العنوان : العقاب والكذب

القسم: #النفسي

الرقم: 09

السؤال:

انا عصبية جدا , والعصبية دي اثرت على بنتى وبقيت اضربها  وبقت تكدب

 

 وكمان بتصوت لما حد يعملها حاجة من عيال الجيران وتقولى حد ضربنى مش عارفة اعمل ايه

 

واقربها اول امبارح قالتلى الميس  ضربتنى واتصل اسال يقولولى مش بنضرب

 

الحل ايه دلوقتى

 

اعصابى تعبت  وبقيت اصرخ   واعيط

 

انا عايزة حل  لانى بقيت بضربها  وانا انهار  من العياط

 

عايزة اخليها تبقى قوية ومتخافش من حد وتساعدنى اخليها احسن حاجة فى الدنيا

 

على فكرة هى اربع سنين و٧شهور

 

النهاردة رمت حاجة على تندة ناس تحت الشباك عندى وكدبت علية وقالتلى لا مش رميت مسكتها بصراحة ضربتها وقرصتها فى جسمها

 

انا اصلا حصل بينى وبينه مشكلة اللى هو ابوها فطلعت قرفى فيها

 

وعايزو اقولك حاجة

 

انا اترببت بالخوف والضرب وكنت بكذب زيها  لما اعمل اشياء غلط مقدرش اقولها

 

انا عايزة بنتى متطلعش زى خالص ولا تكذب ولا تخاف

 

لانى بجد انا بنهار من العياط لما اضربها

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

هي مشكلة مركبة , وتتكون من عدة اجزاء مسببة لبعضها البعض . .

 

و ممكن نلخصها كالتالي :

 

(أم عصبية نوعا , نشأت بأسلوب تربية مش مناسب , مما جعل الطفلة تنتهج سلوك الكذب المستمر , مما يؤدي لمزيد من عصيبتك , خاصة لو حصل مشاكل أخري )

 

وممكن نفكك المشكلة لعدد من النقاط من أجل تحليلها , هي :

 

• الظروف اللي انتي مريتي بيها في الصغر

• عصبيتك وعقابك لبنتك

• كذبها المستمر

• الخوف المزروع داخلها

 

تعالي نتكلم عن نقطة نقطة . .

 

---------------------------------------------------------------------------

 

بالنسبة للنقطة الأولي : الظروف الخاصة بيكي في الصغر  . .

 

انتي مريتي بظروف مؤلمة في طفولتك , لسبب معين كان والدك او والدتك بيتعاملو معاكي بالضرب و العقاب المستمر , واللي من ناحية صنع عندك عصبية بكمية مش قليلة , و زرع جواكي  العنف كاسلوب لمعاملة الغير , وبخاصة الأطفال . .

 

و كان من الطبيعي ليكي كطفلة انك تكدبي  والكذب عند الأطفال غالبا بيكون المسؤول عنه والديهم مش هما  . .

 

لأن الدافع الرئيسي لكذب الأطفال بيكون الهروب من عقاب هما لا يستحقوه , فلما بيشوفو ان فيه ضرب و زعيق  و عقاب عمال علي بطال , فاوتوماتيك هيهرب للكذب , و هيحتمي بيه من بطش ابوه و امه . .

 

كمان ده بيزرع داخل الطفل كارثة اسمها "الخوف" , واللي ممكن تلازمها سنين طويلة , وتبقي مشكلة مش صغيرة , وقد تتحول قدام لاحد انواع "الفوبيا" اللي ممكن تدمر الجهاز العصبي لاي انسان . .

 

و ده اللي جعلك تكذبي وتخافي  انتي صغيرة , وده للاسف اللي جعل بنتك تكذب وتخاف هي كمان , انتي المسؤولة تماما . .

