العنوان : ضجيج الأفكار

القسم: #النفسي

الرقم: 107

السؤال:

السلام علیکم.. اكيد اي حد بيتطور بس ف حاجة فيا انا بكرهها..

ببساطة عاوزة ابقى رزينة

انا عمري 19 سنة وعفوية بشكل بشع.. ساعات بحسني هبلة.. عاوزة يبقى ليا شخصية قوية وكيان مختلف عاوزة ابقى فخورة بنفسي بس من غير غرور

انا لما بعد مع نفسي أو اتكلم جوايا كدا وفكر وابقى لوحدي بحس اني عندي طاقة لا منتهية

بس لما أخرج من بيتي وابدأ اختلط بأصحاب بحس قد ايه ان شخصيتي متدنية جانبهم.. لازم أخطأ كل يوم تقريبا

انا بكتب يعني بعرف استخدم اللغة ف وصف اللي جوايا أو قول حكمة أو ممكن آلف شعر.. بحس ف الوقت دا أن دا العالم بتاعي بس لما ببقى ف الواقعة بحس اني صغيرة مش بالمعنى العادي دا لا يعني شيء عادي لكن طبعا عارفة اني ليا قيمة بس نفسي اتطورت وابقى احسن نفسي ابقي احسن ف دراستي نفسي حياتي تتشقلب معرفش ازاي

انا مش مش راضية عن حياتي...بس حاسة انها ممكن تبقى احسن واني اقدر ابقى احسن بس مش عارفة

بس ف فجوة حصلت ف حياتي للصدق برضو مخليني كارهة كل حاجة مش عارفة أنظم نفسي

او بسببها عاوزة اكون أقوى وأفضل واحسن.. فقدت شخص ف حياتي يعني كان مهم . المشكلة اني مش عارفة احدد المشاكل انا حاسة اني جوايا من المشاكل لا تعد ولا تحصى لدرجة بتخليني عاوزة مغلطتش بس مفيش حد كدا

انا حياتي بسيطة..زي ما قولت حصلت فجوة ف حياتي عموما مش متأثرة بيها أوي.. عندي أصحاب كويسين فيهم بعض العيوب اللي مش ممكن حد يتقبلها وف منهم اللي بالنسبالي عظماء حتى بعيوبهم دي.. راضية عن حياتي كليا بمعنى الكلمة بكل حاجة فيها.. بس انا مش راضية عن نفسي لاني شخصية بتتأثر بكل حاجة حواليها اكيد بنتقي الكويس أو بحاول

بس يمكن الخطأ اني بعمل حاجات ممكن تخلى غيري يستخف بيا لاني تصرفاتي طفولية شوية وعفوية

لما بكتب يعني باللغة العربية وابحر مع كلامي ووصفي بحس ان دا العالم اللي مفروض اكون فيه لاني بره العالم دا بحس قد ايه انا لا شيء بره بس بحاول أثق ف نفسى اكتر بس

مع العلم اني انطوائية جدا و صديقاتي قليلين  بس بحب الكتابة جدا جدا وكمان بحب الرسم وكنت موهوبة فيه بس مهتمتش اني انميه غير اني صوتي حلو كمان بس يعني مش متقبلة فكرة اني اغني ممكن بغني مع نفسي كدا ف البيت بس للعلم انا غنيت ف حفلة ف المدرسة قبل كدا ف ابتدائي

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

و عليكم السلام و رحمة الله

اهلا بيكي . .

مشكلتك مش من المشاكل الصعبة , بس محتاجة منك شوية مجهود و تركيز , وعدد من القناعات اللي تتغير من عندك  , عشان تكوني قادرة علي تخطي الأزمة و حلها . .

أول حاجة محتاجة تركزي عليها هي الهدوء في التعامل و عدم الضغط علي أعصابك , لأن الضغط علي الأعصاب بيعمل فرملة لاي مجهود حقيقي للتقدم , وبيكون أكبر عائق ان الشخص يطور نفسه او يحقق نجاح , طول ما انتي بتلهبي ظهر نفسك بالجلد و بالتعنيف , هتظلي في نفس المكان للأبد

فلابد بداية انك تتعاملي بنوع من الراحة و الهدوء مع رغبتك في التطور و التقدم , وانك تنتهجي الطريق العادي و التدريجي و الهادي في التعامل مع المشاكل و حلها , ومتحطيش في بالك انك هتقدري تنجحي في حياتك بين يوم و ليلة  , طبيعة الأمور انها بتاخد وقت كافي

