العنوان : لفت الإنتباه

القسم: #النفسي

الرقم: 87

السؤال:

 

السلام عليكم ،انا هعرض عليكم مشكلة غريبة شوية

 

انا انسانه غير سوية خالص خالص

 

بشوف اي حد بيعملني كويس ممكن احبه رغم ان المعاملة الكويسة دي بكون عارفة ان سببها مصلحة جدا جدا

بس بحب اضحك علي نفسي

 

ولما اشوف اب بيعامل بنته كويس بتغاظ اوي وبكون عايزة اقوله اشمعنة هي ايه مش انا ،ليه مش عندي حد بيعاملني كده

 

ليه علي طول حاسة اني مكسورة وفاضية اوي وعلي طول مستنية من اللي قدامي كلمة حلوة او موقف كويس

ولما بحب حد بكون عايزة اتعبه عشان احسسه اني موجودة

 

 *-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله

 

لازم في البداية تعملي تغيير في قناعتك انك "غير سوية" , لو آمنتي إنك بالفعل مش طبيعية , هتتحولي لإنسانة مش طبيعية , بتأثير "البلاسيبو" , و"الإيحاء"

 

كل اللي قلتيه هي أعراض طبيعية تماما نتيجة عدد من الظروف اللي مريتي بيها , بل خلينا نقول اننا كنت نتوقع ردود أفعال أكبر من اللي قلتيها كمان . .

 

لازم في الأول تعرفي انك بالفعل طبيعية تماما , و مفيش اي اضطرابات نفسية , لكن هو شكل من السلوك غير السليم , نتيجة بدايات غير صحيحة في حياتك . .

 

------------------------------------------------------------------------------------

 

اللي عندك هو جوع شديد لعواطف مختلطة  , هي : الحب + الإهتمام + الرعاية + الحنان . .

 

و مصدر الجوع ده 3 حاجات أساسية . .

 

أولا : إن إنتي أصلا إنسانة حساسة شوية  , وجرعة العاطفة عندك عالية بطبيعتها

ثانيا : إن لسة محصلش ارتباط او زواج , وديه حاجة ملكيش يد فيها

ثالثا : التعامل الغير سليم من الوالد , لما يقسو عليكي شوية , او يتجاهل إحتياجك من الرعاية و الإهتمام و التواصل المستمر معاكي . .

 

التلات حاجات دول مع بعض , صنعو عندك الجوع للمشاعر اللي قلناها , واللي بتعمل إنعكاس عندك في كذا نقطة . .

 

• إنك دايما بتنتظري الإهتمام من الشخص اللي قدامك , وان كان ده شئ طبيعي عند كل الناس فهي بزيادة عندك

• إنك لما تلاقي الإهتمام مختفي فـ "بتنكشي" اللي قدامك , كنوع من طريقة للفت الإنتباه  , او التلميح ان خلي التواصل معايا أكبر

• لما النكش مش بينفع فتعملي نوع من المشاكل "البسيطة" , عشان يكون فيه اهتمام من اللي قدامك حتي لو كان "خناقة"

• لما المرحلة الأخيرة مش بتنفع فبيحصل نوع من الغضب الداخلي , اللي بيتراكم و بيخليكي تحسي بالشعور السلبي اللي عندك

 

وأنا أتذكر من سنين إن شخص كان بعت سؤال لخبير أسري , بيقول ان مراتي بتستفزني بشكل دائم فباضطر إني اتخانق معاها و اضربها بشكل مستمر , والغريب اني باحس انها بتكون مستمتعة أحيانا بده , مش متضايقة ولا حاجة

 

الخبير قاله إن انت عندك مشكلة في التواصل العميق معاها , وفي انك تظهر لها مشاعر الإهتمام و الرعاية و الحنان ,فهي بتضطر تلجئ لوسائل غير مباشرة عشان تثير اهتمامك , حتي لو كان بالخناق , وهي هتكون مستمتعة انها تنال اهتمامك حتي لو بالخناق , عن إنها تكون منسية تماما من بالك . .

 

صحيح الموقف مختلف عنك , لكن مساحات التشابه مش قليلة

 

و هنا فيه رسالة مهمة بعنوان : البحث عن الإهتمام , لازم تقريها

 

-----------------------------------------------------------------------------------------

 

ولو هنبدأ نعالج المشكلة ديه , فممكن نركز علي عدد محدد من النقاط . .

