صباح الخير عليكم

لما بشوف الاعداد الكبيرة من اللاجئين السوريين و العراقيين و المصريين في اوروبا و امريكا و كندا بكون مستغرب هي ليه البلاد ديه بتستقبل اللاجئين اساسا و بيصرفو لهم اعانات شهرية و سكن و علاج و فيه منهم بياخد الجنسية وهما عارفين انهم فقرا وكتير منهم بيعمل مشاكل

واحد زميلي قالي انهم بيحتضنوهم هناك في الكنايس و المعابد اليهودية عشان يغيرو دياناتهم بس مش عارف كلام جد ولا هبد و خلاص

لو عندك معلومة قولي

​

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

 

صباح الفل عليك

 

الربيع العربي , اللي تبعه نكسات الاستبداد في الدول الخمسة اللي مرت بيها , تونس , مصر , ليبيا , سوريا واليمن , حدث في نفس الفترة اللي اوروبا بتعاني منها من مشكلة ديمجرافية خطيرة جدا , اسمها نقص المواليد , وزيادة متوسط طول العمر . .

 

و عشان تتفهم النقطة ديه و اثرها , يكفي انك تعلم ان في اوروبا 75 % من السكان فوق الـ 25 سنة (طبقا اموقع اندكس موندي) , وده معناه ان المخزون الاستراتيجي اللي بتتمناه اي دولة في العالم , وتعتبر مصدر ثروتها – و هي الطاقة البشرية – بتتناقص بشكل مرعب في القارة العجوز . .

​

ده كابوس مخيف لكل دول الشنجن , ان خلال سنين ممكن يكون في المدارس فراغات , الجامعات تكون باعداد قليلة , و بالتالي الخريجين قليلين , اللي بيشغتلو اعداد اقل من المطلوب , ضريبة الدخل هتقل بطبيعة الحال , عدد المسنين بيزداد , مصاريف اكتر علي الحكومة من رعاية و معاشات , وضرائب مخفضة من عدد عاملين اقل , نقص في العمالة , وده بيهدد بشبح انهيار الدولة داخليا . .

 

متوسط انجاب المرأة الاوروبية هو نصف طفل لكل امرأة ,يعني لو فيه الف مرأة في سن الزواج في قرية معينة , فهما بينجبو 500 طفل , يعني من الاخر نص الستات بس اللي مقررة انها تخلف , ولما بتخلف بتجيب طفل واحد و تقفل الباب . .

 

و السبب الرئيسي في ده حاجتين : اولا تفكك الكيان الاسري و العائلي في كتير من بلدان اوروبا , و قرار الملايين من الشباب و البنات عدم الزواج لكن فقط الاستمتاع اللحظي و الوقتي , وبالتالي عدم التفكير في انجاب طفل يكون مسؤلية عليها او عليه . .

 

كمان المعاناة اللي بتعاني منها الأم في فترة الحمل و الرضاعة والتربية , يعني بالميت 4 سنين بتضيع من حياة الست , و بعضهم مش عايز يخسر قوامه او شبابه عشان حاجة زي كدة . .

 

قناة (يورو نيوز) الأوروبية عملت تقرير مخيف , عن إن في سنة 2060 متوقع يكون نسبة اللي في سن العمل لنسبة المتقاعدين 2 : 1 , بينما النسبة كانت 4 : 1 سنة 2011

يعني اعداد العمالة انخفضت للنصف , بس خلال 60 سنة , طب هيحصل ايه قدام ؟ ؟

 

ولو هتسأل أي عالم اجتماع , ايهما افضل لبلد محتاجة عمالة , انه يأتي ليها عمالة مدربة من بلد تاني , ولا أطفال صغار , يقولك أطفال بالطبع . .

 

العمالة الماهرة بتكون قادرة علي العمل فورا , ده صحيح , لكن يعوقهم الاندماج في المجتمع , وعامل اللغة , وفرق العادات , والولاء الكامن في القلوب , كل ده اللي بيجعل العمالة الاجنبية عامل مساعد , لكن يحتمل علي العديد من المخاطر الاجتماعية لاي دولة . .

 

بينما الأطفال , هم كنز لاي دولة ,لانهم بينشأو و يتربو و يتعلمو بناء علي معايير و قيم الدولة اللي بيعيشو فيها , وبيتعملو لغتها فورا , وبتلاقي امكانية و سهولة اندماجهم في المجتمع اسرع كتير , كمان غالبا ولاءهم بيكون للبلد ديه اكتر من البلد الأم . .

