تقلب المزاج
الرسالة السابقة
العنوان : تقلب المزاج
القسم: #النفسي
الرقم: 76
السؤال:
بقالي فترة بحس بكسل رهيب وبقيت مش حاسة باي رغبة لاي حاجة لا مذاكرة ولا قراية ولا حاجة
وكذا مرة اتربط لكن الوضوع يقف بسببي او بسببه ده غير اني شكلي مش هانجح السنادي
و علي طول خنافات معايا في البيت بسبب و بدون سبب
واحاينا بحس اني مش واثقة من نفسي لان كذة مره احكي لماما علي اسرار و تقلها لبابا و يبدلني لما بطلت اقولها حاجة
بحس اني حزينه وفرحانه في وقت واحد
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
اهلا بيكي
بشكل عام احنا متعودين علي "تقلب المزاج" اللي بيكون لكتير من البنات , خاصة في سن المراهقة , واللي ممكن يكون احد اسباب اللي انتي بتحسي ليه .
وتقلب المزاج مش بس المقصود بيه "الانتقال من الفرح للسعادة" , او التغير من حالة لنقيضها , لكن كمان ممكن يكون "التقلب بين عدد من الحالات السلبية " , زي اللي انا شايفه عندك .
يعني تعالي نعد مع بعض الحاجات اللي انتي شرحتيها في نفسك :
-
كسلانة
-
مش بتذاكري
-
معندكيش نفس لاي حاجة
-
مخنوقة
-
الفشل في اي ارتباط
-
العصبية
-
الفشل في الدراسة
-
الغضب من والدتك
-
متوترة
-
مفيش ثقة في النفس
-
مفيش ثقة في والدتك بعد نشر اسرارك
-
حزينة و فرحانة
انتي بالفعل في سطور قليلة ,ذكرتي 12 مشكلة فيه منهم القريبين من بعض و فيه حاجات مختلفة تماما , و ده يدل علي حاجة من اتنين .
اما ان الكلام ده دقيق و حقيقي , وده معناه ان انتي بالفعل محاطة بمجموعة كبيرة من المشاكل المتتالية , واللي لازم تبدأي تحليها واحدة ورا التانية , عشان متكونيش ضحية ازمة نفسية كبيرة .
و اما ان فيه بعض المشاكل المحدودة , اللي انتي مش قادرة تحليها , فانتي اعطيتي للموضوع اكبر بكتير من حجمه , و تعاملتي علي اساس ان عندك مشاكل الكون , وانك ضحية الجميع , وده السيناريو اللي انا برجحه .
انتي مقولتيش سنك كام , بس الكلام بيدلل انك في مرحلة ثانوي او جامعة , يعني من 15 لـ 20 مثلا , وده اكتر سن البنت بتحس فيه بمشاعر "التوهان" , و"التوتر" و "الخنقة" , و "الغضب" , و "القلق" .
ولو تاخدي بالك , فيه بعض النقط اللي انتي قلتيها , انتي ممكن تحليها بنفسك .
يعني زي "عدم المذاكرة" , مين هيحل المشكلة ديه , ولا مين هيساعدك فيها , ولا مين المتسبب فيها من الاساس .
كون ان معندكيش نفس لحاجة , ديه ممكن تحليها بسهولة لما ترتدي النضارة اللي بيرتديها الاطفال , يعني لما تبصي بنفس نظرتهم للحياة .
الطفل بيكون عنده عدد قليل من المتطلبات , و حجم كبير من التفاؤل و الخيال , و الحاجتين دول هما اساس سعادة اي طفل .
رغباته قليلة ,ياكل و ينام و يلعب , وشوية ضحك و حنان , ولو لقي الحاجات ديه ,يبقي ملك الدنيا و ما فيها .
و عنده كمية لا تنتهي من الخيال , اللي بيجعله يري الكرسي مركبة ماشية في البحر , والسرير بيطير فوق السحاب ,ولما يقرأ رواية و لا يسمع قصة يعيش ادق تفاصيلها .
و عنده تفاؤل غير طبيعي لبكرة ,وسعادة غريزية بالمستقبل ,بتخليه ينام وهو مبتسم .
فاغلب الحاجات ديه ممكن تطبقيها مع نفسك , ايليا ابو ماضي لخص ده كله لما قال : كن جميلا تري الوجود جميلا .
--------------------------------------------------------------------
بالنسبة للفشل في الارتباط , اصلا انا لازم اعرفك ان الارتباط في سنك مش صح ومش سليم , الموضوع مش لسبب ديني , لكن الموضوع في المنطق و تحكيم العقل .
لان البنت اللي في سن المراهقة , هي بالفعل غير قادرة علي تمييز الصفات السليمة في الشاب اللي هتتجوزه , ومعندهاش المهارة علي تقييم الصفات المتواجدة في الشخص , مراية الحب عامية مهما كان .
وأهم نقطة انك متشبكيش قلبك ابدا مع اي شاب وهو بيتسلي , لان هو مستمتع بالشهور اللي هيقضيها معاك في كلام و هزار و ضحك , واول ما يزهق منك هيبيعك فورا , وانتي اللي هتتعذبي من مرارة البعد , بينما هو مش هامه اساسا .
