المعاملة الجافة
الرسالة السابقة
العنوان : المعاملة الجافة
القسم: #النفسي
الرقم: 83
السؤال:
اختي عنده 18 سنة كانت تعرف ولد عن طريق النت وبعدين حصلت مشاكل بينهم وسابو بعض
المهم ماما عرفت بكده واحنا اهلنا حاجه صعبه جدا ماعندهمش حاجه اسمها حب ولا نعرف ولاد ولا كده
بعد ما عرفت خدت من اختي الفون حصل اللي حصل وهي مخصماها مش بتكلمها
وكمان مش راضيه تخليها تكمل تعليم ختي دلوقتي نفسيتها تعبانه جدا جدا درجه انها حاولت تنتحر و تقطع شرايينها و كانت جادة ربنا ستر ان محصلهاش حاجة
وكل ما بتكلم معاها قولي خلاص انا حياتي ادمرت نا معنديش امل الكلام ده
ماما بتعملها معامله مش كويسه ابدا كل ما احاول اكلم ماما لمشكله تسوء اكتر انا بجد مش عارفه اعمل ايه نا تعبت
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي .
طيب فيه 3 مراحل انتي هتشتغلي عليهم بالتوالي مش بالتوازي , يعني هتخلصي المرحلة الأولي كلها , بعدها تدخلي علي المرحلة التانية , لو المشكلة متحلتش في المرحلة التانية , هتدخلي في المرحلة التالتة . .
المرحلة الأولي : أختك .
المرحلة التانية : والدتك .
المرحلة التالتة : والدك .
-----------------------------------------------------------------------------------
نبدأ بأختك , عندك 5 حاجات اعمليها معاها فورا .
- أولا لازم تقربي منها جدا , يعني تكون اعز صديقة ليها , وتكوني اقرب الناس ليها , هي حاليا في حالة ضعف رهيب , ومحتاجة حد قريب منها , ومحتاجة اللي يسمع منها و تفضفض له , فإنتي ان كنتي بعيدة عنها هي هتكون في ورطة كبيرة
-
قوليلها ان المشكلة هتتحل , وانك هتعملي المستحيل عشان تحلي الموضوع , و طمنيها ان الأزمة هتعدي , وبثي فيها روح الأمل و التفاؤل
-
لازم تراقبيها بشكل مستمر عشان متكررش فكرة الانتحار , لازم تكوني عينك عليها و تبعدي عنها اي شئ ممكن هي تستخدمه عشان تأذي نفسها , و تطمني عليها أول بأول , كتير من اللي بيفكرو في الانتحار بيحاولو فيه بجد , وبيكررو المحاولة , وهي عشان سنها صغير فممكن تتهور و تعمل اي خطوة مجنونة
- خليها تبدأ تتغير من جوة و برة , يعني تتغير من جواها و تقرب من ربنا أكتر , بطريقة جميلة خليها تحافظ علي صلاتها , وعلي قراءة القرآن , وانها تقرب من ربنا و تدعيه كتير .
- و بالتوازي خليها كمان تتغير من برة , يعني مظهرها و سمتها الخارجي يكون افضل , عشان والدتك تقتنع بالفعل انها اتغيرت و انها مش هترجع تعمل كدة تاني , ومش هتتواصل ابدا مع الشاب ده او غيره
-
لما تحسي انها اتحسنت شوية , اتكلمي معها في موضوع الشاب و خدي منها وعد ان ده ميحصلش تاني ابدا , سواء نفس الشاب او اي حد تاني , وان ديه حاجة ممكن تعمل ازمة كبيرة في البيت , وان الأزمة هتكبر و مش هتكون صغيرة , لازم هي تفهم ان اللي حصل غلط , وانه مينفعش يتكرر .
لما تشوفي ان اختك اتحسنت شوية , ابدئي شوفي المرحلة التانية , وهي والدتك . .
----------------------------------------------------------------------------------------
-
في البداية حاولي معاها بالاقناع الهادي , شوفي وقت تكون والدتك رايقة فيه و مش مشغولة ولا متضايقة من حاجة , وتكون اختك مشسامعاكي , سواء برة او نايمة , بحيث متدخلش في الحوار بينكم , ,اتكلمي مع والدتك بالراحة ان اختي اتغيرت تماما , وان هي عرفت غلطتها , وانها بتصلي بانتظام و بتقرأ القرآن , وان انا اتكلمت معاها بالفعل , فارجوكي سامحيها , متتكلميش مع والدتك دلوقتي انها ترجع الدراسة , ابدئي بس بتغيير المعاملة من والدتك ليها .
-
لو لقيتي ان والدتك استجابت علي حسن المعاملة , فممكن بعد فترة, اسبوع مثلا او اسبوعين تتكلمي معاها في انها ترجع الدراسة عشان مستقبلها و عشان متتعقدش و تكره حياتها
-
لو الوالدة رافضة و مصرة علي الرفض , عرفيها انها حاولت تنتحر , وانها جادة , وانها مجنونة و سنها صغير و ممكن تعمل اي حاجة واننا مش هنعرف نراقبها 24 ساعة , فلازم المعاملة ليها تتغير , ونحتويها مش اننا نعاملها بالاسلوب الصعب ده
-
لو لسة مصرة علي موقفها , فلازم تعرفيها انها كدة هتأذيها اكتر , وان المعاملة الجافة و تدمير مستقبلها هيعذبها اكتر , وهيخليها تتجنن و تعمل اي خطوة غير متوقعة , بس لما تتكلمي مع الوالدة تتكلمي بالراحة , مش بالزعيق او باسلوب عنيف
-
لو لسة مش مقتنعة عرفيها انك هتقولي لبابا كحل اخير , و انك هتقولي لبابا انها حاولت تنتحر عشان يعرف ان الموضوع جاد مش هزار و ان حياتها في خطر
في حالة ان الوالدة اقتنعت و بدأت تعاملها كويس و وافقت علي الدراسة , فمتدخليش في المرحلة التالتة , لكن لو لسة مصرة ساعتها هيكون لابد من انك تقولي للوالد . .
---------------------------------------------------------------------------------------------
مرحلة الوالد مرحلة محيرة شوية , لانك لو حاسة ان تعامله مع اختك هيكون اصعب من تعامل الوالدة , وان كونه يعرف بالموضوع فده هيعمل تعميق للأزمة , يبقي الأحسن ميعرفش فعلا , وتفضلي تحاولي مع الوالدة , بالتوازي مع انك تقربي من اختك و تراقبيها . .
لو حاسة ان الوالد متفهم اكتر , وهيتعامل مع اختك بالعقل , يبقي روحي و قوليله اللي حصل بالراحة , طالما الوالدة لسة مصرة علي المعاملة القاسية
و طبعا عرفيه انها اتغيرت و عرفت غلطتها , وانها حاولت تنتحر وانها ممكن جدا تكرر ده , فلازم يتدخل و يحل المشكلة . .
وان شاء الله المشكلة تتحل قبل كدة