العنوان : الإدمان العاطفي

القسم: #العاطفي

الرقم: 22

السؤال:

السلام عليكم

انا مشكلتي متشابكه ومعقده وطويله شويتين

 

انا عندي 30 سنه في دوامه بقالي سنين , من وقت ما اتعرفت علي واحد زميلي اتعرفنا عن طريق شغل وبقينا زمايل جدا وهو متجوز ومخلف

 

من ناحية هو فيه كل الصفات الإيجابية اللي تتمناها اي بنت,محترم ملتزم ومتدين ولبق وذكي ومبتسم بيساعد كل الناس وجدع جدا

 

الوقت عدا واحنا بنقرب لبعض اكتر فكريا وبقي بينا حاجات كتير مشتركه زي ما تقول كده بقينا بيست فريند لبعض

 

في الوقت ده كان بيتقدملي عرسان كتير ودائما كنت برفض العرسان دي

 

تدريجيا لقيت نفسي بحبه بجنون هو كمان بدأ يحبني و ده كان باين قدام الناس كلها .

 

وفجأة طلب مني الجواز ومبقتش عارفه افرح ولا ازعل  ازغرط ولا اصوت

 

قدوتي واستاذي ومثلي الاعلي والرمز بالنسبالي لكل ما هو مثالي بيطلب مني انا الجواز

 

ردي طبعا كان معروف ومحدد الرفض طبعا

 

قالي عارف بس قوليلي ليه؟

 

فقولتله علشان انا مش هاستحمل ابدا اكون ضرة وعلشان انا دخلت بيتكو واكلت فيه ومراتك امنتلي وعندي اخوات محبش يحصل فيهم كده

 

وقالي أن مراته موافقه أنه يتجوز لكن برضه فضلت رافضة .

 

وانعزلت تماما عن الناس ومبقتش بخرج ولا بكلم حد وقفلت كل وسائل التواصل

 

وقالي اننا مش صغيرين وان اعتبر أنه مقالش اي حاجه خالص وهنفضل اخوات وزمايل وأنه شرف ليه اكون في حياته باي صوره

 

وفعلا رجغنا تاني عامله عبيطه بس عارفه

 

حاولت اهرب منه , اي مكان يكون فيه مرحش

 

قاومت فوق ماتتخيل علي اد طاقتي

 

لغايه لما الدنيا بينا بقت وحشه فعلا

 

انا ايوه اتضايقت لكن كنت بصلي واعيط وادعي واقول يارب قادر تعوضني واني مش عاوزه اكسر قلب حد

 

وحاولت ابعد واسيبه في حياته مليون مره ورحت لدكاتره نفسيين ورحت لشيوخ  وقربت من ربنا اكتر

 

لكن مفيش فايدة  كنت من غيره بحس اني طفله بتتعلم تمشي اول مره لوحدها مكنتش بعرف اروح مكان لوحدي

 

مع العلم ان فيه شركة بينا , وكمان احنا الاتنين بنعمل دراسات عليا مع بعض

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

سيبي الشغل ,  وفضي الشراكة معاه , وخلي الدراسات العليا بعيد عنه . .

 

ده الحل ببساطة , واحنا مش لاقيين اي حل تاني , للمشكلة بالغة التعقيد اللي انتي فيها . .

 

كل ما ندورها يمين شمال , نفكر بكل الطرق مش شايفين اي حل الا ده . .

 

ايوة حل مؤلم , ايوة هتخسري فلوس  , صحيح هتضيع عليكي مميزات , مجهود كبير في الرسالة هتعمليه من الاول , بس كل ده أخف بكتير من الألم و المعاناة الموجود حاليا , ليكي و ليه و لوالدتك , ولاسرته  . .

 

احنا اتعودنا دايما نقول الحل الصح , سواء كان صاحب الرسالة بيميل اليه ولا لا , سواء كان سهل او صعب عليه , لاننا عارفين ان كتير من اساليب العلاج بتكون مؤلمة و بتصاحبها معاناة , لكن مهما كانت , بتكون اقل من المشاكل المتراكمة اللي بتتواجد مع استمرار و تفاقم المشكلة . .

