طب يعني هو مسلسل القتل فينا بشكل مستمر هيخلص امتي ؟ ولا مش هيخلص ابدا

يعني احنا معاكم في البلد في خيرها و شرها . ونزلت الـ 18 يوم في التحرير و اتضربت بالخرطوش و عيني كانت هتروح في محمد محمود

 

كل كام شهر لازم نشوف مصيبة زي كدة لما تعبنا فعلا في البلد ديه لو نطول نسافر اوروبا ولا كندا هنسافر بس اديك شايف مفيش زفت فيز للمصريين مسلمين ولا مسيحيين . وانا قدمت علي فرنسا من شهرين و اترفضت ولو كنت اتقبلت كنت هغور ومش معتبها تاني

طب بس نعرف مين اللي بيعمل كدة يعني داعش ولا اخوان ولا سلفيين ولا امن دولة ولا انهي خـ** فيهم , عرفونا بس واحنا هنتعامل معاهم

انشر يا ادمن من غير اسمي بليز

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

خالص عزائي ليك و لملايين الاقباط اللي في مصر . شئ مؤلم والله اللي بنشوفه .

 

مش لاقي اي كلمات للتعبير عن حزني او عزائي او مواساتي , خلاص الكلمات فقدت معناها و تأثيرها , وبقت حروف جوفاء لا تغني ولا تسمن من جوع .

انا مش هعزيكم , انا هاعزي نفسي علي بلدي اللي راحت , واللي اتحولت من حلم جميل كنا شايفينه في 2011 , لكابوس مرعب كابس علي نفس الجميع في مصر , باستثناء المطبلين للنظام .

 

النظام اللي قتل الشيخ عماد عفت في مجلس الوزراء , وهو نفسه اللي قتل مينا دانيال بدهس الدبابات في ماسبيرو , وهو نفسه اللي عري ست البنات في التحرير , وهو نفسه اللي عمل كشف عذرية لسميرة ابراهيم , وهو نفسه اللي اعتقل الالاف من غير حساب من 2011 ,وهو نفسه اللي عمل مذبحة جماعية في رابعة , وهو نفسه اللي حرق المعتقلين في عربية الترحيلات .

 

عدونا واحد و احنا عارفينه , وهو السبب المباشر و غير المباشر لكل مشاكلنا من 8 سنين .

​

----------------------------------------------------------------------------

 

نوصل للسؤال المهم بتاعك .

 

هو صحيح مين بيقتل الأقباط ؟

يعني مين اللي يخطط و يشتري سلاح و ينفذ وحاطط هدف معين اثارة ذعر الأقباط في مصر , وسفك دمهم .

الاجابة مش سهلة , والحقيقة ان احنا كفريق الصفحة , مش عارفين مين .

 

اسهل حاجة اننا نقول اي حل و خلاص , اسهل حاجة نقول أمن الدولة , او داعش , او الاخوان ,او القاعدة , او اي رأي بيتقال و خلاص .

و خد بالك ان دايما الشخص اللي حصيلته المعلوماتية قليلة , وخبرته ضعيفة ,و ثقافته ضحلة , دايما بتلاقيه واثق من نفسه , و عنده اجابة محددة وواضحة , وبيصر عليها و يجادل بمنتهي القوة .

 

و دايما الشخص واسع الأفق , اللي بيقرأ كتير ,و عنده اطلاع كبير , دايما بتلاقي عنده شوية شك في اللي بيقوله , ونوع من عدم اليقين , خاصة في الامور الخلافية اللي زي ديه .

لأن مش من الذكاء ان الشخص يختار رأي معين و يصر عليه و يحارب دفاعا عنه , وهو معندوش دليل قطعي و صارم عليه .

بل من الحكمة ان الشخص يضع كل الخيارات علي جنب , ويعمل نوع من الترجيحات بناء علي المعلومات المتوافرة , والاستنتاجات اللي بتؤدي لنتايج , قد تكون صحيحة او لا .

 

فلما انت تلاقي شخص ماسك رأي من الآراء و مصر عليه بتعصب أعمي , اعرف انه غالبا مش فاهم حاجة , وانه متمسك بالرأي ده لسبب "هوائي" , مش بشكل منطقي .

