العتاب المُستمر
الرسالة السابقة
العنوان : العتاب المُستمر
القسم: #النفسي
الرقم: 113
السؤال:
سلام عليكم
الحقيقه انا ما صدقت الاقى حد اتكلم معاه عن مشكلتى وخاصا بعد ما شوفت بعض الشكلات الموجوده ..
انا عندى25سنه متزوجه من ثلاث سنوات عندى بنت وولد زوجى بيسافر وييجى كل اسبوعين يقعد ثلاث ايام ويرجع تانى
الاول كنت بستنى الاسبوعين دول يعدو بفارغ الصبر لكن دلوقتى لا..بسبب ان جوزى دايما يقلل من ثقتى فى نفسى وبيقارنى بغيرى ودى حاجه بتضايقنى جدا وقلتله بس لا حياه لمن تنادى دايما يقولى كلام سم ولما ازعل او ابكى يقولى انتى عايزه ينكدى عليا اليومين اللى انا بجيهم وبيحسسنى ان انا اللى غلطانه وباجى على نفسى علشان ما يمشيش زعلان دابما مش بيلفت نظره اى حاجه فيا تقيل لدرجه البرود
يعني مثلا مش بيحب حاجه تبوظ فى الشقه وعايز الاولاد احسن من اى حد وانا بالطبع كده برده بس اى تقصير ببكون غصب عنى. وسبب التقصير انى بعمل دبلومه تربوى ومشغوله عنهم معظم الوقت.
دا بالنسبه لزوجى بالنسبه ليا انا بقه معنديش ثقه بنفسى ..مش بعرف اتكلم مع حد ..دايما زوجى بيحملنى نتيجه اى خطا يحدث من الاولاد لدرجه بتخنقنى جدا دابما حاسه انى مش عارفه ارضى اللى حواليا على طول ببكى وانا قاعده لوحدى ..
مش راضيه عن نفسى ودابما حاسه بالذنب وتانيب الضمير وخصوصا لما باخد قرار ويبقى خاطى دايما حاسه انى مقصره فى تربيه اولادى ومش واخده بالى منهم كويس انا بعترف انا ممكن يكون عندى لامبالاه مع العلم انى معايا ليسانس وبعمل دبلومه ..
مش عارفه اعمل ايه بس علشان ارضى زوجى واكون راضيه عن نفسى ..ارجو الرد ..وشكر
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
و عليكم السلام و رحمة الله . .
أهلا بيكي . .
من الجميل انك صادقه و صريحه مع نفسك , وانك شرحتي اللي ليكي و اللي عليكي , و ده يدل علي قوة في شخصيتك , وعلي كمية من النزاهة و المصداقية في معايير التقييم عندك . .
فلو هنبدأ الكلام بنقطة التعامل الغير مناسب من زوجك . .
ممكن يكون كلامه فعلا مش مناسب , وممن يكون بناء علي سلبيات هو شايفها بالفعل في البيت , نتيجة انشغالك المستمر بالدراسة و الدبلومة . .
و ان كان الإهتمام بالدراسة شئ ايجابي و مطلوب , لكن لما يكون علي حساب حاجات تانية اكتر اهمية فده شئ غير مقبول . .
يعني تخيلي لو زوجك بيكمل دراسة فساب الشغل و بقيتو فقرا بسبب ده , هل ده ينفع ؟
دراسة الزوجة شئ جميل لكن لما يكون بالتوازي مع واجبها تجاه زوجها و أولادها , ولما الزوج يشوف مواطن تقصير مستمرة , فلازم يتكلم ويعرفك الصح وقتها . .
ايوة ممكن يكون اسلوبه مش مناسب , بس حل الموضوع هيكون باصلاح قلب المشكلة , مفيش دخان من غير نار , ولو انتي قدرتي تعملي توازن بين دراستك و بين بيتك , غالبا كلامه غير المناسب هيختفي , او هيقل بدرجة كبيرة . .
لو كان الطالب العادي ممكن يعمل الدبلومة في سنة , فمفيش مشكلة لما تعمليها في سنتين او تلاتة , مفيش احتياج عاجل دلوقتي للانتهاء منها في اسرع وقت , و في المقابل حرام عليكي لما اولادك يتضررو من اهمال معين او تقصير من امهم , في الوقت اللي انتي ابوهم و امهم فيه في نفس الوقت . .
كمان من حق زوجك لما ييجي اجازة قصيرة انه يلاقي مراته مستعدة ليه , من غير المقبول انه ييجي يلاقيكي مشغولة عنه في اليومين اللي بيجي فيهم البيت . .
------------------------------------------------------------------------------------
بالتوازي مع ده , لازم تبدأي تحلي عدد من النقاط السلبية اللي هتعمل نوع من التنغيص عليكي . .
و أهمهم : عدم الثقة بالنفس , الحساسية المفرطة للكلام , الشعور بالقلق و التوتر , الانهيار بالبكاء مع الأزمات . .
الكلام عن النقاط ديه و غيرها هيطول , ولو انتي شفتي باقي الأسئلة النفسية في الرابط في نهاية الكلام , هتجدي اننا تناولنا بالفعل المواضيع ديه و غيرها , وعملنا تحليل كامل لاسبابها و اعراضها , و طرحنا عدد كبير من اساليب الحل . .
وارد يكون زوجك بيتعامل بشكل طبيعي زي ما كتير من الأزواج بيتعاملو , لكن حساسيتك المفرطة صنعت عندك نوع من التضخيم في أثر كلامه . .
و حتي لو كان اسلوبه غير مناسب , فالرد عليه يكون بطريقة مختلفة , مش بالبكاء و الانهيار .
غير انك ذكرتي ان المشكلة تكمن أساسا في احساسك الذي نشأ منذ طفولتك و كبر مع الزمن .لم تجدي اهتمام كافي و ده ضاعف هذا الاحساس بانك لست ذات قيمه او اقل من غيرك , و هنا هو مربط الفرس
فانتي محتاجة تمشي في خطين بالتوازي :
-
تعملي نوع من الأولوية لبيتك و اولادك , حتي لو كان علي ساب تأخير الدبلومة شوية , و ده هيضمن اختفاء او علي الاقل تقليل نسبة الكلام السخيف من زوجك
-
بالتوازي انك تبدأي تعالجي النقاط السلبية اللي ذكرناها عندك , وعلاجها سهل و معروف بس محتاج منك شوية تركيز و ارادة و طولة بال
ربنا يوفقك يا رب