 

ده كان الاختصار  , ولو عندك مزاج رايق , وشوية صبر , ركزي معانا في التحليل .

 

----------------------------------------------------------------------------------------

 

في البداية مش هنقدر نهمل القاء الضوء علي سبب المأساة ديه من البداية , الخطأ المشترك منك و منه , في التعامل السهل و السلس بينكم .

 

واحنا لا نقصد بمصطلح التعامل السهل اكتر من اللي اتقال في الرسالة , دماغنا مش بتروح لاي مساحة تانية ربنا يحفظنا جميعا منها , احنا بس بنتكلم علي الكلام العام  ,علي التعامل من غير تحفظ  , علي التواصل المستمر , علي تداخل الخيوط بين الشغل , والحياة الخاصة بالشكل ده . .

 

ده هو اصل المشكلة , ديه هي البداية اللي سببت كرة الثلج الضخمة اللي مستمرة حاليا في تدمير حياتك و حياته و حياة أسرته .

 

لما تسمحي لقلبك و قلبه , انه يكون فيه تماس مشترك , وفيه اعجاب متبادل , ويحصل نوع من صب زيت التواصل المستمر , وتبادل الافكار و الرؤي و المشاعر , علي نيران العاطفة الوليدة , فده اللي اكيد هيحصل . .

 

المشكلة ان كتير مننا مؤمن بمقولة : ( احنا اخوات , انا مش هحبه , ده متجوز , ده زي اخويا , ده متدين و بيخاف ربنا , انا همسك نفسي  , عمري ما هاعمل حاجة غلط , انا اصلا مش بحبه ده بس اخ ليا ) . . . و غيرها من الاساطير اللي لازلنا مصرين عليها , بالرغم من انها اثبتت فشلها في تجارب كتير . .

 

و بعد اسابيع او شهور من التواصل الغير سليم , بيحصل اشتباك بين القلوب , وبيجد الطرفين ان هما مش قادرين يسيبو بعض , و ان حياة كل واحد لوحده هتكون مستحيلة . .

 

و المأساة بتظهر لما يكون فيه عوائق اكبر منكم تقف ضد الارتباط , زي الموقف اللي احنا فيه حالا . .

 

و النتيجة شايفاها بنفسك , قلبين ارتبطو ببعض ارتباط قوي , ومش لاقيين اي مخرج او حل ليهم , لا انتي موافقة علي زواج تاني (وده حقك) , ولا ينفع انه يطلق زوجته و هو وانتي تشيلي ذنبها , ولا بقاء الوضع علي ما هو عليه ينفع . .

 

بينما لو كانت ظلت حدود التعامل بينكم في اطار واضح و محدد , ومتسمحيش ليه انه يتجاوزها , وفيه نوع من التحفظ في التعامل بين اي بنت و اي ولد , كانت ظلت قلوبكم بعيدة عن بعضها البعض , ولم تكن تنشأ تلك العاطفة الملتهبة , اللي رغما عنكم بتلتهم كل شئ امامها . .

 

انا والله مش باعمل جلد ليكي , ولا من انصار التأنيب او اللوم , انا بس  باعمل القاء الضوء علي السبب الرئيسي,  وده عشان ميحصلش تكرار للتجربة في المستقبل , لسة العمر قدامك طويل , ولسة في تجارب كتيرة انتي ممكن تخوضيها , فلو كانت البدايات متشابهة , فالمأساة هتكون متكررة . .

 

------------------------------------------------------------------------

 

و بالنسبة له هو , لازم اقول كلمتين . .

 

لازم احيي فيه ان هو عنده وازع ديني وشوية عقل ,  واللي منعوه من انه يرمي مراته الاولي في الشارع  ,او يبعتلها ورقتها , عشان ينفذ اللي هو نفسه فيه (زواجه منك)

 

لكن غير كدة انا مندهش من تصرفاته  . .

 

يعني في البداية انه يسمح لنفسه انه يقترب منك بالشكل ده , وسايب نفسه بالشهور في تواصل "أخوي" , وهو عارف انه متزوج و اب. .