لكن لما تكوني في السنين الاخيرة من الجامعة , وتقابلي شاب محترم , عايز بالفعل يختار شريكة لحياته , ومش بتاع خروجات و تسلية , وعايز يقابل بابا مش عايز تتقابلو في الكافيه , ساعتها وانتي لسة علي البر , ومعندكيش عاطفة معينة تجاهه , هتكون قادرة علي تقييمه بشكل سليم , وهل هو مناسب ولا لا .
------------------------------------------------------------------------
بالنسبة لمشاكلك مع الوالدة , ان كان الاباء و الامهات عندهم شوية "تعنت" , كمية من "عدم التفاهم" مع ابنائهم المراهقين , فلازم نقول ان الابناء المراهقين بيكون عليهم المسؤولية الاكبر في الخلافات ديه .
لأن الاباء و الامهات ومن اول ما الطفل بيتولد , بيعملو المستحيل عشان يكون سعيد , و عشان مصلحته .
و بتبدا الخلافات في سن المراهقة ,لما تتعارض رغبات الشاب او البنت , مع الحاجات اللي الاب و الام عارفين و متاكدين انها صح .
يعني لو الشاب او البنت في سن المراهقة , لو سابولهم الحبل علي الغارب , فالنتيجة الطبيعية هتكون ضياع الوقت في الحب و السهوكة و حاجات فاضية , والفشل المتتالي في الدراسة .
وهو الأمر اللي لما تكبري هتعرفي قيمة الوقت و المجهود اللي المفروض تعمليه في السن ده , لان احيانا نص درجة في ثانوي بتفرق في تغيير مجالك تماما , او انك تكوني في محافظة بعيدة , عشان التنسيق .
وكون ان والدتك حكت اسرار ليكي للوالد , فلو انها حكت شئ مهم وضروري , وده كان عشان حاجة لمصلحتك , فاكيد هي عندها حق , ومينفعش تزعلي منها من حاجة عملتها عشانك انتي
لكن لو كان السر ده مفيهوش اي حاجة تتعالج او مفيش شئ ضروري مرتبط بيه , فده تصرف مش مناسب منها , وكان لازم تحتفظ بالسر فعلا .
فبشكل عام , اغلب المشاكل انتي ممكن تحليها بنوع من التفاهم و المرونة , والطاعة و عدم العناد و الجدال , صحيح ان احيانا بيكون الاب و الام "مزودينها شوية" , لكن ده الاستثناء مش القاعدة
---------------------------------------------------------------------------
ماذا عن مشكلة الثقة بالنفس . .
ولو عايزين نعمل تبسيط شديد لكلمة "الثقة" و نفهم معناها , فممكن نلخصها في كلمة واحدة بسيطة اسمها "الاطمئنان" . .
يعني لما انا اثق في الواد خالد صاحبي , فده معناه اني مطمن له , باتكلم معاه براحتي , اسيب معاه فلوسي ,ائتمنه علي اسراري , وانا مطمن انه مش هيخونها . .
لما واحد يثق في مراته , يعني بينام و هو مطمن انها مش هتخونه ابدا . .
و مفهوم الثقة بالنفس , يعني الشخص يكون مطمن امكانيات نفسه ,فاللي بيطلع علي منصة و يكلم الالاف وهو مش خايف عشان واثق من نفسه , ده لأنه مطمن من قدرات نفسه . .
وديه ببساطة حلها عن طريق ما يسمي : التعرض التدريجي لمواقف ناجحة . .
فلو عايزة يكون عندك ثقة بالنفس في موضوع معين , ابدئي جربيه بالتدريج واحدة واحدة , مع مواقف سهلة , عشان قلبك "يقوي" شوية , وتجدي ان الموضوع مش بالصعوبة اللي كنتي شايفاها . .
فلو انتي معندكيش ثقة في نفسك في موضوع "التعامل مع الناس" , فلازم تبدئي تتعاملي بشكل تدريجي مع ناس قريبة منك , وتشوفي ناس ابعد شوية وابعد كمان , لغاية لما تتعاملي مع ناس غريبة تماما
--------------------------------------------------------------------------------
والمشاكل اللي بتقابليها مع زمايلك, هي كمان من نوعية , اما حاجات حقيقية من ناس معندهومش ذوق او اخلاق , فانتي ببساطة قللي تعاملك معاهم بقدر الامكان .
او ان انتي لسة مكبرة حاجات صغيرة , وشايفاها بحجم مختلف عن حجمها الطبيعي
فاللي اقدر انصحك بيه بشكل عام كالتالي . .
-
اسمعي كلام بابا و ماما في اغلب اللي بيقولوه
-
انسي فكرة الارتباط دلوقتي
-
اعملي تقييم موضوعي و عادل لكل الصفات اللي بتقوليها علي الناس , وشوفي ايه فيهم حقيقي, و ايه مبالغ فيه
-
ركزي في مذاكرتك كويس , وتجاهلي اي عوائق تانية
-
اقطعي علاقتك او قلليها مع صديقات السوء , واللي موراهومش حاجة الا الكلام و الرغي و الهيافة