 

و ان كان انتي ملكيش ذنب في اللي حصلك وانتي طفلة , فانتي ليكي كل الذنب في اللي بيحصل دلوقتي , خاصة انك في مكان المفروض تكوني واعية بالكامل فن التعامل مع الابناء عشان عندك طفلة . .

 

و من حسن الحظ , ان اصلاح الأمر ممكن  ,الطفلة سنها صغير , ولسة وعيها متمش تشكيله بالكامل , و "اللي اتكسر يتصلح", وبالتالي لسة الفرصة قدامك كاملة عشان تحققي 4 أهداف غالية جدا . .

 

• تتخلصي من عصبيتك تماما

• تتوقفي عن ضربها و عقابها الا بالقدر الضئيل المطلوب , ولما هي تغلط بالفعل

• يتم كسر الخوف داخلها بالكامل

• يتم نزع رزيلة الكذب من لسانها

 

---------------------------------------------------------------------------

 

طيب ماذا عن عصيبتك و ضربك المستمر ليها ؟

 

ديه جريمة من غير اي مبالغة , العصبية لوحدها من غير ضرب هي مشكلة , فما بالك لما نزود عليها الضرب و القرص الجنوني . .

 

و أخشي كمان ان العقاب ده يكون غير مصاحب لاخطاء منها , يعني الضرب لما الطفل يغلط بيكون بعضه صح و بعضه غلط , وبيكون  ليه شروط و مواصفات و هكذا , لكن لو تم ضرب من غير غلط مذكور للطفل فهي مأساة . .

 

و ليكي انك تعرفي انك لو كنتي عاشية في  اوروبا أو أمريكا كانت الطفلة اتسحبت منك فورا من غير نقاش , عرضوها للتبني , و انتي كان هيتحكم عليكي بالسجن بلا رحمة . .

 

و التشريع الأوروبي ده  ,لأنهم عارفين الخطر الجسدي و النفسي الرهيب علي الطفل من غباء آبائهم و أمهاتهم في التعامل معاهم , و بالتالي مش بيتفاهمو مع اللي بيمد ايده علي ابناءه

 

ياريت لو مكنتيش قريتي السؤال الخاص بضرب الأطفال , حاولي تشوفيه عشان فعلا مهم ,  بعنوان الضرب بجنون

  

 

فأولا . .

 

انتي محتاجة تعالجي عصيبتك الشديدة . .

 

ولما بقول علاج فانا قصدي علاج . .

 

يعني تعاملي مع العصبية كانها "حصبة" , لو حد عنده الحصبة هيقعد يتفرج عليها ؟ ؟ ولا هيقرا عليها مقال من موقع ؟ ؟

 

ولا هيجري علي دكتور فورا . .

 

علاج حالة بنتك بيبدا بعلاجك انتي من العصبية , خاصة لو هي متملكة فيكي بشكل فوق العادة . .

 

فلو انتي قدرتي تلاقي علي النت حاجة تفيدك فيها , وعملت نتيجة معاكي يبقي كويس , لو مفيش يبقي لازم تروحي لطبيب نفسي فورا . .

 

و انتي كمثقفة و متعلمة , اكيد عارفة ان الطبيب النفسي الناس مش بتروحله لو حسو بالجنون , لكن لو عندهم مشكلة في سلوكهم و طباعهم بتأثر علي حياتهم , وأكيد العصبية واحدة منهم . .

 

الطبيب المتخصص هيقولك علي تدريبات , وحاجات تعمليها , وهيمنعك من حاجات تانية , وهيديلك ادوية تخليكي هادية شوية . .

 

اهمالك لعلاج العصبية معناها استمرار للمشكلة , مالم انتي تحليها بمعرفتك سريعا  . .

 

نوصل للضرب  . .

 

زي ما شرحت بالتفصيل في منشور "الضرب بجنون" , ان ضرب الأطفال لابد يكون في أضيق الحدود , يعني باتكلم في مرة او مرتين في الشهر مثلا , أكتر من كدة يبقي تدمير للطفل . .