 

و بعدها لما يلاقي ان فيه اعجاب مشترك بينشأ بينكم , عقله كان فين ؟ دينه كان فين ؟ طب حتي التفكير القويم كان فين عشان يفهمه انه بيدخل في كهف مش هيخرج منه . .

 

وقتها كان لازم يحصل حاجة من اتنين , اما يكون فيه زواج , ولما انتي موافقتيش (وده حقك) , يبقي كان لازم يكسر كل قنوات التواصل معاكي , مش انه يعمل تصرف شباب مراهقين بالشكل المدهش ده . .

 

و لما قالك بعدها نبقي اخوات و زمايل , هل هو كان ساذج بما يكفي عشان يحسب انه بالفعل مش هيحبك ولا انتي هتحبيه ؟ ؟

 

ليه يخلي عقله و كيانه و قلبه يرتبط بواحده وهي مش موافقة علي التعدد ؟ ازاي هو يسمح لنفسه انه يجعل قلبك قريب جدا منه , واللي تسبب في انك تحبيه , وهو عارف ان مفيش امل في الاربتاط ؟ ؟

 

ده تفكير شخص ناضج ؟ ؟ ؟ فين التدين و فين العقل اللي عنده ؟ ؟

 

لو شايفة اني متجني عليه او باظلمه , عرفيني , انا شايف ان تصرفاته مدهشة بالفعل , ولا تليق بشخص فيه العقل و الدين زي ما بتوصفي . .

 

اكيد هو احسن من حد غيره كان ممكن يعمل تصرفات اكتر حماقة و تهور , بس كون انه معملش اشياء اكتر بشاعة , معناها انه برئ من سلسلة من الاخطاء المستمرة . .

 

 

و ظل هو في نفس الحلقة المفرغة , من انه هو بيسعي ورا موافقتك علي التعدد , وانتي بتهربي منه  ومش لاقية حل. .

 

اؤكد تاني اني احيي فيه انه مطلقش زوجته الأول , لكن انه معملش مصيبة كبيرة , مش معناها براءته من مصايب تانية . .

 

كمان انا احيي فيكي انك مطلبتيش منه انه يطلقها, ده كان ممكن يحقق حلمك انك تتجوزيه لوحدك ,بس كان هيجعلك متقدريش تبصي لنفسك في المراية للابد , ديه حاجة عظيمة فيكي , وربنا يجزيكي الخير عنها . .

 

-----------------------------------------------------------------

 

نوصل بقي للحل اللي قلناهولك . .

 

و في الحل هنتكلم علي حاجتين . .

 

اولا ليه لازم تحلي المشكلة سريعا و متسيبيهاش زي ما هي .

 

ثانيا ليه الحل بتاعنا ممكن يكون فعال  .

 

 

لو هنبدأ بالكلام عن أهمية سرعة حل المشكلة , وانك تجعليها من أولوياتك , و ان مفيش مشكلة لو ضحيتي عشانها بحاجات كتير , فممكن نسرد ده في نقطتين مهمتين . .

 

 

• ان هو متعلق بيكي بشكل مَرَضي  ,بصورة محدش هيصدقها مالم يشوفها بنفسه  . .

 

 

• بالنسبة ليكي انتي , مستحيل هتعرفي تتجوزي و تستمر حياتك الزوجية بشكل صحي ,طالما البنزين جنب النار , طالما هو لسة قدامك و بيشوفك و بتشوفيه بشكل مستمر , مستحيل فعلا

 

---------------------------------------------------------------------------

 

طب نوصل للسؤال المهم اللي علي لسانك : يعني انت فاكر اني لو بعدت عنه هنساه ولا هو هيقدر ينساني ؟ ؟ , انت فاكر يا ادمن اني لما اسيب الشغل ده حل ؟ ؟ ؟

 

الحقيقة ايوة حل , وحل ناجح كمان, ولما تبعدي عنه فترة كافية , رغما عنك و رغما عنه نيران حبكم الملتهبة هتخف شوية بشوية  . .

