العنوان : الشاب المستهتر

القسم: #العاطفي

الرقم: 08

السؤال:

 

 

انا كنت مرتبطه بواحد وكنا بنحب بعض 4سنين وكنت عارفاه من الكليه كان زميلي واستنيته لحد مااخلص جيشه وجه اتقدم قبل الجيش لوحده واستنيته لحد ما قرب يخلص

 

 جاب باباه ومامته وقرينا فاتحه بس للاتفاق مش تلبيس دبل ولا حاجه وهو مكنش قايل لحد ولا قال لاخواته لان حسب كلامه وكلام مامته كان في مشاكل تمنعهم يقولوه

 

المهم انا اهلي فرحو عشان انا اول فرحتهم وقالو لكل الدنيا وبعد قراية الفاتحه بشهرين وقبل الخطوبه بشهر حصلت مابينا مشاكل جامده بسبب غيرتي عليه وهو اتغير معايا في المعامله وكنت بستغربه اوي اهمال وطولة لسان

 

المهم حصلت اخر مشكله مابنا بسبب الغيره وقفل فونه اسبوع وراح يشتكي لبابا مني وكمان وقع بيني وبين مامتي وقالها اني شتمته بلفظ وحش اوي والله العظيم عمره مايطلع مني اصلا

 

ولقيته بيقولي انا هخلي صورتك وحشه قدام اهلك ولما اشتكي لبابا بابا قاله انا هديكم فرصه اسبوع وتتفاهمو مع بعض وبعدها تحددو تكملو ولا لا وقاله كلمها واوصلو لحل وعدا الاسبوع وماتصلش بيا

 

وبعدها اتصل هو ببابا وقاله بنتك متصلتش بيا ليه راح بابا قاله والله انت كنت مستني بنتي اللي تتصل بيك هو ده اللي اتفقنا عليه وعلي العموم كل شئ قسمه ونصيب ياابني وانتهي الموضوع رسمي علي كدا بس الموضوع انتهي رسمي قبل عيد ميلادي باسبوع وكان اسوأ عيد ميلاد في حياتي والكلام ده كله كان شهر 1اللي فات

 

 بعدها كلمني في عيد ميلادي وقالي كل سنه وانتي طيبه وقالي انا مش هينفع ارجع الا بحالتين يااما باباكي هو اللي يرجعني عشان كرامتي ويااما نتكلم من ورا اهالينا وطبعا رفضت الاتنين وقولتله لو روحي فيك وهموت من غيرك مستحيل اقلل من اهلي ابدا في الحالتين

         

وبعدها فضل يتصل بيا من وقت للتاني ممكن كل شهر 4مرات مثلا وانا كمان بصراحه كنت بكلمه اطمن عليه ويطمن عليا وللاسف تعبت جامد وحاولت انتحر ودخلت المستشفي وهو عرف ومعملش حاجه غير انه قابلني بعد مارجعت من المستشفي برا وقالي انا جنبك ومش هسيبك وطبعا كان كله كلام وبس

 

 بعد مااحاولت انتحر مكنتش لسه لقيت شغل الفتره ديه ونفسيتي كانت وحشه اوي اوي للاسف لقيت نفسي بنزل برامج سوشيال ميديا كتير ولقيت نفسي زي كاني اتجننت بنزل صوري في كل مكان  وبقبل طلبات صداقه من شباب وبكلمهم بس كنت طبعا بكلمهم في حدود الصداقه والاحترام بس كنت حاسه اني محتاجه ادخل ناس غريبه في حياتي معرفش ليه ومعرفش ايه كان هدفي من كل ده

 

وقعدت علي الحال ده حوالي 5شهور وفي خلال ال5شهور الحمد لله ربنا كرمني بشغل وكنت وانا بكلم الشباب الكتير كان برضه اللي بحبه كان بيتصل بيا وكنا علي اتصال ببعض بس كل فتره لحد مافي يوم كلمني الصبح وانا نازله الصبح قالي عاوز اشوفك ويومها مروحتش الشغل وروحت قابلته في الكافيه المميز بتاعنا

