العنوان : وساوس الزوج

القسم: #النفسي

الرقم: 102

السؤال:

 

السلام عليكم ورحمة الله وبركاته ..

 

كنت اود الاستفسار عن شئ خاص بالحاله النفسيه .انا منذ الصغر وكنت اشعر بضيق وزعل شديد حينما تحدث مشاكل في اسرتي او مع اخوتي وبدء الشعور يكبر حينما تزوجت اخواتي البنات وتحدث مشاكل زوجيه معهم كنت اشعر بضيق شديد واعياء

 

وفكرت كثيرا حينها انني لا اكرر غلطهم في اختيار العريس المناسب او اني اتزوج في بيت عيله مثل اختي الكبري خوفا من المشاكل التي تحدث في بيت العيله وحاولت اتزوج من شخص مناسب من وجهة نظري يكون السن مناسب ومتدين ومحترم ولا يهمني ابدا المديات

 

وبالفعل تزوجت بعد اختيار بدقه ولكن كنت حينما تحدث مشاكل مع زوجي كنت ازعل واتضايق جدا وادخل غرف الاطفال وازعل فيها وكان زوجي يشتكي مني في هذه النقطه اني بتقمس منه علي اتفه الاسباب ولكنه طبع بداخلي حاولت التغير كثيرا ولكن كان زوجي يضايقني باستمرار ويفعل اشياء لابد الزعل فيها مثل الكلام مع فتيات اخريات

 

حاولت كثيرا ان ارضيه بشتي الطرق كان يقول عليا تخينه اعمل رجيم واخد ادويه واروح الجم حتي اعجبه كان يقول علي شعري وحش احاول اغير منه واسبغه وهكذا احاول بشتي الطرق اسعاده ورضاءه ولكنه لا يرضي

 

مع المشاكل والضغوط العصبيه ادعي ربنا ان اموت وارتاح من التعب النفسي الذي يسببه لي وحدث اكثر من مره حينما اكون حامل او مريضه يهرب من الواقع اللي فيه ويبحث عن وحده اخري تسعده وتلبيله طلباته ويفكر في الزواج

 

والاسوء ان اخته كانت مريضه نفسيه وانتحرت بسبب مرضها كان لديها وسواس وتهيوءات سمعيه وهو  لم يساعدها في شي كان زوجها يشتكي منها وهوه يقول له ادخلي مصحه ولا يزورها او يحل اي مشكله تقابلها الا قليل كان يتهرب من المشاكل حتي مع اخوته لا يحل شي

 

واريد النصيحه وما افعل معه اريد ان اعرف هل ما عندي طبيعي ام لا وماذا افعل معه هل زوجي عنده اضطراب في المزاج او وساوس اوهلاوس في بعد الاوقت نكون قاعدين عادي ويقلب فجاءه وينكد علينا ويقلي كان الشيطان وسوس ليه بدون سبب وانا ماذا افعل معه اني مازالت احبه واشعر بالعطف عليه ولكن حينما يضايقني ازعل جدا وحتي ممكن ادعي عليه او احسبن عليه وبعد ذلك استغفر ربنا واقول اي دعوه لو استجابت انا من سوف تتعب لاحقا وربنا يخليه لاولاده ولي ويهديه ويعقل

 

ارجو الرد بسرعه لاني متعبه نفسيا واسفه علي الاطاله ان الموضوع متشعب وبه اشياء كثيره لم اذكرها لطول الحاله النفسيه عندي وعند زوجي اكثر وشكرا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

و عليكم السلام و رحمة الله . .

 

هنحاول نلخص الردود لمشكلتك المؤلمة في خلال نقاط محددة , ان شاء الله تكون كافية لحل أصل المشكلة , وتوجيهك في الاتجاه السليم . .

 

• في البداية حطي في بالك ان ضغط المشاكل النفسية بيصنع غالبا ألم جسدي , يعني طالما كان فيه مشكلة نفسية عميقة لم يتم حلها , فمن الطبيعي انك تلاقي اعراض جسدية علي شكل تعب او ارهاق او مرض او دوخة او غيرها , واللي بيكون سببها الرئيسي انك عملتي كبت لمشكلة نفسي من غير ما يتم حلها

•  مبدأ إنك متأثرة بالشكل ده معناه انك عاطفية و ديه حاجة كويسة , بس لازم يكون بحدود , عشان ده ميتسببش في أزمة كبيرة

•  كمان حطي في بالك ان سرعة غضبك ممكن تكون هي بداية المشاكل , يعني الشخص اللي بيتجوز واحدة , ويلاقي انها سريعة الغضب , او زي ما وصفتي "بتتقمص بسرعة" , ده هيخلي الزوج مش عارف يتواصل مع مراته , ومش قادر يتوقع اي مود ليها , فمن الطبيعي بعد فترة من المحاولات انه هيزهق و هيسيبها "تخبط راسها في الحيط"

•  اكيد اللي هو عمله من تجاهله ليكي و تواصله مع بنات تانية شئ غلط تماما و يصل لمرحلة الإجرام , بس احنا بنبحص في أصل المشكلة , عشان نشوف هنبدأ الحل منين , يعني انتي لو قدرتي تتحكمي في سرعة غضبك , وانك تتضايقي بس علي الحاجات اللي تستاهل قوي , ده ممكن يكون بداية حل المشاكل

