العنوان : صناعة الأوهام

القسم: #النفسي

الرقم: 86

السؤال:

السلام عليكم

انا عندي 17 سنة و في تانية ثانوي  .

و اكتشفت مؤخرا اني تقريبا بعيش في أوهام .

معرفش دا أوفر ثينكينج و لا انفصام شخصية و لا ايه

ببقى مثلا بفكر ف أحداث وبتيجي وحدها أنا بعرفش أتحكم ف أفكاري وبعيش فيها كإنها واقعية يعني لو حاجة محزنة بعيط وبعد كدا بلا وعي بلاقي نفسي طبقت الأفكار اللي جات ف دماغي على أرض الواقع وبخرب الدنيا..

يعني مثلا ف مره تخيلت ان ليا عم وقد ايه  كان بيحبني وأحداثي معاه وانه اتوفى وأنا صغيرة و فعلا قومت كاتبة ع الفيس الله يرحمه وكدا وحكيت لصحابي عنه

لكن كل دا كان من وحي خيالي انما أنا أصلا عنديش عم

ومواقف كتير بصفة عامة وأحداث بتدور ف دماغي و بعيش جواها بكل مشاعري و بعد كدا بطبقها على أرض الواقع

وكل دا مش بتحكم فيه.. جربت قبل كدا اني كل ما هتيجي تدور ف دماغي حاجة هقعد أسبح وأعمل أي حاجة عشان مفكرش بس اللي حصل اني كنت بحس باحساس غريب وشعور بصداع خفيف وبعرفش أنام بالذات ف الأيام اللي كنت بحاول أبطل فيها تفكير أو أتحكم فيه لكن بقيت بحلم بكل حاجة

وبصحى كل شوية بسبب الموضوع دا ورجعت تاني زي ما كنت وبطلت أحاول أبطل لاني أيقنت اني مش هعرف

مع العلم اني ببقى ف وسط تفكيري وتطبيقي لأي حاجة ببقى عارفة انها غلط وانها من أوهامي

وبحس ان المشكلة بتزيد أوقات الامتحانات وعادة كل يوم من بعد الساعة 12 بليل ببدأ أفكر كتير جدا وعادة بطبق اللي كان بييجي ف تفكيري على مدار اليوم اللي بعده و ف أوقات الحزن برضو

هو الموضوع بيبوظ حياتي الاجتماعية فعلا

يعني مثلا ممكن أقلب على حد وهو ف حاله معملش حاجة لمجرد اني بس بتوهم انه مش بيحبني لفعل صغير طبيعي جدا ودا بيبقى مع الناس الأقرب ليا وكأني كل ما بقرب من حد بدخله ف دايرة الأوهام بتاعتي

مع العلم ان بابا اتجوز على ماما وانا صغيرة وطبعا دا يُتبع بخناقات وعدم اهتمام بيا انا واخواتي.. شوية نقعد مع ستو وماما تسيبنا وتسافر وانا كنت صغيرة مش عارفة أحدد الصح من الغلط ولا عارفة أتصرف ازاي.. بابا كان بيدينا المصروف قليل جدا فبقيت باخد من جيبه وقفشني كتير وقتها ومش قادرة أنسى احساسي باني عايزة انتقم لاني مش عارفة أدافع عن حقي ولا اتكلم واطلب

دا مرض ولا ايه؟ وهل هعرف أعالج نفسي ولا لازم أروح لدكتور

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

وعليكم السلام و رحمة الله  . .

طيب مش هنقدر نعمل حل دقيق لسؤالك, لأن حاجة زي كدة محتاجة زيارة لطبيب نفسي  , وكمان مجموعة من الكشوفات و الاختبارات لتحديد نوعها بالظبط , وطبعا ده مش هينفع الا في عيادة , مش علي صفحة علي الفيس .

ولأننا متعودين اننا نقول علي الحاجة اللي منعرفهاش , اننا منعرفهاش , عشان منعملش اي نوع من تضليل الشخص او إعطائه نصيحة غير مناسبة تأذيه , فلازم نعتذرلك عن الإجابة علي السؤال . .

لكن كحل جزئي , ممكن نعطيكي عدد من النصايح , اللي ممكن تساهم في تقليل أبعاد المشكلة , و ممكن تحلها تماما لو مكانتش عميقة . .

• الأول كنا حاسين بحيرة بين 3 تفسيرات للي عندك , اما إنه اضطراب نفسي , او إنه مجرد أحاسيس عابرة زي اللي بتحصل لكتير من اللي في سن المراهقة , او إنه مس من الجن , وإجاباتك بترجح الإختيار الأول , إن فيه اضطراب نفسي محتاج متابعة مع طبيب نفسي متخصص , وكل ما تروحي اقرب كل ما يكون أحسن

• طبعا المس من الجن هو شئ حقيقي , مش خيال ولا أوهام , لكن أغلب أعراضه مش موجودة عندك , ولازم تحمدي ربنا علي كدة , لأن العثور علي طبيب نفسي فاهم , أسهل كتير من العثور علي شخص يقدر يعالج بشكل حقيقي من المس

