أقرأ لحسنين هيكل ؟
الرسالة السابقة
العنوان : أقرا لحسنين هيكل
القسم : #السياسي
الرقم : 12
السؤال :
أنا من محبي القراية في السياسة و في التاريخ وقريت لناس كتير وأهمهم هيكل بس بعدها سمعت تحذيرات كتير من اصحابي انه كداب و مخادع و بيالف نص القصص اللي قايلها انا عن نفسي شايف كتبه جميلة و فيها معلومات و تحليلات ممتازة ومش عارف اكمل قراية ولا اسيبه
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
باعتبار إنك موضحتش انت قصدك علي (محمد حسين هيكل) , الأديب الشهير و مؤلف كتاب حياة محمد صلي الله عليه و سلم , ولا (محمد حسنين هيكل) الصحفي و السياسي المعروف , والإيد اليمين لعبد الناصر , فهافترض ان قصدك علي التاني , لأن مسمعتش في حياتي حد اتهم الاول انه كداب , بينما هيكل التاني عليه الف علامة استفهام
محمد حسنين هيكل صحفي طموح و شاطر, حضر أغلب حروب العصر الحديث بداية من حرب اسرائيل سنة 1948 , اسلوبه هايل في الكتابة والتحليل , وعنده ذاكرة حديدية مذهلة , وشهرته العالمية كبيرة جدا , وقابل نص رؤساء و قادة العالم , وكتبه تترجم لعدد كبير من اللغات . .
ده التعريف اللي مؤيدي و محبي هيكل شايفينه من خلاله . .
بينما خصومه شايفينه اكبر طبال عرفته السياسة المصرية , وإنه كان الذراع الإعلامية لعبد الناصر , ومن أهم مستشاريه , لغاية لما عين وزير للإرشاد (شبه وزير الثقافة) في آخر عهد عبد الناصر , وساب الوزارة لما مات فورا . .
في عهد السادات كان فيه مساحات اتفاق و اختلاف معاه ,لغاية بعد الحرب و بدأ الكلام عن معاهدة سلام مع الكيان الصهيوني , وهنا هيكل مرحمش السادات في الاهرام , وبالتالي سجنه في سجن القلعة مع عشرات السياسيين التانيين
من بعدها هيكل بقي يركز اكتر في الكتب والتحليلات ,سواء لاحداث قديمة زي حرب السويس , او احداث جارية زي الثورة الايرانية و حرب العراق 1991 , و 2003
---------------------------------------------------------------------------
و الحقيقة ان هيكل مش صادق 100 % , يعني فيه نسبة لا بأس بها من كتبه فيها مبالغات , او تفاصيل يستحيل التأكد من صحتها , خاصة لما يحكي عن مقابلات ثنائية فقط , من غير اي شهود , هتعرف منين مدي صدقه . .
يهني هو قابل جواهر لال نهرو , رئيس الوزراء الهندي المشهور , وكتب يمكن 8 صفحات في حوار مباشر معاه ,قابل رضا بهلوي آخر شاه إيراني , و كتب صفحات طويلة في تفاصيل الحوار بينهم , قابل الملك حسين يمكن عشرين مرة , قابل الملك الاسباني السابق خوان كارلوس , قابل مونتجمري القائد البريطاني لمعركة العلمين , بل انه قابل اينشتاين و اتكلم معاه علي اسرائيل . .
فمن غير شهود , تقدر ازاي تتأكد اساسا انه قابل الشخصيات ديه , وانه صادق فيما يقص . .
خاصة انه كرئيس تحرير الاهرام اغلب فترة حكم عبد الناصر , لم نري من الأهرام الا الكذب المستمر , في كل النواحي , وأشهرها "اسقاط 50 طائرة اسرائيلية و القوات المصرية تتقدم صوب تل أبيب " ايام 1967
كمان هيكل لما يتكلم عن عبد الناصر , فهو يتخذه بمثابة تجسيد بشري للحكمة الخالدة التي لا تخطئ , والزعيم العربي الوحيد الذي قهر خطط الأعداء و لم شمل العروبة المتناثرة , و مفيش اي قرار او خطوة اتخذها عبد الناصر طوال سنوات حكمه الـ 18 غلط , يا سلام !!!!
ولما يتكلم عن الإخوان , فطبيعي أن تكون إبرة بوصلته تتجه لنفس الإتجاه الذي اتجهت اليه بوصلة استاذه و حبيبة عبد الناصر , وبالتالي هم الشياطين متجسدين في آدميين . .
ولكن . .
---------------------------------------------------------------------------
بالرغم من ده , فهو لديه قدرة تحليلية فذة بالفعل , و في ربط الاحداث القديمة بالجديدة , ,استقراء الماضي للإجابة عن أسئلة الحاضر , واستشفاف المستقبل , خاصة لما يخرج عن عباءة مصر . .
وإن كان هناك عدد من المبالغات و الكذب في مقابلاته هنا و هناك , فيظل المعني في نفس الإطار العام للأحداث . .
و أنا عن نفسي قرأت أغلب كتبه , واستمتعت بها جدا , مش بس من اسلوبه الجميل فعلا في الكتابة , لكن في تحليله و تشابكات الاحداث المركبة معا
فنصيحتي هي :
اقرأ له , مفيش مشاكل , ولكن ضع ألف علامة استفهام حينما يتكلم عن موضوعين "عبد الناصر" , و"الإخوان" , فهو يرفع الأول لمنزلة تقارن بالأنبياء من الحكمة و الذكاء , ويخفض بالثاني لمنزلة شياطين الجحيم
اقرأ له , ومتكونش سجين كتبه وبس , اقرأ له و لغيره , اقرأ له و انت تضع في بالك انه قد يكون كاذبا في بعض ما يقال , اقرأ له ولا أخذ برأيه في الإخوان او عبد الناصر