العنوان : الصياد و الفريسة

القسم: #الاجتماعي

الرقم: 58

السؤال:

 

 زمان من قبل ما يخترعو الفيسبوك كنت مدمن الشات علي ياهو وهوتميل ماسنجر و سكايب وبتاع و كنت لما اجي اكلم بنت ابقي مهتم بيها و عايز اعرف كل حاجة عنها . بعد كام اسبوع خلاص ازهق منها و اشوف غيرها

 

لما اتخرجت عقلت شوية و مبقيتش اعمل العبط ده بس لما بدأت اتعرف علي بنات بقيت بحس بنفس الشعور . اهتمام في الاول و ملل بعد ما اتعرف عليها . و ببقي عايز اتعرف علي غيرها و ده طبعا غلط

 

لغاية دلوقتي مخطبتش لاني مش عايز اظلم واحدة معايا بالاسلوب ده و مش قادر الاقي واحدة اضمن اني مزهقش منها

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 شوف يا سيدي

 

اللي كان بيحصل معاك هو أحد الجوانب السلبية الخطيرة لتكنولوجيا الاتصال , واللي زي ما خدمت المجتمع في جوانب كتيرة , طعنته في مقتل في جوانب تانية  , بالطبع ديه مشكلة سوء الاستخدام مش مشكلة الأداة نفسها  . .

 

الثورة في عالم الاتصال سهلت علي الناس انهم يتواصلو مع بعض بشكل آني و في نفس اللحظة , و ظهر مصطلح الشات الي يدل علي الحديث المتبادل اللي بيتم في نفس الوقت من غير وجود وقت مقتطع زي اللي بيحصل في الإيميل . .

 

و زي ما الشات كان ليه فوائد في تواصل الناس بشكل اسرع  و انجاز امورهم و اعمالهم , فبرضه كان ليه جانب سلبي في تشابك العلاقات العاطفية من الجنسين , بشكل لا يحمل أي نوع من الجدية , ولكن فقط بغرض التسلية . .

 

و عشان نقدر نشخص حالتك , تعالي نفسر سبب الشغف واللذة اللي بتصيب الذكر أو الأنثي , لما بيتبادل أطراف الحديث مع الطرف التاني  . .

 

بيكون فيه جزء منه , هو الغريزة اللي داخل كل واحد فينا , للتعرف علي والتعامل مع و الحديث و المزاح إلي طرف من الجنس المخالف ليه , مش المقصود المتعة الجنسية  ,حتي لو كان الكلام بعيد تماما عنه فهناك لذة لا تخفي في مجرد الحديث . .

 

والغريزة ديه شئ طبيعي و موجود , وهي في حد ذاتها ليست عيبا , والا فقدنا متعة الزواج و انهار المجتمع , ولهذا أيضا  حرّم الإسلام الاختلاط بغير ضرورة   , عشان القلوب متتحركش و تسيب اثر قد لا يزول بسهولة , خاصة في قلب الانثي   . .

 

بس الحقيقة ان اللي عندك حاجة اكبر من كدة بشوية  ,انت لما كنت بتتعرف علي البنات , مكانش الدافع الوحيد ليك هي تلك الغريزة اللي جوانا كلنا . .

 

وده لأن انت حصلك نوع من التشبُّع , من كتر ما كلمت بنات من مختلف الاماكن , فخلاص المتعة الخاصة بالكلام مع البنات قلت شوية , وان مختفتش تماما . .

 

---------------------------------------------------------------------------

 

الشئ التاني اللي انت كنت بتدور عليه , نوع من الغريزة اللي بتصاحب الصياد , وهو يبحث عن الفريسة , وبيتربص بيها من بعيد , و يقعد يطاردها لغاية لما يصطادها , وتعلو علي وجهه ابتسامة الظفر أول ما تسقط . .

 

أخشي ان يكون اللي عندك نوع من التحدي الذاتي , اللي هو انا لازم اخلي "البت ديه" تكلمني , مش بس كدة , كمان تضحك معايا , والاقي في صوتها لمسة من الإعجاب , ولمحات من الحب , واحس بيها انها افتقدتني لما غبت عنها كام يوم , او لما تبعت رسالة وانا اشوفها و مردش عليها , او لما اتقل شوية في الكلام . .

 

والتحدي ده بتبدأ خطواته في الرغبة في "اصطياد" الفريسة  , وهي الاثني , سواء آنسة او سيدة , متزوجة او مطلقة او ارملة , عربية او اجنبية  , وانك ترمي الشبكة , عشان هي تلقط الطـُعم  و تبدأ تتكلم معاك . .

 

يليه إنك تشوف مدخلها ايه في الكلام , الكلام الرومانسي ولا الاجتماعي ولا السياسي ولا الروايات ولا الافلام ولا حتي الدين . .