• من اسباب زيادة المشكلة ديه : كبت المشاعر , ان يكون عندك مشاعر سلبية (ضيق , حزن , غضب , اكتئاب) , وفي نفس الوقت متلاقيش حد تتكلمي معاه , او تفضفضي ليه

• والأسوء من كبت المشاعر , إنك تضطري انك تضحكي و تهزري طول اليوم مع صديقاتك , ده بيعمل ضغط غير طبيعي علي أعصابك , وطبيعي إن عقلك الباطن يبحث عن حيلة للهروب من الضغط الغير طبيعي ده , و أحد الحيل المستخدمة هي "تصديق الأحداث و المشاعر الخيالية" زي اللي بتعمليه

• فأحد أساليب العلاج إنك تمشي في مسارين بالتوازي , من ناحية حاولي تتجنبي أي مشاعر سلبية او تحلي اي مشكلة فورا عشان ميحصلش صناعة للمشاعر السلبية نفسها , يعني لو فيه مشكلة حاولي تحليها , لو فيه موقف سلبي مش بايدك حاولي تتجاهليه او تقتنعي ببقاءه للأبد

• الخط التاني انك لازم لازم لازم تفضفضي مع حد , ده شئ مفيهوش نقاش , لازم تشوفي صديقة مقربة منك  ,او واحدة قريبتك , حتي لو واحدة كبيرة في السن (جدتك مثلا) و تحكيلها كل حاجة , وتقولي كل اللي عندك , مجرد تنفيس المشاعر السلبية اللي عندك هيساعدك بشكل غير محدود

• من أكبر فوائد الذهاب لطبيب نفسي هو إنه بيعمل الموضوع ده , ان الشخص اللي عنده مشاعر مكبوتة بيلاقي شخص يقعد يحكيله و يسمع منه كل حاجة , فحتي لو المستمع ده مقدمش اي حل او نصيحة , فأصلا أغلب المشاعر السلبية راحت

• إياكي تعملي الكلام ده مش شاب لأي سبب (مالم يكون من المحارم : أخ , عم , خال) , لأن أضرار التواصل العميق بالشكل ده مع شاب أكبر بمراحل من منافعه , حتي لو هيحل كل مشاكلك

• لو كان الطبيب النفسي شاب فمفيش مشاكل , لأن أصلا فيه حاجز نفسي كبير بين الشخص و الطبيب النفسي , فمش هيترتب عليه اي اضرار سلبية , مالم تحسي إن فيه بوادر إنشاء مشاعر إعجاب او حب ليه , وقتها لازم تشوفي بديل

• بعض الأعضاء علي الصفحة عشان مش لاقيين حد يعمل الدور ده , وعشان مش عارفين يروحو لطبيب نفسي لأسباب عديدة , فبيعملو نظام الفضفضة اونلاين معانا , يعني يدخل يحكيلنا كل اللي عنده و بشكل مستمر (مرة في الاسبوع مثلا) , وده أحيانا بيعمل تأثير إيجابي عندهم , فلو عايزة تعملي كدة , احنا معاكي , وطبعا ده من غير مقابل .

----------------------------------------------------------------------------------

• الخطوة التانية من العلاج (بعد البحث عن صديقة او طبيب للفضفضة) هو تقليل جرعة الخيال اللي انتي بتتعرضي لها

• يعني لو انتي من محبي الافلام الفانتازيا او الخيال العلمي او الرعب , فبطليها دلوقي , لو انتي من محبي الروايات فتوقفي عن قراءتها حاليا , لو انتي مشتركة في صفحات او جروبات بتزود الخيال عندك فمؤقتا تخلي عنها

• الخيال في ذاته شئ مفيد و مش مؤذي , بس انتي عندك جرعة زيادة منه , اللي اخشي انها تدمر الحاجز بين الواقع والخيال , وهتلاقي نفسك عايشة في عالم مجنون بيمتزج بيه الحقيقي و غير الحقيقي , فلازم من دلوقتي تقللي شوية من اي حاجة بتعمل عندك خيال , لغاية لما تتحسني

------------------------------------------------------------------------------

• الخطوة التالتة , حاولي متبقيش لوحدك بقدر الإمكان , ايوة ده شئ مستحيل عمليا بس قصدي بقدر الإمكان

• فلو انتي متعودة تكوني لوحدك مثلا 6 ساعات يوميا , خلهيم ساعتين بس , اتلككي عشان تكوني مع فلانة او علانة , حتي لو هتقعدي جنبها تذاكري من غير ما تتكلمي , حتي لو قاعدة ماسكة الموبايل بس هي جنبك , وجودك لوحدك بيجعل شياطين الخيال و أمواج الهلاوس تهجم عليكي

------------------------------------------------------------------------------

•  الخطوة الرابعة مقاومة التفكير الغير حقيقي لما يجيلك , ايوة الواحد مش بيعرف يتحكم 100 % في خياله و تفكيره , بس ممكن يتحكم بشكل جزئي

• فلما عقلك يسرح لبعيد , وتبدأي تفكري في حاجات غير واقعية , فورا فرملي عقلك , وفورا ركزي في حاجات تانية حقيقية و موجودة قدامك