بل الصح ان الشخص يعمل استعراض للخيارات المتاحة , و يبدأ يحلل كل واحد فيهم , ويشوف بناء علي المعلومات و القناعات و الاستنتاجات المنطقية , مين فيهم اللي ممكن يكون عمل ده .

 

و حتي لما نوصل لقرار , مش هيكون قرار يقيني و اكيد , قد ما هو علي سبيل "الاحتمال الاكبر" , ويكون برضه في بالنا ان باقي الاحتمالات واردة , بس ضعيفة شوية .

ويكون الشخص نفسه علي استعداد انه يعمل اعادة تقييم للخيارات ديه تاني لو توافر معلومات جديدة , او فيه مناقشة سليمة وحيادية مع شخص بيفهم .

 

احنا بس بنحاول نطبق الطريقة العلمية و السليمة في التفكير بشكل عام , مش بس في سؤالنا دلوقتي , بل في اي موضوع تاني في حياتنا

 

تعالي نمسك الخيارات اللي عندنا , ونحللها و نشوف مين فيهم الارجح . .

 

ممكن يكون اللي عمل ده واحد من تلاتة . .

 

---------------------------------------------------------------------------

 

نبدأ بالإخوان .

بعد 30 يونيو , بقي فيه "اسهال" من ذكر الإخوان في كل المصايب في الكون , بداية من سد فتحات المجاري في اسكندرية , وانتهاء بأخو اوباما اللي هو اخوان .

 

و الحقيقة ان غباء النظام في "استهلاك" ذكر الاخوان في كل شئ , جعل رجل الشارع العادي اللي هو حتي ميعرفش حاجة في السياسة , او اللي هو معادي للفكر الاسلامي السياسي يقول : هو خلاص مفيش شماعة الا الاخوان ؟ ؟

و كتر استخدام لفظ الإخوان من اعلام النظام في "تلبيسهم" المصايب , جعل المشاكل الحقيقية اللي عملوها الاخوان قبل كدة , جعلها تذوب وسط الكمية الرهيبة من العبط اللي اتقال عليهم .

 

يعني مفيش حد عمل غسيل لسمعة الاخوان , زي الاعلام الاحمق للنظام المصري , من كتر ما جاب سيرتهم في حاجات لا تصدق .

و ان كان فيه بالفعل العديد من المشاكل في اداء جماعة الاخوان , فالعنف مش من ضمنها .

يعني ان كان اغلب دول اوروبا و امريكا بتعطي حق اللجوء السياسي لافراد الاخوان , يبقي معقولة هيسيبو افراد مقتنعين بنهج العنف والقتل و الاغتيال , معقولة هيخلوهم مقيمين في بلادهم ؟ ؟

 

ان كان لدي السوريين , بيتم منع اللجوء عن اللي بيثبت تواجده في فصائل الجيش الحر او جيش النظام , يبقي ازاي هيخلو الاخوان لاجئين ان مكانوش عارفين يقينا ان العنف مش سبيلهم .

وخد بالك ان فيه كتير من الخلط بين الاخوان و جماعات تانية مش تابعة ليهم , اسهل حاجة اننا نرمي البيض كله في سلة واحدة , ونقول علي اي واحد ملتحي و مكشر انه اخوان , لكن ديه سذاجة سياسية ,بل ان اغلب افراد الاخوان اصلا مش بيربو دقنهم .

هل الاخوان عملوها ؟ وارد , زي ما قلنا مفيش حاجة في السياسة قطعية , لكن الاحتمال قليل , لأن هما في عداء مع السيسي مش مع الاقباط .

 

و هما عارفين ان سفك دم الاقباط هيصنع عداوات اكبر من الشعب المصري ليهم , وهما يهمهم ان سهام العداء للشعب المصري تكون ضد السيسي مش ليهم

ان كان للإخوان أخطاء فهي في الجانب السياسي و التخطيطي و التنفيذي , وشوية العك اللي تم من بعد تنحي مبارك و لغاية دلوقتي , لكن القتل و الدم مش في فكر الاخوان , من وقت انتهاء التنظيم الخاص في الستينات .

