من يوم ما اخترعو الصورة السيلفي وانا مش عارف ايه اللي حصلي , عندي نوع من الهوس بيها جدا لدرجة ان كارت الذاكرة في الموبايل مش بيكفي الصور اللي عليه . يعني بالميت 5 صور يوميا وبتزيد لما بروح مكان جديد او فسحة

 

في الاول الموضوع كان مسلي . بس بعدها ارتبطت بيه جدا . و بقي نوع من الهوس فعلا .

واول ما اخد الصورة لازم ارفعها علي الفيس و انستاجرام واتابع مين عمل اعجاب او علق .

 

بس متقوليش ان انا مريض و بتاع لان الشباب كلهم كدة

 

يللا سلام عليكم

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

 

انت مش مريض , لكن لازم تعمل عدد من التعديلات , عشان متقعش في فخ المرض بالفعل . .

 

المرض اللي بنتكلم عنه اسمه "اضطراب الشخصية النرجسية" , واللي بيتم تعريفه في "دليل التشخيص و الإحصاء" DSM , وهو أشهر تصنيف للاضطرابات النفسية في العالم , يتم تعريفه علي إنه (زيادة شعورالشخص بأهميته الذاتية , و الحاجة لأن يكون موضع إهتمام الجميع , مع تدني مشاعر التعاطف مع الآخرين)

 

وعلي أساس التعريف ده , هتلاقي انك بتمشي علي خطواته من غير ما تحس و وبتقرب بالفعل من المرض . .

 

انت لسة معندكش المرض ده ,بس أخشي انك ماشي في الطريق , او علي الأقل هيكون عندك بعض الأعراض منه . . .

 

و السيلفي في حد ذاته مش هو المشكلة , لكن في المشاعر اللي بتدفع الواحد لالتقاط اعداد من الصور لنفسه و نشرها بالطريقة ديه . .

 

فالفرق الرئيسي بين الصور السيلفي , والصور العادية , إن السيلفي بيشبع عن صاحبه الغرور المرتبط بإحساسه بأهميته المبالغ فيها , عن طريق تكرار التقاط الصور ليه , وهو يحرص علي إنها تكون شديدة الجمال , ويكون فيها بالغ الأناقة . .

 

السيلفي طريقة عشان تقنع نفسك و تقنع الآخرين قد ايه انت وسيم و جمالك من النوع النادر , وإزاي عايز العالم كله ينبهر بيه . .

 

و بمجرد ما تلتقط الصورة , فمش بتقدر تستني عشان تنشرها , وده انعكاس للشق التاني من التعريف السابق , احتياجه الكبير إنه يحس انه موضع أهمية من المجتمع , وده تفسير انك بتعمل ريفريش كل 30 ثانية , عشان تشوف مين شاف الصورة , ومين عمل اعجاب , ومين علق و يا تري قال ايه ,اول ما تصحي من النوم تجري علي التليفون وتشوف حصل ايه في الـ 8 ساعات اللي كنت نايم فيه , مين قال ايه . .

 

و في حالة وجود تعليق إيجابي يمدح في جمال الصورة و اناقة صاحبها , فده يقوم بتدعيم قناعتك بإنك بالفعل محط اهتمام من الجميع , ويؤكد قناعتك السابقة انك بالفعل وسيم من الدرجة الأولي . .

 

و في حالة وجود تعليق ساخر او محبط ليك , فده بيتسبب في غضبك او احباطك , وبيضرب فورا في ثقتك بنفسك , وتحاول تعوض ده بالمزيد من الصور . .

 

و غالبا ما يرتبط الأمر بنوع من التجاهل لمشاعر الآخرين , زي ما ورد في الشق التالت من التعريف , وبيكون الاستثناء انك تعمل تعليق إيجابي علي صور اصدقائك , حتي من وراء قلبك , كنوع من "تقديم السبت" عشان هما كمان "يقدمو الاحد" فيقومو بالتعليق ايجابا علي صورك , وكأن حتي المشاعر الإيجابية اللي ظهرت منك تجاه حد مش عشانه هو , ولكن نوع من الصفقات اللي بيحصل فيها تبادل تعليقات مصطنعة وليست ذات مشاعر حقيقية , ونظام سلم و استلم . .

 

و الحقيقة إن الاستمرار علي هذا النحو شئ غير صحي , وبيعمل تأثير سلبي تراكمي , هتظهر نتائجه بعد فترة , ممكن نذكر بعضها . .