 

و لما يتم  ,يكون بشكل و اسلوب معين  , مش اي حاجة . .

 

و قبلها يكون فيه تحذير و تنبيه للطفل , ويكون عارف بالفعل انه غلطان . .

 

اي تجاوز عن الشروط ديه , يبقي متسألينيش تاني عن صحة بنتك النفسية , واعرفي انك بتدمري مستقبلها بايديكي . .

 

الضرب و التقريص المستمر ليها , بيقتل برائتها , وبيصنع منها كائن مخيف , هيفزعك خلال سنين قليلة . .

 

لازم يا فندم تهتمي بشكل حاد بالنقطتين دول , لان من غيرهم انسي اي حل . . .

 

---------------------------------------------------------------------------

 

نوصل للنقطة التالتة : كذبها المستمر . .

 

زي ما شرحنا من شوية , كذب الأطفال ما هو الا محاولة للهروب من عقاب شايفينه من آبائهم . .

 

في بعض الحالات , بيكون فيه ما يسمي "الكذب المَرَضي" يعني الطفل مش بيتعرض لاي عقاب ولا حاجة , بس بيكدب حبا في الكذب نفسه , او للحصول علي المزيد من رغباته   , وديه حالة تانية لا تعنينا حاليا . .

 

مشكلة بنتك في انها عارفة انها هيتم عقابها لو عملت شئ معين حتي لو هي مش غلطانة , فبتلجئ فورا للكذب . .

 

يعني لو هي بتشرب من الكباية , ووقعت من ايديها و اتكسرت , ده حدث طبيعي ممكن يحصل لاي طفل , ومفيهوش لا تقصير ولا اهمال ولا سلوك سلبي يُعاقب الطفل عليه . .

 

لو هي شافتك جريتي عليها و زعقتي فيها , وعينيكي مليان شر "ايه اللي حصل يا حيوانة ؟ "

 

فهي عارفة انها لو قالت الحقيقة , فانتي مش هترحميها , مع انها بالفعل مش غلطانة  , هتضطر انها تكدب و تقول اي كلام , حتي لو مش منطقي . .

 

و نفس الموضوع في "العيال ضربوني" , "الميس ضربتني"  , "مرمتش حاجة من الشباك" , وهكذا  . .

 

هي عرفت خلاص ان النجاة من جنون امها – سامحيني علي اللفظ – هو  بالاحتماء بمظلة الكذب اللي هتحميها من بطشك , فهي هتكمل علي هذا النحو . .

 

و بالتالي علاج الكذب , هيكون أولا في علاج العصبية و العقاب . .

 

لو بنتك وجدت ان مفيش عندك عصبية , وان العقاب اختفي – الا في اضيق الحدود – وقتها اهم وازع للكذب هيختفي . .

 

ده مش معناها انها هتبطل كذب بالكامل , لأنه للأسف اتزرع جواها من الاسلوب الخاطئ السابق . .

 

بس علي الاقل انتي جففتي منابعه  . .

 

و عشان تقضي علي البقية الباقية فيه , هتعملي حاجة مهمة . .

 

تتعاملي معاها باسلوب "الكتاب المفتوح"  .

 

يعني ببساطة هتندهيلها , وتقوليلها اننا هنبدأ عهد جديد بيننا . .

 

إني أولا مش هزعق فيكي خالص . .

 

و مش هاضربك الا لما تعملي مصيبة . .

 

ونتفق علي حاجة , انك لو قلتي الحقيقة , انا هسامحك فورا , وهحضنك و اديكي شوكولاتة ,  حتي لو انتي عملتي غلط . .

 

بس لو كدبتي هتضايق منك و مش هكلمك اليوم كله   . .

 

و ابدئي نفذي ده فورا , واوعي لاي سبب تخالفي الشروط اللي انتي عاهدتيها عليها . .