 

 وكان اليوم ده شكله ناوي يرجع او بدأت اوحشه فعلا المهم قولتله انا اتغيرت للاوحش ومبقتش زي زمان بسبب بعدنا وقالي انه هو كمان بقي كدا وقالي انه كلم بنات بس حوالي بنتين او 3وانا بصراحه مقبلتش اخدعه فيا فقولتله علي كل حاجه عملتها وعلي كل اللي كلمتهم واتكلمنا في ايه وكل حاجه كنت صريحه اوي معاه واخد مني الفون وقرا شات مابيني وبين واحد منهم

 

 وفي ساعتها لقيته بيقولي ايه ده قولتله في ايه قالي انتي بتقوليله نفس الكلام اللي كنتي بتقولهولي قولتله فين ده واخدت منه الفون وبصيت لقيت اني كنت كتباله( لما تصحي ابقي كلمني ) وبيتهيألي انها كانت كلمه عاديه بس اتهمني بالخيانه ومسح كل ارقامي من عنده وسابني واحنا في نص الشارع ومشي

 

وانا بعدي الشارع وراه اغم عليا في وسط الموصلات لان في اللحظه ديه فعلا اتاكدت ان كل اللي مابنا انتهي ومكنتش مصدقه ابدا وبعد مافوقت لقيت الناس اتصلو بيه رجعوه ياخدني لانه كان اخر رقم متصله بيه علي فوني ورجع فعلا وفضل يهديني وانا كنت منهاره من العياط في الشارع وجسمي كان متلج وبترعش فضل معايا وقالي مش هسيبك وفضلنا نتكلم لمده اسبوع بعدها

 

بس كانت معاملته وحشه ساعتها اتاكدت انه رجع شفقه مش اكتر ورجوله منه بس وطلبت اقابله مكنش راضي في الاول بس وافق بعدين واتقابلنا في نفس مكانا المميز علي البحر بس سابني قاعده مستنياه حوالي 4ساعات بالظبط من الساعه 8الصبح لحد الساعه 12الظهر وجالي بعد الظهر وكانت عيونه فيها كميه قسوه عمري ماانساها ابدا \

 

 

واتفقنا انا وهو علي الفراق والكلام وطبعا السبب اللي افترقناه عليه هو انه شيلني ذنب اني خاينه رغم اني اقسم بالله كنت نفسيا تعبانه ومدمره ومحدش حاسس بيا بس هو مفهمش اي حاجه وفضلت شايله ذنب علاقتنا وفراقنا لوحدي لمده اسبوع

 

 بس فجأه لقيت نفسي داخله اكلم علي الفيس بنت من اللي هو كان بيكلمهم وكان مفهمني انها قريبته كلمتها ووقعتها في الكلام واكتشفت انها صاحبته وانهم بيتكلمو من ايام ماكان مرتبط بيا اصلا يعني في الاخر اتضح انه هو اللي خاني مش انا وخاني وانا معاه اصلا بعد قراية الفاتحه مكنتش مصدقه من الصدمه ولقيتها كانت حطاله بوست في عيد ميلاده وبتقوله وحشتني اوي وكلام من ده

 

روحت عملت اسكرين من الشات اللي بيني وبينها وبعتهوله علي الواتس وبعتله تسجيلات بالصوت مابيني وبينه تثبت كدبه عليا في حاجات كتير وساعتها علي قد صدمتي علي قد ان ضميري ارتاح اني مش خاينه وانه هو اللي كان خاين فعلا من البدايه بس لما وجهته( قالي انسيني بقي وعيشي حياتك بعيد عني وموضوعنا انتهي خلاص روحي خدي اي حد من العرسان اللي بتجيلك وانا نسيتك اصلا وعاوزه تشوفيني خاين شوفيني خاين واهي حاجه تشجعك علي نسياني   )

