من ساعة ما شفت ماتش السبت اللي فات وانا مش عارف افرح للي عمله الالتراس , ولا اتضايق عشان الاسلوب والكلام الزبالة اللي اتقال انهي فيهم صح

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

لا يمكن فصل اللي حصل يوم السبت اللي فات (22 سبتمبر) عن باقي الخيوط السياسية و الرياضية و الاقتصادية في مصر , واللي تتشابك مع بعض بشكل لا يمكن تجاهله . .

 

اي تقييم للسباب البذئ لوالدة تركي آل الشيخ , بعيدا عن اللي بيحصل في مصر من شهور طويلة , هيكون تقييم غير سليم , الأمر ظاهره مجرد اساءات لمستثمر اجنبي في مصر , لكن حقيقته أكثر أتساعا , و أعمق أثرا . .

 

اللي حصل ان جماهير الأهلي رددت هتافات مسيئة ضد "تركي آل الشيخ" في مباراة الأهلي مع فريق "حرية كونكاري" الغيني في ربع نهائي دوري ابطال افريقيا , واللي تمت في ملعب السلام . .

و لازم نتعرف سريعا علي مين هو "تركي" , وايه اللي عمله في مصر ليصل لحالة من الغضب الشديد من التراس اهلاوي , واللي نادرا ما بيوجه سهامه لشخص غير مصري . .

 

"تركي آل الشيخ" هو رئيس الهيئة العامة للرياضة السعودية , يعني زي "هاني ابو ريدة والخطيب ومجدي عبد الغني و مرتضي منصور" لما تضربهم في بعض في الخلاط , يعني من الاخر اللي ماسك اغلب خيوط كرة القدم في السعودية . .

 

"تركي" شاب صغير , مواليد التمانينات , ومن اسمه واضح انه من آل الشيخ , يعني من نسل الشيخ "محمد عبد الوهاب" اللي علي طول بيتم نسب "الوهابية" ليه , واللي غالبا بيكون ليهم المناصب المتعلقة بوزارة العدل السعودية , و دار الإفتاء وإدارة الحرمين الشريفين . .

 

---------------------------------------------------------------------------

 

تركي قرر بداية الاستثمار الرياضي في مصر , وديه الخطوة اللي فجرت تساؤلات محيرة عند الجماهير . .

 

و أصلا الاستثمار الأجنبي في الرياضة المصرية شئ مش جديد , بل ان في يناير 2017 , وزارة الرياضة عملت ما يسمي "ملتقي الاستثمار الرياضي" , واللي دعو فيه المؤسسات و الافراد و المستثمرين الاجانب للاستثمار في الرياضة المصرية , بغرض سد العجز المهول في العملة الصعبة و دفع الاقتصاد الراكد . .

 

و في فبراير 2018 , اطلق بنك مصر اول صندوق استثماري خيري , لدعم الرياضة المصرية , وكان التطبيل علي حس محمد صلاح , شحاتة بس شيك يعني . .

 

وفي اغسطس اللي فات وزير الشباب و الرياضة "أشرف صبحي" حثّ اصحاب رؤوس الاموال عشان يستثمرو في الرياضة , حد ييجي يشتري مننا يا جماعة لاحسن الكشك حاله واقف . .

 

و طبعا بيحاولو يقلدو نوادي اوروبا اللي كتير منها مملوك او مشارك مع مستثرمين اجانب , وحتي منهم مصريين , متنساش ان ناصف سويرس يتملك فوق الـ 50 % من نادي (استون فيلا ) الانجليزي . .

 

وهوب , فجأة الفيس بوك في يونيو اللي فات , ضج بخبر ان تركي آل الشيخ اشتري نادي الاسيوطي سبورت مقابل حوالي 110 مليون جنيه مصري , وهيتم تغيير اسمه لنادي الاهرام (بيراميدز) , وان هيتم أنطلاق قناة رياضية علي اعلي مستوي بنفس الاسم في اغسطس 2018 . .

 

البعض تعامل مع الإعلان علي إنه شئ عادي , وبدأ يكمل اللي كان فيه ايده . .

إلا أن غالبية الجماهير تعاملت مع الإعلان بمنظور أعمق , وصورة أكثر قتامة . .