 

وده السبب اللي جعل اوروبا تفتح ابوابها بشكل كبير , للاعداد المتزادية من اللاجئين العرب لاراضيها , وتجنيسهم كمان

 

---------------------------------------------------------------------------

 

فحاليا , مئات الآلاف من اللاجئين العربي , يمثلو قـُبلة الحياة , واللي قدرت توقف خطر الشيخوخة المبكرة اللي كانت هتعاني منها اوروبا في نهاية القرن الحالي , مئات الالاف من الاسر تحمل أعداد كبيرة من الأطفال , واللي اجباري هيدخلو المدارس , وهيندمجو سريعا في قيم و قوانين و لغة المجتمع , وسرعان ما هتلاقيهم صارو جزء حقيقي منه

 

خد بالك انا مش بقول هل ده لصالحنا ولا لأ , انا بحلل الموضوع مش بأيده . .

 

كمان عايزين نركز شوية في كلمة قيم المجتمعات الغربية , بالطبع احنا – كمسلمين و عرب –علي عداء لن ينتهي مع العديد من القيم ديه , الانفتاح الغير مقبول و الاختلاط المحرم , إباحة الخمر و بعض انواع المخدرات في هولندا , العنصرية المتواجدة بالمانيا و التعنت بفرنسا , إباحة الفواحش , كل دي اشياء غير مقبولة ,لكن علي الرغم من ده , فيه كمية كبيرة من القيم الإيجابية – واللي تتوافق بشدة مع قيمنا الإسلامية – هما بالفعل بيطبقوها , سواء من وازع داخلي او بسطوة القانون . .

 

قيم العدل و المساواة , الحض علي التفوق و الاجتهاد , المجتمع التنافسي شبه الشريف , وامكانية مقاضاة أتخن رجل في الدولة , و مساواة الجميع في القضاء , حتي و ان لم تكن القيم ديه مطبقة بشكل كامل , فالاساس موجود علي الاقل , بعكس بلادنا الجميلة . .

 

بقول كدة عشان لو انت سافرت و استقريت هناك , سواء لاجئ او مقيم بعقد عمل , لازم تفلتر ايه اللي ابنك لازم يتعلمه منهم و ايه اللي لازم تصححه فيهم , البعض مُصر علي إن اي طفل بينشأ في اوروبا هيطلع خمورجي و بتاع نسوان , و ده غير صحيح , أوروبا و أمريكا فيها نماذج هايلة جدا من الشباب المتدين و الخلوق و الناجح علميا , واللي كان السبب في نشأتهم كدة الرعاية المستمرة لوالديه , واهتمامهم بفلترة اللي بيتلقوه , بالإضافة بالطبع لتلقيه التعليم في مدارس إسلامية , وهو شئ بالغ الأهمية

 

---------------------------------------------------------------------------

 

فرغبة اوروبا في احتضان اللاجئين , ليس لاخضرار عيونهم , ولكن طمعا في رفد مجتمعها باعداد كبيرة من الشباب اليانع المتحمس . خاصة انهم عارفين اننا كعرب بنحب زيادة النسل, فهما عايزين اللاجئين هناك يخلفو و يملو البيت عيال , ومتقلقش الحكومة هتصرف عليهم . .

 

كون ان بيتم احتضانهم في كنائس او معابد يهودية , ده كلام غير صحيح , وانا زرت عدد من البلاد الأوروبية و المدن الأمريكية , وقابلت لاجئين عرب و غير عرب , وبيقيمو في اماكن حكومية او اماكن خاصة , وفي حالة قيام مؤسسة دينية بالمساعدة , فهو الاستثناء اللي لا يقاس عليه اي قاعدة , واساسا لا توجد اي مواد دينية في المدارس الأوروبية – باستثناء المدارس الدينية المتخصصة – وممنوع اي حد يقول لابنك اي شئ متعلق بالدين والا انت هتمسكه من قفاه و تبلغ عنه البوليس , والكلام ده بناء علي سفر متعدد لدول اوروبية مش عن سماع و حكي . .

 

تاني انا مش باعمل تبرير او تشجيع لفكرة اللجوء , و أصلا انا معنديش القدرة علي اصدار حكم شرعي عليها , خاصة ان فيه حديث صريح في الإقامة في غير بلاد المسلمين , الحديث اللي رواه الترمذي و مسلم (أنا بريء من كل مسلم يقيم بين أظهر المشركين)

معنديش العلم الشرعي الكافي لاصدار فتوي متعلقة بحكم اللجوء حاليا , انا بس باعمل تحليل للأمر سياسيا , من غير ما اقدر اقول هو حلال ولا حرام

 

---------------------------------------------------------------------------

 

فاختصارا , اوروبا بتكسب كتير من اللاجئين , ولو انت تعرضت للموضوع ده , فلازم تتبع الوسائل الكاملة اللي تضمن ان ابنك هيستفاد من قيمهم الايجابية , و هيرفض قيمهم السلبية , وانا شفت نماذج فعلا مشرفة في امريكا , لاطفال حافظين لأجزاء من القرآن , ملتزمين بالصلاة , متفوقين دراسيا , بنات في ثانوي محجبات , حجابهم مش بيمنعهم انهم يتفوقو علي اقرانهم . .

 

بس كان السبب الرئيسي , اهتمام الاهل بيهم , ووجودهم في مدارس اسلامية من الصغر

​