 

 

بس بعدها اتدمرت اكتر لان خلاص موضوعنا انتهي خالص ولقيت نفسي لسه بكلم الشباب بس مش كتير هم 2او3بس اللي لقيتهم بيفهموني يعني منهم

 

وفجأه اتعرفت علي واحد بالصدفه متدين اتعرفت عليه من النت برضه وشخصيته حلوه وتفكيره حلو بس العقبه الوحيده انه عاوز اللي يتجوزها تكون منتقبه وانا مش قد الخطوه ديه وكنت صريحه معاه وقولتله اني مش هقدر لما سالني اني اقبل البس النقاب ولا لأ وقالي انا احترم صراحتك ،وهو الوحيد اللي مكمل معايا لحد دلوقتي كأصدقاء، بس انا دلوقتي مبقتش بكلم حد غيره من الشباب بس كأصحاب

 

 بس انا لسه نفسيتي تعبانه واللي كنت بحبه واحشني اوي انا مش عارفه مين فينا كان الجاني والمجني عليه ومين الظالم والمظلوم بس بجد نفسي اشوفه او المحه او اسمع صوته حتي ومع العلم اني لسه متقدملي عريس من شهر وقولت اديله فرصه وكان شخص كويس في كل حاجه وقالي كل كلام الحب والغزل اللي في العالم بس انا رفضته بعد ماعطيته فرصه لاني محستش بحاجه نحيته وخوفت اظلمه معايا وهو

 

وخصوصا لانه كان بدأ يتعلق بيا ويحبني ،دايما بحس اني الحب اللي جوايا مينفعش يروح لحد غير حبيبي اللي كنت مرتبطه بيه انا تعبانه اوي دلوقتي وخصوصا ان كل ذكريتنا في دماغي مش قادره انسا اي حاجه مابينا

 

 

وللاسف قريب في فرح واحده صاحبتي مخطوبه لصاحبه وهيتجوزو قريب وعزموني وعزموه وانا خايفه من اليوم ده اوي لاني هواجهه فيه مش عارفه هتعامل ازاي

 

 

وساعات بسأل نفسي ممكن نرجع بس بلاقي الاجابه انه مستحيل لان الثقه مبقتش موجوده اصلا مابينا بس والله العظيم اقسم بالله انا مش خاينه وعمري ماكنت ولا هبقي كدا لاني بحبه ولسه بحبه مع العلم اني انا عندي 23سنه وهو 25 وتربيتي ومبدأي واخلاقي وديني عمرهم مايسمحولي اني اخون

 

بس انا معرفش انا كنت بدور علي ايه او كنت محتاجه ايه خلاني اتكلم مع كل الشباب ديه،  واللي تاعبني حاليا بقي اكتر وملغبطني ان الوحيد اللي كمل معايا الصداقه ده انا وهو متفقين علي اننا اصحاب وبس لانه مش لاقي فيا اللي هو عاوزه من النقاب والالتزام وكدا من وجهة نظره

 

بس ساعات بلاقيه بيلمحلي بحاجات رومانسيه شويه ويقولي وحشتيني وكدا ولما بساله بيقولي احنا اساسنا اننا اصدقاء وبيقول انه ساعات بيحس بحاجات غير الصداقه بس مينفعش او مش مسموحله يقولها لاننا مش مرتبطين وطبعا احنا كلامنا كله علي الفون لانه هو من القاهره وانا اسكندريه ،انا ساعات بحس اني ميالاله بس مش حب بس هو كمان حساه بيستنزفني اكتر اني اديله طاقه سواء باهتمام او حنيه او اي حاجه من متطلبات الاصدقاء

 

انا بعتلكم مشكلتي واللي تعبني وياريت حد يفسرلي انا ليه بعمل كدا؟ وليه اتصرفت كدا في كل اللي عدا عليا السنادي؟ نفسي افهم نفسي واعرف اطلع من اللي انا فيه ده ازاي ؟