•  كمان انتي قلتي انه كان عنده تعليق علي مقدار الإهتمام بيه هو , و ده كمان ممكن يكون من الأسباب اللي خلته يزهق منك , ويشوف غيرك , لو فيه إمكانية دلوقتي لاصلاح الأمر ده , فممكن تكون بوابة حل المشكلة

•  ايضا هو ذكر الإهتمام بنفسك , سواء الوزن او الشعر او غيره , أي رجل بيحب يشوف زوجته متجددة و مختلفة دايما , فكمان ممكن تكون ديه بداية اصلاح المشكلة , انك تواظبي علي الاهتمام بالتفاصيل ديه , اللي هي ممكن يكون شكلها انها "حاجات هايفة"  , لكن صدقيني بتفرق جدا مع الرجل

•  طب ماذا عن أزمة انك بتعملي المستحيل دلوقتي عشان تهتمي بنفسك وهو مش مهتم او بيقولك كلام جارح , فيه حاجات إصلاحها أحيانا بيحتاج وقت , و ممكن من جواه يكون عنده احساس انك شوية و هتتوقفي عن الاهتمام بيه او بنفسك , انتي اخلفي ظنه , واستمري في الاهتمام بنفسك , والاهتمام بيه هو , وخلال شهور هتلاقي انه بالفعل اختلف في التعامل معاكي , لما يشوف ان مستمرة علي الطريق السليم

•  كمان حطي قاعدة في بالك , ان الاهتمام بنفسك يكون لنفسك مش لاي حد تاني , والا لو واحدة تانية مش متجوزة مثلا , هل هتسيب نفسها من غير عناية  ؟ ؟ الأصل ان الشخص يكون مهتم بكل تفاصيله لنفسه قبل اي حد تاني , وده اللي بيصنع أكبر كمية من الثقة بالنفس , انا عايزك لما تبصي في المراية تشعري بالراحة و ده لذاتك قبل اي حد

•  فكرة الهروب من المشكلة غلط , لما تزعلي فكري في المشكلة و حليها مع نفسك  , يعني امسكي ورقة و قلم و شوفي ايه الآلية لعلاج المشكلة و ابدئي شوفي الحلول المختلفة

•  من أكبر الغلطات انك تتمني الموت لنفسك , المولي تبارك و تعالي هو من وهبنا نعمة الحياة , وهو وحده من يقدر موعد انتهائها , فتمني الموت هو مخالفة لفطرة الإنسان , و فيه نوع من السخط علي قدر الله تعالي , كل واحد فينا عليه انه يهتم بإصلاح حياته و حياة اسرته بقدر الإمكان , لغاية لما المولي تبارك و تعالي يقدر موعد رحيل كل إنسان فينا

• في نفس الإطار من الغلط انك تدعي عليه بالموت , هو مهما كان أذاكي فممكن يكون فيه طرق لاصلاح المشكلة , لكن الدعاء علي الشخص بالموت هو شئ يخالف الفطرة , وبيزرع المشاعر السلبية في القلوب

•  احتمال يكون زوجك فيه اضطراب نفسي معين , سواء في حالة بسيطة او متقدمة , هل عرضتي عليه فكرة انه يروح لطبيب نفسي يكشف ؟ هل ممكن يوافق لو قلتيله ؟ ديه ممكن تكون بداية لحل المشاكل بينكم

•  ماذا عن فكرة ان انتي تروحي لطبيب نفسي , الموضوع مفيهوش اي شئ عيب او غلط , بالعكس ممكن يكون ذهابك ليه هو بداية لحل عدد من المشاكل جواكي , وتغيير منظورك للحياة , كمان الطبيب ممكن يكتبلك علي عدد من الأدوية اللي هتساعدك علي تخفيف التوتر و تقليل العصبية

•  ابحثي عن صديقات للتواصل معهم بشكل مكثف , وسعي دايرة معارفك و صديقاتك عشان تهربي من فخ الإنطوائية او العزلة , واكيد هتلاقي عدد من الصديقات المحترمات اللي يساعدوكي علي الاستمرار في حياة سليمة و آمنة, لكن من غير تبادل اسرار معاهم , محدش عارف متي يخون المخلصون

•  فكري في انك تشغلي نفسك باولادك و اهتمي بيهم , يعني ده يكون بديل قوي تعملي تفريغ اهتمامك فيه , و يكون اهم محور في حياتك

• فكرة الطلاق هي فكرة مش مستحيلة , لكن احنا شايفين بدائل موجودة , وقد تكون قادرة علي اصلاح المشكلة حتي لو بشكل جزئي , فياريت متفكريش فيه قبل ما تشوفي كل الحلول المتاحة الأول

•  يا تري فين دور الدين في حياتك ؟ يا تري ملتزمة بالصلاة بشكل مستمر ؟ بتقرأي القرآن يوميا ؟ آخر مرة بكيتي في السجود كان امتي ؟ اخر مرة تصدقتي حتي لو بمبلغ بسيط كان امتي ؟  الدين له دور رائع في زراعة الراحة النفسية داخل الشخص , والتأكيد علي مشاعر السكون و الطمأنينة