 

ولما يتوسع الكلام شوية بشوية , انت تحس بالترمومتر البشري بتاعك ان بقي عندي شوية اعجاب , تتنقل للخطوة الجاية , وهي التــُـقل , عشان تعمل نوع من تعميق العلاقة بينكم . .

 

التــُـقل بيكون هدفه عندك انك تختبر مدي تمسكها و راحتها في الكلام معاك , و بيتم ده عن طريق انك تتاخر في الردود , او تكون اونلاين و متردش عليها , او تبعت رسالة و تتجاهلها شوية . .

 

و لما تتأكد انها معجبة بيك , احيانا بعض الشباب بيتوقفو عن تعميق العلاقة  , ودول اللي لسة عندهم شوية دم و اخلاق , لكن البعض بيزداد في مطاردة الفريسة  لاصطيادها بالكامل , وبالتالي يخطو خطوات أعمق في العلاقة , حتي يتحول الاعجاب لحب من طرفها . .

 

والمشكلة انه من طرفها بس , يعني ياريت هو كمان كان بيحبها , فممكن يكون فيه خطوة للخطوبة و الزواج  , لكن مجرد انك "تشعلق" قلبها , وتجعلها ترتبط بيك , وتلعب علي وتر الضعف الانثوي الغالب لدي كلمات معسولة او نظرات حانية . .

 

و بمجرد دخول الانثي الفخ , هنا يرقص قلبك طربا لانتصارك الرائع علي قلبها , وانك جعلتها "خاتم" في صباعك , وضمتها لسلسلة طوابع البريد اللي انت بتجمعها , تقولها (يللا ادخلي اركني جنب اخواتك)

 

انت كدة عملت ارضاء لغرورك المريض , و عملت إشباع لشهوتك النرجسية , في إنك خليك واحدة تحبك و تتعلق بيك . .

 

---------------------------------------------------------------------------

 

و بعدها ؟ ؟

  

تتحول المطاردة للاتجاه العكسي , بدل ما كان الصياد بيتتبع الفريسة و يجري وراها , الفريسة رغما عنها – تحت ضغط عاطفتها – هتلاحقه و تتصل بيه , وتبعتله رسايل , وهي متعجبة هو مش ليه مهتم زي الاول . .

 

هي لو كانت تعرف انه مجرد بيرضي غروره المرضي , كانت فهمت التفسير , ان هو مش عايزها هي كأنثي , لكن عايز يجمع الـ "كولكشن" الخاصة بيه . .

 

أغلب الإناث بيصابو بالاحباط بعد كام محاولة فاشلة من الاتصال بيه , والاحساس باليقين انه خلاص مبقاش مهتم , وهي بتخرج من التجربة بجرح غائر في قلبها , قد يندمل وقد لا يندمل . .

 

وحتي إذا الئتم و بدأت  هي علاقة جديدة , فهتكون مليئة بالحذر و الريبة من تكرار ما حدث . .

 

المطاردة ديه بتتم بشكل دائم , في كتير من حالات التواصل بين الذكور و الإناث , حتي لو أخذت خطوات مختلفة او شكل مغاير , فبتكون في نفس الإطار , ذكر يبحث عن إرضاء غروره , بجعل الأنثي تعجب بيه , وأنثي تدخل الفخ بقدميها دون أن تدري . .

 

و يزداد الأمر لما يكون للذكر مواطن قوة مرغوبة من الأنثي , يعني هو وسيم , ولا عينيه خضرا , ولا بعضلات , ولا بيكتب شعر , ولا بيعرف يمتطي فرس الكلمات المعسولة , ولا بيتكلم انجليزي كويس فيرمي علي بنات اوروبا و امريكا , وجود المقومات ديه عند الشاب , بيجعله مش قادر يقاوم  انه يستخدمها للاصطياد المستمر للاناث . .

 

واللي زي ده مش بيكتفي بواحدة , بل انه ممكن يكون بيمارس هواية الصيد مع 3 في نفس الوقت مثلا , كل واحدة يكلمها بلغتها و اسلوبها و طريقتها  , مراحل صيد كاملة يا اخوانا , يمارسها بغريزته التي لا تهدأ . .

 

و غالبا هو بيختار نوعية البنات المميزات , او الممنوعات . .

 

المميزات يعني اللي فيها حاجة تجعلها مرغوبة , جميلة بقي او متفوقة او مشهورة , او ليها منصب قيادي او غنيه او معاها الجنسية الامريكية . .

 

الممنوعات يعني اللي صعب الوصول ليهم  , وديه اللي بتثير عنده غريزة التحدي , وانه لازم يوصلها و يكسر مناخيرها  , ويدخلها قفص الصياد غصب عنها , و الكارثة لما يمتد النوع ده للمتزوجات او البنات الخجولات اللي اصلا مش بيحبو يتكلمو مع حد او المنتقبات و المتدينات  . .

