العنوان : الشعور المتبادل

 القسم: #العاطفي

الرقم: 12

السؤال:

 

 بحب صاحب اخويا و حاسه انه معجب بيا بس هو ساكت و مش عارفه اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

اهلا بيكي

 

من ناحيتك فيه احتمالين . .

 

احتمال يكون فيه بالفعل اعجاب و حب حقيقي بينكم , وتكون ديه بداية علاقة ايجابية يتم ترجمتها لارتباط حقيقي , يعني خطوبة و زواج

 

او يكون انتي بتقربي من نفس الدايرة اللي اتكملنا عنها كتير ,و المتعلقة بالحب في غير محله , واللي للاسف اخرته معاناة و عذاب نفسي مستمر .

 

ونفس الكلام من ناحيته , يعني احتمال يكون هو انسان جاد و عايز يتجوز , او يكون بيتسلي .

 

ولان دايما البنت بتكون عايزة استقرار و ارتباط و زواج , اما الشاب فمش دايما بيكون في دماغه نفس الهدف  ,فاحنا لازم نوصل لمساحة مشتركة سليمة .

 

و المساحة الوحيدة المقبولة هي : الاعجاب اللي يؤدي للارتباط و الزواج .

 

واي مساحة تانية  , او اي طريق تاني معناه المعاناة النفسية و العاطفية ليكي , والقلب المكسور في النهاية  , في حين هو مش هيتأثر كتير , لأنه لو كان من النوع اللي بيتسلي , فمش هيتضايق عليكي اكتر من ضيقه علي ضياع علبة سجاير .

 

بقولك الكلام ده عشان يكون الطريق واضح عندك للنهاية , ان اي تواصل معاه و في نفس الوقت مفيش نية حقيقية عندكم انتو الاتنين للارتباط  القريب , يبقي تضييع وقت , و"بعزقة"  كرامة

 

 

اذن دلوقتي احنا عندنا سؤالين مهمين .

 

السؤال الأول : ازاي تقدري تعرفي هل بيبادلك نفس الشعور ولا لا .

 

السؤال التاني : هل هو شخص مناسب ليكي كزوج ولا مش مناسب . .

 

 

السؤال الأول اجابته متعبة  شوية بس مش مستحيلة .

 

 انك تحاولي تعرفي حقيقة مشاعره , وكمان توصليله مشاعرك ممكن يتم عن طريقين , ممكن واحد فيهم ينفع  :

 

 

• ممكن اخوكي يلمحله (في حالة ان هو عارف ومتفهم) , ويقول كلام معين عنك قدامه , ويخلي الكلام ياخد بعضه .

 

 

 

• ممكن حد تاني يتكلم معاه غير اخوكي .

 

 

 

طب بفرض ان هو بالفعل عنده شعور ايجابي ناحيتك , وان فيه اعجاب متبادل , لازم نتأكد هل هو اصلا مناسب ليكي كزوج ولا لأ . . 

 

ولما بقول مناسب او غير مناسب , فانا قصدي باقة كاملة من الصفات اللي تؤهله انه يكون زوج يقدر يبني حياة حقيقية , مش علاقة عابرة .

 

يعني يا تري هو جاد و بتاع جواز ولا بتاع تسلية  . .

 

يا تري دينه و اخلاقه وقيمه مناسبة ولا لا . .

 

يا تري مستعد لتحمل تبعات الزواج , وتخطي اي عقبات تكون قدامكم ولا لا . .

 

عنده كمية كافية من الصبر و طولة البال و الحكمة لعلاج مشاكل معينة ممكن تتواجد , ولا خلقه في مناخيره و الطلاق علي لسانه . .

 

الحاجات ديه كلها هي اللي لازم اصلا تتأكدي من وجودها , قبل ما تشوفي هي رومانسي و طيوب و كيوت ولا لا .

 

لان الصفات اللي فاتت ديه هي اللي بتبني البيت بشكل حقيقي , بعد ما تختفي اصداء اي صفات جانبية تانية من الغلط التقييم علي اساسها .  .

 

وكنا نشرنا من فترة رسالة شديدة الأهمية  , عن الاختبارات الزوجية , وان ازاي تقدري تحددي اللي قدامك ده شخص مناسب ليكي ولا لا . 

 

 

و عن طريق تطبيق الاختبار ده عليكي و عليه , هيبان مدي تناسب شخصيتك مع شخصيته , ومدي تناسب شخصيته مع شخصيتك , و علي اساس ده تعرفو هل هتكملو حياة مع بعض ولا لا . .

 

و ارجو انك بالفعل تهتمي بالصفات الحقيقية اللي بيتبني عليها السعادة الزوجية (الدين , الخلق , طولة البال, الجدية , تحمل المسؤولية , الاخلاص , الصدق ) , مش بناء علي شكله عامل ازاي , ولا هو بيفتكر يجيب دبدوب في الفالانتاين ولا لا .

 

فانتي ابدئي بالخطوة الاولي (تشوفي حقيقة مشاعره) , ومنها شوفي الخطوة التانية (مدي تناسبه ليكي) , وبعدها اتخذي القرار

 

بالتوفيق يا رب