العنوان : قيمة العطاء

القسم: #النفسي

الرقم: 78

السؤال:

 

الفلوس .

 

اكبر مشكلة بقت بتواجة اى شاب دلوقت هى الفلوس

 

هى اللي خليته يستغني عن تعليمه عشان يوفر فلوس لى من شغله

 

و هى اللي بتخلي الواحد ميقدرش يتقدم لبنت الحلال عشان مستواة اقل منهم بكتير  . متقنعنيش ان فى حد دلوقت منظورة فى الاخلاق و بس

 

دة بغض النظر حتى لو المستوى كان موزون برضة الفلوس هى ال بتحكم اذا كنت هتخطى خطوة نص دينك

ولا هتكبر دماغك

 

هى دى مشكلتى .....

 

مطلوب منى ابقاا سوبر مان عرببة و شقة و فلوس

 

انا بموت كل يوم من عجزى  . اللي جاى بيروح و بزيادة كل لما اجمع مبلغ مش بلحق اتهنى على . لانعليا التزامات فلوس و ديون علي اسرتي

 

اعمل ايه ؟

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

انت بتتكلم بالفعل عن ازمة عامة و منتشرة في تقريبا كل قطاعات المجتمع المصري , بل و مجتمعات عربية تانية .

 

الأزمات الاقتصادية المتتالية اللي ضربت بلادنا بعد سلسلة انتكاسات بلاد الربيع العربي , واللي كانت أشبه بعقاب للشعوب انها حاولت تتنفس عبير الحرية .

 

ولأن الأزمة عميقة بالفعل , فالحل مش هيكون سهل , لكن هنحاول نلخصه علي قد ما نقدر في 3 مسارات بالتحديد: تطوير الذات , الحالة النفسية , قيمة العطاء .

 

---------------------------------------------------------------------------------------------

 

لو هنبدأ بتطوير الذات .

 

مش هقول كلام من كتب تنمية بشرية , لكن هقول كلام واقعي و بيتم تطبيقه من بكرة .

 

فيه مثل أمريكي بيقول : ليس عيبا ان تولد فقيرا , لكن العيب ان تموت كذلك .

 

يعني ان كان مش ذنبك انك اتولدت في اسرة بسيطة , لكن هيكون ذنبك لو انت فضلت فقير طول عمرك , وكأن انت في طفولتك لو كنت فقير فهو امر مش بايدك . لكن لما تكبر بيكون في ايدك عدد من الوسائل لتطوير نفسك و النجاح , ولو انت معملتهاش يبقي المشكلة مشكلتك انت مش مشكلة حد تاني .

 

حتي في البلاد اللي فيها ازمات اقتصادية , فيظل فيه عدد من الوسائل اللي لو اتعملت فهتفرق معاك في ايجاد فرص عمل احسن او ايحاد مصادر متنوعة للدخل .

 

صحيح ان فيه ظلم غير محدود , وان القطاعات المقربة من السلطة (جيش , شرطة , قضاء , رجال أعمال) هما اللي في ايديهم كل شئ , لكن مش عايزين نعمل النقطة ديه شماعة , عشان نخليها مبرر للكسل او التقصير .

 

-------------------------------------------------------------------------------

 

ايوة الوضع الإقتصادي صعب , بس يظل فيه عدد من الوسائل اللي ممكن تعمل بيها تغيير في مسارك المهني , وبالتالي تطوير من نفسك , ووضعك المادي , هنا مثلا امثلة :

 

 

• ماذا عن تعلم لغة جديدة , سواء تتقن إنجليزي او تتعلم لغة مختلفة زي الفرنسي او الايطالي , وده هيفتح لك مجال مختلف في الشغل , وانت اصلا ممكن تتعلم لغة جديدة بالكامل مجانا علي اليوتيوب , بس محتاج عزيمة و اصرار و صبر .

 

 

• ماذا عن لغات البرمجة , لو انت اتقنت برنامج زي "اندرويد ستوديو" اللي معتمد علي لغة "جافا" مثلا , مرتبك هيبدأ من 8  الاف , واصلا ممكن تشتغل بس اونلاين و تاخد بالدولار , وبرضه الكورسات بتاعته كلها اونلاين و مجانا 

 

 

• ماذا عن التصميم و الجرافيكس , المجال ده واسع جدا و اللي بيكون شاطر فيه بيكون عنده دخل عالي

 

• ماذا عن فكرة السفر للخارج ؟ سواء الخليج او تركيا او ماليزيا او اوروبا لو كان فيه فرصة ؟ هل انت دورت و سألت بالمقدار الكافي ؟

 

• بل ماذا عن دول افريقيا نفسها , دول وسط افريقيا اللي احنا بنحسب انهم عايشين في غابات و لابسين جلد النمر ,  دلوقتي بي فيها نهضة اقتصادية غير مسبوقة , وفرص البزنس واسعة جدا هناك , هل انت دورت بما يكفي ؟

 

• ايه رأيك انك تتقن حرفة متخصصة , سواء في اصلاح العربيات او الحفر علي الخشب او صناعة الموبيليا , مترميش كلمة واسعة كدة "مفيش شغل في مصر" , لا فيه شغل و كويس بس محتاج الشاطر و المتميز

 

• ماذا عن التجارة ؟ انت ممكن تبدأ تعمل تجارة بين محافظات او حتي جوة المحافظة نفسها براس مال بسيط , بس محتاج شوية خبرة و قلب جامد

 

• ماذا عن التسويق لو انت شاطر فيه ؟ اغلب الاماكن بتحتاج حد كويس في التسويق و ياخد نسبة فورية من اي عملية بيع , وديه هتكون فرصة كبيرة ليك لو انت شاطر في المجال

 

انا مش هاقدر اقولك تمشي في انهي مسار بالتحديد لانك انت اللي عارف نفسك و عارف ايه اللي يناسبك و ايه اللي بتحبه اكتر , انا بس عايزك تمسك نقطة نقطة من دول و تدور عليها كويس , عشان تشوف انهي فيهم اللي ينفع معاك .