 

وكمان عاوزه اعرف اتصرف ازاي مع الصديق اللي بكلمه وازاي محسش اني بميله بمشاعري وازاي اعرف احكمها صداقه بس متوصلش لحب؟

 

ارجو الرد في اقرب وقت لان انا تقريبا خلاص نفسيا استنزفت بما فيه الكفايه ونفسي ارتاح شويه واوصل لحل ونفسي حياتي ترجع كويسه ولو لثانيه نفسي ارجع اضحك من قلبي ولو لدقيقه

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

انتي كتبتي وصف تفصيلي طويل لمشكلتك , بس هي حلها سريع و بسيط . .

 

ده شاب بيتسلي , ومش بتاع جواز , ولازم تنسيه ,  بس كدة . .

 

انتي و هو عملتو سلسلة من الاخطاء , هو ليه نصيب الاسد فيها , وانتي غير معذورة ولا بريئة , وكل ده اللي صنع الحالة المؤلمة اللي انتي فيها حاليا .

 

تعالي كدة نسرد كمية الاخطاء اللي وقعت منك في السنين اللي فاتت , واللي تجمع بين خلق معوج لخطيبك السابق , ومن حب اعمي من طرفك لشاب مستهتر : 

 

• انتظارك لشاب 4 سنين , الانتظار في حد ذاته شئ مش وحش , بس لما تتأكدي انه مناسب في الاساس , والنتيجة انك شفتيه علي حقيقته في النهاية

 

• تغيره الكبير معاكي , وقلة ادبه وطول لسانه , بما يوحي ان هو في الاساس مش بيحب ولا عنده خلق سليم

 

• انه كدب و قال انك قلتي كلام مش مناسب , وانه وقع بينك و بين امك

 

• انه يقولك هخلي صورتك وحشة قدام اهلك , بالله عليكي ده ينفع زوج ليكي و اب لأولادك ؟

 

• انه بساطة ضحي بخطوبته ليكي عشان استكبر انه يكلم ابوكي

 

• انه عرض عليكي انكو تتكلمو من ورا ضهر اهلكم , ده شخص يؤتمن علي بيت و زوجة و اولاد ؟  , وانتي بالطبع كان موقفك سليم تماما برفض فكرته الحمقاء

 

• انه بيتصل بيكي بشكل مستمر , بعد ما تم انهاء الخطوبة بالفعل , وهو تصرف مراهق منه

 

• تجاوبك معاه هو مصيبة , لما تكوني فاتحة باب الكلام اصلا , يعني هو معقولة هيتصل 4 مرات شهريا مالم تكوني انتي بتردي عليه و بتاخدو و تدو في الكلام , وانتي قلتب هنا انك كنتي بتكلميه , هل ده تصرف مناسب ؟

 

• انك فتحتي علي البحري كل ابواب التواصل مع الشباب , وهو التصرف اللي لا يليق بواحدة محترمة بنت ناس , و كمان تنزلي صورك في كل مكان و تتكلمي مع شباب

 

• بتقولي هنا كنت بكلم شباب كتير , وده يجعلنا نتسائل هو انتي بالفعل كنتي عايزة تتجوزي ولا تتسلي , ده مش تصرف معقول ابدا , وحتي الازمة اللي حصلت مش مبرر لحاجة زي كدة

 

• ان هو بمنتهي الاستهتار قالك عايز اشوفك , وانتي وافقتي , وانتي عارفة انه مش هيتجوزك وانه بيتسلي , بس انتي فرحانة بالعذاب اللي بتتعذبيه منه

 

• بعدها بدأ اسلوب المراهقين , انتي تقوليله كنت بكلم شباب و هو يقولك انا بكلم بنات ,نوع من اثارة الغيرة لدي كل طرف باسلوب ساذج رخيص للاسف