 

لأنهم ببساطة مقدروش يفسرو رغبة "تركي" في الاستثمار في مصر , الا بمنظور اوسع من الصورة المحدودة الحالية , خاصة ان حبر عقد بيع الجزيرتين , لم يجف بعد , و معتقلي جمعة الأرض , لم يخرجو جميعا بعد , و الجرح الذي أصاب الجسد المصري بسببها , لم يندمل حتي الآن . .

و تركي مش مجرد مستثمر سعودي , لكن هو شديد القرب من الأسرة المالكة , وأحد محركي الأحداث فيها , وصديق مقرب من "بن سلمان" , ابن امبارح اللي قعد علي العرش . .

 

فخطوة شراء الاسيوطي , لم تـُفهم بمنظور اقتصادي او رياضي , ولكن بمنظور سياسي بحت , و بصورة لن تخلو من التحكم الكامل , و هو ما يتوازي مع الانبطاح الكامل لبلحة , امام شوال الرز السعودي . . .

 

و إن كانت جماهير الكرة عموما , و جماهير الأهلي خصوصا ً ممكن تطنش , او تتناسي ,او "تعدي" , او "تتعود" علي الانتهاكات السياسية و السيادية السعودية في حق مصر , فهي مش هتقدر تسكت في الرياضة . .

مش لأن الرياضة عند الجماهير أغلي من الوطن , لكن لسببين مهمين مينفعش نتجاهلهم . .

 

أولا إننا أغلب الشباب خلاص فقدوا الأمل في منع الانبطاح السياسي المستمر للقاهرة , و "السهوكة" و "المياصة" الغير معقولة اللي شايفينها من هذا السفيه اللي في قصر الاتحادية , خلاص اغلب الشباب فقدوا الامل في تغييرها , و بقينا نتفرج عليه وهو عامل "سوسن" قدام اصغر رئيس لاصغر دولة, ومش عامل دكر الا علي الشعب . .

 

السبب التاني ان الشباب بيتعامل مع الرياضة علي إنها "مسؤوليته" , او "بتاعته" , وان هو اللي لازم يدافع عنها , بنفسه , خاصة انها المتنفس الوحيد المتبقي ليهم , متبقاش الا المخدرات بعدها فورا لو ديه كمان راحت , يعني لا فيه تعليم ولا صحة ولا وظائف ولا فن ولا اعلام ولا ادب ولا سياسة ولا اي ابن لذين , خلاص طب خليلنا الكورة نفرح بيها شوية . .

 

السببين دول اللي جعل شباب النوادي المصرية تتحد – ونادرا ما تفعل – ضد محاولات "انتهاك" الحصن الأخير المتبقي ليهم , وهي الدوري المصري . .

 

و هذا التحدي له ما يبرره , من خوف الجماهير من استخدام سلاح الرز , لإفساد المتنفس الوحيد ليهم , ما هو زي ما سلمان "طال عمره" انتهك عرض السيادة المصرية و اخد الجزيرتين بشوال رز , ايه اللي يمنع ان تركي "طال عمره" يكرر نفس الموضوع في شئ اقل اهمية , بشوال اصغر من الرز , وكل حاجة و ليها تمنها . .

 

و لسة الجماهير المصرية مش قادرة تنسي صدمة الهزيمة المذلة اللي تلقاها المنتخب في ثلاثية كاس العالم , وكان اشدها قسوة الهزيمة السعودية 2 – 1 , مش عشان النتيجة اسوء , لكن عشان هي نفسها السعودية اللي اذلت ناصيتنا في التراب المصري المسروق مننا . .

ده اللي جعل استقبال الجماهير لخبر دخول "تركي" عالم الرياضة المصري , استقبال حاد و عدائي . .

 

---------------------------------------------------------------------------

 

و بالفعل بدأ خلال الاسابيع الاولي في صيف 2018 , يتحقق مخاوف الجميع . .

 

بدأت سريعا الاخبار تتناثر عن إن الرز السعودي المرادي داخل بكل تقله , وان هيتم شراء اللاعب السوري "عمر خربين" اللي بيسموه ماكينة الأهداف من الهلال السعودي . .

و اشتعل الكلام اكتر لما زاد الكلام عن أنهم هيشترو اللاعب السويدي "زلاتان ابراهيموفيتش" الموجود حالا في فريق "إل أي جالاكسي" الأمريكي , لكن طلعت بعدها انها اشاعة . .

