الفشل المستمر
الرسالة السابقة
العنوان : الفشل المستمر
القسم : #النفسي
الرقم : 59
السؤال :
زيي زي مليون واحد في الشعب المصري عايز اهاجر من هنا و اسافر اي حتة بقالي 6 سنين بقدم علي هجرة امريكا العشوائيه و طبعا عمري ما فزت فيها
قريت عن هجرة كندا و عرفت انها مجتاجة نقط و امتحان انجليزي و كدة بدات اخد كورس و ذاكرت علي اليوتوب شوية وزهقت و مكملتش اعصابي تعبت و مش عارف اعمل ايه
المشكلة اني ببدا الحاجة و بزهق و اسيبها علي طول
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
شوف يا سيدي .
هي المشكلة زي ما هي واضحة , مش في عدم معرفة خطوات هجرة كندا , او في صعوبتها , لكن في نقطتين تانيين واضحين , مرتبطين ببعض , ومأثرين علي بعض بشكل ما . .
الإحباط , و عدم الصبر
الإحباط اللي باين من اول كلمة في رسالتك , إنت إنسان فقدت الأمل في البلد , وفي المستقبل , غالبا معندكش وظيفة حاليا او عندك وظيفة غير مستقرة , و مفيش دخل كويس او معاملة آدمية أو مستقبل فيها .
في نفس الوقت مفيش خطة واضحة معاك لإصلاح الوضع الحالي , فأول فكرة الواحد بيفكر فيها هو الهروب .
و إن كان الهروب في بعض الأحيان بيكون حل , فمش دايما بينفع كحل للمشكلة , لأن انا لو رحت اسكندرية , و هناك جالي انفلونزا , فالحل مش اني اسيب اسكندرية , لكن اصلح أصل المشكلة . .
بكرر تاني , الهروب احيانا بيكون حل , بس مش دايما , بعض اللي سافرو برة مصر نجحو نجاح كبير , وبعضهم ماليين قهاوي فرانكفورت و روما و باريس ولسة مخرجوش من نفس الدايرة اللي كانو بيعانو منها في مصر .
و علاج الإحباط بعلاج أسبابه , يعني انت لو مهاراتك في الشغل قليلة فلازم تنميها , لو الانجليزي بتاعك ضعيف فلازم كورسات و ممارسة ,لو مش عارف تجيب قرش يبقي تتعلم و تتدرب .
------------------------------------------------------------------------------
نيجي للنقطة التانية بالغة الأهمية , وهي قلة الصبر .
و عشان نفهم أهميتها , لازم نتعرف شوية علي اسلوب هجرة كندا , والقائم علي تجميع النقاط , والفرق بينه و بين هجرة أمريكا .
نظام الهجرة العشوائي لأمريكا قائم علي ان حضرتك تدخل بياناتك و ترفع صورتك علي موقع معين , في ربع ساعة و خلاص كدة شكرا , من غير ما تدفع فلوس ولا تعمل حاجة . .
و هما بيختارو كل سنة حوالي 50 الف شخص , واللي بيتم اختياره بيعمل شوية خطوات سهلة و ياخد الفيزا و يسافر .
و سهولة الحصول عليها , وعدم وجود شروط , اللي خلي الملايين حولين العالم بيتابعوها من السنة للسنة , وهي تعتبر تطبيق عملي للتواكل , والاعتماد علي الحظ اللي مش هييجي أبدا . .
بينما هجرة كندا قائمة علي اختيار الافراد المميزين حولين العالم , بناء علي عدد من المعايير زي (مستواك في اللغة الانجليزي او الفرنسية او كلاهما , مؤهلك , خبرتك العملية , مستواك المادي , اختيار مقاطعة كندية لك)
و مشكلة الشروط ديه انها كلها محتاجة حاجة خطيرة جدا , هي محور كلامنا حالا وهو الصبر . .
الصبر اللي يخليك تقعد تذاكر انجليزي فترة لا تقل عن سنة مذاكرة جادة , عشان تعرف تجيب سكور كويس في الايلتس .
الصبر في انك تشتغل 4 او 5 سنين في مجال كويس و يكون عندك شهادات خبرة محترمة .
الصبر في متابعة ما يسمي ترشيحات المقاطعات الكندية , والتقديم عليها و هكذا .
الصبر اللي اغلبنا للأسف يفتقده جدا , وبيخلي نفسه قصير مع أي مشروع او خطوة مهمة , حتي لو كانت هتغير حياته .
احنا كشعوب عربية للأسف نشأنا علي "الفهلوة" و"الكروتة" و "شقلب و اقلب" , من أيام ما كنا بننقل الواجب من بعض في تالتة ابتدائي , من نظام تعليمي جاهل غبي , بيصب في عقولنا اسلوب متخلف في التعامل مع الحياة .
-------------------------------------------------------------------------------
ولو تتبعت مسيرة أي حد سافر و نجح هتلاقي ان باله, وقدر يجبر نفسه علي تعلم حاجة هناك , او يعادل شهادته , او يتعلم حرفة صعبة , او يتدرب في مكان مهم , او اي خطوة كانت محتاجة طولة بال و نفس طويل .
ولو تتبعت مسيرة اي حد سافر و فشل , (او حتي عمل نجاح محدود) غالبا هتلاقي السبب في نفس الفكر والأسلوب المتخلف , اللي جعلنا في قاع أمم العالم , انه عايش في باريس بنفس فكر عيشته في مصر , عايز ينجز , عايز يخلص , عايز يضرب خمس عصافير بحجر , عايز يكروت , فالمجتمع نفسه لفظه , وخلاه في مكانه السليم اللي مش هيخرج منه , وهو القهوة , وهيظل عايش في نفس دائرة الفشل المستمر .
اكيد في استثنائات من الطرفين , فيه ناس مثابرة و صبورة جدا و فشلت , وفيه ناس من قاع المجتمع و بقت مليونيرات هناك , كل ديه استثناءات مش بنتكلم عنها .
فحضرتك لو عايز تهاجر كندا او استراليا او نيوزيلاندا , اشهر 3 دول في العالم , مشكلتك مش في الانجليزي ولا النقط , مشكلتك في طولة البال و الصبر , و انك تهدي نفسك خالص , وتتعامل بحكمة مع الموضوع مش عصبية و نرفذة .
عايز تقدم علي امريكا كل سنة , قدم مفيش مانع ,لكن تقدم عليها في شهر 10 , و تستني 6 شهور لشهر 5 لما تطلع النتيجة , فتلاقي نفسك اترفضت , تقوم تستني كمان 6 شهور عشان تقدم تاني في شهر 10 , ومقضي حياتك بين خطوة التقديم , وخطوة الرفض , هتلاقي نفسك فجأة بقي عند 47 سنة , ولسة مستني ضربة الحظ .