العنوان : أطياف الماضي

القسم: #النفسي

الرقم: 49

السؤال:

 

 السلام عليكم

 

أنا عندي مشكله كبيره جدا ومحتاجه مساعدتكم

 

بداية مشكلتي كانت هي الوساوس والأفكار السلبية بتسيطر عليا

 

وكنت بجاهد نفسي عشان متجاوبش معاها وبعمل أي حاجه عشان أنساها وأحيانا كنت بتعايش مع الفكره فبتاخد فتره وانساها بس حاليا أنا حاسه بخنقة وضيق في نفسي شديد وده مأثر على حياتي ودراستي

 

وكمان حاسه أني تايهة عن نفسي وغربه تجاه نفسي اول مره أوصل للشعور ده وخايفة يستمر معايا كتير انا مخطوبه وبسبب الخنقة والضيق ده بتحصل مشاكل بيننا كثير انا محتاجة حل بالله عليكم

 

وساس كتيرة زي كان عندي مرض معين كده بيجي علي بالي فجاة مع انه مش فيا  المرض ده بس الفكرة احيانا بتتسلط عليا كده ووساوس في الطهاره والعبادات كمان

 

أنا اتجاهلت بعضها بس أحيانا بتجي على بالي , وحاليا بقى حاسة بخنقة وزهق مزمن

 

مش حاسة بطعم أي حاجه في الحياة , أنا بقالي شهر على كده

 

قبل خطوبتي أهلي كانوا بيضغطوا عليا في حجات أنا مش عاوزاها وكمان اتنازلت عن شويه حاجات , من هنا حسيت بالخنقة والهم ده

 

وأسوأ أسبوع مر عليا هو الأسبوع ده مبخرجش من البيت وبنام بعد الفجر وبصحي بعد العصر , أنا مريت بهموم كثير وشفت كثير بس أول مرة أمر بالحالة السيئة دي وخايفة تستمر معانا ورافضة أني احكي لحد أي حاجة

 

حتى كان فيه ذنب متكرر معايا كل أما أتوب منه ارجعله وهكذا ففكرت سبب الكبت والخنقة دي منه استغفرت ربنا وتبت منه وبصلي

 

بس الشعور القاتل ده والخنقة الشديدة دي مش راضيه ترووح وبسببها اقسم بالله مبعرفش أنام اوقات

 

كنت عاوزه اعرف ان الشعور والحاله دي مؤقتة ولا هتستمر معايا كتيييير  , رجاءا الرد عليا في اسرع وقت وجزاكم الله خيرا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 وعليكم السلام و رحمة الله

 

هبدأ معاكي بآخر سؤال انتي سألتيه , و اقولك : يصعب تحديد هي حاجة مؤقتة ولا هتستمر , من مجرد سماع مواقف زي كدة .

 

لأن الكلام اللي قلتيه يشير لحاجة من اتنين , حاجة فيهم علاجها طويل , والحاجة التانية ممكن علاجها يكون سهل او صعب , حسب كميتها .

 

الحاجة الأولي هي : الوسواس القهري , والحاجة التانية : الاكتئاب .

 

وبالرغم انه مش صح ان اخصائي نفسي يعمل تشخيص لحالة من مجرد سماع كلام عام زي ده , الا ان ممكن نرسم خط عام للي بيحصل,  فممكن نقول ان ديه مش اعراض وسواس قهري OCD  لانها محتاجة اعراض اكثر عمق , واكثر تكرار , ومش بتظهر فجأة مرة واحدة .

 

فمع ان فيه وساوس كتيرة بتجيلك , بس ممكن نستبعد مبدئيا انك مصابة بالوسواس القهري , وممكن نقول ان عندك بس شوية من اعراضه  .

 

لكن غالبا سبب الازمة ديه كلها هي : الاكتئاب , واللي حصل من سبب معين انتي مذكرتيهوش هنا  .

 

فيه حالات نادرة ان يكون فيه مزيج بين الوسواس القهري و الاكتئاب مع بعض , وده شئ محتاج اختبارات نفسية لحسمه , مش هينفع ابدا اونلاين كدة .

 

-----------------------------------------------------------------------------

 

و هنا يظهر سؤال مهم , هو ايه سبب الموضوع ده ؟ يعني ايه اللي صنع الاكتئاب ده بالكامل ؟

 

بيكون فيه غالبا 3 حالات للاصابة بالاكتئاب

 

اولا ان احيانا بيكون فيه سبب واضح و حصل مرة واحدة .

 

مثلا شخص اتوفي والده , او واحد اترفد من شغله , او اتضحك عليه في شقي عمره , او واحدة جوزها خانها وهكذا .

 

ثانيا ان احيانا  بيكون فيه اسباب تراكمية بتحصل علي مدي طويل نسبيا .

 

يعني واحد لقي نفسه بيفشل في حياته علي مدار سنين , لغاية لما وجد نفسه مرمي علي القهاوي , لا شهادة ولا شغل ولا جواز .

 

فمع ان مفيش حدث محدد حصل مرة واحدة  ,لكن لان هو اتحولت حياته بالتدريج لشئ بشع فيصاب بالاكتئاب .

 

كمان لو واحدة متجوزة من شخص مش وحش بس مش هايل , فتلاقي علي مدار سنين حياتها بقي فيها مشاكل صغيرة متراكمة و شوية كئابة علي ملل , وهكذا

 

الشكل التالت للاصابة بالاكتئاب ان يكون فيه اسباب مش معروفة

 

ولما بقول مش معروفة , فمش قصدي مش معروفة للاهل او الجيران , لا هي اصلا مش معروفة اللي عنده الاكتئاب .