 

و ارجو متلغبطش بين الاخوان و الجهاد او التكفير او الجماعة الاسلامية , اللي قتل السادات و اللي عمل حوادث الارهاب في التسعينات واللي في سينا حاليا جماعات مختلفة و متفرقة

 

-----------------------------------------------------------------------------

 

ماذا عن داعش ؟

ممكن فعلا , والاحتمال مش قليل .

 

مشكلة داعش ان اصلا يصعب التنبؤ بخطواتهم اللي ممكن يعملوها , خاصة بعد الضربات القاصمة ليهم في سوريا و العراق و ليبيا .

هما عملو استعداء ليهم من الجميع , سواء جيش بشار او الجيش الحر او الاكراد او الاتراك او الشيعة او الروس او الجيش العراقي او حتي كتير من الفصائل الاسلامية المقاتلة في سوريا , بالفعل مشفتش حد كان ليه عداء مستمر مع الجميع بالشكل ده .

 

هل داعش صناعة امريكية ؟ ؟ وارد , بس اغلب الظن انها مش صناعة امريكية , لكن تم توجيهها لاحقا , وفيه فرق طفيف بين ده و ده

الامريكان عندهم شوية خبرة ازاي يسيطرو علي بعض الفصائل , من ايام افغانستان , ومن يوم ما حصل تحولات كبيرة في القوات المقاتلة للسوفييت في كابول , وتم عمل نوع من الترويض لبعض القيادات الافغانية زي برهان الدين رباني و عبد رب الرسول سياف و غيرهم . .

 

داعش يهمها اثارة الفوضي , يهمها اثارة المشاكل , يهمها رؤية الدماء , و ديه ازمة نفسية عميقة عندهم .

وللأسف مش قادرين ننسي جريمة 21 قبطي في ربيع 2015 في ليبيا , علي يد داعش , واللي تم تصويرها بشكل همجي و فج , كاستمرار لمسلسل الدعاية السوداء ليهم .

 

و مش مستغرب انهم يستحلو دماء الاقباط ,يعني ان كانو اصلا مكفرين نص الشعب المصري و مكفرين اغلب الفصائل الاسلامية , فمش هنستغرب من موقفهم من الاقباط .

فانت متحسش انه اضطهاد ليكو ولا حاجة , لو تابعت اللي حصل في حلب في صيف وخريف 2013 , هتعرف انهم سفكو كميات لا تصدق من دماء المسلمين هناك , هي مأساة كبيرة بالفعل في عقولهم .

 

ونفسي بس يقرأو الآية 32 من سورة المائدة , لما ربنا قال (أَنَّهُ مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا).

ربنا ذكر علي قتل النفس , مش المسلم , يعني اصلا محرم باي طريقة من الطرق قتل اي انسان , الا قصاص , او محتل , غير كدة هي همجية و فوضي .

 

و صدقني احنا كمسلمين بنعاني منهم اكتر ما انتو بتعانو , كفاية بس انهم رافعين راية ديننا اللي بنؤمن بيه , وانهم بيعملو اكبر ايذاء نفسي لينا باللي بيعملوه فيكم و في غيركم .

هل داعش اللي عملتها ؟ ؟ وارد , زي ما قلتلك مفيش شئ مؤكد نقدر نحسمه , احتمال هما بالفعل واحتمال غيرهم

 

---------------------------------------------------------------------------

 

هل هي صنيعة مخابراتية , من النظام ؟ ؟

الرأي ده بالتحديد من اكتر الاراء اللي فيها جدال كبير في الشارع المصري .

بين اللي مؤمن قطعا و يقينا ان ديه صناعة مخابراتية , ومش مستعد يناقش اي رأي تاني .

و بين اللي شايف ان الكلام ده هو التطبيق المباشر لعقدة المؤامرة , وان بطلو عبط يا جماعة , و متعيشوش في وهم من صناعة خيالكم .

 

و نأكد تاني ان مش هنعرف نحسم شئ من غير اي دليل , وان ده وارد و ده وارد .

وارد بالفعل يكون اللي حصل صناعة مخابراتية بامتياز , و وارد يكون النظام ملوش يد فيها و الكلام ده في سياق عقدة المؤامرة .

مشكلة انك تفكر باسلوب منطقي و عقلاني انك رغما عنك مش هتعرف تقف علي ارض ثابتة , وهيكون كل كلامك في نطاق الاحتمالات .

