العنوان : إعادة التأهيل

القسم: #الاجتماعي

الرقم: 65

السؤال:

 

بعد ما اتجوزت بفترة جوزي اتقبض عليه و اتسجن والمشكلة ان هو مكانش برئ , يعني فعلا هو كان غلطان

 

طلع بعد 3 سنين بس المشكلة اني حاسة اني مش طايقاه ولا مستحملة العيشة معاه خاصة ان اصلا المنطقة اللي احنا عايشين  فيها كلها ناس مش محترمة و هو بدا يتلم علي نفس الناس ديه

 

اعمل ايه خاصة ان معايا طفل 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

  

وعليكم السلام و رحمة الله

 

طيب خلينا نعمل عامل مهم للتقييم , واللي علي أساسه انتي هتعرفي تتخذي قرار , تكملي معاه ولا لأ . .

 

العامل هو : هل هو حاليا إنسان محترم و كويس ولا لأ . .

 

و قصدي بكلمة إنسان محترم و كويس , انه من ناحية مش بيقبل مال حرام , وانه مش بيصرف فلوسه علي اي شئ حرام , وانه بيراعي ربنا فيكي , وزوج و أب كويس .

 

مش لازم يكون "رائع" في التقييمات , بس علي الاقل عنده الحد الأدني , اللي من خلاله نقدر نقول انه انسان يتحمل المسؤولية و يشيل البيت . .

 

و التقييم ده يكون علي اساس دلوقتي , مش زمان هو كان عامل ازاي , يعني ملناش دعوة قبل دخوله السجن , احنا بنتكلم بس في الفترة الحالية .

 

لو كانت فترة دخوله السجن , كانت مرحلة حاسمة في حياته , وقدرت تغير كتير في سلوكه و قناعاته , وكانت مرحلة لإعادة تأهيله مرة تانية , و اتعلم فيها ان طريق العنف و الحرام هو طريق غير سليم , وان هو لازم يشقي عشان يجيب القرش بالحلال , فديه نقطة ايجابية . .

 

لكن لو مكانش اتعلم منها شئ  وظل بنفس القناعة اللي كانت عنده قبل السجن , واللي كانت السبب في ضياع سنين من حياته , فهنا لازم تقلقي منه , ومن تفكيره . .

 

و بالتالي الخطوة الأولي اللي تعمليها عشان تعرفي هتكملي معاه ولا لأ , انك تعمليله اعادة تقييم بشكل كامل في كذا نقطة , أهمهم : مدي قبوله للحلال و الحرام , مدي تدينه , مدي تحمله المسؤولية , قيامه بدوره كزوج و أب , طباعه و خلقه و تعاملاته . .

 

علي أساس مستواه في النقاط السابقة ديه , تقدري تتخذي قرار بالبقاء او الانفصال عنه .

 

-------------------------------------------------------------------------------------------------

 

طيب في حالة إنك لقيتي إنه بالفعل إنسان كويس , او خلينا نقول انه : معقول , مش لازم  يكون في المستوي المثالي . .

 

وقتها حاولي تنفذي عدد من الخطوات اللي هتفيدك في حل المشكلة ولو جزئيا . .

 

 

• فن صناعة الود بينكم .

 

 

 

• فكري معاه في خطة للخروج من المنطقة اللي عايشين فيها  .

 

 

 

•  استخدمي الدين عشان تعملي تقويم ليه . .

 

 

• متنسيش ان الزواج مش بس حب , الحب هو العامل الأهم في الزواج بس مش الوحيد , واختفاء الحب مش معناه اللجوء للطلاق , لكن معناه البحث عن حلول لانقاذ المشكلة , خاصة مع وجود اطفال .

 

 

 

الموضوع صعب بس مش مستحيل , ابدءي فيه تدريجيا و هتلاقي حل ان شاء الله