العنوان : التعدد و الظلم

القسم: #الاجتماعي

الرقم: 13

السؤال:

 

انا متجوزة من حوالي١٢ سنة وعندي اربع اطفال

 

ومن حوالي ٦ سنين جوزي اتجوز من وحدة تانية وهو خلف منها اتنين تاني دلوقتي ومن ساعت ما اتجوز اتغير ١٨٠ درجة

 

بقي بخيل علي أولاده وسعات كتير بيعمل مشاكل كتير علي ميجيب حجات البيت ومقصر في حقوقي الشرعية خالص لدرجت اني مش عارفة نفسي مطلقة ولا متجوزة ولا اييه

 

مش بيتكلم معانا خالص إلا بسيط يعني مع انوا مش بيبات برة البيت غير مرة واحدة في الاسبوع بس وباقي الايام في البيت مع العيال بس زي الضيف يجي ياكل وينام ويصحي يقعد شوية وبس

 

 غير بقي في ضرب وإهانة علي بعض الأسباب التافه جدا وكمان هو ملهوش كبير هنا في البلد دي اصل انا من بلد تانية وسبت بلدي وجيت بلد بعيده اتجوزت وانا عندي --  سنة ودلوقتي عندي -- سنة وهو أكبر مني ب -- سنة

 

انا بقي عايشة دلوقتي زي الغريبة في البلد دي انا سبت كل حاجة علشانه وهو سبني واتجوز وبيقول ان السبب عندي برود جنسي هو بيقول كده لكن انا الحمد الله طول عمري عايشه معها عمري ما اشتكيت ولا بقول اي حاجة هو كان يعملها فيا

 

 بس انا تعبت اوي اوي انا لوحدي عايشة علشان ولادي طيب انا ينفع اخدهم واطلق ونسافر انا وهما اشتغل واربيهم

 

بس المشكلة انا معنديش بيت تاني لان امي وابويا الله يرحمهم من زمان وفي نفس الوقت خايفه اسيبهم لمرات ابوهم وفي نفس الوقت انا تعبت اوي اوي وحاسة اني مسجونة هنا

 

بالله عليك قولي اعمل ايييه انا كتبت لما قرأت حضرتك ازاي بتحلل كل حاجة بالقرآن الكريم وعلي فكرة انا جوزي ربنا فاتح عليه وهو موظف كمان ومعانا بنات وصبيان

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

لا حول ولا قوة الا بالله . .

 

فيه مشاكل لما بقرأها بحس قد ايه الدنيا بتكون قاسية بشكل متوحش علي البعض , و قد ايه فيه ناس باجساد بشر , لكن بقلوب الذئاب . .

 

و المشكلة ان علي وصفك ده , ان 90 % من خطوات الحل عليه هو مش عليكي , وبالتالي مفيش في ايديكي الا حاجات بسيطة اللي ممكن تتعمل . .

 

فكرة التعدد في حد ذاتها مش ظلم ولا اساءة , والا مكانش الإسلام شرعها . .

 

كمان التعدد مش محتاج يكون فيه سبب او عذر شرعي , عشان فيه قناعة بدأت تنتشر ان لازم يكون فيه سبب قوي للتعدد , والا مينفعش , لأ طبعا مين قال كدة , يجوز شرعا الواحد يتجوز تاني حتي لو مفيش اي سبب او ضرورة . .

 

ولكن . .

 

ولكن القيام بالتعدد , مع الإخلال بشرطه الاساسي وهو "العدل الشامل"هي جريمة و ذنب رهيب , و حسابه هيكون عسير جدا عند ربنا . .

 

لأنك من ناحية  هتظلم الزوجة اللي مش هتعدل معاها , و بتطعنها في قلبها و عاطفتها و بتهين كرامتها بشكل مستمر . .

 

و من ناحية بتدمر اي سلام نفسي عند الأطفال لما يشوفو الميزان الأسري مختل بالشكل المعيب ده , ولما يسمع ويشوف بعينه مشاكل يومية . .

 

ومن ناحية بتشجع كتير من الرجال علي انهم يجيرو علي زوجاتهم بعدم تطبيق العدل في التعدد . .

 

و من ناحية بتنشر رعب من فكرة التعدد عند كتير من الستات , طالما انت عملت المثال السئ ده . .

 

انا مش هتكسف اني اقول ان التعدد حلال و شرعي  , وإنه لا يحتاج الي سبب او ضرورة , حتي لو اتهمتني كل نساء العالم اني متخلف و رجعي  , لأن مفيش حد بيخجل من مبادئ دينه . .