• و الخطوة ديه ممزوجة بالخطوة التانية  , واللي بتخليكي تقللي من جرعات الحاجات اللي بتصنع الخيال (وأهمها الروايات)

------------------------------------------------------------------------------

• الخطوة الخامسة , لو لقيتي انك عملتي حاجة غير منطقية (زي انك تكتبي علي الفيس حاجة مش حقيقية , او لو حكيتي لزميلتك علي موقف انتي عارفة انه مش حقيقي) , فحاولي فورا تعملي استدراك سريع , وتوضحي الحقيقة في اسرع وقت

• توضيح الحقيقة مش معناها انك تقولي انا كنت بتخيل كذا كذا , حاجة زي كدة متتقالش , لكن انك تقولي سبب معين او حجة مقنعة (انا حسيت ان فلان زي عمي بالظبط وهو مات من كام يوم) , وهكذا , وحالي تتجنبي الكذب بقدر الإمكان

• أهمية الخطوة ديه , ان عشان ميحصلش "ديول" للمواقف الغير حقيقية , عشان لو انتي مثلا كتبتي علي الفيس (ان الخطوبة اتفركشت) , وانتي عارفة انه شئ مش حقيقي , فلو صديقة ليكي سألتك خير ايه اللي حصل , فهتضطري انك تألفي حاجات تانية معتمدة علي الكذبة الأولي , والسلسلة هتزيد , وده هيعمق المأساة جدا و تدريجيا هتؤمني بالخيالات ديه

------------------------------------------------------------------------------

• الخطوة السادسة : إنك تنشغلي

• علي قد ما عندك وقت فراغ , علي قد ما الخيالات هتنهش في عقلك و مش هترحمك , وعلي قد ما انتي مشغولة , علي قد ما هتتخلصي من القلق ده

• انتي قلتي ان لما بيجيلك الخيالات ديه بتسبحي و تذكري الله , ديه خطوة كويسة بس مش كافية , لأن الدين له خطوة جزئية في علاج المشكلة ديه , مش خطوة كاملة , يعني المشكلة ديه مش هتتحل بالذكر و التسبيح لوحده , وأصلا ديه مش وساوس من الشيطان عشان يتم طردها بالتسبيح او الذكر

• الانشغال معناه ان يكون جدول يومك مليان حاجات كتير , سواء حاجات مهمة (مذاكرة , صلاة , قرآن) , او حاجات مسلية (تشوفي فيلم , تقرأي كتاب) , او حتي حاجات هايفة (تلعبي دومينو مع صديقتك , تشوفي كارتون) , املي جدولك بحاجات كتير حتي لو مش مفيدة , لأن عقلك لما تمليه بحاجات "حقيقية ملموسة" , هيبعد عن الحاجات الغير حقيقية

------------------------------------------------------------------------------

• الخطوة السابعة : التحكم في المشاعر

• وده شئ مش مستحيل , لكن محتاج شوية تدريب , وشوية تحكم في الاعصاب و في التصرفات و في الكلمات

• فلازم يكون تعاملك مع اي شخص , بناء علي حقائق ملموسة , وبناء علي هي عملت ايه او قالت ايه , مش ايه بتفكر ازاي (انتي مشفتيش تفكيرها) , او هي حاسة بايه (انتي متعرفيش احساسها) , او هي ناوية تقول ايه (ده شئ غيبي) , او انتي مقتنعة بايه (ده مش منطق)

• حاجة زي كدة هتيجي بالتدريب , وهتكون اسهل عليكي لو انتي بالفعل طبقتي الخطوات الستة اللي فاتو

•  لو عارفة انك هتعملي مشكلة مع صديقة وهي مش غلطانة , ساعتها حاولي تتجنبي الكلام معاها مؤقتا , يعني حاولي تتفادي تواجهيها , انك متكلميهاش احسن ما تكلميها باسلوب غير مناسب و تعملي مشكلة

------------------------------------------------------------------------------

• الخطوة الأخيرة : لازم تتمسكي بالصلاة

• الصلاة بجانب إنها فرض مفيهوش نقاش من و أسس الدين , فهي بتصنع حالة من الراحة النفسية الكبيرة , خاصة لما تصلي قيام الليل حتي لو 5 دقايق في اليوم

• بجانب الصلاة تمسكي بالدعاء لرب العالمين , وثقي انه هيفرج الكرب عندك في أقرب وقت

------------------------------------------------------------------------------

زي ما قلنا في البداية , احنا مش هنعرف نعمل تشخيص للي عندك , ومش هنقدر نقول ان ده الحل , بس ثقي انك لو مشيتي علي الخطوات التمانية اللي فوق دول لمدة شهرين , هتلاقي اللي عندك تأثيره قل جدا  ,او اختفي . .

في حالة انك مشيتي علي الخطوات ديه , ومفيش حاجة اتغيرت , يبقي لازم فورا تروحي لطبيب نفسي من غير تأخير , وهو هيكون أدري بالعلاج

بالتوفيق يا رب

الرسالة التالية