 

يعني لو عملت مشكلة وقالت الصدق , اياكي تلوميها او تزعقي فيها او طبعا  تضربيها . .

 

لانها لو وثقت فيكي مرة , وانتي خدعتيها , مش هتثق فيكي تاني ابدا . .

 

لازم لازم لازم تلتزمي بالشروط ديه . .

 

و هتلاقي بالاسلوب ده الكذب اللي عندها هيختفي تدريجيا  . .

 

نقطة أخيرة متعلقة بالكذب , وهي مقدار صدقك انتي . .

 

يعني لو انتي بتمارسي اي نوع من الكذب , حتي لو قليل , سواء معاها هي (توعديها بحاجة و بعدها تخلفي , او تقوليلها علي ده مش موجود وتلاقيه انه موجود) , او بتمارسيه قدامها (تقولي لاختك والله ما حصل خالص , تقولي لبنتك ردي علي التليفون وقولي ماما نايمة) , اي ممارسة للكذب معاها او قدامها هو تدمير فعلي لاي محاولة إصلاح ليها  . .

 

مستحيل لاي سبب تشوفك بتكدبي , يعني لو انتي هتكدبي ومش قادرة تمسكي نفسك (والكذب حرام تماما) فلازم ميكونش قدامها , والا مستحيل تتعلم الصدق ابدا   . .

 

---------------------------------------------------------------------------

نوصل للنقطة الأخيرة , وهي الخوف داخلها . .

 

الخوف  داخلها مصدره العقاب المستمر اللي هي بتعانيه منك , ومن غير ما تفهم ايه السبب . .

 

يعني لما الطفل  بيغلط و بيتعاقب و يكون عارف ان ده سبب ده  , فده ملوش علاقة بالخوف , لانه فاهم ايه السبب , وفاهم انه غلطان حتي لو مقتنعش بالكامل  . .

 

لكن العقاب اللي هي شايفاه , من غير ما تكون متفهمة هي غلطت في ايه , هو اللي بيزرع جواها كمية لا تنتهي من الخوف , واللي هيدمر كل حاجة جواها , واولها الثقة بالنفس . .

 

وأول خطوة لعلاج الخوف جواها , هو تطبيق النقط اللي فاتت , يعني التوقف عن العصبية , والعقاب المستمر , وكمان اصلاح الكذب عندها . .

 

و بشكل عام , الكذب مرتبط بالخوف , لان الطفل اللي بيكدب , بيكون من جواه خايف من عقاب , وكمان خايف انه "يتفقس" , فالكذب اصلا بيغذي مشاعر الخوف فورا . .

 

فلو تم تطبيق كل اللي فات , هتلاقي ان جزء كبير من مشكلة الخوف تم حلها  . .

 

لازم هي تتطمن انها مش هتضرب تاني , مش هتتعاقب تاني بظلم , مش هيتزعقلها تاني , مش هيحصل ممارسات سلبية بالشكل ده , وده اللي هيصنع جواها نوع من الهدوء والسكينة , واللي هتزيح كل ملامح الخوف عندها . .

 

بعد ما يتم تطبيق الكلام السابق , تيجي انتي بخطوة مهمة اسمها "التشجيع" . .

 

يعني تاخدي بايديها واحدة واحدة وتساعديها في مواجهة سبل الحياة . .

 

فلو هي كانت خايفة منك , خوفها هيختفي لما تعامليها بالحب . .

 

لو خايفة من الاطفال تحت , انزلي معاها كام يوم , عشان تلعب و هي مطمنة انك جنبها , فتطمن  .

 

لو خايفة من الميس في الحضانة , روحي معاها واقعدي شوية عشان تطمن . .

 

خايفة من ابن خالتها اللي بيضربها , خليكي معاها شوية وهي بتلعب معاه . .

 

التشجيع بالكلام و بالفعل , بيكون ليه أثر مباشر في إزالة بقايا الخوف اللي عندها