العنوان : معايير الرحمة

القسم: #النفسي

الرقم: 104

السؤال:

انا عارفة انكم مش حتشوفوا ان المشكلة تافهة

انا بحب الحيوانات جدا  وبحب القطط بشكل هستيري  ومعايا ٣ قطط

حصل قبل رمضان ان جارتي كنت عطتها قطة من ولاد قطتى وفجاءة القطه دي تعبت وماتت وللاسف انا كنت ف اواخر ايامها بحتك بيها دايما وبشكل مباشر

والمرض اللى عندها معدى ومميت للقطط لان نسبة الشفا فية قليله جدا ما عدا القطط اللى بتكون واخده تطعيمات

المهم القطة دي لما ماتت انا حزينة جدا عليها وللاسف مش حاسة بفرحة شهر رمضان من كتر ما انا مش قادرة انساها

وفجاءة افتكرت ان المرض بتاعها معدى فبدات اتوتر واخاف على القطط بتاعتى واروح لدكاترة بيطرين عشان اطمن واغلبهم طمنى ان طالما هما واخدين تحصين ف مفيش قلق

انا دلوقتي حاسة ان خايفة حدا طول الوقت بفكر فيهم طول الوقت بدور وراهم لو في سوري ترجيع عندهم او اي عارض غير طبيعي

ومن كتر الخوف تقريبا مش بنام كويس وبفكر اروح لدكتور نفسي مش عارفة اعمل ايه لاول مرة افكر انى اشوف حد بيحب القطط واديهوله يعتنى بيهم بس خوفت انى لما الاقى الحد دا يزهق منهم ويرميهم

ومقدرش اسيبهم ف الشارع لان مصيرهم اكيد حيكون صعب

محتاجة رأيكم جدا  واسفه جدا على الاطالة بجد

انا كمان انسه وبدرس دراسات عليا والحمدلله عندي اخوات و اصحاب كتير وشايفه نفسي محبوبة حسب كلام الناس

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

اهلا بيكي . .

مشكلة مش تافهة ولا حاجة , بالعكس اللي بينظر لها نظرة دونية هو الشخص اللي محتاج يعمل اعادة تقييم لمعايير الرحمة في قلبه . .

أي شخص يقارن بين الرحمة بالحيوان , وحاجات تانية و يتناول أمر الحيوانات باعتبارها "شئ هايف" هو إنسان نزعت الرحمة من قلبه , وبيخالف النهج النبوي في التعامل مع الكائنات . .

وجود الرحمة في قلبك علامة ايجابية , ومتخليش اي حد يتهمك "بالسطحية" , او "الهيافة" , لأن مفيش اي تعارض بين تناول القضايا المهمة , ان يكون فيه إنسانية في قلب الإنسان . .

بس بالتوازي , خليني اقولك نصيحة مهمة . .

من الذكاء ان الشخص ميصنعش عنده تعلق غير طبيعي مع اي شئ في العالم , سواء انسان او كائن تاني . . .

الحب بمقداره الطبيعي – سواء لإنسان أو حيوان – هو اللي بيصنع جو من الألفة و الاهتمام و الرعاية , لكن الحب بالمقدار الغير سليم , هو اللي يجعل الشخص متعلق تعلق غير طبيعي مع الطرف التاني , سواء ابن او زوج او اب او ام , او حتي كائن حي تاني زي القطط . .

ليه بنقول الكلام ده ؟

لأن طبيعة حياتنا علي كوكب الأرض انها مؤقتة أساسا , وإن خلال مقدار من السنين , هنبدأ بفقد أحبائنا تدريجيا , وهي سنة الحياة اللي لا بد منها , واللي تسري علي الجميع . . .

و بالتالي من الطبيعي ان الشخص يحزن بالمقدار المعقول علي صديق او قريب اتوفي او سافر , او حتي هجره و سابه , لكن مش من الطبيعي ان يكون فيه تعلق مرضي بالشخص ده , لدرجة ان حياة الإنسان تتدمر و تنهار زي ما بنشوف أحيانا . .

و اللي يتقال علي الإنسان , أكيد يتقال علي أي كائن حي بيعيش معانا . .

فانتهزي فرصة الموقف ده , عشان يعودك علي التعامل بمبدأ "أحبب حبيبك هونا ما" , يعني اعملي ضبط في كمية الحب و التعلق , سواء للقطط او حتي للبشر . .

انا لا أدعو ان الشخص يقلل من حبه لأسرته او أصدقاءه , لكن يكون بالتناول الصحيح , وان الشخص يكون من جواه مؤمن إن كل اللي حوالينا هم أمانة من المولي تبارك و تعالي, و هو يستردها في الوقت الذي يريده , فلو كان تعلقنا بأي إنسان او حيوان أكتر من المطلوب , هنوصل لمرحلة الجزع او الانهيار او الإكتئاب الحاد . .

محدش فينا هيحب زوجته زي ما فعل الرسول صلي الله عليه و سلم مع السيدة خديجة , ولما هي ماتت هو حزن حُزن رهيب , الا انه قدر يتخطي الحزن ده , ويمارس حياته و يستمر في مسار دعوته اللي أمره بيه رب العالمين . .

و بالتالي لازم تبدأي تمرني نفسك علي التعامل السليم مع المواقف الصعبة اللي زي الموقف اللي مريتي بيه , كون ان رمضان يضيع منك , او انك تشعري بالحزن المستمر , او تنكدي علي أسرتك اللي أكيد اتضايقو جدا لحزنك , ده تصرف غير سليم , ولو كنا هنقبله لمدة محدودة  ( أسبوع مثلا) فهيكون من غير الطبيعي انه يستمر لفترة طويلة . .

أيوة شعور الرحمة و الإنسانية هو شئ مطلوب و سليم , لكن بالمقدار الطبيعي اللي ميعملش تدمير لحياتنا بالكامل . .

----------------------------------------------------------------------------------

طب الحل ايه ؟ ؟

لازم تعملي 3 حاجات بالتوازي . .

• أولا ابدئي اتدربي علي موازنة مشاعرك مع القطط او غيرها , مش عايزك يقل حبك او رحمتك ليهم , لكن عايزك تعمليها بالمقدار السليم , اللي ميعملش تأثير سلبي علي حياتك و حياة اللي حواليكي , واللي هما متأثرين بيكي . . مهم انك تعملي توازن في المشاعر بحيث لكل شئ مقداره السليم

•  

• ثانيا شوفي حل مناسب للتخلص منهم من غير ما يكون فيه أذي ليهم , كتير من جروبات الفيس موجودة للي بيقتنو قطط منزلية , وأظن لو عرضتيهم للتبني مجانا , هتلاقي أكتر من حد مهتم , خاصة ان هما تربية منزلية و متعودين علي النضافة , لو دورتي هتلاقي أكيد

•  

• بالتوازي مع ده , ممكن متعمليش تجربة اقتناء حيوان أليف في الفترة الحالية , أيوة اقتناء حيوان أليف في البيت بيكون ليه مميزات و إيجابيات علي الحالة النفسية بشكل عام , بس عندك هيصنع تكرار للمشكلة , لأنك لسة مش قادرة تتحكمي في مشاعرك كويس , فاقتناء قطط مرة تانية , هيخليكي متعلقة بيها بشكل مبالغ فيه , وده اللي هيأثر عليكي سلبا مرة تانية

الرسالة التالية