العنوان : تروس الحياة

القسم: #النفسي

الرقم: 85

السؤال:

 

مش عارفة اعمل ايه في الشغل عندي اكمل ولا اسيبه

 

انا باشتغل من الساعه 8 الصبح لحد الساعه 6 بالليل واحيانا ل 8 فى مدرسة امريكان مع الاطفال اللي عندهم صعوبة في التعليم و الضغط كتير

 

وطبعا معروف المجهود الذهنى اللى ببذله معهم  انا ممكن افضل اشرحلهم حاجة ساعه ولم اجى اسئل فيها ملاقيش اجابة

 

وده بقا ييخلينى فعلا أنهار احيانا كتير بفضل اعيط فعلا ع مجهودى اللى بيضيع ده

 

اى فرصة شغل تانى موجوده هتكون ام مدرسة برضه او مركز بس المرتب هيكوت أقل لانى يعتبر هبدا ف المكان ده من جديد  انا فعلا مش عارفه افكر ولا عارفه اخد قرار

 

بس كل اللى انا حاسه بيه انى فعلا تعبت مبقاش عندى طاقة استحمل بيها انى اشتغل معهم

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 شوفي يا ستي . .

 

من أكتر الأخطاء اللي بيقع فيها فئات واسعة من المجتمع , الغني منها قبل الفقير , انه يجعل محور حياته الشغل , و يجعله هدف في حد ذاته , مش وسيلة للمعيشة الكريمة . .

 

و المشكلة ديه بتزداد في المجتمعات اللي عندها معاناة اقتصادية أكبر , زي بلادنا العربية  , و منها أكيد مصر  . .

 

و بتلاقي ان المشكلة ديه ليها أكتر من شكل , لكن كلها بتصب في نفس الخانة السلبية الخاصة بتدمير الشخص . .

 

إما إن الأب يكون مغترب ,  و شغال هناك بيبعت لأسرته فلوس كل شهر , و ده بيصنع منه ترس شغال في ماكينة عملاقة لصناعة الفلوس , وفي نفس الوقت اولاده اتحرمو منه أهم سنوات في عمرهم , ولما يصفي أعماله و يرجع مصر , هيلاقي أولاده بقو شباب في جامعة او خريجين , و بقو غرباء عنه , طبعا غير التغييرات السلبية اللي بتحصل فيهم لحياتهم الطويلة من غير أب . .

 

أو إن الشخص يكون مش مغترب , بس مطحون صبح و ليل في الشغل , وبالتالي طول 6 ايام في اسبوع مش بيشوف مراته او اولاده , وفي يوم الاجازة عايز يستريح و ينام , لا فاضي لخروج , ولا فسح , ولا مشاوير , ولا حتي انه يقعد مع عياله يطمن عليهم . .

 

و ده كمان بيصنع من الأسرة شئ مفكك , كل واحد في وادي , وطبعا الطفل مش هيلاقي من أبوه اذن صاغية لو عنده مشكلة او استفسار . .

 

او حتي لو الشخص مش متزوج – زي حالتك – لكن طاحن نفسه في تروس الحياة اللي مش بترحم , لصناعة مستقبله او لتحقيق نجاح او لتحويش فلوس , و يفاجئ الشخص بعد سنين انه بالفعل حقق نجاح  ,او حوش فلوس , لكن المأساة انها كانت علي حساب صحته , وراحته , وشبابه , و عمره اللي جري , والأسوء : صحته النفسية اللي اتدمرت . .

 

و ده اللي انا شايفه بالظبط في حالتك دلوقتي . .

 

-------------------------------------------------------------------------------

 

لابد إنك تدربي نفسك علي الكلمة السحرية اللي هتحل مشكلتك بالكامل , وهي : التوازن . .

 

إنك توازني ما بين مميزات الشغل : "نجاح و تفوق و فلوس" , وبين عيوبه اللي مش هينفع تتجاهليها : "التأثير السلبي علي الصحة النفسية , الوقت الرهيب اللي بيضيع , الفرص اللي بتروح منك لانشغالك في الشغل . . "

 

و التوازن مش معناها انك تسيبي الشغل و تقعدي في البيت , لكن معناها انك تاخدي من الشغل المقدار الكافي اللي يفيدك , أكتر من كدة هيكون بيأذيكي . .

