العنوان : بين إيران و أمريكا

القسم :#السياسي

الرقم: 23

السؤال :

 

عايز اقول انه بيتضحك علينا في حوار امريكا و ايران  كل شوية يطلع تصريح من ترامب و قبله من اوباما علي موضوع التجارب النووية الايرانية عشان نحس انهم مقطعين في بعض

 

لكن الحقيقة ان كل ديه تمثيليات وامريكا عارفة ان مصلحتها في الشرق الاوسط بترعاها طهران كمان اسرائيل فاهمة كدة

 

بس عايز اقول كدة عشان الناس اللي بتحسب ان بجد ايران و امريكا اعداء . الناس مش فاهمة ان يهمهم اكتر تطويق الشرق الاوسط  . و ان يخلو الخليج في حرجهم .  لكن امريكا عارفة ان ايران مفيش خطر حقيقي منها

 

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

 

شوف يا سيدي . .

 

كلامك فيه بعض الصحة , وبعض الخطأ , بعض الدقة , وبعض التسرع . .

 

كتير من المهتمين بالعمل السياسي , بيجانبهم الصواب أحيانا في تقييم المسرح السياسي العالمي  , خاصة لو كان عندهم بعض الوازع الديني أو القومي . .

 

 و بيكون السبب غالبا  ,انه بيترجم اي عمل سياسي , او عسكري ,  او اقتصادي عالمي , علي إنه خطوة من خطوات محاولة القضاء علي وطنه , او دينه , او فكره  , او معتقداته . .

 

فرغما عنه , لا يكاد يتصور اي خطوة سياسية او عسكرية , تخرج عن فلك "القضاء علي دينه او وطنه"

 

و خلينا نقول إن ديه أحد مراحل الإصابة بـ "عقدة المؤامرة" المشهورة , وكتير مننا عندهم نسب متفاوتة منه  . .

 

و بيكون الوازع الاساسي عنده , هو التخوف الكبير من انه يتم خداعه او يتضحك عليه , أن إنه شايف إن اللعبة اكبر بكتير من اللي الناس شايفينها , وإن هو من القلة اللي فاهم الحقيقة , مش زي باقي المساكين  .  .

 

وده اللي بيتم ترجمته فورا , لرفض أي وجود عداء أو خلاف بين قوتين تعاديان وطنه او دينه , فهو يري أن جميع قوي العالم تتحد لهدف واحد , هو القضاء علي ما يؤمن به . .

 

وكذلك يؤكد علي أن خلاف بينهم هو وهمي , وفقط لخداعنا و عشان نحس ان اجنداتهم مش متوافقة . .

 

و إن كان هذا التقييم فيه جزء من الصحة , لكن لا شك مبالغ فيه . .

 

و الدليل واضح في السيرة النبوية . .

 

--------------------------------------------------------------------------------

 

في القرن السابع الميلادي , وقبل هجرة الرسول صلي الله عليه و سلم , اجتاح القائد الفارسي مدينة القدس الواقعة تحت سيطرة الروم وقتها , وحرق الكنائس و دمر الصلبان , وقتل عدد كبير من أهل المدينة , ليعلن انتصاره في حرب طويلة . .

 

وقتها حزن المسلمون , ونزلت سورة الروم لتؤكد تعاطف المسلمين مع جيرانهم الكتابيين . .

 

بعدها بسنوات قليلة , تمكن هرقل ملك الروم من تحقيق انتصار حاسم علي مملكة الفرس , أشهرهم معركة نينوي , اللي وجودة حاليا في العراق . .

 

هذا الصراع العالمين بين اقوي دولتين في العالم , محدش من الصحابة الكرام فسره علي انه صراع وهمي بينهم , أو إن هدف القوي العالمية وقتها القضاء علي قوة الإسلام اللي كانت بتنمو بقوة . .

 

حتي بعدها بقرون , لما كان الأمويين في اسبانيا , و من بعدهم العثمانيين في شرق أوروبا , فهمو سريعا إن البلاد الأوروبية ليسو علي قلب رجل واحد , وإن الجرمانيين يختلفون عن الانجلو ساسكون , و عن الفايكينج , وعن القشتاليين , وإن لكل عرق فيهم اجندته الخاصة اللي بييحارب عشانها , ممكن يتفقو و ممكن يتصارعو . .

 

بل إن التاريخ الأندلسي كان بيشهد توافق عدد من الأمراء الأوروبيين مع الحاكم الاندلسي  , لضرب أمراء أوروبيين آخرين . .

 

الحملات الصليبية اللي دامت لـ 200 سنة , مكانتش علي قلب رجل واحد , أمراء و ملوك مشتتين , اتفقو علي اجتياح الشرق الأوسط , واختلفو في مئات التفاصيل , وحصل نوع من الاقتتال الداخلي بينهم , او التضيحة بجيش معين لعدم رغبة جيش آخر لنصرته و هكذا

 

اقرأ عن حرب المائة عام , اللي كانت في القرن الـ 13 و الـ 14 , وعصفت بخمس ممالك اوروبية . .