 

-----------------------------------------------------------------------------------

 

المسار الثاني : تحسين الحالة المزاجية و الشعور بالرضا

 

كنا اتكلمنا بالفعل في رسالة سابقة عن الشعور بالرضا , وأهميته في رسالة : بين الرضا و السخط

 

وأنا يهمني إنك من جواك تعمل نوع من التخفيف من الضغط علي اعصابك , لأن طول ما انت من جواك عامل تعذيب لنفسك و ذهنك دايما بيفكر في الأمر ده  ,فهتعيش في عذاب مقيم .

 

وافتكر دايما ان اللي بيبص لفوق , رقبته بتوجعه , درّب نفسك انك تبص لتحت , يعني للناس اللي بتعاني اكتر منك .

 

زي ما انت بتقبض رقم قليل  ,ففيه ناس مش لاقيين اي شغل , زي ما انت حاسس انك مظلوم , ففيه شباب تاني زيك مرمي في السجن بسبب حاجة هو ملوش ذنب فيها , زي ما انت حاسس انك بتعاني , ففيه شاب تاني زيك بيمشي في الشارع بعكاز وهو يتمني يحس بنعمة البصر  .

 

دايما حط في بالك النعم اللا منتهية اللي ربنا أنعم بيها عليك , ودايما قارن نفسك باللي بيعانو اكتر منك , والافقر منك , وقتها هتلاقي العذاب النفسي اللي جواك اختفي .

 

مش معني كلامي انك تكسل او تكون سلبي , انت لازم تسعي دايما لتطوير نفسك و يكون معاك قرش حلال اكتر , لكن تكون حاطط في بالك ان حتي لو ده محصلش , فانت في نعمة يتمناها ناس كتير و انت مش واخد بالك منها .

 

هدي نفسك خالص , متعذبهاش باللوم المستمر , واعرف ان ربك هيفرجها بطريقة انت مش متخيلها .

 

----------------------------------------------------------------------------------------------

 

المسار الثالث : قيمة العطاء

 

وهو شئ شديد الأهمية بالفعل .

 

ارجوك متحسش باي ندم او غضب من اي فلوس بتصرفها علي أهلك او اخواتك او والدك ووالدتك , واعرف انك بتعمل شئ يرضي ربنا عليك , وبالتالي هيفتحها لك بطريقة انت مش متوقعها .

 

صحيح انت عليك عبئ كبير وهو الخاص باقتطاع جزء من مرتبك عشان اي شئ مطلوب في البيت , بس اعرف بجد انك بتعمل تجارة مع رب العالمين , وان كل جنيه انت دفعته ليهم , هيترد ليك عشرات أضعاف .

 

اي رفض او امتناع عن تقديم يد المساعدة لأهلك , هيكون شئ سلبي , و كل جنيه بتقدمه ليهم , هتلاقي ليه مردود بشكل ايجابي علي كل نواحي حياتك .

 

بس بالتوازي انت محتاج تعمل توازن بين ده و ده , فلو كان الوالد او الوالدة او حد من اخواتك محتاج فلوس لحاجة ضرورية خلاص  ,يتم تقديمها فورا , لكن لو حاسس ان الشئ المطلوب مش عاجل و مش ضروري , وقتها ممكن تنظم الفلوس بحيث يكون معاك جزء و معاهم جزء .

 

ولو تعرف ادخل جمعية بحيث الفلوس اللي انت بتحوشها متكونش سايلة في البيت او في البنك, وهو الامر اللي هيخليها تتصرف بشكل ما .

 

و لما تقبض الجمعية متخليش الفلوس في ايدك , لكن فورا اتصرف فيها في حاجة مفيدة , سواء قسط لشقة , او شراء جزء من العفش او الشبكة و هكذا , وجود الفلوس في ايدك او في البنك هيخليها تضيع بشكل ما .

 

اعمل موازنة بين حق اسرتك عليك , وبين حقك الشخصي , وهتلاقي انك بالفعل بدأت تحوش بشكل تدريجي .

 

----------------------------------------------------------------------------------

 

ودايما حط في بالك دايما الآيتين دول .

 

الآية الأولي من سورة البقرة : (مَّن ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ أَضْعَافًا كَثِيرَةً ۚ )  واخد بالك من مصطلح (يقرض) , وكأن اي فلوس انت بتدفعها لأهلك هو قرض عند رب العالمين , وهو سبحانه هيرده ليك أضعاف مضاعفة , سواء كفلوس او صحة او سعادة او ذرية او توفيق .

 

 

الآية التانية في سورة الطلاق  : (  وَمَن يَتَّقِ اللَّهَ يَجْعَل لَّهُ مَخْرَجًا  وَيَرْزُقْهُ مِنْ حَيْثُ لَا يَحْتَسِبُ ۚ )

 

طالما انت حريص علي طاعة ربنا , وبعيد عن القرش الحرام , و دايما ملتزم بالصلاة و العبادة , ثق ان ربك هيصنح لك " مَخرج" يعني  طريقة تخرج بيها من الأزمة , مش بس كدة , ده كمان هيرزقك من مكان انت مش متوقعه أبدا , وبشكل مدهش

 

حط الآيتين في بالك , و خليهم دستور في حياتك , وثق ان ربك هيفرج الكرب قريب