 

يعني لو انتي استمريتي في الشغل المتعب نفسيا ده فترة طويلة كمان , وعلي سن 40 سنة مثلا قلتي خلاص انا هسيب الشغل و استمتع بالفلوس اللي حوشتها , هتلاقي انك بالفعل حوشتي كمية كبيرة من الفلوس , لكن أجمل سن في حياتك عدي خلاص , صحتك النفسية بقت منهارة (و ديه حاجة يصعب علاجها او إعادة تقويمها) , كتير من صديقاتك بقم يا مشغولين يا مسافرين يا ملخومين مع بيوتهم . . .

 

هتلاقي نفسك إنك ضيعتي أجمل سنين في عمرك , عشان تجيبي الفلوس , اللي هي بالفعل مش هتفيدك دلوقتي لما تعدي السنين ديه , وانتي بالوضع ده , حتي لو معاكي مال الدنيا . .

 

بينما . .

 

بينما لو انتي من دلوقتي اتقنتي فن الموازنة , و قدرتي تعيدي توزيع وقتك ما بين شغلك , وهواياتك , وعلاقاتك الاجتماعية مع صديقاتك او اقاربك , و انك تقضي وقت جميل مع نفسك , او تسافري مثلا , هتلاقي انك لما توصلي لسن 40 سنة , انتي حصلتي علي قدر متوازن من كل اللي انتي عايزاه , ايوة مش معاكي فلوس كتير , لكن حققتي اغلب اللي انتي عايزاه بالفعل  . .

 

الموضوع مش سهل , وبيفشل فيه ناس كتير للأسف , لكن محتاج منك فن و حسن تقدير و قدرة علي التخطيط , وصبر في تنفيذه , والأهم من ده كله : انك تقاومي اغراء انك ترجعي لدوامة "الشغل – الفلوس" مرة تانية , واعرفي ان الفلوس الزيادة اللي هتجيبيها , فعلا اقل أهمية بكتير من الصحة النفسية اللي هتروح عشانها . .

 

ارجوكي توقفي عن الجري وراء أصنام احنا بنصنعها بنفسنا , و بنظن انها صح , وحولناها من وسائل لأهداف في حد ذاتها , واللي في الآخر هتدمرنا . .

 

----------------------------------------------------------------------------------

 

ففي النهاية ممكن نقولك عدد من الاقتراحات , واللي ممكن واحد فيهم يكون مناسب للموقف الخاص بيكي حاليا . .

 

 

 

• الفكرة الأول  , انك تسيبي الشغل ده , و وتدوري عن شغل اقل في الوقت و المجهود و الفلوس . .

 

 

• الفكرة التانية انك تستمري في نفس العمل لكن مع اختلاف التخصص  , يعني بدل ما انتي شغالة مع حالات خاصة و إعاقة ذهنية , إنك تشتغلي مع اطفال عاديين , صحيح الشغل ده هيكون الوقت فيه نفسه هو هو , لكن اكيد هيكون فيه اختلاف جذري من ناحية الضغط النفسي اللي هيكون عليكي . .

 

 

• الفكرة التالتة , انك تستمري في الشغل اللي انتي فيه , لفترة معينة (يعني مثلا سنة او سنتين كمان ) , لغاية لما تكوني رتبتي شغل تاني مناسب , سواء في نفس المدرسة في قسم تاني , او في مكان تاني خالص  . .

 

 

• الفكرة الرابعة إنك تفتحي بزنس , لكن ديه خطوة خطيرة و فيها شوية قلق , لأن لو لأي سبب البزنس فشل , انتي مش بس هتخسري فلوسك , ده انتي كمان هيحصلك انهيار عصبي و هتدمر صحتك النفسية , وانتي مش ناقصة , فنصيحتي انسي الاقتراح ده حاليا

 

 

احنا عرضنا قدامك اربع افكار , شوفي المناسب منهم و توكلي علي الله فيها , احنا شايفين الفكرة الأول و التانية مناسبين ليكي جدا , خاصة انك مش رب اسرة و بالتالي مش مضطرة تشتغلي عشان تفتحي بيت رغما عنك , فكري كويس و صلي استخارة , وان شاء الله ربك هييسر الأمر ليكي