 

وتعاقدو في يوليو اللي فات مع المدرب البرازيلي "فالانتيم" لكن بعدها علي طول تم تغيره للمدرب الارجنتيني "لافولبي"

وقدرو بالفعل يشترو 3 لاعبين برازيليين , "ادواردو" اللي كان في نادي جوياس البرازيلي , "مارينيو" اللي كان في الشارقة الإماراتي , و "كينو" اللي كان في بالميراس البرازيلي

 

وحتي المختصصين في كرة القدم كانو مندهشين , لان قوة الفريق لا تعتمد علي "رص" مجموعة من المحترفين اللي هتشتريهم بالفلوس , والا كانت فكرة "منتخب العالم" نجحت , لازم يكون فيه تجانس و تفاهم , ومدرب محترف , والأهم جو من التعامل الصحي و السليم في ادارة الفريق . .

 

و بدأت الرعب من ان "انتهاك" الرياضة المصرية هي خطوات يتم تحقيقها بالفعل , مش مجرد مخاوف او وساوس قد تتم و قد لا تتم . .

 

مين النادي اللي هيقدر يتحدي لاعبين عالميين , تم شرائهم بفلوس لن تنتهي , طب ايه اللي هيحصل لما "بيراميدز" ابن امبارح ياخد الدوري او الكاس , شعورنا هيكون عامل ازاي , محدش قادر يتخيل ان بيراميدز ده مصري , هو فريق سعودي في ذهن الجميع . .

 

و اللي يضايق فعلا ان محدش مصدق ان نية تركي "طال عمره" هي الاستثمار في الرياضة المصرية او دعمها , ولا حتي حد مصدق ان غرضه التربح منه , مفيش حد قادر يقتنع الا ان تركي جاي يخرب علي المصريين الملاذ الأخير ليهم , والمصدر المتبقي الوحيد لمتعتهم و انتصارهم , وان ده طبعا انتقاما من محاولة تحدي المنتخب السعودي في كأس العالم , مع ان احنا اللي تلقينا الهزيمة القاسية . .

 

فكون ان الجماهير متأكدة ان نية "تركي" هي التخريب و ليس التربح او الاستثمار , ده اللي جعل النفوس مشحونة , و الحناجر متأهبة للذود عن الحصن الأخير . .

 

---------------------------------------------------------------------------

 

وبالطبع كبار مسؤولي الرياضة في مصر , لم يتوقفو عن الانبطاح للكفيل السعودي , واللي يأتي استكمالا لانبطاح بلحة امام سلمان وابنه , فجائت كل ردود أفعال "ابو ريدة" رئيس الاتحاد المصري , و "الخطيب" رئيس النادي الاهلي , و"مرتضي منصور" رئيس الزمالك , جائت كلها مرحبة و مهللة و مكبرة , وكانو نفسهم يوطو علي إيده "كال عمره" عشان يبوسوها . .

 

و لأن الجماهير متعودة علي هذا النوع من "التطبيل" فلم يصابو باندهاش كتير , لما الخطيب أعلن إنه منح تركي , منصب الرئاسة الشرفية لنادي الأهلي في ديسمبر 2017, يللا بقي يا تركي "طال عمره" شوفلنا معاك اي فكة , اسلوب شديد الوضاعة في الشحاتة و التذلل . .

 

هوب مرتضي مسكتش , هو الخطيب هيطبل اعلي من تطبيلي ولا ايه , فاعلن في مارس 2018 ان هو كمان منح تركي منصب الرئاسة الشرفية للزمالك , بس مرتضي كان صريح و بجح وقالها وش كدة , مقابل انك تبني لنا استاد علي حسابك , يللا بقي "طال عمرك" شخلل جيبك . .

 

و ظل الأمر في حالة من التربص و القلق , لغاية يوم 17 سبتمبر . .

ايه اللي حصل في 17 سبتمبر ؟ ؟

 

اللي حصل ان نادي بيرامدز , كان بيلعب مع نادي المقاولين العرب , وفجأة فاز نادي بيراميدز علي المقاولين , بقدم اللاعب البرازيلي المحترف (ماركوس دا سيلفا) , المعروف باسم كينو , و بسبب خطأ فريق التحكيم في المباراة . .

 

ديه القشة اللي قطمت ضهر الجميع . .

 

حتي ان "علاء نبيل" مدرب المقاولين , مستحملش اللي بيحصل , و قال ان ده دوري "مرجان أحمد مرجان" نسبة لفيلم عادل امام و اللي عمله فيه , و الحقيقة ان ده المعني اللي كان بيجيش في صدور الآلاف في مصر . .

