الثقة العمياء
الرسالة السابقة
العنوان : الثقة العمياء
القسم: #النفسي
الرقم: 07
السؤال:
حاسة انى معنديش ثقة فى نفسى
بصراااحة اتكررت معاياا كذا مرة كل م اثق فى حد يطلع الحد دة مش اهل الثقة
و برضو مبتعلمش من اخطائى بزعل زعل وقتى بس و بسامح بسرعه و بنسى
لحد م دلوقتى حسيت انى مبقاش عندى ثقة فى نفسى خالص واقل كلمة من اى حد بتزعلنى
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أغلب المشاكل المتعلقة بالثقة بتيجي في محورين بالتحديد فيها . .
إما عن مشاكل الثقة بالنفس , أو الثقة بالناس . .
و الإضطراب في الأولي بتدمر الحافز عند الانسان للنجاح في حياته , والإضطراب في التانية بيدمر علاقته باللي حواليه . .
ولو عايزين نعمل تبسيط شديد لكلمة "الثقة" و نفهم معناها , فممكن نلخصها في كلمة واحدة بسيطة اسمها "الاطمئنان" . .
يعني لما انا اثق في الواد خالد صاحبي , فده معناه اني مطمن له , باتكلم معاه براحتي , اسيب معاه فلوسي ,ائتمنه علي اسراري , وانا مطمن انه مش هيخونها . .
لما واحد يثق في مراته , يعني بينام و هو مطمن انها مش هتخونه ابدا . .
حتي مفهوم الثقة بالنفس , يعني الشخص يكون مطمن امكانيات نفسه ,فاللي بيطلع علي منصة و يكلم الالاف وهو مش خايف عشان واثق من نفسه , ده لأنه مطمن من قدرات نفسه . .
وانتي في سؤالك ذكرتي النوعين , الثقة بالنفس و الثقة بالناس , وغالبا مشكلتك الاساسية في الثقة بالناس , واللي انتي بتحسبيها مشكلة ثقة بالنفس , عشان كدة هنتكلم دلوقتي عن النوع التاني , واللي بتحمل نفس مفهوم الاطمئنان . .
يعني لما انتي تقابلي زميلتك شيماء في المدرج , وتثقي فيها من اول لقاء , يعني انتي مطمنة ليها بشكل كبير , واللي ممكن يؤدي انك تتكلمي معاها براحتك , و تكشفي لها عن بعض مفاتيح شخصيتك او اسرارك
ولو هي حافظت علي اسرارك , و تمسكت بالامانة اللي عندها , حتي لو اختلفتو او اتخانقتو او بعدتو عن بعض , فهي تسمي "أهل للثقة" يعني بالفعل اطمئنانك ليها كان في محله . .
ولو هي ذاعت اسرارك , او لمحت بيها لحد , فتعتبر كدة انها خانت ثقتك فيها , يعني انتي المفروض مكنتيش تتطمني ليها من الأصل . .
ده باختصار شرح ما يسمي "الثقة بالناس"
---------------------------------------------------------------------------
و الناس بتقع في مشكلتين أساسيتين فيما يتعلق بالثقة في الناس . .
والمشكلتين كل واحدة علي نقيض الأخري تماما . .
فالمشكلة الأولي , هي الثقة المفرطة في الناس , والاطمئنان السريع للي بنقابله , و نتكلم معاهم من قلبنا , ومنخبيش عليهم حاجة . .
وديه مشكلتها ان الشخص بيقابل كل انواع البشر , فحتي لو كان تلات اربعهم كويسين , والربع بس اللي زفت , فالصدمة اللي هيقابلها من الربع هتكون كفيله بتدمير الشخص تماما . .
المشكلة التانية العكس , وهي انعدام الثقة بالناس في الأساس , و التعامل بشك و ريبة مع الجميع , واختفاء الثقة عند الجميع حتي اقرب الناس ليه . .
وديه اللي احيانا بتتطور سلبا عند البعض , وتتحول ما يسمي "اضطراب جنون الارتياب" او اللي احنا بنسميه باللغة العامية "بارانويا" . .
و احيانا بنلاقيه في الشخص الغيور بشكل مجنون , ويشك في مراته في كل شئ , او اللي ميأمنش لابوه وامه ,او يتعامل مع صديق عمره القديم بشك رهيب . .
و المشكلة الكبري . .
ان اغلب اللي بيعانو من النوع الاولي (الثقة المفرطة) , بيتحولو بعد فترة للنوع التاني , وده بعد عدد من الضربات المتتالية اللي اخدها من أكثر من واحد . .
فلما (علا) , تفاجئ ان ثقتها في (ريم و مي و سعاد) كانت في غير محلها , وان (هيام) اتكملت عنها , وان (نهي) قالت لـ (يارا) عن الموقف اللي كان (علا) حكيتهالها . .
فطبيعي ان (علا) مستحيل تثق في اي شخص بعد دلوقتي , وانها هتتعامل بشك مع اي شخص جديد, حتي لو كان محترم و كويس . .