 

طب تعالي نمسك النقط اللي بتأيد الفكرة الاولي , ان اللي النظام المصري ليه يد في الجريمة .

 

1. ان ديه مش اول مرة , حادث تفجير كنيسة القديسين واللي كان قبل ثورة يناير باسابيع قليلة , ثبت بشكل قاطع ان ده كان بتخطيط العادلي

2. ان ده دأب اي حاكم ظالم و فاشل , انه يشعل البلد بحاجات تشغل الناس و تلهيهم عن المطالبة بالحد الادني من مقومات الحياة

3. ان السيسي يهمه ان اوروبا و امريكا يشوفو نار الارهاب و هي بتكوي المسيحيين في بلاده , فتزيد قناعتهم ان وجوده ضروري و مهم عشان يقضي علي الارهاب الاسلامي , خاصة ان السيسي كان في برلين مع ميركل وقت وقوع الحادث , ومتنساش ان ميركل هي رئيسة الحزب الديمقراطي المسيحي CDU , وان ترامب من الحزب الجمهوري اللي اكتر تدين بطبعه , وبالتالي اللهيب اللي بيصيب مسيحيي مصر , هيكون ليه اصداء عندهم

 

4. ان بقي فيه بالفعل ضغوط علي العواصم الاوروبية لاعادة تقييم تعاملهم مع كل حكام الشرق الاوسط بعد مأساة خاشقجي , علي يد بن سلمان , فالسيسي بيثبت حكمه بنفس الاسلوب التقليدي القديم

5. ان الشعب يؤمن ان لسة البلاد محتاجة قبضة من حديد , والخلفية العسكرية , و حالة الطوارئ و الانتهاك المستمر لكل انواع المعارضة .

6. ان الحادثة ديه اتكررت السنة اللي فاتت بنفس السيناريو , ومن وقتها متمش تحقيق جاد او القبض علي الجناة , فواضح انها حاجة مطبوخة من عندهم اصلا

 

 

وفي نفس الوقت فيه نقاط تانية تتعارض تماما مع فكرة ان النظام المصري متسبب في المأساة ديه .

 

1. انه بيثبت للشارع المصري انه فاشل امنيا , يعني هو مسك الحكم من 5 سنين , معقولة مش عارف يقضي علي الارهاب كل الفترة ديه ؟

2. انه بيجعل العواصم الاوروبية يؤمنو انه مش قد المسؤولية , وانه مش عارف يتصرف مع المشاكل المصرية , فممكن يفكرو في استبداله بسهولة

3. انه بيؤذي بشكل غير محدود اهم عنصرين للاقتصاد المصري : السياحة و الاستثمار , في الوقت اللي اصلا الاقتصاد مطحون من كل الجهات

4. ان ده ممكن يعمل احتقان اكتر للشعب , اللي اصلا علي اخره من الغلاء و المشاكل , وده ممكن يعمل تعبئة للشارع ضد النظام , زي اللي حصل في القديسين في 2010

5. ان يصعب تصور فكرة تكرار حوادث بالشكل ده والنظام ليه يد فيها , من غير ما يتم كشف اي خيط ليها او فضح حد من المتورطين فيها

 

---------------------------------------------------------------------------

 

وبالتالي احنا مش قادرين نحسم علامة الاستفهام ديه , ولا نجاوب علي سؤالك , ولا نحدد مين بالفعل اللي ايده منغمسة في دماء الاقباط .

الاحتمالات واردة , ومفيش تأكيد , و مع ان سهل علينا اننا نقول اي اجابة و نأكد عليها , بس كدة هنكون بنشتغلك و بنضحك عليك , الاجابة ببساطة : ان مفيش اجابة واضحة .

 

بس يكفي اننا فتحنا ليك الطريق انك تفكر في الخيارات المختلفة , وانك عرفت طريقة التفكير بشكل منهجي وموضوعي في اي علامة استفهام سياسية , بدل التمسك الغير سليم برأي واحد من غير نقاش .

 

الوطن كله بيعاني , مسلمين و أقباط , وكلنا متساويين في ان ملناش تمن عند النظام , وان آخر شئ الحكومة هتفكر فيها هي المواطن

ربنا يرحمنا كلنا

​