 

كلامي قد يتفهم منه اني باعمل إدانة للشاب من غير الأنثي , لا طبعا , هما الاتنين مخطئين من غير كلام , ومفيش حد بيجبر بنت انها تتكلم مع شاب في الشات , وهي مخطئة زي ما هو غلطان , بس هو بيعمل الجريمة وهو عارف انها لمجرد المتعة , هي بتتكلم وهي مش عارفة الفخ اللي بيتبني ليها . .

 

---------------------------------------------------------------------------

  

ليه باشرح التفاصيل ديه كلها  ؟ ؟

 

عشان اولا اوضح لكتير من الشباب اللي لسة بيمارسو المصيبة ديه  ,انكو محتاجين فعلا تنضجو عن السخافة ديه , واللي تناسب شخص مريض نفسيا عنده لذة السادية , مش شاب محترم ابن ناس   . .

 

لو فاكر الموضوع عادي يا سيدي مفيش مشاكل , فاعرف انه مش عادي , لو سهل علي قلبك انك تنساها – و ده اللي بيحصل فعلا – فمش سهل عليها , وانت كدة بتأذي واحدة هتكون زوجة و ام خلال سنين , وقد يكون طيف المحادثات ديه , هي من اسباب خلافاتها مع زوجها او يؤدي لطلاقها  . .

 

كمان لازم اقول للبنت , ان حضرتك اللي بتسمحيله انك يزقك في قفص الصياد , ويكلبشك بالسلاسل  ,صدقيني هو بيضيع وقته , وبيرضي غروره المريض , وانتي معندكيش طاقة نفسية تتسع او تتحمل دورة (التعارف – الاعجاب – التمسك بيه – الحب – التجاهل – الاحباط – الحزن ) هو مش بيحصله اي حاجة من ديه , انتي بس اللي هتعاني , وهتبكي , وهتتعذبي , وبعدها هتتحولي لكائن بارد لو اتكرر الامر ده , ومنستغربش بعدها ليه كتير من حالات الزواج بتفشل بعد شهور قليلة . .

 

وقفي فورا اللي بيحصل , لو فيه حاجة مهمة يكون الكلام بالايميل – منعا للضحك و الهزار و الرغي – ويكون الكلام علي القد بس . .

 

متفتحيش قلبك الا لشخص جاد , عايز بالفعل يرتبط بيكي , عشان لما تدخلي القفص , يكون قفص الزوجة مش قفص الصياد , وتكونو مع بعض فيه , مش يقفل عليكي و يسيبك و ينصب الفخ لواحدة تانية

 

انتي غلطانة زي ما هو غلطان , لو هو مجرم بيتسلي بقلوب البنات , فانتي مهملة و فرحانة بالكلام معاه , من غير ما تعرفي ان العاقبة مش هتكون ايجابية . .

 

فيه مبدأ بيقول : رفع الكُـلفة يزيد الألفة , المعني واضح و مش محتاج تفسير , ازالة الكلفة و الحواجز في الكلام , يجعل القلب – رغما عنه – يعجب و يتعلق بالطرف الآخر . .

 

---------------------------------------------------------------------------

 

نرجع لسؤالك الاصلي . .

 

الحمد لله انك سبت الكلام ده زي ما قلت  ,وارجو تكون بالفعل مش هتكرره باي شكل مختلف , لان مع تقدم السن , بيحصل احيانا نوع من الانتكاسات الاخلاقية , وممكن يتم تكرار ما حدث بشكل مختلف . .

 

حاليا انت عندك نوع من الأعراض الجانبية اللي بتصيب الشخص مدمن الصيد بالشكل ده , ممكن تسميه نوع من العقاب او الضريبة اللي لازم هتدفع  . .

 

و هي حالة "التشبع" اللي بقت من كل الإناث  , ما هو اللي مداقش في حياته البسبوسة , هيكون مستعد يدخل ياكل محل كامل , لكن اللي كان عايش طول عمره في محل حلويات شرقية , مش هيطيق يبصلها . .

 

انت من كتر ما كلمت و صاحبت و ضحكت و هزرت و حبيت و اعجبت ببنات , فخلاص الانثي بالنسبة لك حاجة عادية مملة , معاك الخريطة الكاملة ليها , ومفيش اي حاجة هتبهرك فيها , فطبيعي انك تصاب بالملل الشديد من اي واحدة تتقدملها , حتي لو انت من جواك عايز الخير , وعايز تتجوز فعلا . .