و أحيانا يتطور الموضوع ان الشك يصل لناس هي (علا) تعرفهم من سنين بالفعل , وعارفه اخلاقهم ,لكن "شوطة" الشك اكلت الجميع . .
و في الحالات الاقصي ممكن موجة الشك تلتهم حتي اقرب الناس ليها زي الاب و الام , وهنا اهلا بيها في نادي "البارانويا" . .
بقول كدة عشان بس اعرفك ان المصابين بالمشكلة الاولي , ممكن للاسف ينتقلو للمشكلة التانية فورا , لو مقدروش يتحكمو في مشاعرهم الداخلية تجاه الناس . .
و كلامك بيقول ان انتي عندك النوع الأول , صحيح ليس لدرجة البلاهة اللي تجعلك تثقي في شخص تقابليه في الشارع , ولكن المشكلة موجودة بنسبة ما بحيث انك بتفتحي قلبك لوحدة قابلتيها بعد مرتين او تلاتة مثلا , وتتكلمي معاها براحتك تماما . .
فلازم نحل المشكلة , عشان نتجنب انك تتحولي للنوع التاني ,ربنا يحفظنا
---------------------------------------------------------------------------
والمشكلة بتبدأ في "طيبة القلب" اللي بتكون موجودة عند كل الاطفال , واللي بتخليهم يستريحو و يحبو اي "عمو" , او "طنط" يقابلوهم اول مرة . .
و من توجيه الآباء و الامهات , بيحصل نوع من تحذير الاطفال ان ثقتك لازم تكون في اماكن معينة بس يا حبيبي , واوعي تسمع كلام عمو اللي معاه شوكولاتة , ويقولك تعالي عشان ماما عايزاك هنا . .
تدريجيا الاطفال بيتكون عندهم الوعي ده , وبيكونو أكثر حذر و ارتياب . . .
إلا ان بعض الاطفال , بيظلو متعلقين بيقينهم ان عمو ده طيب , وان طنط ديه كويسة , وان بس بابا وماما مزودينها شوية . .
اليقين ده هو من اسباب (مش السبب الوحيد ) انه يصنع من الشخص "سريع الثقة" في الناس , وهو اللي يدفعه دفعا للنوع الأول , واللي ممكن يتحول للنوع التاني . .
وده السبب اللي بنأكد فيه دايما علي الآباء و الأمهات , بضرورة متابعة ابنائهم في النقطة ديه , وانهم يتأكدو ان الاطفال عندهم نوع من "المناعة" ضد الطيبة البلهاء , اللي بتصنع "الثقة المفرطة" , واللي ممكن تدمر حياتهم في المستقبل
وزي ما انتي وصفتي في رسالتك , ان اتكرر اكتر من مرة , انك تثقي في حد يطلع غير جدير بالثقة , و يخونها بشكل او بآخر . .
وللأسف انتي كررتي الموضوع تاني ,وواصلي الثقة المفتوحة بالناس في غير محلها , وانك بتضايقي بشكل مؤقت و بتسامحي , والأغرب انك بتنسي . .
وأخيرا زي ما وصفتي في رسالتك انك مفتقدة الثقة تماما , انتي ذكرتي الثقة بالنفس بس غالبا انتي قصدك الثقة بالناس , وكأنك بالفعل علي بوابة التحول من النوع الأول "الثقة المفرطة" للنوع التاني "الشك المستمر" . .
وأغلب ظني انك لسة في بداية النوع التاني , ومدخلتيش فيه كتير , وان المشكلة لازالت في الثقة المفرطة , مش في الشك المتزايد , عشان كدة خطوات الحل هتكون عنها بالتحديد . .
---------------------------------------------------------------------------
وحل المشكلة بالكامل , في كلمة واحدة , واللي بتحمل التوجيه السليم للتعامل في الموقف ده . .
وأخيرا لازم اعلق علي نقطة "النسيان و المسامحة" . .
ان كان ديننا الحنيف أمرنا باننا نسامح اللي أخطأ في حقنا فهو مأمرناش اننا ننسي اللي حصل. .
كمان مأمرناش اننا نكرر الغلطة مع باقي الناس , و نقع في نفس المشكلة . .
وبالتالي الشئ اللي لازم تاخدي بالك منه , هو انك لو اتقرصتي من شخص معين , انك بالطبع متعيديش معاها نفس التجربة , حتي لو اعتذرتلك مليون مرة . .
يعني ممكن تسامحيها ماشي عشان تاخدي ثواب اكبر , لكن بالتأكيد انك تقوليلها اسرار تاني ,وهي من فترة عملت فيكي موقف , فديه سذاجة انتي المسئولة عنها . .
المثل الامريكي بيقول : عار عليك أن تخدعني مرة.. وعار عليَّ أن تخدعني مرتين . .
فالتوازن , والحكمة في توزيع الثقة هتحل مشكلتك ان شاء الله . .