 

 

مش هتعرفي تنسيه ولا هو هينساكي , مش مهم , مش عايزك تنسيه 100 % , ولا انا عايزه انه ينساكي تماما , بس انا عايز كل منكم يتحول لشبح بالنسبة للتاني . .

 

ازاي يعني ؟ ؟

 

فيه قاعدة مهمة  , وبالرغم من انها مثل شعبي , الا انها متطابقة مع علم النفس بشكل كبير

 

وهي : قريب العين قريب القلب . .

 

وحتي من مدي صحتها , انها موجودة بنفس المعني في اللغة الانجليزية , في المثل المعروف  . .

 

Out of Sight, Out of mind. .

 

ولو انتي شايفة انها حاجة غير صحيحة , او غير منطقية , فانتي غلطانة . .

 

العقل الواعي , والعقل الباطن , والقلب و العقل و التفكير الواعي و اللاوعي , كلهم بيتأثرو جدا برؤية شخص او مكان او شئ معين . .

 

و اسئلي في ده شخص يروح عمرة او حج , ويقف قدام بيت الله الحرام , شوفي مدي الحماس اللا معقول اللي بيجري في دمه , واللي يخليه ممكن يقف طول الليل يصلي , او يبكي من خشية الله من ايات القرآن . .

 

و نفس الشخص لما يرجع بلده , بتقل عنده الحماسة تدريجيا , وممكن يرجع لحاله القديم , ربنا يثبتنا جميعا علي طاعته . .

 

لو انتي بالفعل اتخذتي قرار انك تبتعدي عنه تماما - وكلمة تماما يعني تماما , يعني يتم اغلاق كل المنافذ الموجوة و  المتاحة – وقتها انتو الاتنين هتمرو بعدد من المراحل . .

 

• اول مرحلة الخواء , الاحساس بالفراغ الرهيب , والوَحشة الغير محتملة , وان الدنيا كلها كئابة و فراغ و ضياع, وانك (سواء انتي او هو) فقدتي لذة الاستمتاع بالحياة, وهتظني ان الشعور ده هيستمر للابد , وان حياتك اتدمرت تماما , وده ظن غير سليم, اصبري بس معايا للاخر

 

• بعدها هتدخلي في مرحلة الحنين , ان هو وحشك جدا (ونفس الموضوع بالنسبة له) , وهتبدأي تتلمسي ذكرياته في كل حاجة كنتي بتعمليها معاه, وهتبدأي تحسي انك عايزاه جدا جنبك  , اصبري كمان شوية

 

• ندخل في مرحلة التفتيش , بتدوري علي اي آثار ليه , فيس او واتس او انستاجرام , بتتلمسي اخباره بشكل غير مباشر من اصدقاء مشتركين , و المرحلة ديه هتكون متوازية مع مرحلة الحنين اللي مش هتنتهي دلوقتي

 

• بعدها هتبدأ مرحلة ممارسة حياتك من غير نفس , رغما عنك هتشوفي شغلك او دراستك او حياتك , وتدريجيا هتلاقي انك بتمارسي حياتك , بس من غير نفس , وفيه نضارة سودا علي عينيك قدام اي حاجة

 

• شوية و هتدخلي في مرحلة التأقلم , انتي خلاص اتعودتي علي بعده , علي غيابه , انك مش عارفة عنه حاجة , وتبدأ النضارة السودا اللي علي عينيكي تخفت شوية بشوية , وتتحول لرمادي .