 

الملل ده لازم يتعالج , وإلا هيهد بيتك فورا , مفيش حد هيستحمل يعيش مع واحدة زهقان منها العمر كله , ويا يحصل الطلاق يا الخيانة , يا اما المعيشة في تلاجة باردة . .

 

هنحاول نقول علي عدد من الخطوات اللي ممكن تساعد في كسر حالة الملل ديه  :  

 

• أرجو تكون بالفعل توقفت تماما عن اي كلام مع اي بنات تانية , لا شات ولا تليفون ولا في الشغل – باستثناء الضرورة – لان بقاء الوضع زي ما هو هيعمل استحالة للاصلاح , ونفس الموضوع بعد الخطوبة او الجواز .

 

• ابحث عن البنت اللي عندها مساحات مشتركة معاك , بتحبو افلام معينة , بتشجعو فريق كورة بجنون , بتقرو روايات , بتحبو تمشو في الشارع في نص الليل , تطبخو مع بعض , تحضّرو عفاريت سوا , اي حاجة بس تكون انتو الاتنين بتسمتعو بيها , عشان تكون وسيلة لجلب المتعة من الباب في حالة وصل الملل من الشباك . .

 

• لا تبحث في خطيبتك او زوجتك عن ما كنت تبحث عنه ايام مراهقتك , مش مجرد كلام و ضحك و هزار, لكن دور علي حاجات تانية انت مكنتش بتعملها . .

 

• يكون عندك خطط جاهزة لكسر الملل , خروجات  , سفر , فيلم , تزورو صديق . . وحذار تبخل بوقت او فلوس في الحاجات ديه , و الا هيتهد البيت فعلا . .

 

• اشغل نفسك و اشغلها بعد الزواج , عشان ميكونش وشك في وشها لما تزهقو , هي بتذاكر اسباني وانت بتحضر للـ MBA  , هي بتتعلم البرمجة  , وانت بتصلح الخلاط , هي بتشارك في دار ايتام  وانت بتحضر للشغل , انشغال الزوجين عن بعضهم البعض بالمقدار المناسب  , احيانا بيكون حاجة صحية . .

 

• لا بأس في فترات من الابتعاد بينكم بشكل مناسب و صحي , ولفترة محدودة , يعني كل كام شهر لما هي تروح لاختها اللي في محافظة تانية و تبيت عندها يومين ,وانت في البيت لوحدك , لو حدث هذا الابتعاد ليس بسبب وجود خلافات  ولكن كمخطط طبيعي , بيكون ليه دور إيجابي في زيادة الشوق و الافتقاد لدي الزوجين , و كسر حالة الملل عندهم , نفس الموضوع لو انت عندك مشوار تبع الشغل لمدة 3 ايام مثلا , الفترات البينية ديه احيانا بيكون ليها تأثير ايجابي . .

 

• خد بالك النقطة اللي فاتت ديه ممكن تتسبب في مشكلة عكسية خطيرة , لو ان ايا من الزوجين استغل الفترة ديه في التعرف او التواصل مع حد من الجنس الاخر , او لو كانت بسبب وجود مشاكل اساسا , فالخطوة السابقة لازم يتم تطبيقها بحذر , ومن غير ما حد من الطرفين يحس ان التاني عايز يبعد عنه , لكن كأنه غصب عنهم . .

 

• شاركها في امور حياتك و شغلك و مشاكلك الشخصية و اسرتك و اصدقائك , وخليها هي كمان تشاركك في الامور ديه , احيانا بيكون تدخل كل طرف في شئون الطرف الاخر بيكون ليه أثر إيجابي في تعميق العلاقة و الحب بينهم , بس ميكونش من نوع :  (قوليلي بقي يا هانم مين صاحبتك سماح  ديه ؟)  ميكونش فيه نوع من الوصاية و التحكم , يعني التعرف علي شئون الطرف الاخر مش السيطرة عليها .  

 

• طرد اي فكرة للمقارنة بين زوجتك , و"صديقاتك" القدامي , عقلك الباطن غصب عنك هيقارن بين زوجتك اللي "شبعت" منها , وبين هيام و سوسن و مني و مدام سعاد و الاستاذة عفاف و اليزابيث و ساندي, اللي كنت مشعلقهم علي الشات , و اغلب المقارنات زوجتك هتخسر فيها , لانك مشفتش من صديقاتك الا الجانب المضحك الكيوت بس , بينما لو اتجوزت واحدة فيهم كنت هتشوف الشعر المنكوش و الزعيق والطبيخ المحروق , فمتعملش مقارنة , وثق ان مراتك افضل منهم بس انت محتاج تحسن التعامل معاها .

 

• الدعاء المستمر لرب العالمين انه يزيل من قلبك هذا الأثر الباقي من ايام المراهقة , واللي كفيل بالفعل في تنغيص الحياة الزوجية باستمرار