العنوان : الرسالة الوا ضحة

القسم: #العاطفي

الرقم: 11

السؤال:

 

 

أنا عندي ١٨سنه وبحب واحد بقلي ٣سنين

 

ف لاول كنا واخدين بعض ع اساي الصداقه وبعدها بسنه حبيتو كان بيتهم بيا جداااا وكان بيكلمني كتير وانا كنت بنفضلو

 

مره مع مره حبيتو وكنت حاسه من ناحيتو انه بيحبني من طريقه كلامه معايا واهتمامه

 

بعد سنتين قالي انه مش عارف يحبني غصب عنه ومستحيل يتجوزني ووهمني ان الحب ده حاجه مش بأيده وطبعا من صدمتي من كلامه قعدت اعيط ومكنتش عاوزه اصدق الكلام

 

فضلت مكامله معاه ع امل بس انه يحبني واسيبله ذكريات حلوه يفتكرني بيهااا هو بصراحه عمره ماكلم واحده عليا ولا عمري مسكت عليه غلطه بس هو بيعملني وحش جداااا ممكن يقعد شهر ميكلمنيش عادي وكلمه البعد بناسبله سهله

 

بس هو ع طول بيقعد يقولي انا عاوز اغيرك انا عاوزك تبقي انسانه كويسه كل واحد بيتمني يسمع من واحده انا مقدرش اعيش من غيرك بس انا عاوزك تعيش حتي لو من غيري مش عاوزك ضعيفه

 

ولما كنت اجي اقوله بحبك ميردش عليا واسالو انت مبتقوليش بحبك لي يقولي منا ممكن اقولك ١٠٠بحبك مش صعبه عليا بس انا مش عاوز اضحك عليكي علشان لما اسيبك متتقهريش اكتر 

 

وكل يوم عاوزني اشتغل علشان اعتمد ع نفسي ومحتاجش لحد هو عمره ماهاني

 

وانا مش زعلانه انه مش هيجوزني لانه عمره مااجوز وانا كنت متجوزه قبل كده وطبعا من حقه يفرح مع واحده احسن مني بس انا بحبه اوي ومش عارفه انساه ولاعارفه احب غيره ولاعارفه اعيش من غيره مشكلته الوحيده معايا اهماله فيا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

  

انتي غلطانة وهو كتر خيره . .

 

اكيد هو غلطان من البداية انه يتواصل مع واحدة مش عشان الاربتاط , لكن لو كان فيه غلط في البداية عنده , فهو بعدها عمل موقف لازم نشكره عليه .

 

ان هو ببساطة لما عرف انه مش بيحبك , ومش بيفكر يرتبط بيكي , فكان صريح معاكي , يا بنت الحلال انا مش في دماغي الجواز منك , يا اما بقي انه مش حاسس معاكي باي عاطفة , او في دماغه واحدة تانية , او مش عايز يتجوز , او اي سبب تاني , المهم انه كان صريح معاكي .

 

ولما بنقول كتر خيره , فلانه بالفعل مخدعكيش , ولا وعدك بشئ , ولا عشمك بحاجة و كسر قلبك بعدها  .

 

هو غلطان من البداية في التواصل , لكن بعدها بدأ يخلع ايده واحدة واحدة , عشان ميربطش قلبك بيه .

 

وعشان تعرفي موقفه كويس قد ايه , تخيلي لو كان عمل العكس , لو كان كمل معاكي قصة الحب والهيام , وهو من جوة عارف انه مش هيتجوز ,  وعلي حس الحب ده كان ممكن يتسلي بيكي شهور طويلة .

 

و كتير من الشباب للأسف بيعملو كدة , انه يوعد بالجواز , وعلي حس الوعد ده يعمل كل اللي عايزه , والبنت تكمل معاه و هي علي نياتها .

 

أما انتي , فعدد من الغلطات للاسف انتي عملتيه , وباصرار شديد

 

يعني هو كان صريح معاكي في كلامه و في مشاعره , لكن رد فعلك انتي مدهش .

 

بالفعل مدهش.

 

ليه بتهيني نفسك اكتر من كدة ؟ ليه بترخصي نفسك بالشكل ده ؟

 

حرام عليكي نفسك . . حرام عليكي كرامتك اللي بتبعزقيها  .

 

انا بكلمك علي اساس انك اختي الصغيرة , فمتضايق عشانك , متضايق من العذاب اللي بتعذبيه لنفسك .

 

اساسا انتي غلطانة من البداية انك "صاحبتي" حد 3 سنين , مفيش حاجة اسمها مصاحبة , مفيش حاجة اسمها صداقة بين ولد و بنت , ارجوكي سيبك من الروايات و الافلام الرومانسية اللي خربت البيوت .

 

مش بس عشان سبب ديني , كمان عشان كرامتك , عشان عزة نفسك اللي بتتولد بيها اي بنت في العالم .

 

فغلطتك الاولي انك علمتي صداقة مع حد , وقلنا 100 مرة مفيش حاجة اسمها صداقة بريئة بين ولد و بنت , بتضحكو علي نفسكم والله .

 

لو كان ينفع كان ربنا احلها  , هي متمش تحريمها من فراغ  ,لكن من المآسي اللي بنعاني منها بسبب الهم ده .

 

خاصة ان اصلا سنك صغير , وهو سن انتي متقدريش تميزي فيه بين الصح و الغلط , بين الحقيقي و المزيف , بين الاصلي و التقليد , بين الحب و التسلية

 

 

 

ان هو بيقولك يا بنت الناس انتي مش في بالي ,و مش هتجوزك , وسيبيني ابعد عنك  و انتي بتقولي لا , هنكمل صداقة و نكمل كلام .