 

يعني تلاقي شخص حياته كويسة و مستقرة و مفيهاش عقبات كبيرة , بس هو من جواه حاسس باكتئاب بيتزايد

 

لما ييجي يسال نفسه ايه السبب , هو نفسه مش عارف , وبالفعل مش قادر يحدد السبب ايه .

 

و ده بيكون غالبا من الاعيب العقل الباطن , واللي بيكون حتما متذكر حاجات و تفاصيل و مشاعر انت كصاحب المشكلة مش عارفها , لانها مش في عقلك الواعي .

 

مثال علي كدة , لو شخص ايام الكلية اعجب ببنت معاه في الدفعة , وحاول يقربلها و يتكلم معاها , بس هي صدته لانه مش عاجبها او شايفاه اقل من مستواها مثلا , فده عمل عنده نوع من الاهانة و الحزن .

 

و بعد مرور شهور او سنين نسي كل حاجة عن الموضوع اساسا , ومارس حياته بشكل طبيعي  .

 

في الحقيقة ان عقله الواعي هو اللي نسيها , لكن عقله الباطن مش بينسي حاجة .

 

و ممكن بعد سنين طويلة , انه يرتطم بشئ في حياته تفجر عند عقله الباطن كل الذكريات و المشاعر الخاصة بيها , مش لازم زي ما بيحصل في الافلام العربي انه يقابلها في الشارع صدفة بعد مرور سنين , كفاية قوي انه يقرا اسم علي الفيس بوك قريب من اسمها او اسم ابوها , كفاية انه يشوف صورة واحدة تشبها من بعيد او يشم ريحة برفان زي اللي كانت بتحطه , او يسمع كلمة كانت هي بتقولها دايما .

 

لاحظ ان هو من غير اي مبالغة مش فاكر اي شئ عنها , وحتي لو قرا الاسم او شم البرفان , ده مفكروش بيها علي الاطلاق .

 

الا ان عقله الباطن اشتعل فورا بالمؤثر الحسي ده , عمل عنده تهييج رهيب للمشاعر المؤلمة اللي كانت من سنين .

 

فممكن يظل في حالة من الحزن و الاكتئاب لاسابيع , بسبب المؤثر اللي اثار عنده المشاعر ديه , و هو بالفعل – من غير اي كدب – هو مش فاكر اي شئ , وحتي مش عارف ايه السبب , ولما شم البرفان او سمع الكلمة او قرا الاسم , مجاش في باله اي شئ .

 

البروفيسير النمساوي سيجموند فرويد لما قال الكلام ده في اواخر القرن الـ 19 , علماء النفس في عصره اتهموه بالتخريف , اللي هو انت عبيط ؟ ازاي يعني شئ الواحد مش واخد باله منه يعمل كل ده  ؟ ؟

 

الا ان لاحقا اثبتو صحة الكلام ده بشكل كبير, وادركو القوة الغير محدودة للعقل الباطن عن كتير من الناس  .

 

--------------------------------------------------------------------------------

 

فانك تعرفي سبب المشكلة اللي عندك هي اهم خطوة  , لان العلاج هييجي من اصلاح سبب المشكلة .

 

وارد يكون فيه سبب معين انتي مقولتيهوش , وقتها يبقي انتي من الحالة الأولي (سبب مباشر) , او الحالة التانية (السبب التدريجي) .

 

لكن لو فعلا مفيش اي شئ في بالك ومش عارفة ايه السبب , يبقي غالبا السبب التالت , واللي محتاج متخصص و يكون محترف قوي , عشان يقعد معاكي و يعصرك , ويدعبس في ذكرياتك و دفاترك القديمة , لغاية لما يحط ايده علي المشكلة بالتحديد .

 

و كل الكلام بيدور علي انك لازم تروحي لمتخصص , يعني طبيب نفسي او اخصائي نفسي .

 

هو اللي ببساطة يقدر يقعد معاكي  , ويحلل المشكلة , ويعرف السبب و يعالجه .

 

فيه حاجات احنا كفريق في الصفحة نعرف نحل مشكلتها , لكن فيه حالات مينفعش تتحل اونلاين , هنبقي احنا بنهزر لو قلنا ان ينفع تتحل علي الماسنجر , و هنكون بنخون الامانة اللي في رقبتنا .

 

مشكلتك يا فندم حلها الطبيب النفسي او الاخصائي , غير كدة لا .

 

وهو اللي يقدر يحدد عندك الـ OCD  "الوسواس القهري" , ولا اكتئاب , ولا حاجة تالتة امرها مختلف .

 

وارد تكون المشكلة بسيطة , زي ما جت زي ما تروح  , وتلاقي نفسك كمان اسبوع رجعتي لحالتك الطبيعية زي الاول , ساعتها ممكن نطمن شوية , ونقفل الموضوع .

 

لكن علي كلامك ان المشكلة بتزيد , وان خطوبتك علي المحك , فلازم تروحي لمتخصص , ومتستخسريش وقت او فلوس او مجهود , لان اللي عندك مش قليل .

 

علي قد ما تهتمي بنفسك في النقطة ديه , علي قد ما المشكلة هتكون قابلة للحل ان شاء الله

 

احنا عشان بنتعامل معاكي بأمانة , مقلناش ليكي خطوات لحل المشكلة  ,لانها مش هتحلها ابدا , مشكلتك متتحلش الا عن طريق متخصص , ويكون وجها لوجه مش اونلاين

 

بالتوفيق يا رب