​

• الاهتمام الشديد برأي الناس فيك , و ديه مشكلتها ان مشاعر رضاك او غضبك من نفسك , وكذلك تقييمك متعلق برأي الناس فيك , وياريت رأيهم مثلا في فكرك , او شغلك , او تحليلاتك , ده انت منتظر رأيهم في شكلك , اللي اصلا محدش ليه دخل فيه , بالتالي هيتم بناء حالتك النفسية فقط علي رأي الناس , واللي ممكن يكون ايجابي او سلبي . .

​

• التذبذب الكبير للثقة بالنفس , واللي هتعتمد فقط علي رأي الناس , وهتلاقي ان كلمة تفرحك و تخليك متحمس و متفائل , وكلمة تحبطك و تخليك متضايق , وديه مشكلة كبيرة عشان زي ما قلنا إن الرأي اللي بيتقال اصلا بناء علي شئ مش بايدك وهو الشكل . .

 

• إدمان التعامل مع الحياة الخيالية Virtual Life , لان انت مش زي باقي الناس بتتعامل بشكل متوازن مع وسائل التواصل الاجتماعي , بحيث يكون لها وقتها , وحياتك الحقيقية لها وقتها , لكن انت كل تركيزك و اهتمامك و متابعتك , خاصة بهذا العالم الوهمي من الاعجابات و التعليقات , واللي مش بالضرورة بتعبر عن مشاعر حقيقية لاصحابها

 

ده اللي بيدخلك في حالة ادمان الموبايل و تطبيقاته , واللي هييجي علي حساب التعاملات الحقيقية مع الناس , و تواصلك الفعلي مع اقاربك و اصدقائك , بل و مذاكرتك و صحتك , ببساطة انت بتدمر روابطك الاجتماعية وصحتك الجسدية و النفسية في نفس الوقت .

 

• توليد كمية غير هينة من الكراهية و الحقد والغيرة والتنافس الغير حميد , سواء مع شخص سخر منك او تجاهلك في التعليقات , او شخص تاني بدأ يلفت الانظار عنك بصوره السيلفي الأفضل منك , واللي بدأت تجمع اعجابات و تعليقات أكتر من صورك , و هنا هتدخل في ساحة حرب لن تنتهي أشبه بصراع اتنين بنات من بيئة اجتماعية منحطة علي شاب رقيع شعره واقع علي عينيه , وهو بيتفرج عليهم مبتسم . .

 

• ادمان الصور السيلفي بالشكل ده , مرتبط أكتر بالبنات المراهقات , اللي لا يشغل بالهم اي شئ ذو بال , فكونك تحذو حذوهم هيتعمل عنك انطباع شديد السلبية , و هيترسم عنك صورة ذهنية هترتبط بيك فترة طويلة , وبالتأكيد لن يعتمد عليك في اي شئ مهم , او يسمح ليك بالتقدم لاسرة محترمة , كفاية انه هيتاخد عنك فكرة انك "سوسن" , مع الإعتذار لأي بنت اسمها سوسن هنا . .

 

• هتجد تأثير سلبي خطير في دراستك لو انت في الجامعة , او شغلك لو انت بتشتغل , هتلاقي ذهنك مشتت , ومش قادر تركز في حاجة , خارج الإطار الضيق اللي انت حبست فيه نفسك , المشكلة مش في ضياع الوقت بس , لكن كمان في ذهنك اللي مستمر في التساؤل عن يا تري سيلفي الصبح مجابش اعجابات كتير ليه ؟ ياتري لما "مي" علقت بالوش اللي عامل ضحك بالدموع  كان قصدها ايه , وكدة مع السلامة اي تركيز في المذاكرة او الشغل . .

 

• توقع كمية لا تنتهي من المشاكل الزوجية , سواء لما تخطب او تتجوز , وحتي لو شايف ان الصور ديه بتعجب البنات و فرحانين بيها – بفرض انك مسمسم و كيوت – فالبنت ممكن تعجب بصورة شاب لما متعرفوش , لكن اكيد مش هتوافق علي السلوك المَرَضي ده لما يكون خطيبها او زوجها , خاصة لما تلاقي باقي البنات داخلين يمدحو في عيونك الخضر

​

• و بفرض ان مفيش بنات هتعلق خالص , وكل اللي هيعلقو شباب , فأساسا اي بنت هتحتقر زوجها لما يعمل شئ مشهور عن البنات , وهتلاقيها جابتلك علبة المكياج بتاعتها عشان "تتمكيج" قبل سيلفي الساعة 7 و نص

 

السيلفي في حد ذاته مش مشكلة , لما يأتي بالشكل الطبيعي , والكمية المفهومة , سواء سيلفي جماعي او حتي فردي , لكن بشكل مقبول , إنما اللي انت بتعمله هو بالفعل خارج أي إطار منطقي , و مينفعش تستني علي نفسك , لأن الموضوع هيتطور سلبا

​

​