ثورتنا نجحت ؟
العنوان : ثورتنا نجحت ؟
القسم : #السياسي
الرقم : 01
السؤال :
حاسس إنه سؤال غبي و حاسس إجابته سهلة بس فعلا مش عارفها
باختصار ثورتنا اللي نزلنا عشانها و مات الشهداء هتنجح ؟ ولا خلاص اتكتب علينا نعيش مع النظام ده لغاية لما نموت
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
الحقيقة إنه سؤال مش سهل , ومش غبي خالص . .
هو سؤال شديد التعقيد , وإجابته مركبة و متشاكبة , عشان كدة ببساطة مش هاعرف ارد عليه , لكن هاتكلم حوليه . .
و ليه مش هرد عليه , لأن ملوش رد , السؤال ده محتاج حد متنبئ بالغيب , او بيقرأ الكف عشان يقدر يحدد هتنجح ولا لا
مش هينفع اجاوب بما أتمني , او ما ارغب , سؤالك عن توقع وليس عن أمنية , واللي تتوافق بالتأكيد مع أمنية جميع الشباب المصري , الإيجابي منهم و السلبي , الثائر و المشجع من بعيد , المتعلم و غير المتعلم , باستثناء ابناء ظباط الجيش و الشرطة . .
وعشان تكون الاجابة اكثر تحديد ووضوح و منطقية , هنعمل نوع من التحليل الرياضي الرقمي للثورة . .
نجاح أي ثورة معتمد علي كذا نقطة لابد من توافر مقدار معين في كل منها , عشان تقدر تقول إن الثورة هتنجح :
- - الوعي السياسي لدي الثوار
-
- وجود حاضنة شعبية كافية
- انتشار الوعي العام لدي الجماهير
- تكافؤ نسبي في القوة بين النظام و الثوار
- وجود ضغط دولي علي النظام
- مقدار مرونة النظام للتنحي
مش لازم كل العوامل تكون موجودة , يعني الثورة الفرنسية في القرن الـ 18 و الثورة البلشفية في بداية القرن العشرين نجحو من غير وجود البند الخامس , ومع فشل ذريع في البند الاول في كلاهما , بس قوة البند الثاني و الرابع كان السبب الرئيسي لنجاحهم
و الثورة الرومانية في التمانينات فشلت لغياب تقريبا كل العوامل الستة . .
حتي الثورة التونسية , ممكن منقولش عليها انها نجحت , بس كانت احسن حالا من باقي دول الربيع العربي لوجود كمية مناسبة في العوامل السابقة
و الثورة المصرية نجحت في مرحلتها الأولي (تنحي مبارك , وعمل انتخابات برلمانية و رئاسية) ,لما كان فيه وعي بمقدار معقول عن الثوار , وكان فيه حاضنة للثوار , وكان فيه ضغط دولي علي مبارك من واشنطن
و لما فشلت بانقلاب 2013 , فكان لغياب العوامل الستة مع بعض
والثورة الليبية صارت دموية فجأة , لانعدام اي مرونة من نظام القذافي للتفاهم اصلا , ونجحت في مرحلتها الاولي (اغتيال القذافي , وجود حكومة مؤقتة , مطاردة الفلول) لوجود تكافؤ في القوة , و ضغط دولي وأولهم باريس
و لما فشلت بعدها كان لاختفاء اغلب العناصر السابقة
والثورة السورية الأكثر دموية , مع إن كان فيه وعي سياسي كويس جدا عن الشباب السوريين , وكان فيه حاضنة شعبية جبارة , و كان فيه تكافؤ نسبي هايل بين القوتين خاصة في 2012 , لكن اختفاء الضغط الدولي , واختفاء اي مرونة من النظام , تسبب في انهيار الثورة تماما
و كأنها درجات تقدر تقيس بيها اي ثورة هتنجح او هتفشل بيها
--------------------------------------------------------------------------------
ولو هتقيس علي مصر حاليا فممكن نمسك نقطة نقطة فيهم و نتكلم عنها
بالنسبة للوعي السياسي عن الثوار , خليني اقول ان بالفعل فيه وعي سياسي كافي دلوقتي , و ان اغلب الفصائل اتعلمت من أخطائها , وإن لهيب نيران السيسي لسعت الجميع بلا استثناء (مش باتكلم طبعا علي اي سياسي بيطبل للسيسي) , وإنهم دلوقتي فهمو أخطائهم السابقة , لكن طبعا بعد فوات الأوان . .
مظاهرات الأرض مكانتش قليلة , مش قصدي كعدد لكن كوعي و كفهم للقضية , وتوحد الثوار
وجود الوعي حاليا علامة ايجابية , كونه متأخر مينفيش أهميته , لانه ممكن ينفعنا في يوم تاني
بالنسبة للنقطتين التانية و التالتة (الحاضنة الشعبية , والوعي الجماهيري ) خليني اقول ان الموضوع محير , و سبب الحيرة , ان فيه فئات كتيرة من الجماهير بالفعل كفرت بالسيسي و آمنت بالثورة , وفهمت غلطها , و لو اتعمل انتخابات حقيقية هيشاركو لاسقاط السيسي . .
و فيه فئات كتيرة برضه لسة مقتنعين بخيم التحرير و كنتاكي و تامر بتاع غمرة , و حزب الله اللي كان بيقتل في المتظاهرين . .
لسة بيدورو علي عكاشة علي اليوتيوب , و منتظرين لميس عشان تشرحلهم ازاي جون ماكين مسك منصب مرشد الاخوان لما بديع لبس النقاب في ميدان رابعة . .
لسة ميدان التحرير عندهم مرتبط ذهنيا بخيم الدعارة , والحشاشين , و لو هما شافو ست البنات اللي عراها أنجس عساكر في مصر , هيلوموها , ليه يا بنتي ملبستيش "بادي" , وايه اللي وداكي التحرير . .
الناس اللي فاهمة موجودين , والدماغات الجزم موجودين , ومحدش قادر يحدد النسبة الغالبة لمين فعلا . .
بالنسبة للنقطة الرابعة التكافؤ في القوة , فهي مش موجودة ,لأن كل الثوار اختارو الخيار السلمي , وبالتالي لا يوجد سلاح الا في يد طرف واحد , وحتي باقي مفاهيم القوي (زي القوة الاقتصادية او الإعلامية او السياسية ) فالمعارضة لا تملك ايا منها , باستثناء صفحات الفيس بوك (وتأثيرها مش قليل)
بالنسبة للضغط الدولي علي السيسي , فهنا انت ممكن تسيب الموبايل و تضحك شوية لما بقك يوجعك , بعدها كمل قراية البوست
بالنسبة لمرونة النظام , فأظن ممكن برضه تكمل الضحك , او البكاء . .
ده كدة باختصار تشريح مختصر لوضعنا الحالي , مش قادر اكون متشائم و اقولك مفيش أمل , ومش عارف أكون متفائل , و أقولك الانقلاب يترنح . .
لكن ممكن اقول باختصار , إن الوضع دلوقتي للسيسي , مش مستقر زي ما كان في 2014 مثلا , وإن غباؤه هيجيب أجله , لكن مش لازم يكون بالضرورة ده لمصلحة الثورة , لأن ممكن القادم يكون ألعن . .
يا تري عرفت اجاوب علي السؤال ؟ ؟