 

• مهم إنك تسامحي الوالد عن التقصير معاكي , كويس انك قلتي بالفعل انك مش متضايقة منه , بس لازم تكوني من جواه بتحبيه بشكل كبير , وإن كان هو مقدرش يوفرلك الحب و الرعاية و الإهتمام الكافي , فيشفعله انه بيعاني في السن ده عشان اسرته تعيش بشكل آدمي في الأوقات العصيبة اللي احنا عايشينه , بوسي ايديه لما تشوفيه , واعرفي انه عمل ده كله عشانكم

 

• ابحثي عن مصادر سليمة و آمنة للاهتمام و الحنان , يا اما والدتك , يا اما اقاربك (الستات او الرجال من المحارم) , يا اما صديقاتك المقربات  , بحيث يكون فيه نوع من الإشباع – ولو بشكل جزئي – من الناحية ديه , وميكونش فيه ضغط علي أعصابك بشكل مستمر , والكلام ده لغاية لما ربنا يأذن في الوقت المناسب بقدوم شريك حياتك , وتتلقي منه الإهتمام بالشكل السليم 

 

 

 

 

• إعرفي إن الإهتمام و الرعاية حاجة تبادلية , فلما "س" تكون عايزة الإهتمام من "ص" و "ع" و "ل" , سواء هما صديقاتها او قريباتها ,  فهما مش هيقدرو يبذلو ليها اهتمام و رعاية بشكل مستمر , مالم تكون هي كمان بتتبادل معاهم نفس الشعور . .

• بل إن من أهم وسائل انك تدفعيهم للإهتمام بيكي  ,إنك تبدأي إنتي تهتمي بيهم بشكل دائم , وتكوني مراعية و مهتمة بحالهم و أخبارهم , ودائمة السؤال عنهم , وتطمني عليهم بشكل حقيقي , ده هيصنع داخلكم علاقة متينة  من الاهتمام المتبادل , واللي هيفرق معاكي كتير

 

• حاولي تربي حيوان أليف في البيت , سواء قطة , او سلحفاة , أو أرنب (بلاش الكلاب عشان فيها حكم شرعي) , اهتمامك و رعايتك لحيوان أليف هتصنع داخلك كمية غير محدودة من الحب و الحنان تجاههم , وهتلاقيهم هما – بشكل ما – بيردولك الحب بحب , وهيعمل عندك شوية تشبع في العاطفة المفتقدة

 

 

 

 

• لازم تتوقفي عن "مناكشة" أو "مضايقة" حد عشان يهتم بيكي , او لو هتعمليها تكون بكمية محدودة , ومع الناس القريبين منك قوي , لأن أحيانا ده بيصنع نوع من الضيق والزهق تجاهك , واللي هيجعل الشخص ده يبتعد عنك تدريجيا . 

• الكلام ده كمان لازم تبطليه مع زوجك المستقبلي , مفيش راجل بيستحمل الطلب المستمر من الإهتمام من مراته , ولا استفزازه او مناكشته – الا بكمية محدودة – والا هيبدأ الحب بينكم يختفي و تظهر المشاكل .

 

• كمان لازم تحطي في بالك – لما تتجوزي ان شاء الله – ان الراجل كمية اهتمامه و حنانه و رعايته اقل شوية من كميتها عند الست , ديه حاجة في طبيعته و كيانه و عقله , فمترفعيش سقف طموحك , لأنه يتعارض مع طبيعة الرجل اللي هي حتما مختلفة عن طبيعة المرأة

 

 

 

 

 

 

• لازم تتوقفي عن إنك تضحكي علي نفسك لما يجيلك اهتمام زائف وتستمتعي بيه , ده شئ أشبه بالمنشطات الرياضية . .

• لو عارفة المنشطات , بيكون ليها تأثير إيجابي وقت تعاطيها , وبيكون الجسم نشيط جدا , لكن بعدها بتدمر الجسم فورا و بتعمل إرهاق غير طبيعي , ده بالظبط نفس تأثير المشاعر اللي انتي بتحسيها لما تستمتعي باهتمام زائف , يعقبه غضب و حزن و ضيق و بكاء

• فلازم من دلوقتي تدربي نفسك علي عدم قبول اي مشاعر غير حقيقية , او اي اهتمام زائف , ولما واحدة تبدأ تعطيكي اهتمام وهمي , رجعي ليها و قوليلها متشكرة , مش عايزة

 

 

 

 

 

• لازم تتوقفي عن مقارنة نفسك بحد , مينفعش تقولي فلانة عندها اب حنون , او فلانة عندها زوج بيحبها , او فلانة سعيدة عني , ديه مقارنة غير سوية و غير صحيحة

• شوفي المولي تبارك و تعالي بيقول ايه في سورة طه (وَلَا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجًا مِنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ وَرِزْقُ رَبِّكَ خَيْرٌ وَأَبْقَى). .

• ثقي ان اختيار ربنا ليكي هو أحسن اختيار , ولو انتي اطلعتي علي خبايا البيوت , وعرفتي كل واحدة من دول بتعاني قد ايه , هتعرفي انك أقل واحدة بتعاني فيهم

 

• لازم تملي وقتك بحاجات مفيدة و مهمة , وحتي لو حاجات مسلية (بس تكون حلال) , لأن وجود وقت فراغ عندك هيعمق من الأزمة . .

 

• قلتي إنك بتحسي بالكسر لأنه بتوعدي ربنا بحاجات و مش بتنفذيها , امشي علي مهلك واحدة واحدة , واتخذي مبدأ التدريج في حياتك , واعرفي انك هتوصلي ان شاء الله , شوفي رسالة الصعود التدريجي فيها خطوات تنفيذية مهمة

 

 

ربنا يوفقك يا رب , وييسرلك الأمر دايما