 

لكن هعلي صوتي لأقصي قدر لما امسك في خناق اي رجل بيطبق التعدد من غير ما يطبق العدل الشامل بينهم , لأنه بيعمل فتنة في المجتمع , وظلم لإنسانة وقفت معاك عمرها كله . .

 

والمولي تبارك وتعالي بيحذر من الظلم في التعدد , بالآية رقم 129 في سورة النساء , واللي  كأنها بس نازلة عشان الموقف بتاعك

 

(وَلَن تَسْتَطِيعُوا أَن تَعْدِلُوا بَيْنَ النِّسَاءِ وَلَوْ حَرَصْتُمْ ۖ فَلَا تَمِيلُوا كُلَّ الْمَيْلِ فَتَذَرُوهَا كَالْمُعَلَّقَةِ ۚ وَإِن تُصْلِحُوا وَتَتَّقُوا فَإِنَّ اللَّهَ كَانَ غَفُورًا رَّحِيمًا)

 

الجزء الأول من الآية , هو ما يفهمه السفهاء علي هواهم , لما يقولو إن ربنا سبحانه و تعالي بيؤكد ان مفيش عدل مطلق ممكن يتم تطبيقه في حالة التعدد , وبالتالي اللي باعمله مش غلط . .

 

وطبعا ده كلام فاضي , لأن تفسير هذه الآية في عدم المقدرة علي العدل , هو عن الحب القلبي , مش عن المساواة في المعاملات او النواحي المادية . .

 

في تفسير الطبري  يقول  : لن تطيقوا، أيها الرجال، أن تسوُّوا بين نسائكم وأزواجكم في حُبِّهن بقلوبكم

 

وبالتالي أي زوج يمارس التعدد , هو مطلوب ان يقوم بعمل مساواة في كل الأمور المادية , وفي اسلوب التعامل , وفي عدد الأيام اللي يقضيها , وفي نوع المسكن ,وفي الانفاق علي اولاده  و هكذا . .

 

لكن الشئ اللي ممكن الشخص يعجز عن التحكم فيه هو الحب القلبي لهن . .

 

و في الحديث عن الرسول صلي الله عليه وسلم , والذي رواه بن حنبل , وصححه النسائي (عن عائشة، قالت: كان رسول الله صلى الله عليه وسلم يقسم بين نسائه فيعدل، ثم يقول: اللهم هذا فعلي فيما أملك، فلا تلمني فيما تملك ولا أملك.)

 

وكأن الرسول صلي الله عليه و سلم , يعلم ان القلوب مفيش سلطان عليها , لكن التصرف و المعاملة و الانفاق فيه طبعا سيطرة عليها , وبالتالي لو استسلم الرجل لهواه , فهيدخل في مساحة الظلم فورا . .

 

 

في وسط الآية (فَلَا تَمِيلُوا كُلَّ الْمَيْلِ فَتَذَرُوهَا كَالْمُعَلَّقَةِ) وهو التحذير من رب العالمين , ان الزوج لما يميل بفعله و تصرفاته و معاملته و انفاقه و عدد لياليه , مع واحدة غير التانية  , فهو يتركها (كَالْمُعَلَّقَةِ) , كما وصف الربيع بن أنس (لا مطلقة ولا ذات بعل) يعني لا هي متجوزة ولا مطلقة . .

 

و بالتالي اللي بيعمله هو جريمة مش قليلة , والتأخر في عدل الميزان هو بداية خراب البيت والعياذ بالله . . 

 

---------------------------------------------------------------------------

 

طب و الحل   ؟ ؟

 

زي ما قلنا ان أغلب مفاتيح الحل في ايده هو  , باعتبار ان المشكلة من صنعه , لكن خلينا نقول عدد من النقاط اللي ممكن يكون فيها الحل لو تم تطبيقها . .

 

 

• طبعا وارد من البداية يكون رغبته في التعدد لشئ مش متعلق بيكي , ووارد كمان يكون فيه نسبة من المسؤولية حتي لو 10 % , فممكن تبدأي بإنك تحاولي تشوفي ايه اللي ممكن تغيريه و تطوريه في نفسك . .

 

---------------------------------------------------------------------------

 

 

• بالنسلة لنقطة البرود , واللي مكنتش هافتحها لولا ان سيرتها اتجابت في الرسالة . .

 

---------------------------------------------------------------------------

 

 

• ماذا عن المعاملة , متكلمناش عليها . .

 

---------------------------------------------------------------------------

 

 

• انتي قلتي ان ملوش كبير , طب مفيش في عيلته حد يكلمه ؟ ؟ يعني ملوش عمة ولا اخت كبيرة ولا حد يقوله كلمة , و ياريت تكون ست . .

 

---------------------------------------------------------------------------