 

• شوية و تدخلي في مرحلة التعود , انتي متعودة بالفعل علي غيابه , وتلاقي ان كمية تفكيرك فيه قلت شوية , لو كنتي في البداية بتفكري فيه بشكل مستمر, دلوقتي كل كام ساعة لما تفتكريه

 

• في نفس المرحلة هتوصلي لمرحلة استنزاف الذكريات , واللي بتكوني بالفعل عملتي "استهلاك" لكل ذكرياتك معاه, وهنا هيحصل حاجة مهمة جدا , ان تأثير ذكرياته عليكي بيبدأ يقل , وده شئ طبيعي من كتر استهلاكك ليها ,و ده ه المطلوب بالتحديد

 

• شوية و تدخلي في مرحلة "الشبح" او ممكن نسميها "الطيف" ان كلا منكما يتحول لطيف و شبح و خيال بالنسبة للتاني , لسة فيه ذكريات باسمة , وشوية حنين للتاني , لكن الحب و الرغبة و التمسك لكل واحد مع التاني هيكون قل اكيد

 

 

ديه ببساط هي دورة حياة الذكريات , لما الشخص بيبدأ يعمل ابتعاد مستمر و متعمد عن اللي بيحبه , سواء بمزاجه او غصب عنه . .

 

واخدة بالك ان فيه تشابه كبير بين اللي بقوله ده , وبين لما شخص يسيب مراته و يسافر فترة طويلة , وهما الاتنين ميكونش فيه بينهم تواصل مستمر , واخدة بالك ان ده اللي بيحصل بالظبط . .

 

بل ان حتي ديه مشابهة الي حد كبير لاعراض انسحاب السجاير او المخدرات , لو الشخص حابب يبطلها , فعلا قريبة جدا منها , وده لأنك بتعاني من حالة متقدمة من حالات "الإدمان العاطفي" . .

 

احنا بالفعل مش شايفين اي حل الا ده , لازم تبتعدي عنه تماما , وتقطعي اي تواصل بينك و بينه . .

 

الشغل : سيبيه , وهتلاقي غيره , مرتب قليل , مش مشكلة , مستوي اقل , عادي , مميزات اقل , مش ازمة

 

الشراكة معاه تصفيها :  هتخسري , مش مشكلة , هتضيع عليكي فلوس و بزنس , مش ازمة , عندك حاجة اهم اسمها حياتك و حياته اللي هتدمر من استمرار تواصلكم

 

الدراسات العليا :  فورا تعملي تغيير فيها , يا اما تشوفي دكتور غيره  ,او تكملي معاه بس من غير ما تتواصلي مع زميلك , حتي لو هتضيعي عليكي شهور طويلة من التعب . .

 

 

هتظني انك هتعرفي تحلي المشكلة وانتي لسة وشك في وشه , ظنك مش في محله , وهتلاقي العلاقة مستمرة و بعمق  . .

 

هتقولي خلاص هعامله كاخ و زميل بس هافضل في الشركة , كلام غير صحيح , والقلوب هتتشابك تاني رغما عنكم . .

 

هتقولي هافضل في الشركة بس مش هاتكلم معاه , بتحلمي , وابتعادك عنه وهو في نفس الشركة هيشعل نيران الحب عندك و عنده اكتر . .

 

هتقولي هاخلي الشركة موجودة عشان ماخسرش راس مالي : هتتقابلو اكتر من مرة رغما عنكم في شغل , ومنها القلوب والنظرات هتتشابك تاني . .

 

انتي حاليا في فخ , محدش نصبهولك , لكن انتي وقعتي فيه بسبب اخطاء متراكمة منك و منه , والهروب من الفخ انتي عارفه طريقه , بس مؤلم شوية , وهيكون فيه شوية خسارة . .

 

اعتبري كل الخسارة اللي هتخسريها ديه لله , ادعي ربنا بالليل و انتي بتصلي قيام , وقولي يا رب عوضني خير عن كل اللي هيضيع مني , لكن انا باعمل ده عشان ارحم نفسي , وارحمه و ارحم زوجتيه و اولاده من العذاب المستمر ده . .

 

لكن انك تدعي ربنا بالليل انه المشكلة تتحل , وتروحي بالنهار الشركة بابتسامة مشرقة , فانتي كدة بتهزري . .

 

عارف الحل صعب و مؤلم , بس انتي تقدري عليه , وزي ما ربنا كرمك بعقل واعي , نضج في التفكير , وانك بتخافي من ربنا و مش عايزة تتسببي في خراب البيوت , فربنا هيعينك علي الطريق الطويل ده

 

​