العنوان : انا مدمن للعادة السرية

القسم : #الديني

الرقم : 06

السؤال :

  

طبعا ده مش الاكونت بتاعي  

 انا مشكلتي زي مشكلة الاف الشباب في كل مكان   وهي العادة السرية اللي مدمراني نفسيا 

 

احيانا الموضوع بيزيد معايا و بعملها يوميا واحيانا اكتر من مرة في اليوم واحيانا بنساها و اقعد كام يوم من غيرها بس مش بزيد عن اسبوع قبل ما اعملها مرة و مرتين

نفسيا بقيت متدمر حاسس اني مكسوف لما باقف اصلي او اقرا القران بحس اني نجس

​

حاولت ميت مرة اسبها ومش باعرف كل شوية بارجعلها تاني ومش قادر امسك نفسي 

اعمل ايه  

​

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة  :

​

مش هنبالغ لو قلنا انها بالفعل مشكلة كبيرة , والأثر السلبي الخاص بيها مش بس في الذنب اللي بيتم من خلالها , لكن كمان في الأثر السلبي الرهيب , اللي بيجر وراه عدد كبير من المعاصي 

والأزمة إن بعض الشباب بيظنو ان الموضوع بيتحل مع الزواج , للأسف لا , وكتير من مدمنين العادة السرية  , بيكمل فيها بعد الزواج , وبيكون غالبا ده من الاسباب الرئيسية لفشل العلاقة الزوجية تماما , وبتوصل أحيانا للطلاق  , أو صناعة حياة باردة بين زوجين , الزوج فيها مش قادر يستمتع بزوجته , ولا قادر يمتعها بالشكل الكافي , وكدة مع السلامة للزواج كله . . 

و عشان نعرف ازاي نعالج المشكلة ديه , عايزين الاول نتناول نقطة حساسة شوية , قد يبدو الكلام فيها محرج لكنه بالفعل ضروري . . 

 

إيه فارق بالتحديد في المتعة (للرجل) بين الجماع الكامل , وبين اخراج المني بالعادة السرية ؟ ؟ 

الحقيقة انك عشان نحط ايدك بالتحديد علي إجابة السؤال ده , فممكن تعمل مقارنة بين شخصين , الاتنين جعانين جدا

​

الأول دخل علي سفرة مليانة فضلة خيرك بقي , سلطة و رز و بطاطس في الفرن , وفراخ مشوية , وبعدها ضرب طبق رز بلبن و حبس بكباية نيسكافيه تقيلة 

 

التاني المسكين , مش لاقي اي حاجة من دول , بس لقي قدامه طبق فيه مخلل مشطشط , فهجم عليه و بدأ ياكل 

الأولاني المحظوظ  ,بياكل علي مهله , ومستمتع بكل حاجة بياكلها 

 

التاني المسكين , جعان جدا , بس كل ما ياكل حتة خيار او فجل مخلل , يلاقيها مشطشطة , تلسع بقه , ويعوز يشرب مية , المية تنزل علي بطنه الفاضية اساسا تخليه يجوع أكتر . .

 

الاول قام من السفرة و بطنه مليانة أكل , وحاسس بسعادة و هدوء و طمأنينة كدة مريحاه 

التاني لا طايل يشبع , ولا عارف يشرب مية براحته , ولا عارف يوقف الشطة في بقه , ولا حتي قادر يرجع لشعور الجوع العادي اللي كان عنده قبل ما ياكل . . 

 

فهمت الفرق بينهم ؟ ؟ 

 

ممارسة الجماع الكامل مع الزوجة , بيجعل الجسم كله يتعاطي مع الحدث ده , و بهدوء و طمأنينة , والأهم شعور بالود و الرحمة , خاصة لو كان بالفعل بيحب زوجته  مش مجرد قاعدين تحت سقف واحد و خلاص  . . 

 

و بالتالي بعد ما يخلص الجماع , بيشعر "بالهدوء" يعني بالفعل بيكون شبع , بيكون عنده حالة من الرضي والهدوء النفسي , واللي تجعله حتي زاهد في الجنس لكذا يوم بعدها 

 

بينما اللي بيمارس العادة السرية , هو بيلسع نفسه بمخلل مشطشط  , وأول ما "ينتهي" , بيحس ان فيه حاجة غلط , بيحس انه اتضحك عليه , بيحس انه لسة جعان , بيحس ان محصلوش اي تشبع , بس في نفس الوقت جسمه انهك بالفعل

 

يعني ممكن نختصر ده كله في كلمتين . . 

 

ممارسة الجماع بتعمل تشبع في الشهوة , و راحة الجسم مع بعض . . 

ممارسة العادة السرية بتنهك الجسم , من غير اشباع شهوة . . 

و الأزمة إن ممارسة العادة بتورث شعور بالذنب و الخزي والكسوف و الاحراج , وده لوحده قادر يقطم ضهر اي حد , خاصة مع تكراره , و بيزيد لما الشخص ده بيكون اصلا متدين , ومعروف في اسرته و اصدقائه انه محترم و متدين و ابن ناس . . 

 

المقارنة ديه , بين مظهره , و بين الواقع اللي هو شايفه , بترسب في ذهنه صورة بشعة عن نفسه  ,وهو بيحس انه منافق و كذاب و مخادع , وده بيدمره نفسيا

 

والمشكلة بتتضاعف لما ترتبط العادة احيانا بمشاهدة اشياء محرمة , فبيتضاعف الذنب , من معصية واحدة لعدد من المعاصي مع بعض . . 

 

ولأن العادة نفسها , زائد البحث عن الأشياء المحرمة ديه , الاتنين بيصنعو جو مكرهب من التوتر و القلق و الاضطراب  , والخوف ان حد يدخل عليك الغرفة , او حد يشوف اللي انت بتعمله , كل ده بيدمر الشخص نفسيا بشكل كبير , وبيسيبك وانت مجرد حطام , وبقايا إنسان . . 

 

والمشكلة ايضا ان عقلك الباطن هيدفعك دفعا , انك تقلل تدريجيا من إحساسك بالذنب , وده اسلوب دفاعي نفسي معروف , لغاية لما تدريجيا متحسش اساسا ان ده ذنب , وان ديه مشكلة بتهلك جسمك و صحتك النفسية , لغاية لما تتحول لعادة حقيقية يستحيل التخلص منها

 

الحديث عن اساليب و طرق علاجها يطول , وده اللي شرحناه بالتفصيل في رسالة : الدائرة المفرغة -1 , والدائرة المفرغة -2

​