 

يعني انتي بوجهة نظرك , متخيلة ان لما شاب ميطقش بنت , لما هي تكمل معاه , و "تلزق له" , ساعتها هيحبها و يتقدملها ؟ ؟

 

معتقدة كدة بجد ؟

 

يعني بجد مصدقة الخيال ده  ؟

 

صدقيني الحياة مختلفة عن الروايات و الافلام , قوانينها مختلفة , والناس مختلفة .

 

طالما الشاب مش طايق البنت يبقي خلاص الموضوع مقفول , ولما هي تفرض نفسها عليه هو بيتأكد انها "سهلة" .

 

و كلمة "سهلة" هي صيغة مؤدبة بدل ما اقول كلمة "رخيصة" , عشان مش عايز اقولهالك  .

 

بس هو من جواه شايف ده , ان هي "بتلقح جتتها" عليه .

 

والادهي ان الشاب ده لو معندوش دين او اخلاق  , انه ممكن يستغل حبها ليه بشكل قذر , وبالفعل ممكن يدعوها لغرفة نومه , وهو عارف انها ممكن متقدرش تقاوم .

 

ليه اساسا تحطي نفسك في المساحة المرعبة ديه , هل ديه سلوك بنت سوية ؟

 

هو لو كان قبل كدة عنده 1% اعجاب بيكي , فالاعجاب ده هيختفي لما يشوفك بترمي نفسك عليه , مفيش شاب بيطيق ده

 

ارجوكي مترخصيش نفسك , ربنا خلقك غالية عشان الشاب اللي ييجي للبيت و يطلبك من ابوكي , مش عشان انتي اللي تجري وراه و ترمي نفسك عليه

 

 

والغريب انه لما عاملك وحش , انه بيحاول يوصلك الرسالة واضحة , يا بنت الحلال انتي مش بالي , انا اتخنقت منك , ارحميني و شوفيلك سكة غيري , متلزقيش فيا كدة

 

وانا متخيل شكله كل ما يفتح الماسنجر ولا الواتس و يشوف رسالة منك  ومتخيله وهو بيقول : وبعدين بقي في الشغلانة الزرقا ديه , اعملها ايه طيب عشان تفهم  . .

 

متخيله وهو بيحكي لحد من اصحابه عن "البت اللي واقعة فيا و انا مش طايقها" , هل انتي فرحانة بالحوار ده ؟

 

انتي دخلتي نفسك من البداية و برغبتك في مساحة مش سليمة , فاطلعي منها سريعا ارجوكي .

 

عارف النسيان مؤلم , عارف الفراق صعب , بس ده قدرنا , الحياة مؤلمة بشكل عام , الألم عندك هيكون كتير شوية لانك من البداية اللي ربطتي قلبك بشخص بيتسلي .

 

في حين فيه الاف البنات اللي في سنك , واللي مركزين في دراستهم او شغلهم او حياتهم , لانهم عارفين ان من الغباء الارتباط بحد بيتسلي , واي واحدة فيهم بتقول : لما ييجي حد محترم و عايز يبني بيت هفتحله قلبي و احبه , غير كدة فانا مش فاضية .

 

هو مش هيتجوزك , ومش بيحبك  , ومش هيحبك , ارحمي نفسك , وعيطي شوية عليه , وخلاص , اقفلي بقي الباب ده تماما , و ركزي في حياتك و مستقبلك

 

لما تعيشي لوحدك او مع صديقاتك , احسن بكتير من الرقص علي السلالم بالشكل المهين ده , وانك تعذبي نفسك يوميا بالطريقة ديه .

 

---------------------------------------------------------------------------------

 

فاحنا عندنا نصيحة واحدة ومفيش غيرها . .

 

اقفلي تماما معاه كل انواع التواصل . .

 

و كل انواع التواصل  , يعني مفيش اي كلام معاه , لا واتس ولا فايبر ولا اي حاجة في الدنيا .

 

مفيش حاجة اسمها اسيب الاكل قدامي و مش هاكل منه , انتي كدة بتعذبي نفسك .

 

وهو غلطان حاليا انه لسة متواصل معاكي اساسا , لو هو بالفعل حريص عليكي يعملك بلوك , عشان تتقفل الصفحة ديه من حياتك للابد .

 

اي تواصل معاه تاني هو استمرار للعذاب ده , وهو صب البنزين علي نيران العذاب اللي بيقطعك يوميا .

 

ارجوكي متقوليش خلاص , هقفل الباب بس هنفضل اصحاب , ولا حاضر مش هكلمه بس هطمن عليه من بعيد , لا بقولك اقفلي الباب تماما , يعني بلوك من كل انواع التواصل .

 

لو انتي اصريتي علي وجهة نظرك , ولسة بتتكلمي معاه , يبقي براحتك , متلوميش الا نفسك لما تلاقي نفسك بالشكل ده سنين طويلة , لا انتي طايلة تتجوزيه ,ولا انتي عارفة تنسيه , لانك اساسا حطاه قدامك ليل و نهار و بتقولي هنساه

 

النسيان صعب بس ممكن لو فيه ارادة , اقفلي الباب تماما , مفيش واتس  , مفيش تليفون  ,مفيش ماسنجر , مفيش اي حاجة .

 

ولو هو حاول يكلمك اشتميه فورا , عشان يقفل الباب هو كمان

 

جايز كلامنا ميكونش عاجبك , بس احنا بخبرتنا الحياتية بنقولك الصح ايه , واللي نتمني انه يرحمك من العذاب ده