الحاجة اللي بعدها انك لازم تزرعي جواكي الإحساس بالتقدير الذاتي  , وان بالفعل فيه مقدار من النجاح حققتيه , لازام تحاربي جواكي الإحساس بالتدني , و تؤمني بنفسك أكتر  , لأنك من جواكي لو حسيتي باحتقار نفسك او ان انتي اقل مما ينبغي , ده هيدمر السلام النفسي اللي جواكي , وهيجعلك عايشة في احباط مستمر , باعتبار ان كدة كدة خربانة  , بينما لو آمنتي بنفسك أكتر , وعرفتي انك بالفعل حققتي نسبة من النجاح , هتتشجعي علي الاستمرار

حاولي تحققي حالة نجاح في شئ انتي بتحبيه , وطالما انتي ذكرتي انك موهوبة في الكتابة , فحاولي تقتطعي من وقتك بشكل مستمر , عشان تستخدمي الكتابة في التنفيس عن مشاعرك و افكارك , سواء خواطر او روايات او تحليلات او شعر او غيرها , و حتي لو عايزة ممكن تعملي صفحة علي الفيسبوك و تنشري عليها بعض من الكتابات ديه سواء لو خليتي الصفحة باسمك او من غير اسمك (لو عايزة خصوصية)

فكرة استخدام الكتابة للتنفيس عن افكارك و مشاعرك هتساعدك بشكل كبير في صناعة احساس بالهدوء و الاستقرار و كمان التفوق و النجاح , ثقي ان الكتابة بتكون من افضل اساليب الراحة النفسية , ولو كنتي قرأتي للدكتور احمد خالد توفيق – رحمه الله – فهو وصف ازاي ان الكتابة ساعدته جدا في صناعة هدوء و استقرار نفسي جواه , وفرغت منه كل التوتر و العصبية اللي كانت عنده , وبتعمل راحة كبيرة لضجيج الأفكار عند الكاتب

كمان انتي محتاجة تعملي نوع من التخطيط لحياتك , يعني تمسكي ورقة و قلم , وتكتبي مميزاتك و نقاط قوتك في صفحة , وعيوبك و نقاط ضعفك في صفحة تانية , بعدها تمسكي الصفحة الأولي و تشوفي ازاي تستغلي النقاط اللي فيها , وتمسكي الصفحة التانية و تحددي ازاي تتغلبي علي نقطة نقطة فيها بالتدريج , مش بسرعة ولا استعجال

كمان حطي في بالك ان السعي للكمال هيوقفك و يعيقك و مش هيخليكي تقدري توصلي لاي شئ , لما تحطي في بالك انك لازم تصلي لنسبة 100 % من الكفاءة , مش هتقدري توصلي ولا حتي لـ 50 % , لازم تؤمني بالضعف الإنساني , وتعرفي ان وجود عيوب عندنا هو ما يجعلنا بشر , وان المهم هو الاستمرار في محاولة اصلاحها , مش التخلص منها تماما

لازم تتوقفي عن مراقبة نفسك بالشكل المبالغ فيه , وكمان في انك "تكهربي" نفسك كل ما تعملي غلطة معينة  , ده مش صح و لا يندرج تحت نوعية "النفس اللوامة" , الصح ان الإنسان لما يعمل خطا انه يلوم نفسه مقدار معين بعدها يقوم عشان يصلح اللي عمله , لكن ان الشخص يعيش نفسه طول حياته في تأنيب و تعذيب و توتر و قلق , ده من ناحية هيدمر استقرارك النفسي , ومن ناحية مش هيخليكي تحققي اي مقدار من النجاح , لازم تتعاملي بهدوء و توازن مع الأمر

أخيرا يكون عندك فن تحديد : (ايه يتقال فين ) , و تتكلمي مع كل شخص باللي هيقدر يفهمه و يستوعبه , فلما تستخدي اللغة العربية الفصحي مع ناس هيتعاملو مع الأمر بهزار و سخرية , فانتي كدة بتضعي نفسك في موقف محرج علي الفاضي , والصح ان : لكل مقام مقال , وانك تستخدمي في كل مكان الشئ المناس له

الرسالة التالية