسها تنفع لاي حاجة في حياتك , مش بس القسم والتخصص . .

 

الأول خلينا نشرح النموذج الغير سليم في تحديد اختيار بين اكتر من حاجة قدامك , وبعده نشرح الطريقة السليمة . .

 

أغلب الناس بتختار , بناء علي حاجة من اتنين , معلومة  ,او انطباع . .

 

معلومة : يعني قرأ في مكان  , او عرف من حد , سمع في محادثة , او شاف علي الواتس , معلومات معينة ان قسم كهربا شغله كويس , او قسم ميكانيكا ده صعب في المذاكرة , او قسم مدني سهل جدا و بيسموه ادبي هندسة . .

 

انطباع : يعني مشاعر , مش معلومة , يعني هو من وهو صغير بيحب مسطرة تي , والخوذة الصفرا , فعايز يكون مدني , او هو بيكره جدا اي حاجة متعلقة بالكهربا , او  بالنسبة له مهندس ميكانيكا, يعني لابس عفريتة و نازل تحت العربية . .

 

فالفرق بين المعلومة و الانطباع , هو ذاته الفرق بين العقل و القلب , الافكار , والعاطفة . .

 

----------------------------------------------------------------------------

 

ومشكلة اتخاذ قرار بناء علي المعلومة او العاطفية مشكلتين متوقعتين  . .

 

أولا تكون المعلومة او الانطباع نفسه غير دقيق , يعني هو سمع ان مهندسين كهربا مطلوبين في الخليج , بس فعليا لأ ,  مهندسين طبية مطلوبين اكتر منه , او قرأ ان مدني قسم سهل جدا في حين ده مليان مذاكرة , او هو بيخاف من الكهرباء بس فعليا هو مش هيلمس الكهربا في دراسته . . . 

 

 فمجرد اتخاذ قرار بناء علي معلومة او انطباع ممكن ميكونش دقيق , هيخليه يدخل طريق طويل , من غير امكانية عمل undo   وبالتالي حياته كلها اتحددت و اترسمت , عشان واحد كتب بوست علي الفيس بمعلومة مش متاكد منها . .

 

المشكلة التانية اللي ممكن تحصل , ان القرار ده – حتي لو كان بناء علي معلومة او انطباع دقيق و سليم – هو قرار تم اتخاذه بناء علي نظره أحادية , يعني عشان حاجة واحدة , من غير ما ياخد باله من معايير تانية بالغة الأهمية . .

 

فلو انت اتخذت قرار انك هتدخل هندسة بترول , باعتبار ان شغلها مطلوب جدا , بس بعد ما دخلت فوجئت ان اغلب شغلها في الخليج , وانت ظروفك الاجتماعية متسمحش انك تسافر و تسيب والدك مثلا , هتبقي مشكلة . .

 

لو انتي اخترتي تكوني مهندسة ميكانيكا لانك بتحبي جدا التصميم و الرسم و الحاجات ديه , ولما اتخرجتي فوجئتي ان اغلب شغل ميكانيكا بيكون في مصانع بعيدة , والشغل بيخلص 7 مساء , وده ميناسبكيش . .

 

فاتخاذ القرار بناء علي معلومة او انطباع , ممكن يصنع ازمة والواحد ميكتشفهاش الا بعد فوات الأوان . .

 

----------------------------------------------------------------------------

 

طب نعمل ايه ؟ ؟

 

فيه طريقة علمية جميلة و دقيقة , لعمل تقييم شامل لكل خيار من خيارات متعددة , واتخاذ القرار السليم , اسمها طريقة القبعات الست للتفكير . .

 

هيكون صعب نشرحها دلوقتي , لكن خلينا حاليا ناخد نموذج مصغر يشبهها , ممكن تعمله في حوالي اسبوع او عشر ايام . .

 

وهما تلات خطوات بالتحديد :

 

• الوصول لمميزات و عيوب كل خيار

• تحديد الظروف الخاصة بك

• اتخاذ القرار

 

---------------------------------------------------------------------------

 

أول خطوة هي أهمهم , انك اولا تعمل سرد للبدائل يعني تمسك ورقة و قلم  , وتكتب يا تري فيه كام قسم عندي , آه الكلية عندي فيها 8 أقسام , هما كذا و كذا و كذا . .