 

• انه غضب بشدة لما لقاكي قلتي كلمة لاحد الشباب , وهنا لازم ابدي كامل اندهاشي , هو عايز يقنعنا انه بيغير عليكي , بعد ما رماكي السنين ديه كلها ؟

 

• لما اغمي عليكي ده مغيرش فيه اي شئ (والحمد لله انه متغيرش) , ووعدك بوعد و لحسه بعدها فورا

 

• انك ذليتي نفسك و طلبتي تقابليه , وهو اهانك انه سابك منتظرة ساعات طويلة

 

• انك دخلتي تنكشي تاني في الماضي القديم , وتشوفي زميلته و الحوارات ديه

 

• انك لما واجهتيه بالسكرين هو بعتلك رد في منتهي السفالة , لدرجة انه يدعوكي للخيانة

 

• انك بعد ده كله لسة متأثرة بيه , وبتكلمي شباب تانيين

 

• انك لسة لغاية اليوم منتظره تشوفيه او تسمعي منه , بعد كل المعاناة والعذاب اللي شفتيه منه

 

• انك قفلتي باب الخطيب الجديد , لتعلقك بالشاب الغريب ده

 

• انك لسة مصاحبة الشاب اللي بيقول علي نفسه متدين , واللي بيقولك كلام رومانسي و عايزك تتنقبي

 

 

هتلاقي اننا كتبنا 21 غلطة انتي او هو وقعتو فيها , ولسة بعد ده كله , بتسألي ترجعي ولا لا . .

 

 

العلاقة من بدايتها محكوم عليها بالفشل , وده كان واضح من اول مواقف بينكم , ان ده انسان معندوش اي مقدار من المسؤولية او الجدية او الاهتمام , وان اي ارتباط حقيقي معاه محكوم عليه بالفشل , وان ربنا بيحبك انه خلاه بعيد عن طريقك .

 

لانك لو كنتي اتجوزتيه , كان هيتلاشي الحب اللي انتي معيشة نفسك فيه , وكنتي هتشوفي الوجه الحقيقي ليه فورا , واللي انتي شفتي منه جزء حاليا في مشاكلك المستمرة معاه .

 

يعني ان كان في فترة الخطوبة و فترة الصحوبية , واللي هي بتكون اصلا جنة عند كتير من الحبيبة , انتي شفتي المرار المستمر, والعذاب الدائم منه , فما بالك بقي لما يكون فيه زواج و ارتباط و مسؤولية و متاعب الحياة الطبيعية .

 

ده مش شخص يُعتمد عليه  , ولا يتم الوثوق فيه انه يصلح كزوج ليكي او كأب لاولادك , هو مجرد مراهق بيتسلي بقلوب بنات الناس , و مستمتع بدخوله في مغامرات عاطفية مستمرة مع عدد من البنات , ولما يزهق من واحدة يقلبها عشان يشوف غيرها  .

 

احنا شرحنا بالفعل النموذج ده اللي اسمه "شاب بيتسلي – بنت مخدوعة" , وحذرنا منه مرات عديدة  ,لان البنت هي اللي بتشيل المعاناة في الاخر فوق دماغها   .

 

ياريت تقري الأسئلة في الرابط في اخر الرد , وانتي تشوفي الصورة كاملة

 

 

 

غيري رقم تليفونك , مترديش علي اي اتصال منه باي طريقة , انسيه زي ما هو قالك , واعرفي انك بترحمي نفسك من عذاب مستمر .

 

لو مسمعتيش الكلام , وتواصلتي معاه تاني , كما تشائي ديه حياتك , واستمتعي بسلسلة المتاعب اللي مش بتنتهي .

 

احنا ياما شفنا نماذج زبالة زي اللي انتي بتوصفيها في الشاب ده , واللي زي ده ملوش اي علاج الا بالبعد التام عنه , اي تواصل معاه هي معاناة مستمرة