 

تركي فورا بعت علي تويتر وباللهجة المصرية , ان "اذا كان مدرب المقاولون العرب غلط عليا ... في جهات في مصر مترضاش الغلط ولها القدره على تربيته !"

 

وبالفعل الاتحاد المصري مسكتش , وقاله ازاي يا بني آدم تشتم الراجل اللي كلنا واقفين بالدور عشان نبوس ايده, امال هننبطح لمين دلوقتي , و عملو علي علاء غرامة 20 الف , وايقاف مباراتين . .

 

---------------------------------------------------------------------------

 

وهنا تأكد للجميع ان الدوري المصري ذاهب إلي الجحيم , و ان مرجان احمد مرجان لابس جلبية و عقال و شماغ , واول حرف من اسمه "تركي" , وإن اللي حصل لو اتسكت عليه , فالمأساة هتستمر للأبد . .

 

وبالتالي كان لازم الجماهير تعبر بالطريقة الوحيدة اللي تقدر عليها حاليا , الهتافات . .

 

وبالفعل , اختار التراس اهلاوي , اول مباراة للنادي بتاعه , واللي كانت يوم السبت 22 , يعني بعد 5 ايام بس من مشكلة المقاولين , ولعلعت هتافات الجماهير في قلب الماتش , بسب أم "تركي آل الشيخ" , مسبوقة بالكلمة الساخرة "طال عمره" , واللي دايما بتتقال علي الساسة السعوديين . .

 

ولان الماتش كان علي الهوا , وانتشرت الهتافات فورا , والمرادي الإساءة مش من شخص تقدر تحاسبه , لكنها من تراكمات عشرات الالاف من الأصوات الغاضبة , اللي لسة مش قادرة تنسي مرارة بيع الجزر لـ "طال عمره" سلمان, ومرارة العبث بالمتعة الوحيدة المتبقية في مصر , ومحاولات تخريبه باسلوب مرجان . .

 

وهنا أعلن تركي انسحابه الكامل من الاستثمار في الرياضة في مصر , من غير ما يتضح مدي جدية التصريحات ديه , او مصير النادي او القناة . .

 

---------------------------------------------------------------------------

 

ولازم قبل ما أنهي الكلام , اتكلم عن تلات نقاط . .

 

أولا أن الحق لا يجزء , وأن طول اللسان هو شئ غير مقبول علي الإطلاق , و هو يصل لدرجة الجريمة لما يمس الأمهات او الأعراض . .

 

لا يوجد اي مبرر مهما كان لقذف سيدة انت متعرفش عنها حاجة , واكيد مترضاش نفس الكلام يتقال علي امك , الحديث واضح و مفيهوش هزار ( إن من أكبر الكبائر أن يلعن الرجل والديه قيل يا رسول الله وكيف يلعن الرجل والديه قال يسب الرجل أبا الرجل فيسب أباه ويسب أمه ) , وهو في صحيح البخاري . .

 

فالاشتراك في هذا الأمر هو جريمة و ذنب عظيم , و يحتاج إلي توبة فورية . .

 

النقطة التانية هي الهلع الرسمي مما حدث . .

وهو بالفعل اللي حصل , تركي قرر الانسحاب فورا , وكل الاصوات المصرية اللي كانت بتطبله اعلنت انزعاجها من اللي حصل , ولو يطولو يحبسو كل اللي حضرو الماتش عقابا لهم . .

 

الهتافات اللي أذلت ناصية تركي , جاءت بعد صبر و تحمل من شعب مقهور , حاول يطول باله في حاجات كتير , لكن خلاص صبره نفد , و جاء موقفه , شبيه بموقف جمعة الغضب , لما اتحدت القلوب و العقول لزلزلة اركان الطاغية . .

 

النقطة التالتة موجهة للناس اللي مش مهتمة بالكورة (وانا منهم) . .

 

اياك إنك تتجاهل مشاعر شخص مؤيد لكرة القدم في موقف زي ده , غضبه من تركي و الخطيب و مرتضي و ابو ريدة , يشابه بالظبط غضبك من السيسي و سلمان و بن زايد , هو مش متضايق لأن فريقه اتهزم , لكن لان كرامة بلدة اتمسحت بيها الأرض علي يد سفيه معاه رز , وبموافقة سفيه تاني اتعود علي الانبطاح , وطنية اي عضو في الالتراس لا تقل عن وطنيتك في شئ , لكن لكل منها شكل مختلف . .

​