 

اقرأ عن الحرب العالمية الأولي , و مدي الصراع العرقي و الوطني بين السلاف , والالمان , والفرنسيين و الإنجليز والروس , واللي ادي لمذبحة بشرية هائلة , وعلي الجانب الاخر من المحيط , امريكا بتتفرج علي حلفائها الانجليز و الفرنسيين و متدخلتش الا لما قرب الصراع ينتهي لحصد الجوائز

 

و بعدها بعشرين سنة , الحرب العالمية التانية , اللي هتلر رفع فيها راية الإبادة البشرية للجميع , خد بالك هو محرقش اليهود و بس , كمان السود والمعوقين و الشواذ كانو وقود افرانه , ولو كان روميل فاز في العلمين و دخل القاهرة كنا هنشوف الالمان علي حقيقتهم . .

 

طبعا اليهود ظايطين في حوار المذابح و ضاربين ارقام القتلي في 10 , بس فعلا كان فيه افران غاز ومحارق ليهم زيهم زي غيرهم .

 

العالم كان ولا يزال فرن ملتهب , بتغلي فيه العصبية و العنصرية و الوحشية , ولن يتوقف الصراع إلي يوم الدين , وكل المعارك اللي انا قلتها ديه , مكانتش بلادنا العربية او ديننا الإسلامي طرف فعال فيها . .

 

----------------------------------------------------------------------------

 

ليه بقول ده كله ؟ ؟

 

عشان أؤكدلك إنك لازم توازن بين حاجتين بالغي الأهمية . .

 

أولا إن بالفعل , توجد خطط صارمة و قاسية للقضاء علي اي تفوق عربي او إسلامي عالمي , ده كلام واضح ولا ينكره إلا أعمي , و جميع الحروب و الأحداث من نشأة الكيان الصهيوني إلي الان تؤكد ده  .

 

و هذه الخطط مترجمة في حروب عسكرية , صراع اقتصادي , حصار سياسي , طمس ثقافي , حكام خونة , احتضان عالمي لكوادر العرب و المسلمين للتربية في بلادهم و هكذا . .

 

و من ناحية فكل دولة من دول العالم لديها اجندتها الخاصة , وخططها المستقلة , وبعض الدول تضع أمر "القضاء علي التفوق العربي و الإسلامي" من اولوياتها , وبعضها لا يكاد يفكر فيه . .

 

و بالتالي الصورة اللي بنشوفها , هي مزيج من تقاطعات و اشتباكات هذه المصالح المشتركة و المتعارضة علي حد سواء . .

 

يعني أكيد بيكين يهمها القضاء علي أي تفوق إسلامي , وده لتسهيل التحكم في ملايين مسلمي الإيجور , و للتأكد من هدوء جيرانها في افغانستان و بورما و بنجلاديش

 

لكن برضه بيكين عندها أولويات لا نقاش فيها في استمرار الحرب الاقتصادية المستمرة علي أمريكا , و الإيقاع بها في كافة المحافل التجارية . .

 

كمان موسكو عندها أولوية في اقتلاع أي تفوق سياسي إسلامي , لعدم تهييج الجمهوريات الإسلامية جنوب روسيا , و لدعم مصالحها في سوريا . .

 

لكن في نفس الوقت عندها أجندة متعلقة بمصالحها في شرق أوروبا و سيطرتها علي اوكرانيا   و اقليم القرم , وعلاقتها المتشابكة مع انقرة , الجار الأهم في البحر الأسود .

 

طهران لا تغفل عن القضاء علي اي مشروع لمسلمي السنة , خوفا من انتفاضة مسلمي اقليم الأهواز الغني في ايران . .

 

لكن أيضا لديها خلافات حادة مع واشنطن , من أيام مصدق في الخمسينات , واختتمت باقتحام السفارة الأمريكية في طهران مع اشتعال الثورة الإسلامية 1979

 

فيه عداء حقيقي و جدي بين طهران وواشنطن , الايرانيين مش قادرين ينسو ازاي كان اسرة "كاجار" و من بعدها اسرة "بهلوي" تتحكم بالكامل بمقدرات الشعب الإيراني لصالح واشنطن , و ازاي تم خلع رئيس الوزراء مصدق سنة 1953 عشان حاول يأمم صناعة البترول الإيراني في عملية "أجاكس" . .

 

 

و واشنطن مش قادرة تصدق ان فيه قوة خرجت عن طوعها و في طريقها لتملك النووي , واللي عندهم صواريخ باليستية توصلها لتل ابيب بسهولة  . .

 

اكيد ايران مش هتضرب تل ابيب بالنووي , بس التهديد لوحده كفيل بإلقاء الذعر في قلب الصهاينة  .

 

فيه عداء حقيقي و طويل بين طهران وواشنطن , حتي لو بدا غير ذلك . .

 

العالم لا يمشي علي ايقاع واحد , هو القضاء علي ما تنتمي له , لكنه يضعه كواحد من أهدافه , وقد تتلاقي هذه الأهداف مع دول أخري , وقد تختلف  .

 

و هنا هتلاقي تفاصيل اكتر عن إيران من الداخل في رسالة  : المشهد الإيراني