 

بعدها تقوم بعمل بحث كامل عن مميزات و عيوب , نقاط قوة و نقاط ضعف كل قسم فيهم . .

 

و البحث ده , علي قد ما تتعب فيه , علي قد ما القرار الناتج هيكون دقيق جدا

 

يعني اولا جوجل مسابش حاجة , لو انت مثلا مسمعتش قبل كدة يعني ايه هندسة طبية , دور عليه و اقضي ساعات بتقرا كل حاجة عن المجال ده , وبيدرس ايه , ومطلوب ولا لا , وهتعرف تسافر بيه ولا محتاج معادلة و هكذا .

 

محتاج تقعد مع طلبة من كل قسم , وتسمع منهم بالتفصيل ايه المواد اللي بيدرسوها , و ايه المطلوب للنجاح و التفوق في المجال ده , وايه الحاجات اللي لو انت اصلا ضعيف فيها مش هتعرف تكمل (مثلا الهندسة الطبية محتاجة تكون بتحب الاحياء biology )

 

محتاج كمان تقعد مع خريجين , تعرف منهم سوق العمل عامل ازاي , كام ساعة بتشتغل , المرتبات , الدراسات العليا , فرص الترقي , انك تفتح بزنس لحسابك و هكذا

 

لو شايف الموضوع صعب فهو مش مستحيل , و ان مكنتش قادر تقعد مع كل الاقسام فعلي الاقل الاقسام اللي انت مرجحها اكتر و محتار بينهم . .

 

----------------------------------------------------------------------------

 

نوصل للنقطة التانية وهي الظروف الخاصة بيك . .

 

و ان كانت النقطة الاولي محتاجة جوجل و يوتيوب و طلبة وخريجين , فالنقطة التانية محتاجة كباية شاي و شوية تركيز . .

 

• يعني تسال نفسك يا تري مستعد تسافر برة مصر ولا لا ؟

• مستعد تكمل دراسة ماستر و دكتوراه ولا لا ؟

• بتحب اكتر المسائل الرياضية ولا الرسم الهندسي؟

• بتحب الرياضة البحتة ولا التطبيقية ؟ 

• بتحب الانجليزي ولا لا ؟

• بتحب تشتغل بايديك ولا بس تقعد في مكتب و تزعق في الموظفين ؟

• خبرتك قد ايه في الشغل علي الكمبيوتر  ؟

• احتياجك لمرتب عالي كبير ولا ممكن تصبر شوية ؟

• هل عندك موانع صحية انك تشتغل في جو تراب و شمس و عفار و شحم و زيت ولا لا ؟

• استعدادك انك تبيت في مكان الشغل لفترة طويلة (مهندسين البترول و مدني) قد ايه ؟

 

الإجابات ديه بتختلف من واحد للتاني , فديه مش هتسال حد عليها , بس هتسال نفسك و تكتب في ورقة الاجابات . .

 

بعدها يا سيدي هتجمع المعلومات اللي جبتها من النقطة الاولي (مميزات و عيوب كل قسم) و من النقطة التانية (متطلباتك الشخصية) و توفقهم مع بعض في الخطوة التالتة . .

 

و هنا في الخطوة التالتة تستخدم عاطفتك في اختيار اللي بتحبه , لكن بعد انك بالفعل رسمت الاساس بالكامل بناء علي معلومات دقيقة . .

 

لما تفرش كل ده قدام عينيك , هتقدر و انت مستريح تختار القسم اللي انسب ليك , واللي مش بالضرورة هو الأفضل من وجهة نظر الناس , لانك اخترت اللي يتناسب معاك

 

علي سبيل المثال  , المهندس المبرمج ,لو مكانش عنده استعداد انه يذاكر طول عمره , هيشتغل كمان سنتين تلاتة علي اوبر , او عربية فشار . .

 

لان البرمجة هي من اسرع العلوم تطور و تغيير , وان مكانش بيطور نفسه مفيش مكان هيوافق يشغله بدراسته القديمة  . .

 

فنقطة صغيرة زي كدة , ان مكنتش عارفها و متاكد من امكانية انك تذاكر طول حياتك , يبقي لازم تختار مجال مختلف و هكذا

 

الطريقة ديه مش بس عشان اقسام الكلية , هي تنفع لاي شئ في حياتك , حتي لو هتختار شريكة حياتك

 

بالتوفيق يا هندسة , وربنا يرزقك ما فيه الخير لك . .